1-3. (a) Kouma nou bizin konsider laverite ki ena dan Labib? Donn enn lexanp. (Get bann zimaz dan koumansman lartik.) (b) Ki nou pou examine dan sa lartik-la?

AZORDI, bien souvan bann dimounn aste enn kitsoz dan magazin ek apre zot retourn li. Ek si zot inn aste enn kitsoz lor Internet, zot trouv pli boukou rezon ankor pou retourn li. Kitfwa zot nepli kontan seki zot inn aste, ouswa ena enn defo avek lartik-la. Lerla, swa zot desid pou sanz li kont enn lot kitsoz, swa zot demann pou ranbours zot.

² Me zame nou pa pou fer sa avek laverite ki ena dan Labib. Enn fwa ki nou’nn “aste” laverite, zame nou pa pou anvi “vann” li, setadir kan nou’nn aprann laverite, zame nou pa pou rod kit li. (Lir Proverb 23:23 *; 1 Timote 2:4) Kouma nou ti gete dan lartik avan, nou ti pas boukou letan pou aprann laverite. Kitfwa nou’nn sakrifie enn karyer kot nou ti pe gagn boukou kas. Kitfwa osi nou’nn bizin fer bann sanzman dan nou relasion avek lezot, dan nou fason panse ek azir, ek rezet bann koutim ek tradision ki Bondie pa kontan. Me nou sir ki bann benediksion  ki nou’nn gagne gras-a laverite ena pli boukou valer ki tou bann sakrifis ki nou’nn fer.

³ Zezi ti servi lexanp enn marsan ki ti vwayaze pou rod bann zoli perl. Kan sa marsan-la ti trouv enn perl ki ti ena enn extra gran valer, deswit li ti vann tou seki li ti ena pou li kapav aste sa perl-la. Sa perl-la ti reprezant laverite lor Rwayom Bondie. Par sa lexanp-la, Zezi ti montre kouma laverite ti pou ena enn gran valer pou bann dimounn ki rod li. (Matie 13:45, 46) Kan nou ti aprann laverite pou premie fwa, laverite lor Rwayom Bondie ek tou bann lezot verite Biblik ki ena enn gran valer, nou osi nou ti dispoze pou sakrifie ninport ki kitsoz pou nou kapav gagn li. Si laverite kontign ena valer pou nou, zame nou pa pou kit li. Me malerezman, pou sertin serviter Bondie, laverite ti nepli ena valer ek zot finn mem kit li. Zame nou pa pou anvi fer sa, pa vre? Alor, nou bizin swiv konsey Labib ki dir “kontign mars dan laverite.” (Lir 3 Zan 2-4, NW. *) Savedir ki nou met laverite an premie dan nou lavi ek nou montre sa par fason nou viv. Me kifer ek kouma eski enn kikenn kapav “vann” ouswa kit laverite? Kouma nou kapav fer sir ki zame nou pa pou fer sa? Ek kouma nou kapav ena plis determinasion pou “kontign mars dan laverite”?

4. Dan lepok Zezi, kifer sertin ti aret mars dan laverite?

⁴ Dan lepok Zezi, sertin ki o-koumansman ti aksepte laverite, ti aret swiv laverite apre. Par exanp, apre ki Zezi ti nouri enn gran lafoul gras-a enn mirak, sa lafoul-la ti swiv li ziska lot kote Lamer Galile. Me apre sa, Zezi ti dir enn kitsoz ki ti sok zot. Li ti dir: “Si zot pa manz lekor Garson Limanite e zot pa bwar so disan, zot pa pou gagn lavi dan zot.” Olie ki zot ti demann Zezi explik sa bann parol-la, zot ti dir: “Sa parol la tro dir [“sokan,” NW]; kisannla kapav aksepte sa?” Akoz sa, ‘boukou parmi so bann disip ti tourn ledo e ti nepli mars ar li.’​—Zan 6:53-66.

5, 6. (a) Dan nou lepok, kifer sertin finn detourn zot ar laverite? (b) Kouma enn kikenn kapav elwagn li tigit par tigit ar laverite?

