1, 2. (a) Kouma Frer Russell ti reponn enn paster ki ti anvi kone kouma laktivite bann Etidian Labib finanse? (b) Ki nou pou examine dan sa sapit-la?

 ENN zour, enn paster dan l’Église réformée ti vinn vizit Frer Charles Russell. Li ti anvi kone kouma laktivite bann Etidian Labib finanse.

Frer Russell ti explik li: “Zame nou pa pas okenn laket.”

Alor, paster-la ti demann li: “Me kouma zot gagn kas?”

Frer Russell ti reponn li: “Si mo dir ou vremem laverite, ou pa pou’le krwar mwa. Kan bann dimounn vinn asiste nou bann renion, nou pa pas enn ti panie anba zot nene. Me zot trouve ki ena bann depans. Zot dir an zotmem: ‘Sa lasal-la kout larzan . . . Kouma mo kapav fer enn ti kontribision?’”

Paster-la ti get Frer Russell, li pa ti’le krwar.

Frer Russell ti kontign dir li: “Mo pe dir ou vremem laverite. Parfwa zot poz mwa sa kestion-la: ‘Kouma mo kapav fer enn ti kontribision dan sa laktivite-la?’ Kan enn kikenn gagn enn benediksion ek li ena larzan, li anvi servi sa pou Lesegner. Si li pena nanye, kifer nou bizin pous li pou li done?” a

² Frer Russell ‘vremem ti pe dir laverite.’ Depi bien lontan bann serviter Bondie finn fer bann kontribision volonter pou soutenir vre ladorasion. Dan sa sapit-la, nou pou examinn sertin lexanp Biblik ek osi listwar modern bann Temwin Jéhovah an rapor avek bann kontribision. Nou pou examine kouma bann laktivite an rapor avek Rwayom Bondie finanse zordi. Amezir ki nou fer sa, li bon ki sakenn parmi nou demann limem: ‘Kouma mo kapav montre ki mo soutenir Rwayom Bondie?’

3, 4. (a) Ki konfians Jéhovah ena dan so bann adorater? (b) Kouma bann Izraelit ti montre ki zot ti soutenir konstriksion tabernak?

³ Jéhovah ena konfians dan so bann adorater. Li kone ki si Li donn zot lokazion, zot pou bien kontan pou fer bann donasion volonter pou montre zot latasman pou Li. Anou examinn de lexanp ar seki ti pase dan lepok bann Izraelit.

 ⁴ Apre ki Jéhovah ti fer bann Izraelit sorti dan l’Égypte, Li ti dir zot fer enn tabernak, setadir enn latant ki zot ti pou kapav sarye pou ador Li. Ti pou bizin boukou materyel pou fer sa latant-la ek bann meb ki ti pou met ladan. Jéhovah ti dir Moïse donn lepep lokazion pou soutenir sa proze-la. Li ti dir: “Ki tou dimounn ki ena enn leker bien dispoze amenn enn kontribision pou Jéhovah.” (Ex. 35:5) Pa tro lontan, sa bann Izraelit-la ti pe travay “dan bann kondision bien dir dan tou sort kalite lesklavaz.” Kouma eski zot ti reazir kan Moïse ti fer zot konn seki Jéhovah ti dir? (Ex. 1:14) Zot ti bien soutenir sa proze-la. Avek tou zot leker, zot ti amenn lor, larzan, ek lezot kitsoz ki ena boukou valer. Kitfwa zot ti gagn laplipar sa bann kitsoz-la ar zot bann ansien met, bann Ezipsien. (Ex. 12:35, 36) Telman bann Izraelit ti donn boukou kitsoz ki “ti bizin anpes [zot] pou amenn ankor.”​—Ex. 36:4-7.

