1-3. (a) Kifer bann zapot pe pas devan Sanedrin, ek ki desizion bien inportan zot bizin pran? (b) Kifer nou bien interese pou kone kouma bann zapot inn reazir?

 BANN ziz dan Sanedrin a pe bwi ar koler! Bann zapot Zezi pe pas devan Sanedrin. Kifer? Zozef Kaif, gran pret ek prezidan Sanedrin, dir zot dan enn fason bien ferm: “Nou ti bien donn zot lord pou pa kontign ansegn lor sa nom-la.” Kaif telman ankoler, ki li pa mem kapav pronons nom Zezi. Kaif kontign koze: “Zot inn ranpli Zerizalem avek zot lansegnman, ek zot bien deside pou rann nou responsab lamor sa zom-la.” (Zist. 5:28) Mesaz-la bien kler: Aret prese, sinon. . .

² Kouma bann zapot reazir? Zezi ti donn zot mision pou prese, ek li ti gagn sa lotorite-la ar Bondie. (Mat. 28:18-20) Eski bann zapot pou les laper bann zom trap zot, ek res trankil? Ouswa eski zot pou ena kouraz pou tini ferm ek kontign prese? Ofet, zot bizin pran enn desizion bien inportan: Eski zot pou obeir Bondie ouswa bann zom? San okenn ezitasion, Pier koz pou tou bann lezot zapot. Avek kouraz, li koz dan enn fason bien kler ek ferm.

³ Antan-ki bann vre Kretien, nou bien interese pou kone kouma bann zapot inn reazir kan Sanedrin ti menas zot. Parey kouma zot, nou osi nou’nn gagn mision pou prese, ek nou osi nou kapav gagn persekision. (Mat. 10:22) Nou bann adverser kapav esey anpes nou prese kouma nou abitie fer ouswa mem interdi nou travay predikasion. Lerla, ki nou pou fer? Kan nou pran letan pou gete seki’nn ed bann zapot pou ena kouraz, ek seki’nn pase kan zot ti devan Sanedrin, nou pou kapav aprann boukou ar zot lexanp.

4, 5. Kifer Kaif ek bann Sadisein “ranpli ar zalouzi”?

⁴ Pa bliye ki premie fwa ki Pier ek Zan ti gagn lord pou aret prese, zot ti reponn: “Nou pa kapav aret koz lor bann kitsoz ki nou’nn trouve  ek tande.” (Zist. 4:20) Apre ki zot ti pas devan Sanedrin, Pier ek Zan, ansam avek bann leres zapot, ti kontign prese dan tanp “kot bann Kolonn Salomon.” Laba, bann zapot ti fer bann gran mirak, kouma par exanp geri bann malad, ek expilse bann demon. Ek pa zis sa! Li paret ki bann dimounn ti mem geri ar lonbraz Pier! Boukou parmi bann dimounn ki’nn gagn zot gerizon, ti osi aksepte Parol Bondie. Ek pli ale “enn kantite zom ek fam ti krwar dan Lesegner ek ti vinn bann disip.”​—Zist. 5:12-15.

⁵ Kaif form parti sekt bann Sadisein. Ek li ek bann Sadisein “ranpli ar zalouzi,” alor zot zet bann zapot dan prizon. (Zist. 5:17, 18) Kifer bann Sadisein agase koumsa? Bann zapot pe ansegne ki Zezi inn resisite, ek bann Sadisein pa krwar dan rezireksion. Bann zapot pe dir osi ki se zis kan nou ena lafwa dan Zezi, ki nou kapav gagn lavi sov. Bann Sadisein per ki lepep aksepte Zezi kouma zot sef, ek ki zot gagn problem ar gouvernman romin akoz sa. (Zan 11:48) Alor, nou konpran kifer bann Sadisein bien determine pou fer bann zapot res trankil!

6. Azordi, akoz kisann-la bien souvan bann serviter Zeova gagn persekision, ek kifer fode pa sa etonn nou?

⁶ Azordi osi, bien souvan se akoz bann sef relizie ki bann serviter Zeova gagn persekision. Sa bann dimounn-la servi linflians ki zot ena lor bann gouvernman ek bann media pou fer nou aret prese. Eski sa bizin etonn nou? Non. Nou mesaz devwal seki bann fos relizion ete vremem. Alor, kan bann dimounn sinser aksepte bann verite ki ena dan Labib, zot libere ar bann krwayans ek bann koutim ki pa baze lor Labib. (Zan 8:32) Se akoz nou mesaz ki bann sef relizie ayir nou ek persekit nou.

7, 8. Ki lefe lord sa anz-la sirman finn ena lor bann zapot, ek ki kestion nou bizin poz noumem?

