1-3. (a) Kisann-la nouvo konpagnon servis Pol, ek ki nou kone lor li? (b) Ki nou pou aprann dan sa sapit-la?

 AMEZIR ki zot pe pas dan enn lavil apre lot ek ki zot pe mars lor bann sime later, Pol pe get sa zenom ki pe mars akote li la. Sa zenom-la apel Timote. Timote enn zenes ki ena anviron 20 an, ek li ena foul lenerzi. Sak pa ki Timote pe fer dan sa nouvo vwayaz-la, pe elwagn li inpe plis ar so lakaz. Amezir ki soley pe al dormi, rezion List ek Ikoniom pe disparet tigit-tigit deryer zot. Ki pe atann zot dan bann zour ki pe vini? Pol ena enn ti lide kouma sa pou pase, parski se so deziem vwayaz misioner. Li kone ki zot pou gagn boukou difikilte ek ki zot pou bizin fer fas ar boukou danze. Kitfwa Pol pe demann limem, kouma sa zenom ki pe akonpagn li la pou reazir?

² Pol ena konfians dan Timote, ek kitfwa Timote pena sa kantite konfians-la dan limem. Bann levennman ki fek pase, finn plis konvink Pol ankor ki li bien inportan ki li gagn dimounn ki bizin pou akonpagn li dan sa vwayaz-la. Pol kone ki zot pou bizin fer boukou zefor ek travay ansam dan linite, pou vizit bann lasanble ek pou fortifie zot. Kifer Pol pans koumsa? Kitfwa li pe mazinn diskision ki li ti gagne inpe avan ar Barnabas.

³ Dan sa sapit-la, nou pou aprann kouma nou kapav regle bann dezakor. Nou pou aprann osi kifer Pol inn swazir Timote pou akonpagn li dan so vwayaz, ek nou pou aprann plis lor travay inportan ki bann responsab sirkonskripsion fer azordi.

4. Ki bann lobzektif Pol ena pou so deziem vwayaz misioner?

⁴ Dan sapit avan, nou ti aprann kouma Pol, Barnabas, Zida, ek Silas ti ankouraz lasanble Antios. Zot ti fer sa, kan zot ti fer bann-la konn desizion ki komite santral inn pran lor sirkonsizion. Apre sa, ki Pol pe pans pou fer? Li propoz Barnabas pou fer enn nouvo vwayaz: “Aster-la anou retourn vizit bann frer dan tou bann lavil kot nou’nn  anons parol Zeova, pou gagn zot nouvel.” (Zist. 15:36) Kan Pol dir sa Barnabas, li pa pe zis propoz li pou al rann enn ti vizit bann Kretien ki fek konverti. Liv Zistwar Bann Zapot ed nou pou konpran ki lobzektif Pol ena pou so deziem vwayaz misioner. Premierman, Pol pou kontign fer bann lasanble konn desizion ki komite santral inn pran. (Zist. 16:4) Deziemman, antan-ki responsab sirkonskripsion, Pol determine pou ankouraz bann frer ek ser dan bann lasanble ek pou ed zot fer zot lafwa vinn pli for. (Rom. 1:11, 12) Kouma lorganizasion Zeova azordi pe imit lexanp bann zapot?

5. Azordi, kouma Komite Santral ankouraz bann lasanble ek donn zot bann instriksion?

⁵ Azordi, Lekris servi Komite Santral bann Temwin Zeova pou diriz so lasanble. Komite Santral servi bann let, bann piblikasion inprime ek elektronik, bann renion, ek bann lezot kitsoz ankor pou ankouraz ek pou donn bann instriksion bann frer ek ser dan tou bann lasanble dan lemond. Komite Santral anvi osi gard enn bon kominikasion avek sak lasanble, akoz sa li avoy bann responsab sirkonskripsion pou vizit bann lasanble. Pou fer sa, li’nn swazir bann milye ansien partou dan lemond pou servi kouma responsab sirkonskripsion.

6, 7. Ki sertin responsabilite bann responsab sirkonskripsion ena?

⁶ Azordi, bann responsab sirkonskripsion fer zefor pou interes zot ar tou bann frer ek ser dan bann lasanble ek pou fortifie zot lafwa. Kouma zot fer sa? Zot imit lexanp bann responsab sirkonskripsion dan premie siek, kouma par exanp Pol. Pol limem ti dir enn lot responsab sirkonskripsion: “Pres laparol; kontign fer sa san tarde dan lepok favorab ek dan lepok difisil; korize, donn bann lavertisman ferm, ankouraze, fer tousala avek boukou pasians ek kapasite pou ansegne. . . . Fer travay enn predikater.”​—2 Tim. 4:2, 5.