5. Kouma bann Izraelit ti reazir kan David ti donn zot lokazion pou kontribie dan konstriksion tanp?

⁵ Apepre 475 an plitar, David ti pran bann kitsoz ki ena valer dan “so trezor personel,” pou fer bann kontribision pou finans konstriksion tanp. Sa tanp-la ti premie sant permanan pou vre ladorasion lor later. Apre, li ti donn lokazion bann Izraelit pou done. Li ti demann zot: “Kisannla ki volonter zordi pou vinn avek enn don dan so lame pou Jéhovah?” Lepep ti reazir ek zot ti fer “bann kontribision volonter pou Jéhovah avek enn leker konple.” (1 Chron. 29:3-9) David ti kone ki se Jéhovah ki ti deryer sa bann kontribision-la. Dan so lapriyer li ti dir: “Tou kitsoz sorti kot twa, ek seki nou finn donn twa sorti dan to lame mem.”​—1 Chron. 29:14.

6. Kifer bizin larzan pou fer bann laktivite an rapor avek Rwayom Bondie zordi, ek ki bann kestion ki souleve?

⁶ Ni Moïse, ni David pa ti met presion lor pep Bondie pou fer bann kontribision. Okontrer, lepep ti bien dispoze pou done. Ki nou kapav dir zordi? Nou bien konsian ki bizin larzan pou fer bann laktivite an rapor avek Rwayom Bondie. Sa kout boukou pou pibliye ek pou distribie bann Labib ek bann piblikasion Biblik, pou konstrir bann Lasal kot fer renion ek bann Lasal lasanble ek bann Béthel, pou gard zot dan bon leta, ek pou ed nou bann frer apre enn katastrof. Alor, ena bann kestion bien inportan ki souleve: Kotsa nou gagn larzan pou fer tousala? Eski bizin met presion lor bann disip Christ pou zot fer bann kontribision?

7, 8. Kifer bann serviter Jéhovah pa demann, ni sipliy bann dimounn pou donn zot larzan?

⁷ Frer Russell ek bann frer ki ti travay ansam avek li ti refiz pou fer parey kouma bann relizion ki dir zot Kretien. Dan deziem nimero Latour Degard, ti ena sa tit-la: “Eski Ou Anvi Gagn ‘Latour Degard Sion’?” Frer Russell ti dir: “Nou krwar ki JÉHOVAH soutenir ‘Latour Degard Sion’ ek tanki li pou  koumsa, zame nou pou demann bann dimounn ni nou pou sipliy zot pou gagn zot soutien. [Jéhovah] ti dir: ‘Tou lor ek larzan ki ena dan bann montagn, pou mwa.’ Kan Li pou aret donn larzan ki neseser, nou pou konpran ki letan inn arive pou aret fer sa piblikasion-la.” (Hag. 2:7-9) Plis ki 130 an plitar, Latour Degard ek lorganizasion ki ti pibliye sa magazinn-la ankor touzour existe.

⁸ Bann serviter Jéhovah pa sipliy dimounn pou donn zot larzan. Zot pa pas bann panie pou ramas kas, ouswa avoy bann let pou demann larzan. Zot pa fer bann fennsifer ek bann tonbola pou gagn larzan. Zot aplik bien seki lontan Latour Degard ti dir: “Zame nou pa finn trouv sa bon pou demann larzan pou Lesegner, kouma bann lezot legliz fer . . . Nou trouv sa sokan pou demann larzan o-nom nou Segner atraver plizir mwayin, li pa aksepte sa, ek li pa donn so benediksion bann dimounn ki pe donn sa, ni travay ki pe fer.” b

9, 10. Sit enn rezon kifer nou fer bann kontribision volonter.

⁹ Antan ki bann sitwayen Rwayom Bondie, personn pa obliz nou pou done. Okontrer, nou kontan servi nou larzan ek lezot dibien ki nou ena pou soutenir bann laktivite Rwayom Bondie. Kifer? Anou examinn trwa rezon.

¹⁰ Premierman, nou fer bann kontribision volonter parski nou kontan Jéhovah ek nou anvi fer “seki bon devan so lizie.” (1 Jean 3:22) Pena dout ki Jéhovah bien kontan kan so bann adorater donn avek tou zot leker. Anou examinn seki Paul ti dir konsernan bann kontribision. (Lir 2 Corinthiens 9:7.) Enn vre Kretien pa ezite ek li pa santi li forse pou done. Okontrer, li done parski li “finn deside dan so leker” pou fer sa. c Savedir ki li done apre ki li finn trouve ki ena enn bezwin ek li finn reflesi kouma li kapav ede. Jéhovah apresie enn dimounn koumsa parski Li “kontan enn dimounn ki donn avek lazwa.” Dan enn lot tradiksion Labib, nou lir: “Bondie kontan bann dimounn ki kontan done.”

