Inpe apre so batem, Zezi inn fer fas ar enn lennmi ki ti bien deside pou anpes li res fidel, avan mem ki li koumans so minister. Wi, plizir fwa Lediab inn sey tant Zezi. Plitar, konsernan Lediab, Zezi inn dir: “Sef lemond pe vini. Ek li pena okenn pouvwar lor mwa.”​—Zan 14:30, NW.

Dan enn vizion, lapot Zan inn trouv lavenir ki pe atann ‘gran dragon, serpan orizinel, ki apel Diab ek Satan.’ Sa lennmi kriel la ti pou gagn pouse depi lesiel, ek li ti pou dan “enn gran koler parski li kone ki li ena zis enn tigit letan mem.” (Revelasion 12:9, 12, NW.) Bann Kretien ena bann bon rezon pou krwar ki zot pe viv pandan sa ‘tigit letan-la,’ ek ki biento “gran dragon, serpan orizinel,” pou al ferme 1,000 an dan labim, kot li pa pou kapav fer nanye. Pandan sa letan-la, Zezi pou regne dan Rwayom Bondie.​—Revelasion 20:1, 2.

Pandan sa letan-la, ki pou ariv nou lakaz, setadir later? Kisannla pou res lor later, ek kouma lavi pou ete? Zezi limem inn donn sa repons-la. Dan so lexanp lor bann mouton ek bann kabri, li’nn montre ki lavenir bann dimounn drwat pou gagne, bann dimounn ki kouma bann mouton, ki korper avek bann frer Zezi, ek ki fer zot dibien. Li’nn montre osi seki pe atann bann dimounn ki pa azir koumsa, setadir bann dimounn ki kouma bann kabri. Zezi dir: “Sa bann la [bann kabri] pou pini [“mor,” NW] pou toultan, me bann zis [bann mouton], zot pou gagn lavi eternel.”​—Matie 25:46.

Sa ed nou konpran bann parol ki Zezi ti dir sa voler ki ti lor poto akote ar li la. Zezi pa finn promet sa zom-la mem rekonpans ki li’nn promet so bann zapot fidel, setadir pou form parti dan Rwayom ki dan lesiel. Okontrer, Zezi inn  promet sa peser ki’nn repanti la: “Vremem mo dir twa zordi, to pou avek mwa dan Paradi.” (Lik 23:43, NW.) Alor, sa zom-la inn gagn posibilite pou viv dan Paradi, enn zoli zardin. Azordi, bann dimounn ki kouma bann mouton ek ki pou gagn “lavi eternel,” zot osi zot pou dan sa Paradi-la.

Sa an-akor avek seki lapot Zan dir lor bann kondision ki pou ena lor later sa lepok-la. Li dir: “Latant Bondie avek bann dimounn, ek Li pou res avek zot, ek zot pou vinn so pep. Ek Bondie Limem pou avek zot. Ek Li pou souy tou larm dan zot lizie, ek lamor pou nepli existe. Dimounn nepli pou an-dey, zot nepli pou plore ek pou nepli ena douler. Bann kitsoz ki ti ena avan finn disparet.”​—Revelasion 21:3, 4, NW.

Pou ki sa voler-la profit lavi dan Paradi, li pou bizin resisite. Ek pa zis li tousel ki pou resisite. Zezi inn fer konpran sa dan enn fason bien kler, kan li’nn dir: “Ler pe vini kot tou dimoun ki dan tom pou tann so lavwa . . . pou sorti dan tom, tou dimoun ki finn fer dibien pou leve e pou gagn lavi; tou dimoun ki finn fer lemal pou leve e pou kondane.”​—Zan 5:28, 29.

Me ki pou ariv bann zapot fidel ek sa ti group ki pou avek Zezi dan lesiel la? Labib dir: “Zot pou vinn pret pou Bondie ek Kris, e zot pou regn avek li pandan mil an.” (Revelasion 20:6) Bann ki pou regne avek Lekris, zot ti bann zom ek bann fam ki ti viv lor later avan. Alor, zot pou bann dirizan ki ena konpasion ek ki konpran bann imin.​—Revelasion 5:10.

Zezi pou aplik bann bienfe so sakrifis ar bann dimounn ki lor later, ek li pou tir malediksion pese ki nou finn erite. Zezi ek so bann adzwin pou ed bann dimounn fidel pou vinn parfe. Wi, bann dimounn pou kapav gagn lavi ki Bondie ti anvi zot gagne o-koumansman, kan Li ti dir Adan ek Ev pou gagn bann zanfan ek pou ranpli later. Mem lamor, konsekans pese Adan, nepli pou existe!

Lerla, Zezi pou’nn fini akonpli tou seki so Papa inn demann li. Alafin Regn Mil An, Zezi pou retourn so Papa Rwayom ek lafami imin parfe. Sa aksion-la montre ki Zezi ena boukou limilite. Konsernan limilite Zezi, lapot Pol ti ekrir: “Kan tou kitsoz pou fini soumet ar li, lerla Garson-la pou soumet limem ar sa Kikenn ki finn soumet tou kitsoz ar li la, pou ki Bondie vinn tou kitsoz pou zot tou.”​—1 Korintien 15:28, NW.

Li kler ki Zezi ena enn rol inportan dan lakonplisman bann proze Bondie. Ek amezir ki Bondie pou kontign revel so bann proze pandan leternite, Zezi pou kontign viv an-akor avek deskripsion ki li’nn fer lor limem: “Momem sime, laverite, lavi.”​—Zan 14:6.