Fer Zeova Konfians ek Viv!
“Fer Zeova konfians avek tou to leker ek pa fie lor to prop lintelizans.”—PROVERB 3:5.
1. Kifer nou tou nou bizin rekonfor?
NOU tou nou bizin rekonfor. Kitfwa nou lavi ranpli ar traka ek desepsion. Kitfwa nou pe soufer parski nou malad, nou pe vinn vie, ouswa parski enn kikenn ki nou kontan inn mor. Ena parmi nou ki pe gagn maltrete ar lezot. Anplis, nou antoure ar bann dimounn ki pe vinn deplizanpli violan. Vremem, sa “bann moman difisil” la prouve ki nou pe viv “bann dernie tan,” ek sak zour ki pase, lemond nouvo pe vinn pli pre. (2 Timote 3:1) Me kanmem sa, kitfwa sa fer lontan ki nou pe atann ki bann promes Zeova realize, ek nou lavi pe vinn deplizanpli difisil. Alor, kotsa nou kapav gagn rekonfor?
2, 3. (a) Ki nou kone lor Abakuk? (b) Kifer nou pou examinn liv Abakuk?
2 Anou examinn liv Abakuk pou gagn repons sa kestion-la. Mem si Labib pa donn nou boukou detay lor lavi Abakuk, so liv vremem ankourazan. Li posib ki nom Abakuk vedir “Maye Avek Boukou Lafeksion.” Sa kapav fer referans ar fason ki Zeova may so bann serviter avek boukou lafeksion Abakuk 2:2.
pou rekonfort zot. Sa kapav osi fer referans ar fason ki bann serviter Zeova trap Li bien for. Abakuk ti koz ar Bondie ek ti poz Li bann kestion. Zeova ti fer Abakuk ekrir sa konversasion-la, parski Li ti kone ki sa ti pou fer nou gagn bann bienfe.—3 Labib pa koz boukou lor Abakuk. Li rakont zis konversasion ki Abakuk, ki ti bien dekouraze, ti gagne avek Zeova. Me liv Abakuk form parti dan “touseki ti ekrir dan Lekritir lontan . . . pouki nou gagn lesperans par landirans ek rekonfor ki li [“Lekritir,” NW] donn nou.” (Romin 15:4) Kouma liv Abakuk kapav ed sakenn parmi nou? Li kapav ed nou pou konpran ki savedir fer Zeova konfians. Ek profesi Abakuk donn nou lasirans ki nou kapav ena lape lespri malgre nou bann problem ek difikilte.
PRIYE ZEOVA
4. Kifer Abakuk ti trakase?
4 Lir Abakuk 1:2, 3. * Abakuk ti viv dan enn lepok bien difisil. Li ti antoure ar bann dimounn ki ti bien move ek violan, ek sa ti rann li bien tris. Partou kot li ti gete, li ti trouv bann Izraelit pe tret zot kamarad dan enn fason kriel ek inzis. Abakuk ti demann limem: ‘Kan sa bann move kitsoz-la pou arete? Kifer Zeova pe atann sa kantite letan-la pou azir?’ Li ti dezespere. Alor, li ti sipliy Zeova pou azir. Kitfwa Abakuk ti koumans panse ki Zeova ti nepli pran kont So pep ouswa ki Li pa ti pou azir. Eski to finn deza ena sa santiman-la?
