1-3. Kouma Zezi kit so bann zapot, ek ki bann kestion nou pou examine?

 SA FER 40 zour aster-la, ki Zezi inn aparet plizir fwa ar so bann disip. Pandan sa bann zour-la, li’nn kontign ansegn zot ek ankouraz zot. Pou bann zapot, sa bann dernie semenn-la ti extraordiner! Kan zot inn trouve ki Zezi inn resisite, sa finn redonn zot lazwa! Zot vremem anvi ki Zezi kontign res avek zot. Me selman, azordi, se dernie fwa ki li pe aparet ar zot.

² Bann zapot lor Montagn Pie Zoliv, ek zot pe ekout bien tou seki Zezi pe dir. Zot anvi ki Zezi kontign ansegn zot, me Zezi aret koze, li lev so lame ek li beni zot. Apre sa, Zezi koumans mont dan lesiel! Amezir ki li pe monte, so bann zapot pe get li. Alafin, enn niaz vini ek zot nepli trouv li. Zezi inn fini ale, me zot pe kontign get lesiel!​—Lik 24:50; Zist. 1:9, 10.

³ Sa levennman-la, inn sanz lavi bann zapot net. Ki zot pou fer aster-la  ki zot Met, Zezi Kris, inn mont dan lesiel? Pa gagn traka! Zot Met ti fini prepar zot pou ki zot kapav kontign travay ki li’nn koumanse. Kouma li’nn prepar zot pou sa responsabilite inportan la, ek kouma zot pou aplik seki zot inn aprann? Kouma sa konsern bann Kretien azordi? Nou pou gagn repons sa bann kestion-la dan premie sapit liv Zistwar Bann Zapot. Ek so bann repons pou bien ankouraz nou.

4. Kouma Lik koumans liv Zistwar Bann Zapot?

⁴ Kan Lik koumans ekrir liv Zistwar Bann Zapot, Lik koz ar Teofil. a Se pou limem ki Lik ti ekrir so Levanzil inn gagn de-trwa lane. Pou montre ki liv Zistwar Bann Zapot se enn laswit so Levanzil, Lik fer enn rezime bann kitsoz ki li ti ekrir alafin so Levanzil. Me dan liv Zistwar Bann Zapot, Lik rakont sa bann kitsoz-la dan enn lot fason ek donn bann lezot detay.

5, 6. (a) Ki pou ed bann disip Zezi pou kontign ena enn lafwa for? (b) Ki prev solid ed bann Kretien azordi pou ena vre lafwa?

⁵ Ki pou ed bann disip Zezi pou kontign ena enn lafwa for? Zistwar Bann Zapot 1:3 dir konsernan Zezi: “Li ti aparet ar zot plizir fwa pou ki zot kapav sir ki vremem li ti vivan. Bann-la ti trouv li pandan 40 zour.” Zezi ti aparet ar so bann disip plizir fwa. Ena fwa, li ti aparet ar enn ouswa de disip. Parfwa li ti aparet ar tou so bann zapot, ek dan enn lot lokazion, li ti aparet ar plis ki 500 disip. (1 Kor. 15:3-6) Tou sa bann prev-la ti vremem fortifie lafwa bann disip Zezi!

⁶ Azordi osi, lafwa bann vre Kretien baze lor bann prev. Eski nou ena bann prev ki Zezi inn viv lor later, inn mor pou nou bann pese, ek inn resisite? Wi, biensir! Nou trouv bann prev solid dan Labib, ki inspire par Bondie. Ladan, ena bann zistwar ki baze lor temwaniaz bann dimounn ki’nn viv sa bann levennman-la. Kan nou etidie sa bann zistwar-la ek nou priye Zeova pou ed nou konpran seki nou pe lir, sa pou fortifie nou lafwa. Rapel ki vre lafwa se pa ki nou swete ki enn kitsoz li vre, me li baze lor bann prev solid. Ek li inportan ki nou ena vre lafwa, pou ki nou kapav gagn lavi pou touletan.​—Zan 3:16.

7. Ki lexanp Zezi ti donn so bann disip konsernan ansegne ek prese?

⁷ Zezi ti osi “koz lor Rwayom Bondie.” Par exanp, li ti montre ki dapre bann profesi, Lemesi ti bizin soufer ek mor. (Lik 24:13-32, 46, 47) Zezi ti  met laksan lor Rwayom Bondie, par exanp, li ti donn plis detay lor rol ki li ena antan-ki Lemesi, setadir Lerwa ki Bondie inn swazir pou diriz So Rwayom. Zezi ti touletan pres lor Rwayom Bondie, ek azordi osi so bann disip pres lor sa Rwayom-la.​—Mat. 24:14; Lik 4:43.