11. Ki pous nou pou donn Jéhovah pli bon don ki nou kapav?

¹¹ Deziemman, nou fer bann kontribision pou remersie Jéhovah pou tou so bann benediksion. Anou get enn prinsip ki sorti dan Lalwa Mozaik ek ki ti fer bann Izraelit reflesi ek examinn zot leker. (Lir Deutéronome 16:16, 17.) Kan bann Izraelit ti al asiste zot trwa fet toule lane, sak zom ti bizin ofer enn don “dapre benediksion ki Jéhovah” ti’nn donn li. Alor, avan li ti al asiste enn fet, sak zom ti bizin kalkil benediksion ki Jéhovah ti’nn donn li ek examinn so leker. Li ti bizin deside ki pli bon don li ti kapav donn Jéhovah. Zordi osi parey, kan nou reflesi lor tou bann benediksion ki Jéhovah inn donn nou, sa motiv nou pou donn Li pli bon don ki nou kapav,  sirtou lor plan materyel. Nou donn sa bann don-la avek tou nou leker ek sa montre ki kantite nou rekonesan pou bann benediksion ki nou gagne ar Jéhovah.​—2 Cor. 8:12-15.

12, 13. Kouma nou bann kontribision volonter montre nou lamour pou nou Lerwa, ek ki kantite sakenn done?

¹² Trwaziemman, par nou bann kontribision volonter, nou montre nou lamour pou nou Lerwa Jésus Christ. Kouma? Remarke seki Jésus ti dir so bann disip dernie lanwit ki li ti pase lor later. (Lir Jean 14:23.) Jésus ti dir: “Si enn kikenn kontan mwa, li pou obeir mo parol.” Parmi bann “parol” ki Jésus ti dir, ena lord ki li ti done pou pres bon nouvel lor Rwayom Bondie partou lor later. (Mat. 24:14; 28:19, 20) Nou obeir sa ‘parol-la’ kan nou fer tou seki nou kapav pou soutenir bann aktivite ki konsern Rwayom Bondie. Nou fer sa kan nou servi nou letan, nou lafors, ek nou bann dibien. Koumsa, nou montre nou lamour pou nou Lerwa Mesianik.

¹³ Pena dout ki antan ki bann sitwayen Rwayom Bondie, nou anvi montre ki nou soutenir sa Rwayom-la avek tou nou  leker, kan nou fer bann kontribision. Ki kantite kontribision nou bizin fer? Sa se enn desizion personel. Sakenn parmi nou donn seki li kapav. Selman, boukou parmi nou bann frer ek ser pena boukou kitsoz materyel. (Mat. 19:23, 24; Jacq. 2:5) Me sa ankouraz zot pou kone ki Jéhovah ek so Garson akord enn gran linportans mem ar bann ti kontribision ki zot fer avek tou zot leker.​—Marc 12:41-44.

14. Pandan boukou lane, kouma bann Temwin Jéhovah inn ofer zot bann piblikasion?

¹⁴ Pandan boukou lane, bann Temwin Jéhovah finn demann enn kontribision pou bann piblikasion Biblik ki zot ofer. Sa bann piblikasion-la ti bien bomarse pou ki mem bann dimounn ki pena boukou larzan, kapav gagn sa. Biensir, si enn dimounn ti interese me li pa ti kapav fer enn kontribision, bann proklamater ti bien dispoze pou donn li bann piblikasion. Seki nou ti vremem anvi se ki bann dimounn sinser lir sa bann piblikasion-la ek gagn bann bienfe.

15, 16. (a) Apartir 1990, ki sanzman Komite Santral finn fer? (b) Kouma bann dimounn fer bann donasion volonter? (Get osi lankadre “ Ki Fer Avek Nou Bann Donasion?”)

