1, 2. Ki bann kestion nou pou examine an rapor avek seki Zezi ti dir dan Matie 24:14?

ZEZI ti predir ki pandan bann dernie zour, pou pres bon nouvel lor Rwayom Bondie ar tou dimounn. (Matie 24:14) Antan ki Temwin Zeova, lemond antie konn nou pou nou travay predikasion. Sertin dimounn kontan mesaz ki nou prese, alor ki lezot non. Me, mem parmi bann ki pa kontan nou mesaz, ena ki respekte nou pou travay ki nou fer. Nou dir ki se noumem ki pe fer travay ki Zezi ti predir. Eski nou ena drwa dir sa? Kouma nou pou sir ki nou predikasion se travay ki Zezi ti predir?

² Boukou group relizie pretann ki zot pe pres mesaz Zezi. Me zot predikasion se zis bann sermon ki zot fer dan legliz, dan televizion, ouswa lor Internet. Ouswa zot zis dir bann dimounn kouma zot inn aprann konn Zezi. Lezot panse ki kan zot rann servis bann ki bizin led ouswa kan zot fer bann travay benevol antan ki dokter,  ners, ouswa profeser, se zot fason prese. Me, eski sa bann aktivite-la, se samem travay predikasion ki Zezi ti pe koze?

3. Dapre Matie 28:19, 20, ki kat kitsoz bann disip Zezi bizin fer?

³ Eski Zezi anvi ki so bann disip atann ki bann dimounn vinn ver zot? Non! Apre so rezireksion, Zezi ti dir ar plizir santenn so bann disip: “Al dan tou bann pep ki ena e fer zot vinn mo bann disip; batiz zot. . . . Montre zot met anpratik tou seki mo finn komann zot.” (Matie 28:19, 20) Alor, antan ki bann disip Zezi, ena kat kitsoz ki nou bizin fer. Nou bizin fer bann disip, batiz zot, ek ansegn zot. Me premie kitsoz ki nou bizin fer, se al ver bann dimounn. Enn biblis explik sa: “‘Ale,’ se enn kitsoz ki tou krwayan bizin fer, ki li bizin al lot kote semin ouswa lot kote losean.”​—Matie 10:7; Lik 10:3.

4. Ki sa inplike vinn bann ki “lapes dimounn”?

⁴ Ki Zezi ti atann so bann disip fer? Eski li ti anvi ki zot prese sakenn so kote, ouswa ki zot organize antan ki enn group? Li ti pou inposib ki enn sel dimounn pres ar bann dimounn “dan tou pep.” Akoz sa, so bann disip ti pou bizin organize antan ki enn group. Se samem ki Zezi ti pe rod dir kan li ti invit so bann disip pou vinn bann ki “lapes dimoun.” (Lir Matie 4:18-22.) Zezi pa ti pe koz lor enn sel peser ki pe servi so prop lalign ek labwet, ek ki pe atann enn pwason vinn mord lamson. Okontrer, Zezi ti pe koz lor enn lot kalite lapes, setadir lapes avek file. Pou lapes dan sa fason-la, boukou dimounn bizin travay ansam, bizin travay dir ek bien organize.​—Lik 5:1-11.

5. Ki kat kestion nou bizin reponn, ek kifer?

⁵ Pou kone kisannla ki pe pres bonn nouvel azordi, nou bizin reponn sa kat kestion-la:

• Ki mesaz bann disip Zezi bizin prese?

• Ki bizin pous zot pou fer sa travay-la?

• Ki bann metod zot bizin servi?

• Ki dimansion sa travay-la bizin pran, ek komie letan sa bizin kontigne?

Repons sa bann kestion-la pou ed nou kone kisannla pe fer sa travay ki sov lavi la. Sa pou osi ed nou pou plis determine pou kontign prese.​—1 Timote 4:16.

6. Kifer to kapav sir ki bann Temwin Zeova pe pres mesaz ki bizin?

⁶ Lir Lik 4:43. Zezi ti pres “bonn nouvel Rwayom Bondie,” ek li anvi ki so bann disip osi fer parey. Ki group dimounn ki pe pres sa mesaz-la ar tou  dimounn? Se zis bann Temwin Zeova! Mem bann ki pa kontan nou zot rekonet sa. Par exanp, get seki enn pret misioner ki’nn viv dan plizir pei ti dir enn Temwin Zeova. Dan sak pei, pret-la ti demann bann Temwin Zeova ki mesaz zot pe prese. Pret-la ti dir: “Zot tou telman bet ki zot ti donn mem repons: ‘Bon nouvel lor Rwayom Bondie.’” Seki sa pret-la finn dir montre ki nou pa bet, me ki nou ini antan ki bann vre Kretien. (1 Korintien 1:10) Rwayom Bondie, se osi mesaz prinsipal ki ena dan Latour Degard Pe Anons Rwayom Zeova. An mwayin inprim 59,000,000 kopi sak nimero sa magazinn-la dan 254 lang. Akoz sa, li’nn vinn magazinn ki pli distribie dan lemond antie!