Fode pa nou per pou dir Zeova seki trakas nou ek bann dout ki nou ena
5. Ki nou kapav aprann dan liv Abakuk? (Get zimaz dan koumansman lartik.)
5 Eski Abakuk ti poz sa bann kestion-la parski li ti nepli ena konfians an Zeova ek So bann promes? Non, zame! Abakuk ti pe demann Zeova pou ed li sirmont so bann dout ek so bann problem. Sa montre ki li pa ti perdi lespwar ek ki li ti ankor ena konfians an Zeova. Abakuk ti vremem trakase ek li ti dan konfizion. Li pa ti konpran kifer Zeova ti pe atann pou azir ek ti pe les li soufer sa kantite-la. Zeova ti inspir Abakuk pou ekrir seki ti pe trakas li, ek sa ansegn nou enn leson bien inportan. Fode pa nou per pou dir Zeova seki trakas nou ek bann dout ki nou ena. Okontrer, Li invit nou pou priye Li ek pou dir Li exakteman seki nou resanti. (Psom 50:15; 62:8) Proverb 3:5 donn nou tou sa lankourazman-la: “Fer Zeova konfians avek tou to leker ek pa fie lor to prop lintelizans.” Abakuk ti aplik sa bann parol-la dan so lavi.
6. Kifer li inportan ki nou priye?
6 Abakuk ti ena konfians an Zeova, ki li ti konsider kouma so Kamarad ek so Papa, ek li ti bien deside pou apros avek Li. Olie ki Abakuk ti zis trakase akoz so Psom 65:2) Kan nou fer sa, nou pou trouve kouma Zeova reponn nou bann lapriyer. Nou pou santi ki Li may nou avek boukou lafeksion, kan Li rekonfort nou ek gid nou. (Psom 73:23, 24) Dan ninport ki difikilte, Li pou ed nou konpran kouma Li, Li trouv nou sitiasion. Vremem, lapriyer se enn parmi bann pli bon fason pou montre Zeova ki nou fer Li konfians.
sitiasion ek ti esey regle sa par limem, li ti priye ek li ti fer Zeova konn so bann santiman ek so bann traka. Se enn bon lexanp pou nou. Zeova, ki ekout bann lapriyer, invit nou pou montre ki nou ena konfians an Li, kan nou priye Li ek nou dir Li tou seki trakas nou. (EKOUT ZEOVA
7. Kouma Zeova ti reazir kan Abakuk ti rakont Li so bann traka?
7 Lir Abakuk 1:5-7. * Apre ki Abakuk ti dir Zeova seki ti pe trakas li, kitfwa li ti demann limem kouma Zeova ti pou reazir. Parey kouma enn Papa ki ranpli ar lamour, Zeova ti konpran seki Abakuk ti resanti. Li ti kone ki Abakuk ti pe soufer ek ti pe sipliy Li pou gagn led. Alor, Zeova pa ti repros Abakuk, me Li ti fer li kone seki biento Li ti pou fer ar sa bann Zwif infidel la. An realite, Abakuk kitfwa ti premie dimounn avek ki Zeova ti dir ki bann Zwif ti pou gagn enn pinision biento.
8. Kifer Abakuk pa ti atann sa repons ki Zeova ti donn li la?
8 Zeova ti explik Abakuk ki Li ti pre pou azir. Li ti pou pini bann abitan Zida ki ti move ek violan. Kan Zeova ti dir ki sa ti pou arive “pandan ki zot ankor vivan,” Li ti montre ki sa zizman-la ti pou arive pandan ki Abakuk, ouswa bann Izraelit dan so lepok, ti pou ankor vivan. Me Abakuk pa ti atann ditou ki Zeova donn li enn repons koumsa. Bann Kaldeen, setadir bann Babilonien, ti enn pep bien kriel. Bann Izraelit ti violan, mem si zot ti konn bann komannman Zeova. Me bann Babilonien ti pli violan ki bann Izraelit. Alor, kifer eski Zeova ti pou servi sa nasion payin ek kriel la pou pini so pep? Sa ti pou fer nasion Zida plis soufer ankor. Ki to ti pou resanti si to ti dan plas Abakuk?