8, 9. (a) Ki de fos lide bann zapot ti ena? (b) Kouma Zezi ti koriz fason panse bann zapot, ek ki leson sa aprann nou?

⁸ Kan bann zapot ansam avek Zezi lor Montagn Pie Zoliv, se zot dernie renion avek Zezi lor later. Bann zapot ena enn gran dezir pou konn plis, lerla zot demann Zezi: “Segner, eski se aster-la mem ki to pe remet rwayom pou Izrael dibout?” (Zist. 1:6) Kan zot poz sa kestion-la, bann zapot montre ki zot ena de lide ki fos. Premie lide: Zot panse ki Rwayom Bondie pou rekoumans diriz nasion Izrael. Deziem lide: Zot panse ki Rwayom ki Bondie inn promet pou koumans dirize “aster-la mem.” Kouma Zezi pou ed zot pou koriz zot fason panse?

⁹ Zezi kone ki biento so bann disip pou konpran ki sa premie lide-la li fos. Kifer? Parski dan zis 10 zour, so bann disip pou trouv formasion enn nouvo pep, Izrael Bondie! Biento Bondie pou rezet nasion Izrael. Konsernan deziem lide-la, avek bonte Zezi rapel zot: “Li pa neseser pou zot ki zot konn bann letan ek bann lepok parski zis mo Papa ki ena drwa pou desid sa.” (Zist. 1:7) Zeova inn etabli enn kalandriye ki Li respekte. Mem Zezi pa ti kone kan sa pou arive, parski avan ki li mor, li ti dir ki li pa konn ‘ni zour ni ler’ ki lafin pou arive, ‘me se zis Papa-la’ ki konn sa. (Mat. 24:36) Azordi osi, si bann Kretien gagn traka kan exakteman lafin pou vini, zot pe trakase pou bann kitsoz ki pa neseser.

10. Ki bon latitid bann zapot ti ena, ek kifer nou bizin ena mem latitid ki zot?

¹⁰ Me kanmem sa, fode pa ki nou mepriz bann zapot, parski zot ti ena enn gran lafwa. Avek limilite zot ti aksepte kan ti koriz zot. Mem si zot kestion ti baze lor bann fos lide, sa ti montre ki zot ti ena enn bon latitid. Plizir fwa, Zezi ti ankouraz so bann disip pou “kontign veye.” (Mat. 24:42; 25:13; 26:41) Se samem ki zot ti pe fer, parski zot ti pe rod tou ti indis ki montre ki Zeova ti pre pou azir. Nou osi, nou bizin ena sa mem latitid-la. Sirtou, ki nou pe viv “dan bann dernie zour.”​—2 Tim. 3:1-5.

11, 12. (a) Ki responsabilite Zezi ti donn so bann disip? (b) Kifer li bon ki Zezi ti rapel zot ki zot ti pou gagn lespri sin?

¹¹ Zezi rapel so bann zapot ki kitsoz bizin zot priorite. Li dir zot: “Zot pou gagn pwisans kan lespri sin pou desann lor zot, ek zot pou vinn mo bann temwin dan Zerizalem, partou dan Zide ek Samari, ek ziska dan bann landrwa pli lwin lor later.” (Zist. 1:8) Se dan Zerizalem ki bann dimounn ti touy Zezi, ek se dan sa lavil-la an premie, ki bann disip ti pou anonse ki Zezi inn resisite. Se depi laba mem, ki mesaz lor Rwayom  Bondie ti pou fane partou dan Zide, ek apre sa dan Samari, ek alafin, bien pli lwin ankor.

¹² Avan ki Zezi avoy so bann disip prese, li rapel zot ki li pou avoy lespri sin pou ed zot. Isi se pa sel plas kot nou trouv lexpresion “lespri sin.” Nou trouv sa lexpresion-la plis ki 40 fwa dan liv Zistwar Bann Zapot. Plizir fwa, sa liv Labib la rapel nou ki nou pa kapav fer volonte Zeova san led lespri sin. Alor, li inportan ki nou priye regilierman pou gagn lespri sin. (Lik 11:13) Azordi, se moman kot nou plis bizin lespri sin!

