Eski To Pe Fer Zefor pou Ena Mem Fason Panse ki Zeova?
“Transform zot, ek renouvle zot fason panse.”—ROMIN 12:2, NW.
1, 2. Amezir ki nou kontign progrese, ki kitsoz nou aprann? Donn enn lexanp.
MAZINE ki enn kikenn donn enn zanfan enn kado. So bann paran dir li: “Dir mersi.” Zanfan-la fer sa, sirtou parski so bann paran inn dir li fer sa. Me amezir ki zanfan-la grandi, li koumans konpran kifer so bann paran panse ki li inportan montre lezot rekonesans. Alafin, li koumans remersie lezot par limem parski li’nn aprann montre rekonesans.
2 Nou osi finn ariv nou enn kitsoz koumsa. Kan nou ti koumans aprann laverite, nou ti aprann ki li bien inportan ki nou obeir Zeova so bann komannman debaz. Me pli nou kontign progrese, pli nou konpran fason panse Zeova, setadir, seki Li kontan, seki Li pa kontan, ek kouma Li trouv bann kitsoz. Kan nou les fason panse Zeova inflians nou bann swa ek aksion, nou koumans pans parey kouma Li.
3. Kifer nou kapav trouv sa difisil pou pans parey kouma Zeova?
3 Mem si nou kontan pou aprann pans parey kouma Zeova, parfwa li difisil pou pans parey kouma Li parski
nou inparfe. Par exanp, nou kone ki Zeova panse lor moralite, materyalis, predikasion, disan, ek lezot kitsoz ankor. Me kitfwa nou trouv sa difisil pou konpran kifer Li pans koumsa. Alor, kouma nou kapav aprann pou pans plis kouma Zeova? Ek kouma sa pou ed nou pou fer seki bon depi asterlamem ek dan lavenir?KOUMA NOU KAPAV ENA MEM FASON PANSE KI ZEOVA?
4. Ki savedir renouvle nou fason panse?
4 Lir Romin 12:2, NW. * Dan sa verse-la, lapot Pol montre nou seki nou bizin fer pou ena mem fason panse ki Zeova. Li ti dir ki nou bizin “aret fer parey kouma sa lemond-la.” Dan lartik avan, nou ti aprann ki sa lexpresion-la vedir rezet bann panse sa lemond-la ek so bann latitid. Me Pol ti osi dir ki nou bizin renouvle nou fason panse. Savedir ki nou bizin etidie Parol Bondie, konpran So bann panse, medit lor la, ek fer bann gran zefor pou ena mem fason panse ki Bondie.
5. Explik diferans ki ena ant lir ek etidie?
5 Etidie pa vedir lir vit-vit bann linformasion ouswa nek soulign bann repons. Kan nou etidie, nou bizin reflesi lor seki sa aprann nou lor Zeova, lor so fason azir, ek lor so fason panse. Nou esey konpran kifer Zeova demann nou pou fer enn kitsoz ek pou rezet enn lot kitsoz. Nou osi reflesi lor seki nou bizin sanze dan nou lavi ek dan nou fason panse. Li vre ki nou pa pou kapav medit lor tou sa bann pwin-la sak fwa ki nou etidie. Me li bon ki nou pran letan, kitfwa lamwatie letan ki nou pase pou etidie, pou medit lor bann kitsoz ki nou fek lir.—Psom 119:97; 1 Timote 4:15, NW.
6. Ki arive kan nou medit lor Parol Bondie?
6 Kan nou medit regilierman lor Parol Bondie, enn kitsoz extraordiner arive. Nou ‘verifie par noumem,’ ouswa nou konvink noumem, ki fason panse Zeova parfe. Nou koumans konpran fason ki Zeova trouv bann kitsoz, ek alafin, nou aksepte so fason panse. Se koumsa ki nou renouvle nou fason panse ek koumans pans dan enn lot fason. Tigit-tigit, nou koumans ena mem fason panse ki Zeova.
NOU BANN PANSE INFLIANS NOU BANN AKSION
7, 8. (a) Kouma Zeova konsider bann kitsoz materyel? (Get bann zimaz dan koumansman lartik.) (b) Si nou konsider bann kitsoz materyel parey kouma Zeova, ki kitsoz pou touletan pli inportan pou nou?