9. Ki lezot kestion Abakuk ti poze?
9 Lir Abakuk 1:12-14, 17. * Mem si Abakuk ti konpran ki Zeova ti pou servi bann Babilonien pou pini bann move dimounn dan Zida, li ti ankor dan konfizion. Me li ti ena limilite ek li ti determine pou kontign fer Zeova konfians. An realite, li ti dir ki Zeova ti pou kontign res so “Gran Ros.” (Deteronom 32:4; Izai 26:4) Abakuk ti sir ki Zeova enn Bondie ki ena lamour ek ki bon. Alor, li pa ti per pou poz Zeova bann lezot kestion, kouma par exanp: Kifer Zeova ti pou les sitiasion dan Zida vinn pli pir ankor, ek permet ki so pep soufer plis ankor? Kifer Li pa ti azir deswit? Kifer Bondie Tou-Pwisan ti pou kontign “res trankil” ek toler lemal partou? Apre tou, Zeova Limem Bondie “ki Sin,” ek so “lizie tro sin pou get seki move.”
10. Kifer parfwa nou kapav ena mem santiman ki Abakuk?
10 Parfwa nou kapav ena mem santiman ki Abakuk. Nou ekout Zeova ek nou fer Li konfians. Nou lir ek etidie so Parol ki fortifie nou lesperans. Nou tann osi so bann promes kan nou ekout seki so lorganizasion ansegn nou. Me kitfwa nou ankor demann noumem, ‘Kan eski nou pou aret soufer?’ Anou tir leson ar seki Abakuk ti fer apre.
ATANN ZEOVA AZIR
11. Ki Abakuk ti bien determine pou fer?
11 Lir Abakuk 2:1. * Konversasion ki Abakuk ti gagne ar Zeova ti fer li gagn lape lespri. Sa ti ed li pou res bien determine pou atann ki Zeova azir. Abakuk ti montre so determinasion kan li ti dir: “Mo atann avek kalm zour detres.” (Abakuk 3:16) Ena lezot serviter Bondie osi ki ti atann avek pasians ki Li azir. Zot lexanp ankouraz nou, parski sa montre nou ki nou osi nou kapav fer parey.—Mishe 7:7; Zak 5:7, 8.
Nou bizin atann avek pasians ki Zeova azir ek ena konfians ki Li pou soulaz nou dan ler ki Li’nn deside
12. Ki nou kapav aprann ar lexanp Abakuk?
12 Ki nou kapav aprann ar determinasion Abakuk? Premierman, dan ninport ki problem, fode zame nou aret priye Zeova. Deziemman, nou bizin ekout seki Zeova dir nou atraver so Parol ek so lorganizasion. Ek trwaziemman, nou bizin atann avek pasians ki Zeova azir ek ena konfians ki Li pou soulaz nou dan ler ki Li’nn deside. Si nou imit Abakuk, nou pou ena lape lespri ek nou pou kapav andire. Nou lesperans pou ed nou ena pasians ek gard nou lazwa malgre nou bann problem. Nou ena konfians ki nou Papa ki dan lesiel pou azir.—Romin 12:12.
13. Kouma Zeova ti rekonfort Abakuk?
13 Lir Abakuk 2:3. * Nou kapav sir ki Zeova ti kontan ki Abakuk ti desid pou atann ki Li azir. Bondie Tou-Pwisan ti konn exakteman seki ti pe fer Abakuk soufer. Alor, Li ti rekonfort so profet ek avek boukou lamour, Li ti donn li lasirans ki Li ti pou reponn so bann kestion sinser. Biento, Abakuk ti pou gagn soulazman pou tou so bann traka. Koumadir Zeova ti pe dir Abakuk: “Zis pran pasians ek fer mwa konfians. Mo pou reponn to lapriyer, mem si to ena linpresion ki sa pe pran boukou letan.” Zeova ti rapel Abakuk ki Li ti fini deside kan Li ti pou realiz So bann promes. Alor, Li ti ankouraz Abakuk pou kontign atann. Alafin, so profet pa ti pou gagn desepsion.