7. Kouma nou kone ki bann pret pa pe pres mesaz ki bizin?

⁷ Bann pret pa pe pres lor Rwayom Bondie. Si zot koz lor Rwayom Bondie, boukou parmi zot dir ki se enn santiman ki dan leker bann dimounn. (Lik 17:21) Zot pa ansegn bann dimounn ki Rwayom Bondie se enn gouvernman ki dan lesiel ek ki pe dirize par Zezi. Olie sa, zot abitie koz lor Zezi kan ena Nwel ouswa Pak. Zot pa explike ki Rwayom Bondie pou rezoud tou bann problem limanite ek ki biento li pou tir tou lemal ki existe lor later. (Revelasion 19:11-21) Li kler ki bann pret pa kone seki Zezi pou fer antan ki Lerwa dan Rwayom Bondie. Ek parski zot pa konpran mesaz Zezi, zot pa konpran kifer zot bizin prese.

8. Ar ki lobzektif fode pa nou fer travay predikasion?

⁸ Fode pa ki bann disip Zezi fer travay predikasion pou gagn kas ouswa pou aranz bel-bel batiman. Zezi ti dir: “Zot finn resevwar tou kado, donn tou kado.” (Matie 10:8) Alor, fode pa nou fer travay predikasion vinn enn biznes. (2 Korintien 2:17) Fode pa ki bann disip Zezi demann enn lapey pou zot travay predikasion. (Lir Zistwar Bann Apot 20:33-35.) Mem si linstriksion Zezi bien kler, laplipar legliz ramas kas pou ki zot antretenir zot legliz ek pou pey zot pret ek lezot dimounn ki travay dan legliz. Ek gras-a sa, boukou pret finn vinn bien ris.​—Revelasion 17:4, 5.

9. Kouma bann Temwin Zeova montre ki zot fer sa travay-la avek bann bon mobil?

⁹ Eski bann Temwin Zeova ramas kas dan zot bann renion ek lasanble? Non! Zot travay soutenir par bann kontribision volonter. (2 Korintien 9:7) Pourtan lane dernie, bann Temwin Zeova finn pas preske de milyar lertan pou pres bonn nouvel ek finn kondir plis ki nef milyon letid Labib sak mwa. Pa donn zot okenn lapey kan zot prese,  me zot kontan pou servi zot prop kas pou fer sa travay-la. Enn kikenn ki fer bann resers finn dir sa lor travay bann Temwin Zeova: “Zot lobzektif prinsipal se prese ek ansegne.” Li ti osi dir ki bann Temwin Zeova pena enn pret ki zot bizin peye. Alor, si nou pa fer sa travay-la pou gagn kas, ki pous nou pou prese? Volonterman nou fer sa travay-la parski nou kontan Zeova ek nou kontan bann dimounn. Sa latitid-la akonpli profesi ki trouv dan Psom 110:3, NW. * (Lir.)

10. Ki bann metod Zezi ek so bann disip ti servi pou prese?

¹⁰ Ki bann metod Zezi ek so bann disip ti servi pou prese? Zot ti al ninport kotsa zot ti kapav zwenn bann dimounn. Par exanp, zot ti pres lor semin ek dan bazar. Zot ti osi pres lakaz-lakaz pou rod bann dimounn kot zot. (Matie 10:11; Lik 8:1; Zistwar Bann Apot 5:42; 20:20) Predikasion lakaz-lakaz ti enn fason bien organize pou zwenn tou sort kalite dimounn.

11, 12. Konsernan predikasion bonn nouvel, ki nou kapav dir lor zefor ki bann relizion swadizan Kretien pe fer konpare ar pep Zeova?

¹¹ Bann relizion ki dir zot Kretien, eski zot pres bonn nouvel parey kouma Zezi ti fer? Normalman, pey bann pret pou ki zot fer enn sermon pou zot bann krwayan. Sa bann sef relizie-la pa fer bann nouvo disip, me plito zot esey gard bann manb ki deza dan zot legliz. Parfwa, zot finn esey ankouraz zot  bann manb pou prese. Par exanp, an lan 2001, Lepap Jean Paul II ti dir dan enn let ki bann manb legliz ti bizin pres bann Levanzil ek ena mem zel ki lapot Pol, ki ti dir: “Maler lor mwa si mo pa pres Levanzil.” Apre sa, Lepap ti dir ki sa travay predikasion-la, pa zis bann dimounn ki’nn gagn enn formasion ki bizin fer sa, me tou bann manb legliz. Selman, bien tigit finn fer sa.

¹² Ki nou kapav dir lor bann Temwin Zeova? Se zis zot tousel ki prese ek dir ki Zezi pe regne kouma Lerwa depi 1914. Zot obeir Zezi ek zot fer travay predikasion vinn enn priorite dan zot lavi. (Mark 13:10) Liv Pillars of Faith​—American Congregations and Their Partners dir ki travay predikasion bien inportan pou bann Temwin Zeova. Li dir osi ki, kan bann Temwin trouv bann dimounn ki gagn fin, ki tousel, ek malad, zot esey ed sa bann dimounn-la. Me zame zot pa bliye ki zot lobzektif prinsipal se anons lafin sa lemond-la ek osi ansegn bann dimounn ki pou ena enn delivrans. Bann Temwin Zeova kontign pres sa mesaz-la ek imit bann metod ki Zezi ek so bann disip ti servi pou prese.

