1, 2. (a) Kouma Zezi ti reazir kan Pier ti dir li ki tou pou pas bien pou li? (Get zimaz dan koumansman lartik.) (b) Kifer Zezi ti reponn dan sa fason-la?

BANN disip Zezi ti gagn sok! Zot ti panse ki Zezi ti pou retabli rwayom Izrael, me Zezi ti dir zot ki biento li ti pou soufer ek mor. Lapot Pier ti koz an premie: “Tou pou pas bien, Segner! Sa pa pou zame ariv twa.” Me Zezi ti reponn: “Pas deryer mwa, Satan! To enn gro ros lor mo sime parski to pa pans kouma Bondie me kouma imin.”​—Matie 16:21-23; Zistwar Bann Apot 1:6.

² Kan li ti dir sa, Zezi ti montre dan enn fason kler ki fason panse Zeova bien diferan ar fason panse sa lemond ki kontrole par Satan la. (1 Zan 5:19) Pier ti ankouraz Zezi pou ena enn latitid egois ki boukou dimounn dan lemond ena. Me Zezi ti kone ki Zeova ti anvi ki li prepar li pou bann soufrans ek lamor ki li ti pou kone biento. Repons Zezi ti montre dan enn fason bien kler ki li ti  aksepte fason panse Zeova ek ki li ti rezet fason panse lemond.

3. Kifer li difisil pou aksepte fason panse Zeova ek rezet fason panse lemond?

³ Ki nou kapav dir lor noumem? Eski nou pans parey kouma Zeova, ouswa kouma bann dimounn dan lemond? Antan ki Kretien, nou fer boukou zefor pou fer Zeova plezir. Me ki nou kapav dir lor nou fason panse? Eski nou pe fer zefor pou pans parey kouma Zeova, setadir, pou trouv bann kitsoz parey kouma Li? Sa demann boukou zefor pou fer sa. Parkont, li bien fasil pou pans parey kouma bann dimounn dan lemond. Kifer? Parski nou antoure ar lespri sa lemond-la. (Efezien 2:2, NW) Anplis, bann dimounn dan lemond pans zis zotmem, ek nou kapav tante pou pans parey kouma zot. Wi, li difisil pou pans parey kouma Zeova, me li bien fasil pou pans kouma bann dimounn dan lemond.

4. (a) Ki pou arive si nou les lemond inflians nou fason panse? (b) Ki nou pou aprann dan sa lartik-la?

⁴ Si nou les lemond inflians nou fason panse, nou riske vinn egois ek rod desid par noumem seki bon ek seki pa bon. (Mark 7:21, 22, NW) Alor, li bien inportan ki nou aprann “pans kouma Bondie,” pa “kouma imin.” Sa lartik-la pou ed nou fer sa. Nou pou get bann rezon kifer kan nou ena mem fason panse ki Zeova, sa pa priv nou, nou liberte, me okontrer sa fer nou gagn bann bienfe. Nou pou osi gete kouma nou kapav evit les nou forme ouswa inflianse par fason panse sa lemond-la. Dan prosin lartik, nou pou aprann kouma nou kapav konpran ek ena mem fason panse ki Zeova dan sertin domenn an partikilie.

5. Kifer sertin dimounn pa anvi les personn inflians zot?

⁵ Sertin dimounn pa anvi les personn inflians zot fason panse. Zot dir: “Mo reflesi par momem.” Sirman zot pe rod fer konpran ki zot anvi pran zot prop desizion ek ki zot ena drwa fer sa. Zot pa anvi ki lezot inpoz lor zot ouswa fors zot pou vinn parey kouma tou dimounn. * (Get not.)

6. (a) Ki liberte Zeova donn nou? (b) Eski sa liberte-la pena limit?