⁷ Bann zapot pe asize dan prizon, ek pe atann ki zot case pase. Sirman zot pe demann zot, si zot bann lennmi pou touy zot. (Mat. 24:9) Me pandan lanwit, enn kitsoz ki zot pa atann arive: ‘Anz Zeova ouver bann laport prizon.’ b (Zist. 5:19) Anz-la donn zot bann instriksion bien presi: “Al dan tanp, ek kontign dir bann dimounn tou bann parol konsernan sa lavi-la.” (Zist. 5:20) Nou sir ki sa komannman-la finn rasir bann zapot ki seki zot ti pe fer ti bon. Kitfwa bann parol ki sa anz-la ti dir, finn osi donn zot plis kouraz malgre persekision. Alor, “kan ti koumans fer kler zot ti rant dan tanp ek zot ti koumans ansegne” avek lafwa ek kouraz.​—Zist. 5:21.

⁸ Sakenn parmi nou bizin demann limem: ‘Si mo retrouv mwa dan mem sitiasion, eski mo pou ena lafwa ek kouraz ki bizin pou kontign  prese?’ Nou kapav gagn kouraz kan nou kone ki bann anz soutenir nou ek gid nou pou “rann temwaniaz afon konsernan Rwayom Bondie,” enn travay ki bien inportan.​—Zist. 28:23; Rev. 14:6, 7.

9-11. Kouma bann zapot reazir kan Sanedrin donn zot lord pou aret prese, ek ki lexanp zot finn kite pou bann vre Kretien?

⁹ Aster-la, Kaif ek bann lezot ziz dan Sanedrin pare pou rann zot verdikt konsernan bann zapot. San ki zot kone ki’nn arive dan prizon, zot avoy bann gard pou al rod bann prizonie. Mazinn bann gard pe al rod bann prizonie. Ek la, zot gagn sok letan zot trouve ki bann prizonie inn disparet, alor ki ‘prizon bien ferme ek bann gard pe debout kot laport.’ (Zist. 5:23) Bien vit, sef gard tanp aprann ki bann zapot inn retourn dan tanp. Bann zapot pe rann temwaniaz lor Zezi Kris, alor ki se akoz samem ki’nn avoy zot dan prizon! Vit-vit sef gard tanp ek so bann gard al dan tanp pou trap bann prizonie, ek pou amenn zot devan Sanedrin.

¹⁰ Kouma nou’nn trouve dan koumansman sa sapit-la, bann sef relizie fer bann zapot bien konpran ki zot bizin aret prese. Ki bann zapot reponn? Pier, ki koz pou bann lezot zapot, dir avek kouraz: “Nou bizin obeir Bondie kouma sef plito ki bann zom.” (Zist. 5:29) Wi, bann zapot finn kit enn zoli lexanp pou tou bann vre Kretien. Savedir ki nou pa bizin obeir bann dirizan imin, kan zot demann nou fer enn kitsoz ki Bondie kondane ouswa kan zot anpes nou fer seki Bondie demann nou fer. Alor, si azordi “bann lotorite ki diriz nou” interdi nou predikasion, nou pa pou aret pres bon nouvel, parski se enn travay ki Bondie inn donn nou. (Rom. 13:1) Okontrer, nou pou trouv bann mwayin pou kontign pres lor Rwayom Bondie, san ki bann lotorite remarke.

¹¹ Sa pa etonn nou ki repons ki bann zapot inn done, inn plis agas bann ziz ki ti deza bien ankoler. Sa bann ziz-la ti bien determine pou “touy bann zapot.” (Zist. 5:33) Li paret ki sa bann zapot bien devwe la pou pas enn martir. Me selman, zot pou gagn led dan enn fason ki zot pa atann!

12, 13. (a) Ki konsey Gamaliel ti donn bann lezot manb dan Sanedrin, ek ki bann-la ti fer? (b) Kouma Zeova kapav azir dan faver so pep azordi? Ek si Li permet ki nou “soufer akoz lazistis,” ki kitsoz nou kapav sir?

¹² Gamaliel, c “enn ansegnan Lalwa ki tou bann dimounn ti bien respekte,” koumans koze. Sirman bann lezot manb Sanedrin bien respekte li, parski li azir kouma enn leader dan sa sitiasion-la. Li mem “donn lord pou met bann zapot deor pou enn ti moman.” (Zist. 5:34) Gamaliel koumans sit bann soulevman ki’nn ena dan lepase ek ki’nn tengn bien vit apre ki bann-la zot sef inn mor. Alor, li ankouraz zot pou pez nene bwar delwil, parski bann zapot zot sef, Zezi, fek mor. Gamaliel so rezonnman bien konvinkan: “Pa fer sa bann zom-la nanye, me les zot trankil. Parski si se bann zom ki deryer sa proze-la ouswa sa travay-la, li pa pou tini dibout; me si se Bondie ki deryer sa, zot pa pou kapav anpes bann-la. Sinon, zot kapav mem trouv zot pe lager kont Bondie limem.” (Zist. 5:38, 39) Bann ziz swiv so konsey. Me kanmem sa, zot fwet bann zapot ek donn zot lord “pou aret koz dan nom Zezi.”​—Zist. 5:40.

