Eski inn deza arive ki enn parmi ou bann pros inn mor? Kitfwa kan ou’nn pas par sa sitiasion difisil la ou’nn demann oumem: ‘Ki arive kan nou mor? Eski ena kit lespwar ki enn zour nou pou kapav retrouv zot?’ Dan sa leson-la ek prosin leson, nou pou gete kouma bann repons ki ena dan Labib kapav rekonfort ou.

1. Ki arive kan nou mor?

Zezi ti konpar lamor ar enn gran somey. Kifer? Kan enn dimounn dan enn gran somey, li pa kone ki pe pase otour li. Dan mem fason, kan enn dimounn mor li pa konn nanye ditou. Li pa resanti okenn douler ek li pa soufer. Labib dir: “Bann dimounn ki’nn mor pa konn nanye ditou.”​—Lir Ekleziast 9:5.

2. Kouma sa kapav ed nou kan nou konn laverite lor lamor?

Boukou dimounn gagn per lamor ek zot mem per bann dimounn mor! Me seki Labib dir lor lamor kapav rekonfort ou. Zezi ti dir: “Laverite pou rann zot lib.” (Zan 8:32) Sertin relizion ansegne ki apre lamor enn dimounn, so nam kontign viv. Me Labib montre nou ki sa li fos; pena nanye ki kontign viv apre lamor. Kan enn dimounn mor li pa soufer. Anplis, si enn dimounn mor pa konn nanye ditou, li pa kapav fer nou ditor. Alor, li pa neseser ki nou priye pou bann dimounn mor ouswa fer kitsoz pou ki zot pa ankoler ar nou.

Sertin dimounn dir ki zot kapav koz avek bann mor. Me sa li inposib. Kouma nou fek aprann, bann dimounn mor “pa konn nanye ditou.” Bann ki fer sa panse ki zot pe koz avek zot bann pros ki’nn mor, me ofet zot pe koz avek bann demon ki pe fer zot pas pou sa bann dimounn mor la. Kan nou konn laverite lor lamor, sa protez nou kont bann demon. Zeova demann nou pou pa koz avek bann dimounn mor, parski Li kone ki si nou koz avek bann demon sa kapav fer nou boukou ditor.​—Lir Deteronom 18:10-12.

3. Laverite lor lamor

Partou dan lemond, bann dimounn ena bann diferan krwayans lor seki arive kan enn dimounn mor. Biensir, tou sa bann krwayans-la pa kapav vre.

• Dapre bann dimounn dan ou landrwa, ki arive apre ki enn dimounn mor?

 4. Laverite lor lamor liber nou

Kan nou konn laverite lor lamor, nou pa pou per bann dimounn mor. Lir Ekleziast 9:10, ek apre sa, get sa kestion-la ansam:

• Eski bann dimounn mor kapav fer nou ditor?

Seki Labib dir nou lor lamor liber nou ar sertin krwayans. Alor, li pa neseser ki nou priye pou bann dimounn mor ouswa fer kitsoz pou ki zot pa ankoler ar nou. Lir Izai 8:19 ek Revelasion 4:11, ek apre sa, get sa kestion-la ansam:

• Ki ou panse Zeova resanti kan enn dimounn ador bann mor ouswa rod zot led?

5. Laverite lor lamor rekonfort nou

Boukou dimounn finn aprann ki kan zot pou mor, zot pou soufer akoz bann move kitsoz ki zot finn fer. Me sa rekonfort nou pou kone ki personn pa soufer apre lamor, mem si enn dimounn inn fer boukou move kitsoz. Lir Romin 6:7, NW, ek apre sa, get sa kestion-la ansam:

• Labib dir ki lamor liber enn dimounn ar bann pese ki li’nn fer. Eski ou panse ki enn dimounn mor soufer akoz bann erer ki li’nn fer dan lepase?

Plis nou aprann konn Zeova, plis nou pou realize ki zame Li pou fer enn dimounn soufer apre so lamor. Lir Deteronom 32:4 ek 1 Zan 4:8, ek apre sa, get sa bann kestion-la ansam:

• Sa bann verse-la koz lor bann zoli kalite ki Bondie ena. Eski ou panse ki enn Bondie koumsa pou aksepte ki bann dimounn soufer apre lamor?

• Eski seki Labib dir lor lamor rekonfort ou? Kifer?

 SEKI NOU’NN APRANN

Kan enn dimounn mor, li pa konn nanye ditou. Bann dimounn mor pa soufer, ek zot pa kapav fer ditor bann dimounn ki vivan.

Eski Ou Rapel?

• Ki arive kan nou mor?

• Ki bienfe nou gagne kan nou konn laverite lor lamor?

• Kouma laverite lor lamor rekonfort nou?