7 Nou bann panse inflians nou bann aksion. (Mark 7:21-23, NW; Zak 2:17) Anou examinn de-trwa lexanp ki pou ed nou bien konpran sa lide-la. Premie lexanp-la ena enn rapor ar nesans Zezi ek li montre nou dan enn fason bien kler seki Zeova panse lor bann kitsoz materyel. Se Bondie Limem ki ti swazir Zozef ek Mari pou elve so Garson, mem si zot pa ti ena boukou larzan. (Levitik 12:8; Lik 2:24) Kan Zezi ti ne, Mari ti met “li dan enn manzwar, parski pa ti ena plas pou zot dan lasal pou vwayazer.” (Lik 2:7) Si Zeova ti anvi, Li ti kapav fer an sort ki Zezi ne dan enn pli bon plas. Me Li ti anvi ki Zezi grandi dan enn fami ki ti met ladorasion pou Bondie an premie dan zot lavi. Samem ki ti pli inportan pou Zeova.
8 Seki Labib dir konsernan nesans Zezi fer nou konpran kouma Zeova konsider bann kitsoz materyel. Sertin paran anvi ki zot zanfan gagn seki pli bon lor plan materyel, mem si sa afekte zot relasion avek Zeova. Me li kler ki pou Zeova, se nou relasion avek Li ki ena plis valer. Eski to finn aksepte fason panse Zeova dan sa domenn-la? Ki to bann aksion montre?—Lir Ebre 13:5.
9, 10. Parey kouma Zeova, kouma nou montre ki li bien grav ki nou fer enn kikenn tonbe?
9 Deziem lexanp-la montre seki Zeova panse lor enn kikenn ki fer lezot tonbe, setadir ki fer lezot komet enn pese ouswa fer zot aret servi Li. Zezi ti dir: “Dimoun ki fer enn sa bann ti zanfan [“tipti,” NW] ki krwar dan mwa la tonbe, ti a preferab atas enn gro ros otour so likou e zet li dan lamer.” (Mark 9:42) Sa bann parol-la bien for! Ek nou kone ki Zezi ena mem fason panse ki so Papa. Alor, nou kapav sir ki Zeova pa kontan ditou kan enn kikenn fer enn disip Zezi tonbe.—Zan 14:9.
10 Eski nou ena mem fason panse ki Zeova ek Zezi dan sa domenn-la? Ki nou bann aksion montre? Par exanp, sirman nou kontan enn sertin fason abiye ouswa kwafe. Me ki nou pou fer si nou bann swa kitfwa sok sertin dan kongregasion, ouswa fer lezot ena bann panse imoral? Eski nou lamour pou nou bann frer pou pous nou pou abandonn nou bann preferans personel?—1 Timote 2:9, 10, NW.
11, 12. Kan nou aprann pou kontrol noumem ek pou ena laenn pou seki move, kouma sa pou protez nou?
11 Anou get enn trwaziem lexanp: Zeova deteste linzistis. (Izai 61:8) Zeova kone ki li difisil parfwa pou nou fer seki drwat akoz nou inparfe. Kanmem sa, Li anvi ki nou ena laenn pou seki move, parey kouma Li. (Lir Psom 97:10, NW. *) Si nou medit lor kifer Zeova ena laenn pou lemal, sa pou ed nou pou ena mem fason panse ki Li ek sa pou donn nou lafors pou pa fer bann move kitsoz.
Ena sertin kitsoz ki move, mem si Labib pa koz lor la dan enn fason presi
12 Si nou aprann pou ena laenn pou seki move, li pou pli fasil pou kone ki kitsoz ki move, mem si Labib pa koz lor la dan enn fason presi. Anou pran lexanp lap dancing, enn kondwit imoral ki pe vinn deplizanpli komin dan lemond azordi. Sertin dimounn panse ki li pa move, parski li pa parey kouma * (Get not.) Me eski se vremem seki Zeova panse lor la? Pa bliye, Zeova ena laenn pou tou sort kalite move kitsoz. Alor, anou res lwin ar tou seki move kan nou aprann pou kontrol noumem ek pou ena laenn pou bann kitsoz ki Zeova deteste.—Romin 12:9.
gagn relasion sexiel avek enn kikenn.PANS LOR SEKI TO POU FER DAN LAVENIR DEPI ASTERLAMEM
13. Kan nou reflesi depi asterlamem lor fason ki Zeova trouv bann kitsoz, kouma sa kapav ed nou pou pran bann bon desizion dan lavenir?
13 Kan nou etidie, nou bizin reflesi lor fason ki Zeova trouv bann kitsoz parski sa kapav ed nou pou pran bann bon desizion. Lerla, si nou dan enn sitiasion kot nou bizin pran enn desizion deswit, nou pou kone ki nou bizin fer dan sa ler-la. (Proverb 22:3) Anou examinn sertin lexanp dan Labib.
