Kan Zezi ti kot enn sef parmi bann Farizien, li’nn ansegn bann leson bien inportan. Asterla, pandan ki Zezi pe kontign so larout pou al Zerizalem, bann lafoul dimounn vinn ansam ar li. Kifer? Eski zot vremem anvi vinn so disip, ninport ki sa kapav inplike?

Pandan ki zot pe vwayaze, Zezi dir enn kitsoz ki kitfwa sok sertin. Li dir: “Si kikenn vinn ar mwa e . . . [“pena laenn pou,” NW] so papa ek so mama, so fam ek so zanfan, so frer, so ser, ek so prop lavi, li pa kapav vinn mo disip.” (Lik 14:26) Me ki Zezi pe rod dir?

Zezi pa pe rod dir ki tou bann ki vinn so disip bizin ena laenn pou zot fami. Me plito, zot bizin kontan li plis ki zot fami. Fode pa zot kouma sa zom dan lexanp ki Zezi ti mansione lor dine la, ki pa ti aksepte enn linvitasion inportan akoz li ti fek marye. (Lik 14:20) Finn ekrir lor Zakob, anset bann Zwif, ki li ti “ena laenn” pou Lea me li ti kontan Rashel, savedir ki li ti kontan Lea mwins ki so ser Rashel.​—Zenez 29:31; not.

Remarke ki Zezi dir ki so disip bizin ena laenn pou “so prop lavi.” Savedir ki enn vre disip bizin kontan Zezi plis ki so prop lavi, ek li bizin mem dispoze donn so lavi si neseser. Alor, li kler ki vinn enn disip Zezi se enn responsabilite bien-bien serye. Fode pa pran sa desizion-la lao-lao, bizin bien reflesi avan pran li.

Zezi explike ki so disip bizin atann pou gagn bann difikilte ek bann persekision. Li dir: “Si kikenn pa sarye so poto soufrans ek swiv mwa, li pa kapav vinn mo disip.” (Lik 14:27, NW.) Wi, parey kouma Zezi, so bann disip bizin pre pou soufer. Zezi ti mem dir ki so bann lennmi pou touy li.

Alor, bann lafoul ki pe vwayaz ar Zezi bizin bien reflesi seki sa inplike pou vinn enn disip Kris. Zezi servi enn lexanp pou montre linportans sa lide-la. Li dir: “Si enn parmi zot anvi mont enn miray [“ranz enn latour,” NW], eski dabor li pa asize pou kalkile komie sa pou kout li, ek apre li gete si li ena ase kas pou fini travay la? Sinon, . . . li koul fondasion e apre li pa kapav fini.” (Lik 14:28, 29) Alor, avan ki zot vinn so disip, bann ki pe vwayaz ar Zezi bizin bien deside pou asim bann responsabilite ki sa inplike. Zezi servi enn lot lexanp pou montre linportans sa lide-la:

“Kan enn lerwa al lager kont enn lot lerwa, eski li pa dabor asize, pran konsey pou gete si avek so dis mil zom li kapav al lager kont so lennmi ki ena vin-mil? Si li pa kapav, letan lotla ankor lwin, li avoy enn delegasion [“bann anbasader,” NW] pou fer lape.” Pou met laksan lor sa pwin-la, Zezi dir: “Alors, si zot pa renons  tou seki zot posede, zot pa pou kapav vinn mo disip.”​—Lik 14:31-33.

Biensir, Zezi pa pe dir sa zis pou bann dimounn ki pe vwayaz ar li. Tou dimounn ki aprann konn Lekris bizin dispoze pou fer seki li dir isi. Zot bizin pre pou sakrifie tou seki zot ena, zot bann dibien ek mem zot lavi, si zot anvi vinn so disip. Se enn kitsoz lor ki bann dimounn bizin bien reflesi ek priye.

Asterla, Zezi rekoz lor enn size ki li ti koze dan so Sermon lor Montagn, kan li ti dir ki so bann disip zot “disel pou lemonn.” (Matie 5:13) Parey kouma disel ena kapasite pou prezerv bann kitsoz, bann disip Zezi kapav prezerv bann dimounn, setadir ed bann dimounn pou pa pouri lor plan spiritiel ek moral. Asterla ki’nn ariv ver lafin so minister, Zezi dir: “Disel enn bon kiksoz; me si li perdi so gou [“lafors,” NW], kouma pou kapav redonn li so gou?” (Lik 14:34) Bann dimounn ki pe ekout Zezi kone ki ena bann kalite disel ki inpir ek initil, parski li melanze ar bann lezot kitsoz.

Alor, Zezi pe montre ki fode pa ki so bann disip perdi zot determinasion, mem bann ki servi li depi lontan. Si sa arive, zot pou initil parey kouma disel ki’nn perdi so lafors. Lerla, lemond pou boufonn zot. Anplis, zot pou perdi faver Bondie, ek zot kapav mem sali So nom. Pou ki enn kitsoz koumsa pa arive, Zezi donn sa konsey-la: “Ekout bien, seki ena zorey pou tande.”​—Lik 14:35.