¹⁵ An 1990, Komite Santral ti koumans sanz fason ki nou ofer bann piblikasion. Depi sa lane-la an Amérique, nou ti koumans ofer tou nou bann piblikasion san demann okenn kontribision, me zis dapre enn sistem donasion. Tou bann kongregasion dan sa pei-la ti gagn enn let ki ti dir: “Bann proklamater ek bann dimounn ki interese pou gagn bann peryodik ek bann piblikasion san ki nou demann zot ouswa mem donn zot linpresion ki zot bizin fer enn kontribision presi pou gagn enn piblikasion. . . . Si enn kikenn anvi fer enn kontribision pou kouver bann depans an rapor avek laktivite pou ansegn bann dimounn, li kapav kontribie. Me [bann dimounn] kapav gagn sa bann piblikasion-la, ki zot donn enn kontribision ouswa non.” Sa dispozision-la fer bann dimounn bien konpran ki nou laktivite li volonter ek li relizie, ek ki nou pa “fer komers ar parol Bondie.” (2 Cor. 2:17) Avek letan, tou bann biro nasional finn aplik sa dispozision-la.

¹⁶ Kouma bann dimounn fer sa bann donasion volonter la? Dan bann Lasal kot nou fer renion, ena bann bwat kontribision dan bann plas bien diskre. Bann dimounn kapav met zot kontribision dan sa bann bwat-la ouswa avoy zot donasion direkteman ar enn asosiasion legal ki bann Temwin Jéhovah servi. Sak lane, ena enn lartik dan Latour Degard ki explike kouma kapav fer sa bann donasion volonter la.

17-19. Explike kouma servi bann donasion pou (a) laktivite mondial, (b) konstriksion bann Lasal dan lemond, ek (c) depans kongregasion.

¹⁷ Laktivite mondial. Bann donasion kouver tou bann depans ki nou fer pou laktivite predikasion dan lemond antie. Parmi sa bann depans-la ena depans pou prodir bann piblikasion  ki nou distribie partou dan lemond, konstriksion ek lantretien bann Béthel, ek depans ki fer pou bann diferan lekol teokratik. Anplis, servi sa larzan-la pou ed bann misioner, bann sirveyan ek bann pionie spesial. Nou servi sa donasion-la osi pou avoy led nou bann frer, apre bann katastrof. d

¹⁸ Konstriksion bann Lasal dan lemond. Bann donasion ed bann kongregasion pou konstrir ouswa pou fer renovasion bann Lasal kot zot fer renion. Amezir ki nou gagn bann donasion, pou ena plis larzan pou ed lezot kongregasion. e

¹⁹ Depans kongregasion. Servi bann donasion pou pey bann depans ki fer dan kongregasion ek pou gard bann Lasal dan bon leta. Bann ansien kapav propoze ki avoy enn parti sa larzan-la biro nasional pou favoriz laktivite ki fer dan lemond antie. Dan sa ka-la, bann ansien prezant enn rezolision devan kongregasion. Si zot tou dakor, bann ansien pou avoy sa larzan ki finn deside la Biro Nasional. Sak mwa, frer ki okip kont kongregasion prepar enn rapor finansie, ek lir sa devan kongregasion.

20. Kouma ou kapav onor Jéhovah avek ou “bann kitsoz ki ena valer”?

²⁰ Kan nou reflesi lor tou seki sa inplike pou pres Rwayom Bondie ek pou fer bann disip dan lemond antie, sa pous nou pou “onor Jéhovah avek [nou] bann kitsoz ki ena valer.” (Prov. 3:9, 10) Parmi bann kitsoz ki ena valer, nou ena nou bann kapasite fizik, mantal ek spiritiel. Pena dout ki nou anvi servi sa bann kapasite-la bien pou bann laktivite an rapor avek Rwayom Bondie. Me rapel ki parmi bann kitsoz ki ena valer, ena osi nou bann kitsoz materyel. Alor, anou bien deside pou donn seki nou kapav, kan nou kapav. Nou bann kontribision volonter donn loner Jéhovah ek montre ki nou soutenir Rwayom Mesianik.