⁵ Malerezman, sertin dan nou lepok osi finn kit laverite. Kifer? Sertin finn gagn difikilte pou aksepte enn nouvo lexplikasion lor enn verse Labib. Ouswa enn frer, ki boukou frer ek ser kone, inn dir ouswa inn fer enn kitsoz ki’nn fatig zot. Lezot pa’nn kontan kan enn kikenn inn donn zot enn konsey ki sorti dan Labib, ouswa zot finn gagn enn gran dezakor avek enn kikenn dan kongregasion. Ek sertin finn swiv fos lansegnman bann aposta, ouswa zot finn ekout bann mansonz ki bann dimounn dir lor nou. Sa se de-trwa rezon kifer sertin finn volonterman detourn zot ar Zeova ek kongregasion. (Ebre 3:12-14) Vomie zot ti fer Zezi konfians,  parey kouma lapot Pier! Kan lafoul ti soke par bann parol Zezi, Zezi ti demann so bann zapot si zot osi zot ti anvi ale. Me Pier ti reponn: “Segner, kot [“ver kisannla,” NW] nou pou ale? Tomem ki ena parol lavi eternel.”​—Zan 6:67-69.

⁶ Sertin finn elwagn zot tigit-tigit ar laverite, kitfwa san mem ki zot rann zot kont. Enn kikenn ki kit laverite tigit par tigit, li kouma enn bato ki dousman-dousman elwagn li ar later. Labib ankouraz nou pou fer bien atansion “ki zame nou pa elwagne tigit par tigit.” (Ebre 2:1, NW) Bien souvan, enn kikenn ki elwagn li tigit par tigit ar laverite, li pa fer sa par expre. Me li’nn les so relasion avek Zeova afebli ek avek letan, li kapav perdi net sa relasion-la. Kouma nou kapav fer sir ki sa pa ariv nou zame?

7. Ki kitsoz pou ed nou pou nou pa “vann” laverite zame?

⁷ Pou ki nou kontign mars dan laverite, nou bizin aksepte ek obeir tou seki Zeova dir. Nou bizin fer laverite vinn kitsoz pli inportan dan nou lavi ek aplik bann prinsip Labib dan tou seki nou fer. Dan enn lapriyer, Lerwa David ti fer Zeova sa promes-la: “Mo pou mars dan to laverite.” (Psom 86:11, NW) David ti bien deside pou kontign mars dan laverite, ek nou osi parey. Si nou pa fer sa, kitfwa nou kapav koumans pans bann kitsoz ki nou’nn abandone pou laverite, ek mem rod gagn sertin parmi sa bann kitsoz-la. Me antan ki Kretien, nou pa kapav swazir ki verite Biblik nou pou obeir, ek ki verite nou pa pou obeir. Nou bizin mars dan “tou seki konsern laverite.” (Zan 16:13, NW) Dan lartik avan, nou ti examinn sink kitsoz ki kitfwa nou finn bizin sakrifie pou ki nou aprann ek aplik laverite. Asterla, nou pou gete ki nou bizin fer pou ki nou pa retourn ver sa bann kitsoz ki nou’nn kit deryer nou la.​—Matie 6:19.

8. Kouma fason ki enn Kretien servi so letan kapav elwagn li tigit par tigit ar laverite? Donn enn lexanp.

⁸ Letan. Pou ki zame nou pa elwagn nou tigit par tigit ar laverite, nou bizin servi nou letan avek sazes. Si nou pa fer atansion, nou kapav pas tro boukou letan dan bann divertisman, dan nou bann pastan, lor Internet, ouswa devan televizion. Mem si sa bann aktivite-la pa move, li kapav arive ki sa bann kitsoz-la ranplas letan ki nou ti pe servi pou etidie ek prese. Se seki ti ariv Emma. * (Get not.) Depi ki li tipti, Emma ti bien kontan bann seval ek li ti mont seval sak fwa ki li ti gagn lokazion. Me kan li ti reflesi lor kantite letan ki li ti pe pase dan sa  pastan-la, so konsians ti repros li. Alor, li ti desid pou sanz so bann priorite. Enn lot kitsoz ki ti ed Emma, se lexanp ser Cory Wells, ki dan lepase ti pe partisip dan bann rodeo. * (Get not.) Azordi, Emma pas plis letan pou servi Zeova, ek li ena plis letan pou pas avek so fami ek so bann kamarad ki servi Zeova zot osi. Li santi li pli pros avek Zeova, ek li pli ere parski li kone ki li pe servi so letan avek sazes.

