Dan enn sinagog Kafarnaom, Zezi pe ansegn bann dimounn ki limem vre dipin ki sorti dan lesiel. Li pe explik zot seki li’nn deza dir bann dimounn ki’nn retourn dan kote les Lamer Galile. Se zotmem ki ti gagn dipin ek pwason pou manze par enn mirak.

Zezi dir zot: “Zot gran dimoun finn manz lamann dan dezer, zot tou finn mor.” Apre sa, li fer enn konparezon ar limem: “Momem dipin vivan ki finn desann depi lesiel; si kikenn manz sa dipin la, li pou viv toultan; dipin ki mo done, se mo prop lekor [“laser,” NW] pouki lemonn antie gagn lavi.”​—Zan 6:48-51.

Dan printan lane 30 Nou Lepok, Zezi ti dir Nikodem ki Bondie telman kontan lemond ki li’nn avoy so Garson pou sov bann dimounn. Ek asterla, Zezi met laksan lor linportans pou manz so laser, setadir pou ena lafwa dan sakrifis ki li pou fer. Se koumsa ki nou kapav gagn lavi pou touletan.

Me bann dimounn ankoler ar bann parol Zezi. Zot demande: “Kouma li kapav donn nou so lekor pou manze?” (Zan 6:52) Zezi anvi ki zot konpran ki li pe koz dan enn fason sinbolik. Alor, pou ed zot konpran, li dir:

“Si zot pa manz lekor Garson Limanite e zot pa bwar so disan, zot pa pou gagn lavi dan zot. Seki manz mo lekor e bwar mo disan gagn lavi eternel, . . . parski mo lekor, samem vre nouritir ek mo disan, samem vre labwason. Seki manz mo lekor e bwar mo disan li res dan mwa e mwa dan li [“res ini avek mwa,” NW].”​—Zan 6:53-56.

Mazine kouma sa bann parol-la kapav ofans bann Zwif ki pe ekout li! Kitfwa zot pe panse ki Zezi pe ankouraz bann dimounn pou vinn bann kanibal ouswa pou dezobeir lalwa ki Bondie ti done lor disan. (Zenez 9:4; Levitik 17:10, 11) Me Zezi pa pe dir zot ki zot bizin vremem manz so laser ouswa bwar so disan. Li pe koz dan enn fason sinbolik. Li pe explik zot ki tou bann ki anvi gagn lavi pou touletan bizin ena lafwa dan sakrifis ki li pou fer kan li pou donn so lekor imin parfe ek vers so disan. An realite, boukou parmi so bann disip osi pa konpran seki li pe ansegne. Sertin mem dir: “Sa langaz-la sokan! Kisannla kapav ekout enn koze koumsa?”​—Zan 6:60, NW.

Zezi remarke ki sertin parmi so bann disip pe koz dousman-dousman ant zot. Alor, li demann zot: “Eski seki mo pe dir ofans zot? Ki zot pou dir aster, si zot trouv Garson Limanite mont lao kot li finn sorti? . . . Parol ki mo finn prononse, samem Lespri, samem lavi. Me ena ki pa krwar parmi zot.” Akoz sa, boukou parmi bann disip kit Zezi ek aret swiv li.​—Zan 6:61-64.

Lerla, Zezi demann so 12 zapot: “Zot anvi ale zot osi?” Pier reponn: “Segner, kot [“ver kisannla,” NW] nou pou ale? Tomem ki ena parol lavi eternel. Nou finn krwar e nou finn kone ki to tousel Sin, ki to sorti kot Bondie.” (Zan 6:67-69) Mem si dan sa ler-la Pier ek bann lezot zapot pa finn bien konpran seki Zezi ti pe ansegne, sa parol-la montre ki zot bien determine pou res fidel, pa vre?

Seki Pier finn dir fer plezir Zezi. Pourtan li dir zot: “Mo finn swazir zot douz, pa vre? Pourtan enn parmi zot enn diab (koz manti pou gat repitasion).” (Zan 6:70, NW.) Zezi pe koz lor Zida Iskaryot. Li posib ki Zezi ti fini koumans trouv Zida pe pran enn move lapant.

Zezi bien kontan pou trouv Pier ek bann lezot zapot determine pou kontign swiv li ek pou partisip avek li dan sa travay ki sov lavi-la.