14. Ki nou aprann ar repons ki Zozef ti donn madam Potifar?
14 Kan madam Potifar ti esey sedwir Zozef, deswit Zozef ti rezet so bann lavans. Li kler ki Zozef ti fini reflesi lor seki Zeova panse lor maryaz. (Lir Zenez 39:8, 9. *) Zozef ti dir madam Potifar: “Kouma mo kapav fer enn move kitsoz koumsa ek vremem fer pese kont Bondie?” Sa montre ki li ti ena mem fason panse ki Zeova. Ki nou kapav dir lor noumem? Ki to pou fer si enn koleg travay koumans fer lizie dou ar twa? Ouswa ki to pou fer si enn kikenn avoy enn sexto lor to portab? * (Get not.) Li pli fasil pou res fidel ar Zeova si alavans nou fini kone ek aksepte so fason panse lor sa bann kitsoz-la, ek nou’nn fini deside ki nou pou fer.
15. Kouma nou kapav res fidel ar Zeova, parey kouma sa trwa Ebre-la?
15 Reflesi osi lor lexanp Shadrak, Meshak, ek Abed-Nego. Lerwa Naboukodonozor ti fer enn stati an-or ek li ti donn zot lord pou ador sa stati-la. Me dan enn fason bien ferm, sa trwa Ebre-la ti refiz fer sa. Repons bien kler ki zot ti donn lerwa ti montre ki zot ti fini reflesi lor seki ti pou arive si zot ti res fidel ar Zeova. (Exod 20:4, 5; Daniel 3:4-6, 12, 16-18) Ki nou kapav dir azordi? Ki to pou fer si to patron demann twa enn ti kontribision pou enn fet ki ena enn lien ar fos relizion? Olie ki nou atann ki enn sitiasion koumsa arive, li bon ki depi asterlamem nou medit lor seki Zeova panse lor sa bann kitsoz-la. Lerla, si enn zour nou dan enn sitiasion koumsa, li pou pli fasil pou nou dir ek fer seki bizin, parey kouma sa trwa Ebre-la.
Eski to’nn fer bann resers, ranpli enn dokiman medikal ki explik bien to volonte, ek koz avek to dokter? (Get paragraf 16)
16. Kan nou konpran bien fason panse Zeova, kouma sa kapav ed nou pou prepar nou pou enn irzans medikal?
Zistwar Bann Apot 15:28, 29) Me ena sertin teknik ki inplik disan, kot sak Kretien bizin pran so prop desizion baze lor bann prinsip Labib. Ki meyer moman pou pran sa bann desizion-la? Eski se kan nou dan lopital, kan kitfwa nou pe soufer ek ki sertin pe met presion lor nou pou pran enn desizion vit-vit? Non. Se asterla ki nou bizin fer bann resers, ranpli enn dokiman medikal ki explik bien nou volonte, ek koz avek nou dokter. * (Get not.)
16 Kan nou medit lor fason panse Zeova, sa kapav osi ed nou pou res fidel ar Li kan nou bizin pran bann desizion medikal ki irzan. Biensir, nou bien determine pou refiz transfizion disan ek osi so kat konpozan prinsipal. (17-19. Kifer li inportan ki nou konn fason panse Zeova depi asterlamem? Donn enn lexanp.
17 Finalman, reflesi lor kouma Zezi ti azir deswit kan Pier ti donn li sa move konsey-la: “Tou pou pas bien, Segner.” Pena dout ki Zezi ti medit boukou lor seki Bondie ti anvi li fer ek lor bann profesi konsernan so lavi ek so lamor lor later. Rezilta: sa ti donn li lafors pou res fidel ar Zeova ek pou donn so lavi kouma enn ranson pou tou dimounn.—Lir Matie 16:21-23.