9. Kouma bann kitsoz materyel kapav koumans ena enn gran linportans dan nou lavi?

⁹ Bann kitsoz materyel. Pou nou kontign mars dan laverite, fode pa nou les bann kitsoz materyel ena enn tro gran linportans dan nou lavi. Kan nou ti konn laverite, nou ti rann nou kont ki nou servis pou Zeova boukou pli inportan ki bann kitsoz materyel, ek nou ti bien kontan pou abandonn sa bann kitsoz-la pou laverite. Me amezir ki letan pase, kitfwa nou trouv lezot pe aste bann dernie laparey elektronik ouswa pe profit lezot kitsoz ki zot inn aste. Kitfwa nou kapav koumans panse ki nou pe rat kitsoz. Kitfwa nou nepli satisfe ar seki nou ena ek nou rod gagn pli boukou kitsoz materyel, olie ki nou res konsantre lor nou servis pou Zeova. Sa fer nou rapel seki ti ariv Demas. Li ti telman kontan “lemonn” ki li ti abandonn responsabilite ki li ti gagne pou akonpagn lapot Pol. (2 Timote 4:10) Kitfwa Demas ti kontan bann kitsoz materyel plis ki so servis pou Zeova. Li posib osi ki li ti nepli anvi fer bann sakrifis pou servi ansam avek Pol. Ki leson nou aprann? Kitfwa dan lepase, nou ti vremem kontan bann kitsoz materyel. Si nou pa fer atansion, sa lamour-la kapav rekoumans grandi dan nou ek li kapav vinn telman for ki nou perdi nou lamour pou laverite.

10. Pou nou kontign mars dan laverite, kont ki linflians nou bizin reziste?

¹⁰ Relasion avek lezot. Pou nou kontign mars dan laverite, fode pa nou les nou inflianse par bann dimounn ki pa servi Zeova. Kan nou ti konn laverite, nou relasion avek nou bann kamarad ek bann fami ki pa Temwin ti sanze. Sertin kitfwa ti respekte nou nouvo krwayans, me lezot ti opoze ar sa. (1 Pier 4:4) Biensir, nou fer tou pou gard enn bon relasion avek nou fami ek nou tret zot avek bonte. Me nou pa met bann prinsip Zeova dekote pou fer zot plezir. Ek kouma nou’nn aprann dan 1 Korintien 15:33, nou bizin fer kamarad avek bann ki kontan Zeova.

11. Kouma nou kapav rezet bann move panse ek bann move aksion?

¹¹ Bann move panse ek bann move aksion. Pou mars dan laverite, nou bizin san tas ouswa sin devan lizie Zeova. (Izai 35:8; lir 1 Pier 1:14-16.) Kan nou ti konn laverite, nou ti fer bann sanzman dan nou lavi pou ki nou swiv bann prinsip Labib. Sertin parmi nou finn fer bann gran sanzman. Me kanmem sa, nou bizin fer bien atansion ki nou pa sanz nou lavi ki nou’nn pirifie kont enn lavi ki imoral. Ki kapav ed nou reziste kont tantasion pou fer enn kitsoz  imoral? Pans lor seki Zeova finn donn nou pou ki nou kapav vinn sin. Li’nn donn lavi so Garson, Zezi Kris! (1 Pier 1:18, 19) Pou ed nou res sin devan lizie Zeova, nou bizin touletan rapel gran valer ki sakrifis Zezi ena.

12, 13. (a) Kifer nou bizin ena mem fason panse ki Zeova lor bann fet? (b) Ki nou pou examine asterla?

¹² Bann koutim ek bann tradision ki pa fer Bondie plezir. Bann manb nou fami, bann koleg travay, ek bann kamarad lekol kapav ankouraz nou pou vinn dan zot bann fet ki pa fer Zeova plezir. Kan lezot met presion lor nou pou partisip dan bann fet ouswa koutim ki Zeova pa kontan, kouma nou kapav tini ferm? Li bizin kler dan nou lespri kifer Zeova pa kontan sa bann fet-la. Nou kapav fer bann resers dan bann piblikasion ek rod lorizinn sa bann fet-la. Kan nou reflesi lor bann rezon Biblik kifer nou pa fer sa bann fet-la, sa konvink nou ki nou pe mars dan fason ki “fer Bondie plezir.” (Efezien 5:10) Si nou fer Zeova ek so Parol konfians, nou pa pou per seki lezot panse.​—Proverb 29:25.

