1, 2. (a) Kifer li dan nou lavantaz ki nou res dan kote Zeova? (b) Ki nou pou examine dan sa lartik-la?

LI DAN nou lavantaz kan nou res pros ar Zeova. Pena personn ki pli pwisan, pli saz, ek ki kontan nou plis ki Li! Pena dout ki touletan nou anvi res fidel ar Li ek res dan so kote. (Psom 96:4-6) Me sertin dimounn ki ti ador Bondie pa ti reisi fer sa.

² Dan sa lartik-la, nou pou examinn lexanp bann personaz ki ti dir zot dan kote Zeova, me anmemtan zot ti fer bann kitsoz ki Zeova deteste. Bann leson inportan ki nou aprann ar zot lexanp kapav ed nou pou res fidel ar Zeova.

3. Kifer Zeova ti esey ed Kain, ek ki Li ti dir li?

³ Par exanp, reflesi lor Kain. Li pa ti ador bann fos bondie, me kanmem sa Zeova pa ti aksepte so ladorasion. Kifer? Zeova ti trouv bann move tandans dan Kain so leker. (1 Zan 3:12, NW.) Zeova ti averti Kain: “Si to sanze, ek fer seki bon, eski to pa pou regagn mo faver? Me si to pa sanze ek fer seki bon, ena pese devan laport, ek li pe atann  twa avek inpasians; me eski to pou kapav dominn li?” (Zenez 4:6, 7) Zeova ti montre dan enn fason bien kler ki si Kain ti repanti ek ti swazir pou res dan kote Bondie, Li ti pou avek Kain.

4. Ki Kain ti fer kan li ti gagn lokazion pou res dan kote Zeova?

⁴ Si Kain ti sanz so fason panse, Zeova ti pou re-aksepte so ladorasion. Me Kain pa ti ekout Bondie, ek so move fason panse ek so dezir egois finn amenn li pou fer bann move kitsoz. (Zak 1:14, 15) Kan Kain ti pli zenn, sirman zame li ti panse ki li pou opoz li ar Zeova. Me pourtan, plitar li’nn inior lavertisman Bondie, li’nn rebel kont Bondie, ek li’nn touy so prop frer!

5. Ki kalite panse kapav fer nou perdi faver Zeova?

⁵ Parey kouma Kain, enn Kretien azordi kapav dir ki li pe ador Zeova, me an realite li pe fer bann kitsoz ki Zeova deteste. (Zid 11) Li kapav aktif dan so minister ek regilie dan bann renion. Me anmemtan, kitfwa li pe les bann panse imoral, lanvi pou gagn plis, ouswa mem bann santiman laenn kontrol so fason panse. (1 Zan 2:15-17; 3:15) Sa bann kalite panse-la kapav amenn nou pou komet bann pese. Lezot dimounn kitfwa pa kone ki nou pe panse ouswa ki nou pe fer, me Zeova kone. Li kone kan nou pa dan so kote dan enn fason konple.​—Lir Zeremi 17:9, 10. *

6. Kouma Zeova ed nou pou vink nou bann move dezir?

⁶ Mem kan nou fer bann erer, Zeova pa abandonn nou deswit. Si nou pe pran enn move sime, Zeova donn nou sa linvitasion-la: “Retourne ek mwa osi mo pou retourn ver zot.” (Malaki 3:7) Zeova konpran ki nou pe bizin lit kont nou bann febles. Me Li anvi ki nou res ferm ek rezet seki move. (Izai 55:7) Si nou fer sa, Li promet ki Li pou ed nou ek Li pou donn nou lafors ki bizin pou vink nou bann move dezir.​—Zenez 4:7.

7. Kouma Salomon ti perdi so lamitie avek Zeova?

⁷ Kan Salomon ti zenn, li ti ena enn bon relasion avek Zeova. Bondie ti donn li enn gran sazes ek ti donn li enn travay bien inportan, setadir konstrir enn zoli tanp dan Zerizalem. Me Salomon ti perdi so lamitie avek Zeova. (1 Lerwa 3:12; 11:1, 2) Lalwa Bondie ti dir ki fode pa ki enn lerwa ena “boukou madam, pou ki so leker pa detourne.” (Deteronom 17:17) Salomon ti dezobeir sa lalwa-la. Antou, li ti ena 700 madam ek 300 konkibinn! (1 Lerwa 11:3) Boukou sa bann madam-la ti bann etranze ki ti ador bann fos bondie. Alor, Salomon ti osi dezobeir lalwa Bondie kan li ti marye avek bann madam etranze.​—Deteronom 7:3, 4.