⁶ Li bon nou kone ki mem si nou aksepte fason panse Zeova, nou kapav kanmem ena nou prop lopinion. Dan 2 Korintien 3:17, Labib dir: “La kot Lespri [“Zeova,” NW] prezan, la ena liberte.” Zeova les nou lib pou swazir ki kalite dimounn nou anvi ete. Nou kapav ena nou bann preferans ek swazir ki kitsoz interes nou. Zeova inn kree nou dan sa fason-la. Me sa pa vedir ki nou liberte pena limit. (Lir 1 Pier 2:16.) Kan nou bizin kone ki kitsoz bon ouswa move, Zeova anvi ki nou servi so Parol kouma enn gid. Eski sa priv nou, nou liberte, ouswa sa fer nou gagn bann bienfe?

7, 8. Eski sa priv nou, nou liberte kan nou aprann trouv bann kitsoz kouma Zeova trouve? Donn enn lexanp.

 ⁷ Anou pran enn lexanp. Bann paran esey ansegn zot zanfan bann bon prinsip. Kitfwa zot ansegn zot zanfan pou res onet, travay dir, ek respekte lezot. Ek sa pa priv bann zanfan-la zot liberte. Okontrer, bann paran-la pe prepar zot zanfan pou ki zot reisi zot lavi. Kan bann zanfan grandi ek kit lakaz, zot pou lib pou fer zot prop swa. Si zot swazir pou viv dapre bann bon prinsip ki zot paran finn ansegn zot, sa pou ed zot pran bann bon desizion ek evit bann problem, traka, ek regre.

⁸ Parey kouma enn bon paran, Zeova anvi ki so bann zanfan profit pli bon lavi ki ena. (Izai 48:17, 18) Alor, Li ansegn nou kouma nou bizin tret lezot, ek osi bann prinsip debaz pou ki nou ena enn bon kondwit. Li invit nou pou aprann trouv bann kitsoz kouma Li, Li trouve, ek pou viv an-akor avek so bann prinsip. Sa pa priv nou nou liberte. Okontrer, sa fer nou vinn pli saz ek ed nou pran bann bon desizion. (Psom 92:5; Proverb 2:1-5; Izai 55:9) Nou pou touzour ena nou bann preferans personel, me nou pou fer bann swa ki pou rann nou ere. (Psom 1:2, 3) Kan nou ena fason panse Zeova, nou gagn boukou bienfe!

9, 10. Ki kitsoz montre ki fason panse Zeova boukou pli siperyer ki fason panse lemond?

⁹ Enn lot rezon kifer nou anvi ki nou fason panse li parey kouma Zeova, se parski so fason panse boukou pli siperyer ki fason panse lemond. Lemond donn bann konsey lor moralite, lor kouma ena enn lavi fami ere, kouma nou kapav reisi dan travay, ek dan lezot domenn ankor. Me laplipar sa bann konsey-la zot pa an-akor ar fason panse Zeova. Par exanp, lemond souvan ankouraz bann dimounn pou get zis zot prop lintere ek pou aksepte limoralite sexiel. Ek parfwa, li osi konsey bann koup marye pou separe ouswa divorse pou bann rezon bet, si zot panse ki zot pou pli ere apre. Sa konsey-la al kont seki Labib ansegne. Me eski bann konsey ki lemond done azordi zot pli pratik ki bann konsey Labib?

¹⁰ Zezi ti dir: “Nou rekonet sazes enn dimounn par so bann aksion.” (Matie 11:19, NW) Mem si lemond finn fer boukou progre dan domenn teknolozi, li pa finn reisi rezoud bann gro problem ki anpes bann dimounn pou ere, kouma lager, rasis, ek krim. Anplis, lemond aksepte limoralite sexiel. Me kanmem sa, boukou dimounn rekonet ki limoralite detrir bann fami, amenn bann maladi ek bann lezot move konsekans ankor. Ki nou kapav dir lor  bann konsey ki Zeova donn nou? Bann Kretien ki finn aksepte fason panse Zeova, zot ena enn lavi fami ere, zot ena enn bon lasante, ek zot ena bann bon relasion avek zot bann frer ek ser dan lemond antie. (Izai 2:4; Zistwar Bann Apot 10:34, 35; 1 Korintien 6:9-11) Sa montre dan enn fason bien kler ki fason panse Zeova boukou pli siperyer ki fason panse lemond.