18 Azordi, Bondie anvi ki nou vinn so kamarad ek ki nou fer nou maximum pou pres bonn nouvel. (Matie 6:33; 28:19, 20; Zak 4:8) Me sertin dimounn, ki pourtan ena bann bon lintansion, kapav esey dekouraz nou, parey kouma Pier ti fer ar Zezi. Par exanp, to patron kapav propoz twa pli boukou kas, me to kone ki to pou bizin travay plis ek ki to pa pou ena ase letan pou to renion ek predikasion. Ouswa si to ankor lekol, mazine ki to bann profeser donn twa posibilite pou fer bann lezot letid lwin ar to fami. Si sa arive, eski to pou bizin priye, fer bann resers, ek koz ar to fami ouswa bann ansien avan ki to pran enn desizion? Li pli bon si to kone ki Zeova panse lor la depi asterlamem ek ki to ena mem fason panse ki Li. Lerla, si enn zour to bizin fer fas ar sa bann sitiasion-la, kitfwa sa bann kitsoz-la pa pou mem enn tantasion pou twa. To konn exakteman seki to bizin fer, parski to’nn fini deside pou res konsantre lor to servis pou Zeova.
19 Ena ankor lezot sitiasion ki kapav teste nou fidelite anver Zeova san ki nou atann. Li vre ki nou pa kapav prepar nou pou tou sitiasion ki kapav arive. Me si nou medit lor fason panse Zeova pandan nou letid personel, nou pou rapel seki nou’nn aprann ek nou pou kone seki nou bizin fer dan ninport ki sitiasion. Alor, kan nou etidie, anou esey konpran fason panse Zeova, anou esey pans parey kouma Li, ek osi reflesi kouma sa kapav ed nou pou pran bann bon desizion depi asterlamem ek dan lavenir.
FASON PANSE ZEOVA EK TO LAVENIR
20, 21. (a) Kifer nou pou kontan nou liberte dan lemond nouvo? (b) Kouma nou kapav ere depi asterlamem?
20 Nou pe atann avek inpasians pou viv dan lemond nouvo, pa vre? Laplipar parmi nou ena lesperans pou viv pou touletan lor later ki pou vinn enn paradi. Kan Rwayom Bondie pou dirize, nou pou libere ar bann soufrans ek bann lapenn ki nou kone azordi. Ek nou pou touzour ena liberte pou swazir, dapre nou bann preferans ek nou bann dezir.
21 Me sa pa vedir ki nou liberte pa pou ena limit. Bann ki ena limilite pou kontign pran bann desizion ki an-akor avek bann lalwa Zeova ek so fason panse. Ek sa pou amenn boukou lazwa ek lape. (Psom 37:11) Me an-atandan, nou kapav ere depi asterlamem kan nou fer zefor pou ena mem fason panse ki Zeova.
^ par. 4 Romin 12:2: “Ek aret fer parey kouma sa lemond-la, me transform zot, ek renouvle zot fason panse. Koumsa zot pou kapav verifie par zotmem ki volonte Bondie, li bon, li akseptab ek li parfe.”
^ par. 11 Psom 97:10: “Zot ki kontan Zeova, zot bizin ena laenn pou seki move. Li protez lavi so bann fidel; Li sap zot dan lame bann move dimounn.”
^ par. 12 Lap dancing se enn danse kot enn kikenn ki preske touni asiz lor zenou enn kliyan ek fer bann mouvman sexiel. Dan sertin ka, kapav konsider sa kouma enn aksion sexiel imoral, kot bann ansien pou bizin form enn komite disiplinn relizie. Enn Kretien ki’nn inplike dan sa kalite sitiasion-la bizin rod led bann ansien.—Zak 5:14, 15, NW.
^ par. 14 Zenez 39:8, 9: “8 Me li ti refize ek li ti dir fam so met: ‘Mo met nepli okip nanye dan lakaz, ek li finn met tou kitsoz dan mo lame. 9 Pena personn pli gran ki mwa dan sa lakaz-la, ek li pa finn refiz mwa nanye, apart twa, parski to so fam. Alor, kouma mo kapav fer enn move kitsoz koumsa ek vremem fer pese kont Bondie?’”
^ par. 14 Bann sexto se bann mesaz, foto, ouswa video sexiel ki avoye lor portab. Dan sertin ka, kitfwa bann ansien pou bizin form enn komite disiplinn relizie. Dan sertin pei, gouvernman finn mem konsider bann adolesan ki finn avoy bann sexto kouma bann delinkan sexiel. Pou gagn plis ransegnman, al lor sit jw.org dan seksion LA BIBLE ET VOUS > ADOLESCENTS, ek lir lartik « Le sexting : que faut-il savoir ? » Ouswa get lartik « Comment parler des sextos à votre ado » dan Réveillez-vous ! Novam 2013, paz 4-5.
^ par. 16 Pou gagn plis ransegnman lor bann prinsip Labib ki kapav ed nou, get par exanp, liv Reste dan l’amour Bondié, paz 215-218.