13. Ziska ki kote nou teritwar ale azordi, ek kifer nou bizin donn nou afon dan sa travay-la?

¹³ Pou bann zapot, lexpresion “bann landrwa pli lwin lor later,” ti konsern zis sertin landrwa dan lemond. Me pou nou azordi, sa lexpresion-la vedir partou dan lemond. Kouma nou’nn trouve dan sapit 1, avek tou zot leker bann Temwin Zeova inn aksepte pou prese, parski zot kone ki Bondie anvi ki tou sort kalite dimounn tann bon nouvel lor so Rwayom. (1 Tim. 2:3, 4) Eski to pe donn twa afon dan sa travay-la? Pena okenn lot travay ki pou donn twa otan satisfaksion! Zeova pou donn twa lafors ki to bizin pou fer sa travay-la. Dan liv Zistwar Bann Zapot, to pou aprann boukou lor bann metod ki to bizin servi, ek osi lor latitid ki to bizin ena pou ki to gagn bann bon rezilta.

14, 15. (a) Ki bann anz ti dir lor fason ki Zezi ti pou retourne, ek ki zot ti pe rod dir? (Get not.) (b) Kifer nou kapav dir ki Zezi inn retourn “dan mem fason” ki li’nn ale?

¹⁴ Kouma nou’nn mansione dan koumansman sa sapit-la, Zezi inn mont dan lesiel ek so bann zapot ti nepli kapav trouv li. Me kanmem sa, toule 11 zapot ankor pe debout anplas ek pe fixe lesiel. Apre sa, de anz aparet ek koriz zot avek zantiyes: “Bann zom Galile, kifer zot pe debout la ek zot pe get lesiel? Sa Zezi ki ti avek zot ek ki’nn mont dan lesiel la pou vinn dan mem fason ki zot inn trouv li al dan lesiel.” (Zist. 1:11) Eski bann anz pe rod dir ki Zezi pou retourn dan mem lekor, parey kouma sertin relizion ansegne? Non, se pa sa ki zot pe rod dir. Kouma nou konn sa?

¹⁵ Bann anz pa’nn dir ki Zezi pou retourn dan mem form, me ki li pou retourn “dan mem fason.” b Me dan ki fason li’nn ale? Kan bann anz ti pe koze, ti nepli trouv Zezi. Se zis bann zapot, setadir de-trwa zom, ki’nn trouve ek konpran ki Zezi ti nepli lor later ek ki li ti mont dan lesiel pou al zwenn so Papa. Zezi ti pou retourn dan mem fason. Ek se seki’nn arive. Azordi, se zis bann ki konpran bann Lekritir ek ki konpran dan ki lepok nou pe viv, ki konsian ki Zezi inn retourne antan-ki Lerwa dan lesiel. (Lik 17:20) Nou bizin konpran bien bann prev ki montre prezans  Zezi, ek fer bann lezot dimounn konn sa, pou ki zot osi, zot konpran bien dan ki lepok nou pe viv.

16-18. (a) Dapre Zistwar Bann Zapot 1:13, 14, ki nou aprann lor bann renion ki bann Kretien ti fer? (b) Ki nou kapav aprann ar Mari, Zezi so mama? (c) Kifer bann renion bien inportan pou bann Kretien azordi?

¹⁶ Nou konpran ki bann zapot “retourn Zerizalem dan enn gran lazwa.” (Lik 24:52) Me kouma zot pou reazir ar bann instriksion ki Lekris ti donn zot? Dan liv Zistwar Bann Zapot sapit 1, verse 13 ek 14, nou trouve ki zot rasanble dan “enn lasam lor letaz,” ek nou aprann bann detay interesan lor sa rasanbleman-la. Sa lepok-la dan Palestinn, souvan bann lakaz ti ena enn lasam lor letaz. Pou kapav al dan sa lasam-la, ti bizin pas par enn leskalie ki ti andeor. Nou pa kone si se samem “lasam lor letaz,” ki mansione dan Zistwar Bann Zapot 12:12, ki ti pou Mark so mama. Me antouka, li ti enn plas ki ti sinp ek ki ti pratik pou ki bann disip Zezi zwenn ansam. Me kisann-la ti la pou sa renion-la, ek ki zot ti fer?

¹⁷ Remarke, ki pandan sa renion-la pena zis bann zapot ouswa zis bann misie. Ena osi “sertin madam” ki la, ek parmi ena Mari, Zezi so mama. Se dernie fwa ki mansionn li dan Labib. Nou sir ki Mari pa la pou fer gran-nwar, me avek limilite li’nn vini pou ador Bondie ansam avek so bann frer ek ser. Sirman sa rekonfort Mari ki so kat garson ansam avek li. Kifer? Parski kan Zezi ti lor later so bann demi-frer pa ti ena lafwa dan li. (Mat. 13:55; Zan 7:5) Me depi ki zot demi-frer inn mor ek inn resisite, zot latitid inn sanze.​—1 Kor. 15:7.