Kifer nou bien determine pou fer nou maximum pou Zeova? (Get paragraf 14)
14. Ki nou bizin bien determine pou fer kan nou pe fer fas ar bann leprev?
14 Nou osi nou bizin atann ki Zeova azir. Nou bizin osi ekout bien seki Li dir nou. Lerla, nou pou ena konfians ek ena lape lespri, mem si nou pe fer fas ar bann leprev. Zezi ti ankouraz nou pou pa fixe nou latansion lor “bann letan ek bann lepok” ki Bondie pa finn revel nou. (Zistwar Bann Apot 1:7, NW) Nou bizin ena konfians ki Zeova kone ki pli bon moman pou azir. Alor, fode pa nou bes lebra, me nou bizin ena limilite, pasians, ek lafwa dan Bondie. Ek pandan ki nou pe atann, nou bizin servi nou letan avek sazes ek servi Zeova pli bien ki nou kapav.—Mark 13:35-37; Galat 6:9.
BANN KI FER ZEOVA KONFIANS POU VIV POU TOULETAN
15, 16. (a) Ki bann promes ena dan liv Abakuk? (b) Ki sa bann promes-la ansegn nou?
15 Zeova ti promet: “Enn kikenn ki zis pou viv parski li fidel,” ek “later pou ranpli ar konesans lor laglwar Zeova.” (Abakuk 2:4, 14) Wi, Zeova promet ki Li pou donn bann dimounn ki ena pasians ek ki fer Li konfians, lavi pou touletan.
16 Sa promes ki trouv dan Abakuk 2:4 la telman inportan ki lapot Pol ti sit li trwa fwa dan so bann let! (Romin 1:17; Galat 3:11; Ebre 10:38) Dan ninport ki difikilte, nou kapav sir ki nou pou trouv bann promes Zeova realize si nou fer Li konfians. Zeova anvi ki nou res konsantre lor nou lesperans pou lavenir.
17. Ki lasirans Zeova donn nou si nou fer Li konfians?
17 Pou nou ki pe viv dan bann dernie zour, ena enn leson bien inportan dan liv Abakuk. Zeova promet pou donn bann dimounn ki zis ek ki fer Li konfians, lavi pou touletan. Alor, anou kontign ranforsi nou konfians an Zeova, malgre ninport ki problem ek traka ki nou ena. Seki Zeova ti dir Abakuk donn nou lasirans ki Li pou soutenir nou ek sov nou. Avek bonte, Zeova demann nou pou fer Li konfians ek pou atann avek pasians moman ki Li’nn deza fixe, kot so Rwayom pou diriz later. Sa lepok-la, later pou ranpli ar bann dimounn ki ere ek ki pou ador Zeova dan lape.—Matie 5:5; Ebre 10:36-39.
FER ZEOVA KONFIANS EK RES ZWAYE
18. Ki lefe bann parol Zeova ti ena lor Abakuk?
18 Lir Abakuk 3:16-19. * Seki Zeova ti dir Abakuk ti ena enn gran lefe lor li. Abakuk ti medit lor bann kitsoz extraordiner ki Zeova ti fer pou So pep dan lepase. Asterla, so konfians an Zeova ti vinn pli for. Li ti sir ki Zeova ti pou azir biento! Sa ti rekonfort Abakuk, mem si li ti kone ki kitfwa li ti pou bizin soufer ankor inpe letan. Li ti nepli ena okenn dout. Okontrer, li ti san poursan sir ki Zeova ti pou sov li. An realite, seki li ti dir dan verse 18 kitfwa enn parmi bann pli gran lexanp konfians ki nou lir dan Labib. Sertin biblis panse ki sa verse-la vedir: “Mo pou sote ar lazwa akoz Lesegner; mo pou danse dan lazwa pou Bondie.” Se vremem enn leson bien inportan pou nou tou! Zeova pa’nn zis fer nou bann zoli promes pou lavenir, me Li’nn donn nou lasirans ki Li pou realiz sa bann promes-la biento.