¹³ Parey kouma dan lepase, azordi osi, Zeova kapav servi bann zom inportan, kouma Gamaliel, pou azir dan faver So pep. (Prov. 21:1) Zeova kapav servi so lespri sin pou fer bann ki etabli bann lalwa, bann dirizan, ouswa bann ziz azir dapre so volonte. (Ne. 2:4-8) Me si Li permet ki nou “soufer akoz lazistis,” nou kapav sir ki: Premierman, Bondie pou donn nou lafors ki nou bizin pou andire. Ek deziemman, nou bann adverser ‘pa pou kapav anpes’ Bondie fer so travay.​—1 Pier 3:14; Iza. 54:17; 1 Kor. 10:13.

14, 15. (a) Kouma bann zapot ti reazir kan ti fwet zot, ek kifer? (b) Rakont enn lexperyans ki montre ki pep Zeova andir bann leprev avek lazwa.

¹⁴ Eski bann zapot dekouraze ouswa perdi zot determinasion, parski’nn fwet zot? Non, pa ditou! Zot “sorti devan Sanedrin dan lazwa.” (Zist. 5:41) Kifer zot “dan lazwa”? Pa akoz bann douler ki zot gagne parski bann-la inn fwet zot. Zot dan lazwa, parski zot kone ki pe persekit zot akoz zot lintegrite pou Zeova ek parski zot pe swiv lexanp Zezi.​—Mat. 5:11, 12.

¹⁵ Parey kouma nou bann frer dan premie siek, nou osi nou andire avek lazwa, kan nou soufer akoz bon nouvel. (1 Pier 4:12-14) Se pa ki nou kontan ki bann dimounn menas nou, persekit nou, ouswa avoy nou dan prizon. Me nou ena enn gran kontantman, parski nou pe reisi gard nou lintegrite. Anou get lexanp, Henryk Dornik. Sa frer-la ti andir boukou move tretman lepok kot ti ena bann diktatir. Li rapel ki an Out 1944, bann lotorite ti desid pou avoy li ek so frer dan bann kan konsantrasion (bann kan kot bann dimounn ti  gagn bann move tretman). Sa bann lotorite-la ti dir: “Li inposib pou konvink zot pou fer enn kitsoz. Kan zot kone ki zot kapav mor akoz zot bann krwayans, sa rann zot zwaye.” Frer Dornik dir: “Mem si mo pa ti anvi soufer, mo ti dan lazwa parski mo ti res fidel anver Zeova. Mo ti fer fas ar sa bann leprev-la avek kouraz ek dignite.”​—Zak 1:2-4.

16. Kouma bann zapot ti montre ki zot determine pou rann temwaniaz afon? Ek azordi, kouma nou swiv metod ki zot ti servi pou prese?

¹⁶ Bann zapot pa ti perdi letan pou repran zot travay predikasion. San okenn laper, zot ti ‘anons bon nouvel lor Lekris toulezour dan tanp ek lakaz-lakaz.’ d (Zist. 5:42) Sa bann predikater bien devwe la ti determine pou rann temwaniaz afon. Remarke ki zot ti anons zot mesaz kot bann dimounn, parey kouma Zezi Kris ti demann zot pou fer. (Mat. 10:7, 11-14) Pena dout, ki se koumsa ki zot ti reisi ranpli Zerizalem avek zot lansegnman. Azordi, bann dimounn kone ki bann Temwin Zeova swiv sa metod predikasion la. Kan nou pase lakaz-lakaz, nou montre ki nou anvi ki sak dimounn tann bon nouvel. Eski Zeova finn beni nou travay predikasion lakaz-lakaz? Wi, Li’nn beni nou travay! Bann milyon dimounn finn aksepte bon nouvel dan lepok lafin, ek boukou parmi zot finn tann bon nouvel pou premie fwa kan enn Temwin Zeova finn tap zot laport.

17-19. Ki problem bien delika ti leve, ek ki bann zapot ti fer pou regle sa?

