SAPIT 34
Zezi Swazir Douz Zapot
-
12 ZAPOT ZEZI
Sa fer apepre enn an edmi depi ki Zan Batis inn prezant Zezi kouma Lagno Bondie. Kan Zezi inn koumans so minister, boukou zom sinser inn vinn so bann disip. Parmi ena Andre, Simon Pier, Zan, kitfwa Zak (frer Zan), Filip, ek Natanael (ki apel osi Bartelemi). Avek letan, boukou lezot ankor inn koumans swiv Lekris.—Zan 1:45-47.
Asterla, Zezi inn pare pou swazir so bann zapot. Zot pou vinn so bann kamarad bien pros ek zot pou gagn enn formasion spesial. Me avan li swazir zot, Zezi al lor enn montagn, kitfwa enn ki pre ar Lamer Galile, pa tro lwin ar Kafarnaom. Laba, li pas enn lanwit dan lapriyer, pou rod sazes ek benediksion Bondie. Landemin, li apel so bann disip ek swazir 12 parmi zot pou vinn so bann zapot.
Zezi swazir sa sis disip ki nou’nn mansione lao-la. Li swazir Matie osi, sa zom ki ti ramas tax la. Sink ki reste se Zida (ki apel osi Tade ouswa “garson Zak”), Simon ki enn Kananeen, Toma, Zak garson Alfe, ek Zida Iskaryot.—Matie 10:2-4; Lik 6:16.
Sa fer deza inpe letan ki sa 12 zom-la pe vwayaz ansam ar Zezi, ek li konn zot bien. Sertin parmi zot tom fami ar li. Bann frer Zak ek Zan sirman kouzin ar Zezi. Ek sertin panse ki Alfe se frer Zozef, papa adoptif Zezi. Si sa li vre, alor garson Alfe, lapot Zak, tom kouzin ar Zezi.
Biensir, Zezi pena okenn problem pou rapel nom so bann zapot. Me eski ou, ou rapel zot? Rapel ki ena de Simon, de Zak, ek de Zida. Simon (Pier) ena enn frer ki apel Andre, ek Zak (garson Zebede) ena enn frer ki apel Zan. Sa pou ed ou rapel nom wit zapot. Parmi kat ki reste ena enn ki ti ramas tax (Matie), enn ki’nn gagn bann dout apre (Toma), enn ki ti anba enn pie kan Zezi ti apel li (Natanael), ek kamarad Natanael (Filip).
Onz parmi bann zapot res dan Galile, rezion kot Zezi osi reste. Natanael res Kana. Filip, Pier, ek Andre sorti Betsaid. Avek letan, Pier ek Andre inn al res Kafarnaom, landrwa kot kitfwa Matie reste. Zak ek Zan osi res dan Kafarnaom ouswa pre ar sa lavil-la, kot zot ena enn biznes lapes. Zida Iskaryot, ki plitar inn trayir Zezi, kitfwa ti sel zapot ki sorti depi Zide.
