1. Kifer batem bien inportan? (Get zimaz dan koumansman lartik.)

SAK lane, plizir milye etidian Labib pran batem. Parmi zot, ena boukou zenn, adolesan ek bann zanfan osi. Sertin finn grandi dan laverite. Eski to dan sa ka-la? Si wi, to’nn fer enn bon kitsoz. Sak Kretien bizin pran batem. Li inportan ki li pran batem pou li kapav gagn delivrans ek viv pou touletan.​—Matie 28:19, 20; 1 Pier 3:21.

2. Kifer fode pa to per pou vwe to lavi ar Zeova?

² Kan to’nn pran batem, Zeova inn koumans beni twa dan boukou fason. Me to finn gagn osi bann responsabilite. Kouma? Zour to batem, frer ki ti fer diskour batem ti poz sa kestion-la: “Lor baz sakrifis Zezi Kris, eski ou finn repanti ar ou bann pese ek eski ou finn vwe ou lavi  ar Zeova pou fer so volonte?” To ti reponn wi. To ti promet pou kontan Zeova ek pou fer so volonte pas avan tou kitsoz dan to lavi. Eski to bizin regrete ki to’nn fer sa promes bien serye la? Non! Zame to pou regrete ki to pe les Zeova diriz to lavi. Bann ki pa konn Zeova form parti dan lemond Satan. Satan Lediab pa gagn zot traka ni to traka osi. An realite, sa pou fer Satan Lediab extra kontan si to perdi to lesperans pou viv pou touletan parski to’nn al dan so kote ek to’nn rezet Zeova.

3. Kouma Zeova finn beni twa parski to finn vwe to lavi ar Li?

³ Reflesi kouma Zeova finn beni twa parski to finn vwe to lavi ar Li ek to finn pran batem. To finn donn to lavi Zeova, ek akoz sa to kapav dir avek konfians: “Zeova avek mwa; mo pa pou per. Ki enn dimounn kapav fer mwa?” (Psom 118:6, NW.) Kan nou met nou dan kote Zeova ek nou kone ki nou rann Li fier, sa donn nou pli gran loner ki kapav ena.

4, 5. (a) Kifer nou kapav dir ki vwe nou lavi ar Zeova se enn responsabilite personel? (b) Ki difikilte tou bann Kretien gagne?

⁴ To pa kapav konsider to relasion avek Zeova kouma enn package Internet ki to paran peye. Mem si to ankor pe res avek to bann paran, to relasion avek Zeova se to responsabilite personel. Kifer li inportan ki to rapel sa? Personn parmi nou pa kone exakteman kouma nou lafwa pou teste dan lavenir. Par exanp, kitfwa to’nn pran batem avan ki to vinn adolesan. Asterla ki to enn adolesan, to ena bann nouvo santiman ek bann nouvo problem. Enn tifi adolesan ti dir: “An zeneral, enn zanfan pa pou regrete ki li enn Temwin Zeova zis parski li pa gagn enn bout gato laniverser dan lekol. Me dan de-trwa lane, kan bann dezir sexiel vinn pli for, la enn adolesan pou bizin ena konviksion ki obeir bann lalwa Zeova se meyer swa ki li kapav fer.”

⁵ Pa zis bann zenn ki pou bizin fer fas ar bann nouvo difikilte. Mem bann ki pran batem kan zot adilt gagn bann difikilte ki zot pa atann ek ki teste zot lafwa. Kitfwa zot gagn bann difikilte dan zot maryaz, zot travay, ouswa akoz zot lasante. Ninport ki laz nou ena, sakenn parmi nou bizin res fidel ar Zeova dan bann diferan sitiasion.​—Zak 1:12-14.

6. (a) Ki to bizin rapel konsernan promes ki to ti fer Zeova? (b) Ki to kapav aprann dan Filipien 4:11-13?

⁶ Pou ed twa res fidel, zame pa bliye promes ki to finn fer Zeova. To pa ti fer okenn kondision kan to ti fer sa promes-la. To ti promet Souverin liniver ki to pou servi Li ninport ki arive, mem si to bann kamarad ouswa to bann paran aret servi Li. (Psom 27:10) Dan ninport ki sitiasion, demann Zeova pou ed twa pou tini promes ki to’nn fer Li.​—Lir Filipien 4:11-13, NW.

7. Ki savedir travay pou to delivrans “avek lakrint ek tranbleman”?

⁷ Zeova anvi ki to vinn so kamarad. Me to bizin fer zefor pou gard sa lamitie-la  for ek pou travay pou to delivrans. Filipien 2:12 dir: “Kontign travay pou zot delivrans avek lakrint ek tranbleman.” Savedir ki nou bizin reflesi bien kouma nou kapav res pros ar Zeova ek res fidel ar Li ninport ki arive. Fode pa nou zis panse ki otomatikman nou pou kapav fer sa. Rapel ki mem sertin dimounn ki finn servi Bondie pandan boukou lane pa finn res fidel. Ki bann kitsoz pratik to kapav fer pou ed twa pou kontign travay pou to delivrans?