¹⁸ Zistwar Bann Zapot 1:14 donn nou enn lot rezon kifer bann disip ti reini ansam: “Kouma enn sel, zot ti pe kontign priye ansam.” (Zist. 1:14) Pou bann Kretien, zwenn ansam pou ador Bondie ti touletan enn kitsoz ki bien inportan. Nou zwenn ansam pou ankouraz sakenn nou kamarad, pou gagn bann instriksion ek bann konsey, me sirtou, nou zwenn ansam pou ador nou Papa ki dan lesiel, Zeova. Bann lapriyer ek bann kantik ki nou sante dan sa bann renion-la vremem fer Zeova plezir, ek vremem bien inportan pou nou. Fode zame ki nou abandonn sa bann rasanbleman ki sakre ek ankourazan la!​—Ebre 10:24, 25.

19-21. (a) Se Pier an premie ki fer zefor pou organiz bann kitsoz. Ki sa aprann nou? (b) Kifer ti bizin ranplas Zida, ek ki nou aprann ar fason ki’nn regle sa sitiasion-la?

¹⁹ Aster-la, li inportan ki bann disip Zezi gete kouma pou organiz bann kitsoz. Ek se Pier, enn parmi bann zapot, ki an premie fer zefor pou organiz bann kitsoz. (Verse 15-26) Li bien ankourazan pou trouve kouma Pier so latitid inn sanze, mem si inn gagn de-trwa semenn, li ti renie Lesegner. (Mark 14:72) Nou tou nou ena tandans pou fer pese, me nou bizin rapel ki Zeova “ranpli ar bonte ek pardon” anver bann ki repanti  avek tou zot leker.​—Ps. 86:5.

²⁰ Pier konpran ki bizin ranplas Zida, sa zapot ki’nn trayir Zezi la. Me kisann-la pou ranplas Zida? Zot bizin swazir enn kikenn ki’nn prese ansam avek Zezi, ek ki’nn trouv Zezi apre so rezireksion. (Zist. 1:21, 22) Ek sa an-akor avek promes ki Zezi ti fer: “Zot ki finn swiv mwa, zot pou asiz lor 12 tronn ek pou ziz bann 12 tribi Izrael.” (Mat. 19:28) Li paret ki Zeova anvi ki sa 12 zapot ki ti swiv Zezi la, vinn bann “12 ros fondasion” dan Nouvo Zerizalem. (Rev. 21:2, 14) Bondie ed Pier pou konpran ki profesi ki trouv dan Psom 109:8: “Fer enn lot dimoun gagn so travay,” aplik ar Zida.

²¹ Kouma pou swazir sa nouvo zapot-la? Par enn tirazosor. Labib montre ki bien lontan bann dimounn ti abitie fer sa. (Prov. 16:33) Me selman, se dernie fwa ki Labib montre ki servi tirazosor dan sa fason-la. Li kler ki apre ki bann disip ti gagn lespri sin, ti nepli bizin servi tirazosor. Me remarke kifer dan sa sitiasion-la servi tirazosor. Bann zapot fer sa lapriyer-la: “A! Zeova, twa ki konn leker tou dimounn, fer nou kone kisann-la to’nn swazir parmi sa de zom-la.” (Zist. 1:23, 24) Zot anvi ki Zeova pran sa desizion-la, ek Zeova swazir Matias. Li paret ki Matias ti enn parmi bann 70 disip ki Zezi ti avoy prese. Alor, Matias vinn enn parmi “bann 12 zapot.” c​—Zist. 6:2.

22, 23. Kifer nou bizin soumet ek obeir bann ki pe diriz lasanble?

²² Sa levennman-la rapel nou ki pep Bondie bizin travay dan enn fason ki organize. Azordi, bann zom ki servi kouma ansien dan lasanble, se bann zom ki serye ek ki kapav fer konfians. Avan ki nomm enn kikenn kouma ansien, bann ansien pou gete si li ranpli bann kondision ki ena dan Labib, ek zot pou priye pou ki lespri sin gid zot. Bann frer ek ser konsider sa bann frer-la kouma bann zom ki’nn swazir par lespri sin. Alor, nou bizin soumet ek obeir bann ki diriz nou. Sa pou permet ki ena enn bon leta despri dan lasanble, kot nou tou nou korpere ansam.​—Ebre 13:17.

²³ Bann zapot finn trouv Zezi apre so rezireksion. Ki lefe sa finn ena lor zot? Sa finn ankouraz zot ek prepar zot pou seki pe atann zot. Prosin sapit pou koz lor sa levennman extraordiner la.