¹⁷ Aster-la, nouvo lasanble ki dan Zerizalem fer fas ar enn danze bien sournwa. Enn danze ki ti kapav menas lape ki ti ena ant bann frer ek ser. Ki sa danze-la sa? Boukou parmi bann disip ki ti pran batem pa viv dan Zerizalem, me zot anvi res inpe pli lontan pou aprann inpe plis. Alor, bann disip ki res Zerizalem donn kas volonterman pou ki bann-la gagn manze ek bann lezot kitsoz ki zot bizin. (Zist. 2:44-46; 4:34-37)  Lerla, enn problem bien delika leve: “Ti pe negliz” bann vev ki koz Grek “kan ti pe fer distribision manze toulezour,” alor ki pa ti negliz bann vev ki koz Ebre. (Zist. 6:1) Aparaman, bann-la ti pe get figir. Ek sa li enn problem ki bien grav, parski sa ti kapav lev enn bel lager.

¹⁸ Bann zapot, ki form parti komite santral sa lepok-la, rekonet ki li pa korek ki zot “les parol Bondie pou distribie manze.” (Zist. 6:2) Alor pou regle sa problem-la, zot demann bann disip pou rod set zom “ki ranpli ar lespri sin ek sazes.” Bann zapot pou donn sa set zom-la “sa travay inportan la” pou fer. (Zist. 6:3) Bizin bann zom kalifie, parski pou bizin servi manze, me osi zer kas, aste bann kitsoz, ek gard enn kont pou tou sa bann kitsoz-la. Tou bann zom ki zot swazir ena bann nom grek. Kifer? Kitfwa sa ti pou pli fasil pou ki sa bann vev-la fer zot konfians. Bann zapot examinn bann rekomandasion ki bann disip inn fer, zot priye, ek apre sa, zot nomm set zom ki pou fer “sa travay inportan la.” e

¹⁹ Eski savedir ki aster-la sa set zom-la ti pou nepli bizin prese, parski zot ti pe distribie manze? Non! Parmi bann zom ki ti swazir pou fer sa travay-la, ti ena Etienn, ek plitar nou pou trouve ki Etienn ti enn predikater ki ti ena boukou kouraz. (Zist. 6:8-10) Parmi ti ena Filip osi, ek dan Labib apel li “predikater.” (Zist. 21:8) Alor, sa montre nou ki sa set zom-la ti kontign pres bon nouvel afon.

20. Azordi, kouma pep Zeova swiv lexanp bann zapot kan nomm bann frer?

²⁰ Azordi, bann serviter Zeova swiv lexanp bann zapot, kan nomm bann frer pou asim bann responsabilite dan lasanble. Sa bann frer  ki’nn rekomande la bizin montre ki zot pans parey kouma Zeova ek ki zot les lespri sin azir lor zot. Nou kapav dir ki se Komite Santral ki nomm bann frer ki ranpli bann kondision ki ena dan Labib, pou servi kouma ansien ouswa serviter lasanble. f (1 Tim. 3:1-9, 12, 13) Alor, se lespri sin ki’nn etabli sa bann zom-la. Sa bann zom-la travay bien dir pou fer boukou travay inportan. Par exanp, bann ansien kapav organize pou ki bann frer ek ser aze gagn led ki zot bizin. (Zak 1:27) Sertin ansien ede dan konstriksion bann lasal renion, pou organiz bann lasanble, ek ede osi dan Komite Liezon Ospitalie. Bann serviter lasanble okip bann lezot kitsoz ki pena enn lien direk avek lansegnman ouswa travay ki enn berze fer. Bann serviter lasanble ek bann ansien bizin trouv enn lekilib ant zot responsabilite pou pres bon nouvel ek zot responsabilite dan lasanble ek lorganizasion.​—1 Kor. 9:16.

21, 22. Ki kitsoz montre ki Zeova ti pe beni sa nouvo lasanble-la?

²¹ Gras-a led Zeova, sa nouvo lasanble-la ti reisi tini malgre bann problem divizion ki ti kapav ena ek persekision. Li kler ki Zeova ti pe beni zot, parski Labib dir: “Parol Bondie ti pe kontign fane partou, ek kantite disip ti pe kontign ogmante deplizanpli dan Zerizalem; ek enn kantite pret ti koumans ena lafwa.” (Zist. 6:7) Ena ankor bann bon rezilta koumsa dan liv Zistwar Bann Zapot, ek sa montre ki Zeova ti pe beni so pep. (Zist. 9:31; 12:24; 16:5; 19:20; 28:31) Kan twa osi to tann bann zoli fe predikasion ki ena partou dan lemond, eski sa pa ankouraz twa?

²² Anou retourn dan premie siek N.L. Bann sef relizie ki bien ankoler pa ti pou kit bann disip koumsa mem. Enn gran persekision ti pre pou koumanse. Kouma nou pou trouve dan prosin sapit, bann-la ti pou viz Etienn.