8. Ki savedir etidie Labib? Kifer li inportan?

⁸ Pou nou kapav vinn kamarad Zeova, nou bizin ekout Li ek nou bizin koz ar Li. Mwayin prinsipal pou nou ekout Zeova se kan nou etidie Labib. Sa inplik lir ek medit lor Parol Bondie ek bann piblikasion ki baze lor Labib. Me etidie Labib, pa vedir rapel bann linformasion parey kouma to ti pou fer pou enn lexame dan lekol. Okontrer, li kouma enn vwayaz kot to aprann ek dekouver bann nouvo kitsoz lor Zeova. To pou vinn pli pros ar Bondie, ek Li pou vinn pli pros ar twa osi.​—Zak 4:8.

9. Ki bann zouti finn ed twa dan to letid personel?

⁹ Lorganizasion Zeova donn twa bann zouti ki to bizin pou ed twa dan to program letid. Par exanp, lor jw.org (an Franse) dan parti « Adolescents »  ena enn seksion ki apel « Explore la Bible ». Sa pou ed twa pou aplik seki to aprann dan bann zistwar ki ena dan Labib. Lor jw.org, ena osi bann fiches d’étude ki baze lor liv “Ki la Bible enseigné vrai-mem?” Sa kapav ed twa pou ena enn lafwa for ek pou explik to bann krwayans ar lezot. To kapav trouv lezot lide ankor pou to letid personel dan lartik « Les jeunes s’interrogent : Comment trouver du plaisir à lire la Bible ? » ki ti paret dan Réveillez-vous ! Avril 2009. Letid ek meditasion, se bann kitsoz inportan pou to kapav travay pou to delivrans.​—Lir Psom 119:105, NW.

10. Kifer enn Kretien batize bizin priye?

¹⁰ Kan nou etidie Labib, nou ekout Zeova, ek kan nou priye, nou koz ar Li. Fode pa nou panse ki lapriyer se zis enn labitid ouswa se enn ‘port-boner’ ki pou fer nou reisi dan seki nou pe fer. Lapriyer se enn vre kominikasion ki nou ena avek nou Kreater. To rann twa kont: Zeova anvi tann seki to ena pou dir! (Lir Filipien 4:6.) Alor, kan ena enn kitsoz ki pe trakas twa, Labib dir twa “zet to fardo lor Zeova.” (Psom 55:22, NW.) Plizir milyon frer ek ser kapav dir twa ki sa konsey-la finn ed zot. Sa kapav ed twa osi!

11. Kifer to bizin touletan remersie Zeova?

¹¹ Selman, fode pa nou priye zis kan nou bizin led Zeova. Labib rapel nou: “Montre ki zot ena rekonesans.” (Kolosien 3:15, NW.) Parfwa, nou telman trakase akoz nou bann problem ki nou pa remark tou bann bon kitsoz ki nou ena. Alor esey fer sa: Sak zour, mazinn omwin trwa kitsoz ki Zeova fer pou twa ek lerla, priye Zeova ek remersie Li pou sa bann kitsoz-la. Enn adolesan ki apel Abigail ki’nn pran batem kan li ti ena 12 an, dir: “Mo panse ki Zeova merit nou rekonesans plis ki ninport kisannla dan liniver. Sak fwa nou bizin remersie Li pou tou bann kado ki Li donn nou.” Parfwa Abigail demann limem enn kestion ki li’nn deza tande: “Si demin mo leve avek zis bann kitsoz pou ki mo finn remersie Zeova zordi, ki mo pou ena?” * (Get not.)

12, 13. Kouma personelman to finn fer lexperyans ki Zeova Li bon, ek kifer li inportan ki to reflesi lor fason ki Zeova finn ed twa?

¹² Zeova ti ed Lerwa David pou andir boukou sitiasion difisil. Alor, par lexperyans David inn kapav dir: “Goute e gete konbien LESEGNER [“Zeova,” NW] li bon. Bienere bann ki swazir so proteksion.” (Psom 34:8) Sa verse-la montre nou ki nou bizin trouve par noumem kouma Zeova Li bon avek nou. Kan to lir Labib ek bann piblikasion  ek osi kan to asiste bann renion, to aprann kouma Bondie finn ed lezot pou res fidel. Me amezir ki to relasion avek Zeova vinn pli for, to pou trouve kouma Zeova pe ed twa. Kouma personelman to finn fer lexperyans ki Zeova Li bon?

¹³ Sak Kretien finn gout bonte Zeova dan enn fason spesial. Li finn invit sakenn parmi nou pou vinn pli pros ar Li ek so Garson. Zezi ti dir: “Personn pa kapav vinn ver mwa, si mo Papa ki finn avoy mwa pa atir li.” (Zan 6:44, NW.) Eski to santi ki Zeova inn atir twa ar Li? Ouswa eski to pans koumsa: ‘Zeova inn atir mo bann paran, mwa mo zis pe swiv’? Rapel ki kan to finn vwe to lavi ar Zeova ek to finn pran batem, to finn koumans ena to prop relasion spesial avek Li. Labib dir nou: “Si enn dimounn kontan Bondie, Bondie konn sa dimounn-la.” (1 Korintien 8:3, NW.) Touletan akord enn gran valer plas ki Zeova inn donn twa dan so lorganizasion.