8. Kouma Salomon ti ofans Zeova?

⁸ Tigit par tigit, Salomon ti perdi lamour ki Li ti ena pou bann lalwa Zeova. Finalman, li ti fer bann kitsoz bien grav. Li ti konstrir bann lotel pou  dees Astarte ek bondie Kemosh, ek apre li ti ador sa bann fos bondie-la avek so bann madam. Salomon ti ranz sa bann lotel-la lor enn montagn zis anfas avek Zerizalem, kot li ti ranz tanp Zeova! (1 Lerwa 11:5-8; 2 Lerwa 23:13) Kitfwa Salomon ti anbet limem kan li ti panse ki Zeova pou inior tou bann move kitsoz ki li ti fer tanki li ti kontign ofer bann sakrifis dan tanp.

9. Ki ti arive kan Salomon pa ti ekout Bondie so bann lavertisman?

⁹ Me Zeova zame pa ferm lizie lor bann pese. Labib dir: “Zeova ti bien ankoler ar Salomon, parski so leker ti’nn elwagne ar Zeova.” Bondie ti esey ed Salomon. Zeova “ti aparet de fwa ar li ek ti averti li ki fode pa li al ador bann lezot bondie. Me li pa ti obeir lord ki Zeova ti done.” Akoz sa, li ti perdi faver ek soutien Bondie. Zeova pa ti permet Salomon so bann desandan regn lor nasion Izrael an-antie, ek zot ti fer fas ar bann gran problem pandan plizir santenn lane.​—1 Lerwa 11:9-13.

10. Ki kapav gat nou bon relasion avek Zeova?

¹⁰ Si nou swazir bann kamarad ki pa konpran ouswa pa respekte bann prinsip Bondie, zot kapav inflians nou fason panse ek gat nou lamitie avek Zeova. Kitfwa zot form parti dan kongregasion, me zot pena enn relasion solid avek Zeova. Li posib osi ki se nou  bann fami, vwazin, koleg travay, ouswa kamarad lekol ki pa ador Zeova. Si nou pas letan avek bann dimounn ki pa swiv bann prinsip Zeova, sa linflians ki zot ena lor nou la kapav fer nou perdi nou bon relasion avek Zeova.

11. Ki kapav ed nou pou swazir nou bann kamarad?

¹¹ Lir 1 Korintien 15:33, NW. Laplipar dimounn ena bann bon kalite. Ek bann ki pa ador Zeova pa touletan fer bann move kitsoz. Kitfwa to konn sertin dimounn ki koumsa. Eski savedir ki zot bann bon frekantasion? Kouma zot afekte to relasion avek Zeova? Eski zot ed twa vinn pli pros ar Bondie? Ki kitsoz ki vremem inportan pou sa bann dimounn-la? Lor ki kitsoz zot koze? Eski zot koz sirtou lor lamod, kas, bann gajet, bann divertisman ek bann lezot kitsoz koumsa? Eski zot pas zot letan kritik lezot? Eski zot kontan rakont bann blag malprop? Zezi ti donn sa lavertisman-la: “Labous exprim seki ena dan fon leker.” (Matie 12:34) Si to rann twa kont ki bann dimounn avek ki to pas letan pe gat to relasion avek Zeova, pa tarde pou azir! Pas mwins letan avek zot ek si neseser, aret frekant zot.​—Proverb 13:20.

12. (a) Ki Zeova ti dir bann Izraelit zis apre ki zot ti kit Lezip? (b) Ki bann Izraelit ti dir kan Bondie ti demann zot pou res fidel?