11. Kisannla ti form fason panse Moiz, ek ki rezilta sa finn amene?

¹¹ Bann fidel serviter Zeova dan lepase ti kone ki fason panse Zeova boukou pli siperyer. Par exanp, mem si Moiz “ti gagn sazes bann Ezipsien,” li ti kone ki vre sazes sorti kot Zeova. (Zistwar Bann Apot 7:22; Psom 90:12) Se pou sa rezon-la ki li ti demann Zeova: “Fer mwa konn to bann fason azir.” (Exod 33:13) Moiz ti les Zeova form so fason panse. Akoz sa, Zeova ti servi li dan enn fason extraordiner pou akonpli So volonte. Li ti osi donn Moiz loner kan Li ti koz lor Moiz kouma enn kikenn ki ena enn gran lafwa.​—Ebre 11:24-27.

12. Lor ki kitsoz Pol ti baz so bann desizion?

¹² Lapot Pol ti enn kikenn intelizan ek li ti gagn enn bon ledikasion. Li ti koz omwin de langaz. (Zistwar Bann Apot 5:34; 21:37, 39; 22:2, 3) Me li ti rezet sazes lemond ek li ti pran bann desizion ki baze lor Parol Bondie. (Lir Zistwar Bann Apot 17:2; 1 Korintien 2:6, 7, 13.) Akoz sa, li ti gagn bann bon rezilta dan so minister, ek li ti atann pou gagn enn rekonpans ki ti pou dire pou touletan.​—2 Timote 4:8.

13. Pou ki nou trouv bann kitsoz dan mem fason ki Zeova, kisannla ena responsabilite pou regle nou fason panse?

¹³ Li bien kler ki fason panse Bondie boukou pli siperyer ki fason panse lemond. Si nou swiv bann prinsip Bondie, nou pou vremem ere ek nou pou reisi nou lavi. Me Zeova pa pou fors nou pou pans parey kouma Li. “Lesklav fidel ek saz” pa kontrol nou bann panse, ek bann ansien osi pa fer sa. (Matie 24:45, NW; 2 Korintien 1:24) Sakenn parmi nou ena responsabilite pou regle so prop fason panse, pou ki nou trouv bann kitsoz dan mem fason ki Zeova. Kouma nou kapav fer sa?

14, 15. (a) Pou nou pans parey kouma Zeova, lor ki kitsoz nou bizin medite? (b) Kifer fode pa nou les bann panse lemond rant dan nou lespri? Donn enn lexanp.

¹⁴ Romin 12:2 (NW) dir: “Aret fer parey kouma sa lemond-la, me transform zot, ek renouvle zot fason panse. Koumsa zot pou kapav verifie par zotmem ki volonte Bondie, li bon, li akseptab ek li parfe.” Sa verse-la montre nou ki, ninport ki kitsoz ki ti form nou fason panse avan, asterla ki nou konn laverite nou kapav sanz nou bann panse ek fer zot vinn plis kouma fason panse Bondie. Mem si bann fakter zenetik ek nou lexperyans lavi finn inflians nou fason panse dan enn sertin fason, nou lespri ankor kapav kontign sanze. Sa sanzman-la pou depann lor seki nou met dan nou lespri. Si nou medit lor fason panse Zeova, nou pou konpran ki so fason panse touletan  bon. Lerla, nou pou anvi trouv bann kitsoz dan mem fason ki Li.

¹⁵ Me pou nou sanz nou fason panse ek pans parey kouma Zeova, nou bizin “aret fer parey kouma sa lemond-la.” Savedir ki nou bizin aret gete, lir, ek ekout bann kitsoz ki kont fason panse Zeova. Pou nou konpran kifer sa inportan, anou pran enn lexanp. Enn kikenn ki anvi ena enn pli bon lasante, kitfwa li pou desid pou manz bann manze ki nourisan. Me tou so bann zefor pou dan vid si li manz osi bann manze ki pa bon! Dan mem fason, tou nou bann zefor pou aprann fason panse Zeova pou dan vid, si nou les bann panse lemond rant dan nou lespri.