14, 15. Kouma predikasion kapav ed twa pou ena enn lafwa ki pli for?

¹⁴ To gout osi bonte Zeova kan Li donn twa kouraz pou koz lor to lafwa avek lezot, ki li dan predikasion ouswa dan lekol. Kitfwa li difisil pou pres avek to bann kamarad lekol. Kitfwa to per zot reaksion. Sirman to trouv sa difisil pou explik to bann krwayans devan boukou dimounn. Me ki kitsoz kapav ed twa?

¹⁵ Reflesi kifer to krwar seki to krwar. Si bann fiches d’étude ki ena lor jw.org disponib dan to lang, servi zot. Sa kapav ed twa pou reflesi lor to bann krwayans, lor kifer to krwar sa, ek lor kouma to kapav explik sa ar lezot. Kan to ena konviksion ek kan to’nn bien prepar twa, to pou anvi rann temwaniaz lor Zeova.​—Zeremi 20:8, 9.

16. Ki kitsoz kapav donn twa kouraz pou koz lor to bann krwayans?

¹⁶ Mem si to finn bien prepar twa, kanmem sa kitfwa to santi twa malalez pou explik to bann krwayans. Enn ser ki ena 18 an, ki ti pran batem kan li ti ena 13 an, dir: “Mo konn mo bann krwayans, me parfwa mo pa reisi exprim seki mo panse.” Alor, li esey koz lor laverite dan enn fason natirel. Li dir: “Mo bann kamarad lekol santi zot alez pou koz lor bann kitsoz ki zot fer. Mwa osi mo bizin santi mwa alez pou fer parey. Alor kan mo rakont enn kitsoz, parfwa mo nek dir: ‘Mo ti pe ansegn Labib lot zour-la ek . . . ’ Apre mo kontign mo zistwar. Mem si seki mo dir pena enn lien direk avek Labib, souvan lezot anvi kone seki mo fer kan mo ansegn Labib. Parfwa zot poz bann kestion. Plis mo servi sa teknik-la, plis li vinn fasil. Ek apre, mo extra kontan!”

17. Ki kitsoz ankor kapav ed twa pou koz avek lezot?

 ¹⁷ Kan lezot trouve ki to vremem interese ar zot ek ki to respekte zot, li pou pli fasil pou zot respekte twa ek to bann krwayans. Par exanp, Olivia, ki ena 17 an ek ki’nn pran batem kan li ti pli zenn, dir: “Mo finn touletan gagn per ki si mo mansionn Labib dan enn konversasion, bann dimounn pou konsider mwa kouma enn fanatik.” Apre sa, li finn koumans trouv bann kitsoz dan enn lot fason. Olie ki li pans tro boukou lor seki fer li per, li ti dir limem: “Boukou zenn pa konn nanye lor bann Temwin Zeova. Kitfwa nou tousel bann Temwin Zeova ki zot kone. Alor, nou kondwit kapav inflians fason ki zot pou reazir. Me ki pou arive si nou tro timid, ouswa si nou pe gagn difikilte pou koz lor nou lafwa? Ki pou arive si nou paret anbarase kan nou koz lor nou lafwa? Kitfwa zot pou panse ki nou gagn onte ki nou enn Temwin. Kitfwa mem zot kapav mal reazir parski nou mank lasirans. Selman, si kan nou pe koz lor nou bann krwayans nou alez ek nou ena lasirans, ek si nou koz lor la kouma enn kitsoz normal, ena plis sans ki zot respekte nou.”

18. Ki to bizin fer pou travay pou to delivrans?

¹⁸ Nou finn trouve ki se enn responsabilite bien serye ki to travay pou to delivrans. Pou to kapav fer sa, to bizin lir ek medit lor Parol Bondie, priye Zeova, ek reflesi lor tou bann fason ki Zeova finn ed twa personelman. Tousala pou ed twa pou ena plis lasirans ki Zeova Li to Kamarad. Sa pou fer twa anvi koz lor to bann krwayans ar lezot.​—Lir Psom 73:28.

19. Kifer li vo lapenn ki to travay pou to delivrans?

¹⁹ Zezi ti dir: “Si kikenn anvi swiv mwa, li bizin renie limem ek pran so poto soufrans ek kontign swiv mwa.” (Matie 16:24, NW.) Alor, pou swiv Zezi, tou bann Kretien bizin vwe zot lavi ar Zeova ek pran batem. Me sa se zis koumansman enn zoli lavi ki pou fer zot gagn lavi pou touletan dan lemond nouvo. Alor, fer tou seki to kapav pou kontign travay pou to delivrans!