⁷ Parey kouma sa bann verse-la montre nou, bann responsab sirkonskripsion ek zot madam, si zot marye, akonpagn bann proklamater dan diferan form predikasion. Sa bann responsab sirkonskripsion-la bann bon ansegnan ek zot bien devwe dan predikasion, alor zot lexanp motiv bann frer ek ser dan lasanble. (Rom. 12:11; 2 Tim. 2:15) Bann responsab sirkonskripsion ena boukou lamour ek enn gran lespri sakrifis. Zot kontan pou donn zot letan ek zot lenerzi, mem si zot bizin vwayaze kan letan pa bon ek pas dan bann plas ki danzere. (Fil. 2:3, 4) Gras-a bann diskour ki baze lor Labib, zot osi ankouraz, ansegn, ek averti sak lasanble. Tou bann frer ek ser dan lasanble pou gagn bann bienfe kan zot reflesi lor bon lexanp sa bann responsab sirkonskripsion-la, ek imit zot lafwa.​—Ebre 13:7.

8. Ki Barnabas panse lor Pol so linvitasion?

⁸ Barnabas aksepte pou akonpagn Pol pou al “vizit bann frer.” (Zist. 15:36) Sa de frer-la ti deza travay ansam, ek tou ti pas bien ant zot. Anplis, zot deza konn bann frer ek ser ki zot pou al vizite dan sa bann lasanble-la. (Zist. 13:2–14:28) Alor, sa paret enn bon lide pou travay ansam ankor enn fwa. Me enn problem leve! Zistwar Bann Zapot 15:37 dir ki ‘Barnabas bien deside pou amenn Zan, ki apel osi Mark.’ Ofet isi, Barnabas pa pe demann Pol ki li panse, li “bien deside” pou amenn so kouzin, Mark, ansam avek zot pou sa vwayaz-la.

9. Kifer Pol pa dakor ar Barnabas?

⁹ Pol pa dakor. Kifer? Labib dir: ‘Selman, Pol pa dakor pou amenn Mark avek zot, parski li ti kit zot dan Panfili ek li pa’nn al avek zot pou akonpli so travay.’ (Zist. 15:38) Mark ti akonpagn Pol ek Barnabas pandan zot premie vwayaz misioner, me selman, li pa ti res avek zot ziska lafin sa vwayaz-la. (Zist. 12:25; 13:13) Inpe apre ki zot ti koumans sa vwayaz-la, alor ki zot ti ankor dan Panfili, Mark ti kit so lafektasion ek ti retourn kot li dan Zerizalem. Labib pa dir kifer li ti ale, me li kler ki pou Pol, Mark enn dimounn ki pa serye. Ek kitfwa li pe demann limem, si Mark se enn dimounn ki li kapav fer konfians.

10. Ki arive ant Pol ek Barnabas? Ki konsekans sa ena?

¹⁰ Kanmem sa, Barnabas persiste pou amenn Mark ansam avek li. Me Pol li osi pe persiste. Zistwar Bann Zapot 15:39 dir: ‘Alor, enn bel diskision eklate ant zot, ek sakenn al so kote.’ Barnabas pran Mark ansam avek li, ek retourn kot li lor lil Sip. Parkont Pol li, kontign so vwayaz misioner. Labib dir: ‘Pol swazir Silas ek zot ale, apre ki bann frer priye pou ki Zeova montre Pol so bonte extraordiner.’ (Zist. 15:40) Apre sa, zot ‘travers Siri ek Silisi, ek fortifie bann lasanble.’​—Zist. 15:41.

11. Ki bann kalite pou ed nou pou res kamarad avek enn kikenn avek ki nou’nn gagn enn diskision?

¹¹ Seki’nn arive rapel nou, ki nou osi nou inparfe. Dan ka Pol ek Barnabas, se komite santral ki ti swazir Pol ek Barnabas pou reprezant zot. Ek kitfwa apre, Pol ti form parti dan sa komite-la. Me malgre tousala, mem si zot ti bann bon frer, sa zour-la zot toule-de ti sap lor kal. Me eski zot ti les sa problem-la detrir zot lamitie? Mem si zot ti inparfe, Pol ek Barnabas ti bann zom ki ena limilite, ek ki ti fer zefor pou imit Zezi. Avek letan, zot ti pardonn zot kamarad ek zot ti revinn kamarad. (Efe. 4:1-3) Anplis inpe letan apre, Pol ek Mark ti re-travay ansam. a​—Kol. 4:10.

12. Parey kouma Pol ek Barnabas, ki bann kalite bann ansien ek bann responsab sirkonskripsion bizin montre?

 ¹² Se vre ki dan sa sitiasion-la Barnabas ek Pol ti sap lor kal, me pa ti konn zot kouma bann dimounn ki ankoler vit. Barnabas ti telman bon ek zenere, ki bann frer ek ser pa ti apel li par so nom Zozef, me ti apel li Barnabas, ki vedir “Garson Konsolasion.” (Zist. 4:36) Bann dimounn ti konn Pol osi kouma enn dimounn ki zanti, ek ki pran swin lezot. (1 Tes. 2:7, 8) Azordi, bann ansien ek bann responsab sirkonskripsion bizin imit Pol ek Barnabas. Zot bizin ena limilite, ek montre lamour ek zantiyes anver bann frer ek ser dan lasanble, me osi anver bann lezot ansien.​—1 Pier 5:2, 3.

13, 14. (a) Kisann-la Timote, ek kouma Pol zwenn li? (b) Kifer Pol remark Timote? (c) Ki lafektasion Timote gagne?