¹³ Nou anvi kontign mars dan laverite pou touletan. Ki kapav ed nou pou plis determine pou kontign mars dan laverite? Anou get trwa kitsoz ki nou kapav fer.

14. (a) Kan nou kontign etidie Labib, kouma sa ed nou pou plis determine pou pa kit laverite? (b) Kifer nou bizin sazes, disiplinn, ek lintelizans?

¹⁴ Premierman, kontign etidie Labib an profonder ek medit lor seki to aprann. Fer enn bon program ek swiv li regilierman. Pli to etidie, pli to lamour pou laverite pou ogmante, ek to pou plis determine pou pa kit laverite. Proverb 23:23 dir nou “aste laverite” ek osi aste “sazes, disiplinn, ek lintelizans.” Li pa ase ki nou zis konn bann verite ki ena dan Labib. Nou bizin aplik li dan nou lavi. Lintelizans pou ed nou azout bann kitsoz ki nou pe aprann ar bann kitsoz ki nou deza kone. Sazes pou pous nou pou azir an-akor avek seki nou kone. Parfwa laverite disiplinn nou kan li montre nou ki sanzman nou bizin fer. Fode pa nou tarde pou aplik sa disiplinn-la. Labib dir ki li ena pli boukou valer ki larzan.​—Proverb 8:10.

15. Kouma laverite protez nou parey kouma enn sintir?

¹⁵ Deziemman, nou bizin determine pou aplik laverite dan nou lavi toulezour. Labib konpar laverite ar sintir enn solda. (Efezien 6:14) Dan lepase, sintir enn solda ti tini so lerin ek ti  protez li dan lager, tanki so sintir ti atase bien sere. Si so sintir ti las, sa pa ti pou ed li. Kouma laverite protez nou kouma enn sintir? Si nou touletan tini bien for laverite ki ena dan Labib, li pou protez nou kont bann move panse ek li pou ed nou pran bann bon desizion. Kan nou ena enn problem bien grav ouswa ki nou tante pou fer enn move kitsoz, laverite pou fer nou plis determine pou fer seki bon. Parey kouma enn solda zame pa pou al lager san so sintir, nou osi zame nou pa pou kit laverite. Nou pou fer tou pou aplik laverite ki ena dan Labib dan sak domenn nou lavi. Enn solda ti osi akros so lepe ar so sintir. Anou gete kouma nou kapav swiv so lexanp.

16. Kan nou ansegn laverite, kouma sa ed nou pou kontign mars dan laverite?

¹⁶ Trwaziemman, ansegn lezot laverite ki ena dan Labib otan ki to kapav. Labib li kouma enn lepe. Parey kouma enn bon solda pou trap bien for so lepe, nou osi nou bizin trap Parol Bondie bien for. (Efezien 6:17) Nou tou nou kapav vinn bann meyer ansegnan, ki “konn servi parol laverite kouma bizin.” (2 Timote 2:15, NW) Kan nou servi Labib pou ansegn lezot, sa ed nou pou konn ek kontan laverite ankor plis. Ek lerla, nou plis determine ankor pou kontign mars dan laverite.

17. Kifer laverite ena enn gran valer pou twa?

¹⁷ Laverite se enn kado ki Zeova donn nou ek ki ena enn gran valer. Li permet nou ena enn relasion bien pros avek nou Papa ki dan lesiel, ek nou relasion avek Bondie, samem kitsoz plis valer ki nou kapav ena. Zeova finn deza ansegn nou telman boukou kitsoz, me sa se zis enn koumansman! Li promet nou ki Li pou kontign ansegn nou pou touletan. Alor, apresie laverite parey kouma to ti pou apresie enn perl ki ena enn gran valer. Kontign “aste laverite ek zame pa vann li.” Lerla, parey kouma David, twa osi to pou tini promes ki to’nn fer ar Zeova: “Mo pou mars dan to laverite.”​—Psom 86:11, NW.