16. Kont ki kitsoz nou bizin protez noumem?

¹⁶ Eski nou kapav evit net bann fason panse lemond? Non. Nou pou touzour an kontak ar fason panse lemond parski nou pa kapav viv andeor lemond. (1 Korintien 5:9, 10) Mem kan nou prese, nou pou tann bann dimounn dir bann fos lide ek bann fos krwayans. Me mem si nou pa kapav evit net sa bann fos lide-la, nou pa bizin kontign pans lor la, ni aksepte zot. Parey kouma Zezi, deswit nou bizin rezet bann panse ki Satan anvi met dan nou lespri. Nou kapav osi protez nou kan nou evit gagn kontak ar fason panse lemond kan li pa neseser.​—Lir Proverb 4:23. *

17. Kouma nou kapav evit kontaminn nou lespri ar fason panse lemond?

¹⁷ Par exanp, nou bizin swazir bien nou bann kamarad. Labib met nou an gard kont bann kamarad ki pa ador Zeova. Si nou vinn tro pros avek zot, nou pou koumans pans parey kouma zot. (Proverb 13:20; 1 Korintien 15:12, 32, 33, NW) Nou bizin osi swazir bien nou bann divertisman. Kan nou  rezet bann divertisman ki met laksan lor teori levolision, violans, ouswa limoralite, nou evit kontaminn nou lespri avek bann panse ki “kont konesans Bondie.”​—2 Korintien 10:5.

18, 19. (a) Kifer nou bizin fer bien atansion ar bann fason panse lemond ki sournwa? (b) Ki bann kestion nou bizin demann noumem, ek kifer?

¹⁸ Nou bizin osi rekonet ek rezet bann fason panse lemond ki sournwa. Par exanp, sertin reportaz donn bann linformasion ki kapav inflians bann dimounn pou aksepte sertin lopinion politik. Lezot ankouraz bann lobzektif ki ena valer pou sa lemond-la. Sertin fim ek liv ankouraz bann rezonnman kouma “mwa avan” ek “mo fami avan,” ek zot fer sa bann rezonnman-la paret rezonab, atiran, ek mem bon. Selman, sa bann fason panse-la pa an-akor avek seki Labib dir. Labib dir ki nou ek nou fami pou vremem ere kan nou kontan Zeova plis ki tou kitsoz. (Matie 22:36-39) Anplis, sertin liv zistwar pou bann zanfan, ki kitfwa paret korek, kapav dan enn fason sournwa ankouraz bann zanfan pou aksepte bann konportman imoral.

¹⁹ Sa pa vedir ki li pa bon ki nou diverti nou. Me nou bizin demann noumem: ‘Eski mo rekonet bann fason panse lemond, mem kan zot sournwa? Eski mo pe protez mwa ek mo bann zanfan kont sertin lektir ek program televizion? Eski mo ed mo bann zanfan pou ena fason panse Zeova, pou ki zot pa les zot inflianse ar seki zot tande ek trouve dan lemond?’ Si nou konn fer diferans ant fason panse Bondie ek fason panse lemond, nou pa pou “rant dan moul sa lemonn la.”

20. Ki kitsoz pou montre kisannla ki form nou?

²⁰ Nou bizin rapel ki ena zis de sours linformasion. Enn sorti kot Zeova, ek lot-la sorti kot Satan ek so lemond. Kisannla pe form twa? Se sa kikenn kot ki to pou al rod bann linformasion la. Si nou aksepte bann lide lemond, lemond pou form nou fason panse ek nou pou reflesi, ek azir dan enn fason egois. Alor, li bien inportan ki nou swazir bien seki nou gete, lir, ekoute, ek panse.

21. Ki nou pou examine dan prosin lartik?

²¹ Dan sa lartik-la, nou finn aprann ki nou bizin rezet bann panse lemond pou ki nou kapav ena fason panse Zeova. Nou bizin osi medit lor bann panse Bondie pou ki nou pans plis kouma Li. Dan prosin lartik, nou pou aprann kouma nou kapav fer sa.