¹³ Pandan so deziem vwayaz misioner, Pol al vizit bann lasanble dan Galasi, enn provins romin. Li “ariv Derbe ek apre sa List.” Labib dir: ‘Laba ena enn disip ki apel Timote. So mama enn Zwif ki krwayan ek so papa enn Grek.’​—Zist. 16:1. b

¹⁴ Kitfwa Pol ti zwenn Timote ek so fami kan li ti vizit sa landrwa-la pou premie fwa ver lane 47 N.L. Aster-la, pandan so deziem vizit, setadir de ouswa trwa-z-an apre, Pol inpresione par Timote, ki enn zenom. Kifer? Parski bann frer “koz an bien lor Timote.” Timote pena zis enn bon repitasion dan so lasanble, me osi dan bann lasanble ki toutotour. Labib dir ki mem bann frer dan List ek Ikoniom, ki trouv anviron 30 kilomet ar so lasanble, koz an bien lor li. (Zist. 16:2) Lespri sin gid bann ansien pou donn Timote enn gran responsabilite: Akonpagn Pol ek Silas dan zot vwayaz misioner.​—Zist. 16:3.

15, 16. Kifer Timote ena enn bon repitasion?

¹⁵ Ki ed Timote pou ena enn bon repitasion, mem si li zenn? Eski se parski li intelizan, li enn zoli garson, ouswa akoz bann kapasite ki li ena? Souvan, bann dimounn inpresione par sa bann kitsoz-la. Mem profet Samiel ti ziz enn dimounn dapre so laparans. Selman, Zeova ti dir li: “Bondie pa get parey kouma dimounn gete; enn dimounn trouv zis seki paret devan so lizie, me Zeova trouv seki ena dan leker.” (1 Sam. 16:7) Alor, se pa gras-a so bann kapasite ki Timote ena enn bon repitasion, me plito gras-a so bann zoli kalite.

¹⁶ Plizir lane apre, Pol ti koz lor bann zoli kalite ki Timote ena. Pol  ti dekrir Timote kouma enn dimounn ki ena enn bon latitid, ki ena lespri sakrifis, ek ki travay dir pou lasanble. (Fil. 2:20-22) Bann dimounn ti konn Timote osi kouma enn kikenn ki ti ena enn “lafwa ki pa ipokrit.”​—2 Tim. 1:5.

17. Azordi, kouma bann zenn kapav imit Timote?

¹⁷ Azordi, boukou zenn imit Timote kan zot fer zefor pou devlop bann zoli kalite. Kan zot fer sa, zot gagn enn bon repitasion devan Zeova ek bann frer ek ser, mem si zot ankor zenn. (Prov. 22:1; 1 Tim. 4:15) Zot montre enn lafwa ki pa ipokrit, setadir zot pa amenn doub rol. (Ps. 26:4) Gras-a sa, bann manb lasanble bien apresie zot ek zot itil pou bann-la, parey kouma Timote. Kan bann manb lasanble trouv sa bann zenn-la vinn bann proklamater, donn zot lavi Zeova, ek pran batem, sa vremem ankouraz zot!

18. (a) Kouma Pol ek Timote ti ed komite santral? (b) Ki bienfe bann lasanble gagne?

¹⁸ Pol ek Timote inn travay ansam pandan plizir lane. Antan-ki bann responsab sirkonskripsion, zot ti pe fer seki komite santral inn demann zot fer. Labib dir: “Kan zot ti pe pas dan bann lavil, zot ti fer bann frer ek ser konn bann desizion ki bann zapot ek bann ansien dan Zerizalem ti’nn pran, pou ki bann-la kapav swiv sa.” (Zist. 16:4) Lerla, bann lasanble ti obeir bann instriksion ki bann zapot ek bann ansien dan Zerizalem ti’nn done. Gras-a zot lobeisans, “bann lasanble ti kontign vinn for dan lafwa ek kantite bann krwayan ti pe ogmante zour apre zour.”​—Zist. 16:5.

19, 20. Kifer nou bizin obeir “bann ki pe diriz” nou?

¹⁹ Azordi osi parey, kan nou dispoze pou obeir “bann ki pe diriz” nou, Zeova beni bann lasanble. (Ebre 13:17) Li bien inportan ki nou kontign ekout ek aplik bann instriksion ki “esklav fidel ek saz” done, parski sa lemond-la pe kontign sanze. (Mat. 24:45; 1 Kor. 7:29-31) Kan nou fer sa, nou pou kontign ena enn lafwa for ek sa pou ed nou pou res san tas konsernan sa lemond-la.​—Zak 1:27.

²⁰ Pol, Barnabas, Mark, ek bann lezot ansien dan premie siek ki ti ena lesperans pou al dan lesiel, ti bann zom inparfe. Azordi osi, bann responsab sirkonskripsion, bann ansien, ek bann manb Komite Santral zot osi, zot inparfe. (Rom. 5:12; Zak 3:2) Me parski Komite Santral swiv Parol Bondie ek swiv lexanp bann zapot, sa montre ki nou kapav fer zot konfians. (2 Tim. 1:13, 14) Gras-a sa, bann lasanble vinn pli stab ek sa fortifie zot lafwa.