19. Parey kouma Abakuk, kouma Zeova kapav rekonfort nou?
19 Leson bien inportan ki nou aprann ar liv Abakuk se pou fer Zeova konfians. (Abakuk 2:4). Pou nou kontign ena konfians an Zeova, nou bizin kontign fer nou relasion avek Li vinn pli for. Ki kitsoz pou ed nou fer sa? (1) Kontign priye ek dir Zeova tou seki trakas nou. (2) Ekout bien seki Zeova dir nou dan so Parol, ek swiv direksion ki Li donn nou atraver so lorganizasion. (3) Atann avek pasians ek lafwa ki Zeova realiz so bann promes. Abakuk ti fer sa bann kitsoz-la. Mem si li ti bien trakase kan li ti koumans koz ar Zeova, alafin li ti ankouraze ek zwaye! Si nou imit lexanp Abakuk, nou osi nou pou santi ki nou Papa Zeova pe may nou avek boukou lafeksion ek sa pou rekonfort nou. Dan sa move lemond-la, eski nou kapav gagn enn pli gran rekonfor ki sa?
^ par. 4 Abakuk 1:2, 3: “2 A Zeova, ziska kan mo pou bizin kriye o-sekour san ki to tande? Ziska kan mo pou bizin demann led kont laviolans san ki to azir? 3 Kifer to fer mwa trouv tou seki move? Ek kifer to toler bann dimounn dominer? Kifer ena destriksion ek violans otour mwa? Ek kifer ena sa kantite lager ek diskision la?”
^ par. 7 Abakuk 1:5-7: “5 Get bann nasion ek pran kont! Get bien ek zot pou etone; parski pandan ki zot ankor vivan, pou ariv enn kitsoz ki zot pa pou krwar, mem si rakont zot sa. 6 Parski mo pe fer bann Kaldeen vini, enn nasion ki kriel ek san pitie. Zot anvayir boukou pei pou pran bann lakaz ki pa pou zot. 7 Zot fer gagn per. Zot etabli zot prop lazistis ek lotorite.”
^ par. 9 Abakuk 1:12-14, 17: “12 A Zeova, eski to pa existe depi touletan? A mo Bondie, twa ki Sin, to pa mor. A Zeova, to finn swazir zot pou exekit to zizman. Mo Gran Ros, to finn etabli zot pou donn pinision. 13 To lizie tro sin pou get seki move, ek to pa kapav toler lemal. Alor kifer to toler bann tret ek to res trankil kan enn kikenn ki move detrir enn kikenn ki pli zis ki li? 14 Kifer to tret bann dimounn kouma bann pwason ki dan lamer, kouma bann zanimo ki ranpe ek ki pena sef? 17 Alor eski li pou kontign vid so file lapes? Eski li pou kontign masakre bann pep san okenn pitie?”
^ par. 11 Abakuk 2:1: “Mo pou kontign res dan plas kot mo bizin veye, ek mo pou debout lor miray lavil; mo pou kontign veye pou gete ki Li pou fer mwa dir ek ki mo pou reponn ar repros ki mo pou gagne.”
^ par. 13 Abakuk 2:3: “Parski letan fixe pou vizion-la realize, li pankor arive. Vit-vit li pe al ver so realizasion, ek li pa pou koz manti. Mem si li tarde, kontign atann li; parski li pou realize vremem. Li pa pou an-retar!”
^ par. 18 Abakuk 3:16-19: “16 Mo ti tande ek mo ti koumans gagn frison; sa tapaz-la ti fer mo lalev tranble. Mo bann lezo ti koumans fermal; ek mo de lazam ti koumans tranble. Me mo atann avek kalm zour detres, parski li pe vinn lor bann ki atak nou. 17 Mem si pie fig pa an-fler ek ki pena frwi lor pie rezin; mem si pie zoliv pa raport nanye ek ki pena nanye dan bann karo; mem si troupo inn disparet dan lanklo ek ki pena okenn zanimo dan lekeri; 18 mwa, mo pou dan lazwa akoz Zeova; mo pou dan lazwa akoz mo Bondie ki sov mwa. 19 Souverin Segner Zeova Limem mo lafors; Li pou fer mo lipie vinn kouma lapat bann serf, ek Li pou fer mwa mars dan bann oter.”