13. Ki dimansion travay predikasion bizin pran?

¹³ Zezi ti dir ki so bann disip ti pou pres ek ansegn bonn nouvel “partou dan lemonn.” Zezi ti donn zot lord pou fer bann disip dan “tou bann nasion.” (Matie 24:14; 28:19, 20) Savedir ki ti pou bizin pres bonn nouvel lor later antie.

14, 15. Ki prouve ki bann Temwin Zeova finn realiz profesi Zezi konsernan dimansion ki travay predikasion ti pou bizin pran? (Get zimaz dan koumansman lartik.)

¹⁴ Se zis bann Temwin Zeova ki’nn realiz profesi Zezi, ki ti dir ki ti pou pres bonn nouvel dan lemond antie. Kifer nou dir sa? Dan l’États-Unis, ena apepre 600,000 pret dan bann relizion swadizan Kretien, alor ki ena apepre 1,200,000 Temwin Zeova ki pe pres bonn nouvel dan sa pei-la. Dan lemond antie, ena 400,000 pret Katolik, me ena plis ki wit milyon Temwin Zeova ki pe pres bonn nouvel dan 240 pei ek teritwar. Li kler ki bann Temwin Zeova pe pres bonn nouvel dan lemond antie, ek sa pe donn loner ek laglwar Zeova!​—Psom 34:1; 51:15.

¹⁵ Antan ki Temwin Zeova, nou lobzektif se pres bonn nouvel ar maximum dimounn posib avan ki lafin vini. Pou fer sa travay-la, nou finn tradir ek pibliye plizir milyon liv, magazinn, trak ek linvitasion lasanble ek Memoryal dan plis ki 700 lang. Nou ofer bann dimounn sa bann piblikasion-la san ki zot bizin peye. Zis lane dernie, nou finn pibliye apepre 4.5 milyar piblikasion ki baze lor Labib. Nou finn osi pibliye plis ki 200 milyon kopi Les Saintes Écritures. Traduction du monde nouveau dan plis ki 130 lang. Nou sit Internet ofisiel disponib dan plis ki 750 lang. Se zis bann Temwin Zeova ki pe fer enn travay extraordiner koumsa.

16. Kouma nou kone ki bann Temwin Zeova ena lespri Bondie?

 ¹⁶ Komie letan ankor nou pou kontign prese? Zezi ti dir ki ti pou pres bonn nouvel ziska ki lafin vini. Antan ki Temwin Zeova, nou finn kapav andire dan travay predikasion pandan bann dernie zour zis parski nou ena lespri sin Zeova. (Zistwar Bann Apot 1:8; 1 Pier 4:14) Kitfwa sertin dimounn relizie kapav dir: “Nou ena lespri sin.” Me eski zot pe kapav fer travay ki bann Temwin Zeova pe fer pandan sa bann dernie zour-la? Sertin group finn esey pres parey kouma nou, me zot pa finn reisi. Lezot dispoze pou prese, me zis pou enn sertenn letan. Kitfwa ena sertin ki prese lakaz-lakaz, me zot pa pres bon nouvel lor Rwayom Bondie. Alor, se pa zot ki pe fer sa travay ki Zezi ti koumanse la.

17, 18. (a) Kifer nou kapav sir ki se bann Temwin Zeova ki pe pres bon nouvel lor Rwayom Bondie azordi? (b) Kouma nou pou kapav kontign fer sa travay-la?

¹⁷ Alor, kisannla pe pres bon nouvel lor Rwayom Bondie azordi? Se zis bann Temwin Zeova! Kouma nou konn sa? Parski nou pe pres mesaz ki bizin, bon nouvel lor Rwayom Bondie. Nou rod bann dimounn kan nou al prese, alor nou pe servi bann metod ki bizin. Nou prese avek bon mobil, setadir, nou kontan Zeova ek nou kontan bann dimounn. Nou travay predikasion ena enn extra gran dimansion parski nou pres avek bann dimounn dan tou nasion ek lang. Ek nou pou kontign pres bon nouvel lor Rwayom Bondie ziska ki lafin vini!

¹⁸ Li vremem extraordiner pou trouv gran travay ki pep Zeova pe fer pou pres bonn nouvel pandan bann dernie zour. Me kouma nou pe kapav fer tou sa travay-la? Lapot Pol explike: “Se Bondie ki, pou so prop plezir pe donn zot lafors, pou ki zot ena dezir ek kapasite pou azir.” (Filipien 2:13, NW.) Ki Zeova kontign donn nou lafors pou ki nou fer tou seki nou kapav pou kontign pres bonn nouvel!​—2 Timote 4:5.