¹² Nou kapav osi tir leson ar seki ti arive apre ki Zeova ti liber bann Izraelit depi Lezip. Kan lepep ti rasanble devan Montagn Sinai, Zeova ti aparet devan zot dan enn fason extraordiner! Zot ti trouv enn niaz nwar, zekler, ek lafime, ek zot ti tann loraz ek enn son bien for ki ti kouma son enn kor. (Exod 19:16-19) Apre, zot ti tann Zeova dir ki Li ‘enn Bondie ki oule ki zot res atase zis ar Li tousel.’ Li ti promet ki Li pou fidel ar bann ki kontan Li ek ki obeir so bann komannman. (Lir Exod 20:1-6. *) Zeova ti pe fer bann Izraelit kone ki si zot res dan so kote, Li ti pou avek zot. Si to ti dan sa lafoul-la, ki to ti pou resanti apre ki to’nn tann bann parol Zeova? Sirman to ti pou reponn kouma sa bann Izraelit-la, ki ti dir: “Nou dakor pou fer tou seki Zeova inn dir.” (Exod 24:3) Me bien vit, enn kitsoz ti arive ki ti teste fidelite bann Izraelit. Ki kitsoz?

13. Ki sitiasion ti teste fidelite bann Izraelit?

¹³ Bann Izraelit ti gagn per kan zot ti trouv Bondie montre so pouvwar extraordiner, alor Moiz ti mont lor Montagn Sinai ek ti koz avek Zeova pou zot. (Exod 20:18-21) Me letan ti pe pase, ek Moiz pa ti ankor retourn dan kan. Li ti paret ki lepep ti bloke dan dezer san zot sef. Ki zot ti pou fer? Kitfwa bann Izraelit ti kont tro boukou lor enn sef imin, setadir Moiz. Zot ti koumans  trakase ek ti dir Aaron: “Fer enn bondie ki pou mars devan nou, parski nou pa kone ki finn ariv Moiz, sa zom ki finn tir nou depi pei Lezip la.”​—Exod 32:1, 2.

14. Kouma bann Izraelit ti anbet zotmem, ek kouma Zeova ti reazir?

¹⁴ Bann Izraelit ti kone ki li pa bon ador bann idol. (Exod 20:3-5) Me, bien vit zot ti koumans ador enn vo an-or! Mem si zot ti dezobeir komannman Zeova, zot ti pe anbet zotmem kan zot ti panse ki zot ankor dan kote Zeova. Aaron ti mem apel ladorasion sa vo-la, “enn fet pou Zeova”! Ki Zeova ti fer? Li ti dir Moiz ki lepep ti “ena enn bien move kondwit” ek ki zot ti kit semin ki Li’nn “donn zot lord pou swiv.” Zeova ti telman ankoler ki Li ti mem pans pou detrir sa nasion-la net.​—Exod 32:5-10.

15, 16. Kouma Moiz ek Aaron ti montre dan enn fason kler ki zot dan kote Zeova? (Get zimaz dan koumansman lartik.)

¹⁵ Me Zeova Li enn Bondie ki ena mizerikord. Li ti desid pou pa detrir sa nasion-la. Plito, Li ti donn bann Izraelit lokazion pou montre ki zot anvi res dan so kote. (Exod 32:14) Kan Moiz ti trouv lepep pe kriye, sante, ek danse devan sa idol-la, li ti kraz sa vo an-or la ek fer li vinn lapousier. Apre sa, li ti kriye: “Kisannla dan kote Zeova? Vinn ar mwa!” Ek “tou bann Levit ti rasanble otour” Moiz.​—Exod 32:17-20, 26.

¹⁶ Mem si Aaron ti fer enn vo an-or, li ti repanti ek ti swazir pou al dan kote Zeova ansam avek bann lezot Levit. Sa bann zom fidel la ti montre dan enn fason kler ki zot pa ti dan kote bann peser. Zot ti pran enn bon desizion, parski plitar sa zour-la, plizir milye dimounn ki ti ador sa vo an-or la ti mor. Me bann ki ti dan kote Zeova ti gagn lavi sov, ek Zeova ti promet pou beni zot.​—Exod 32:27-29.

17. Ki nou aprann ar seki Pol ti ekrir lor sa vo an-or la?

¹⁷ Ki leson nou aprann? Lapot Pol ti dir: “Sa finn arive kouma enn lexanp pouki” zame nou “ador bann idol.” Pol ti explike ki finn ekrir sa bann lexanp-la “pou averti nou parski nou pe viv dan letan kot lafin pe vini. Alors, si to krwar to pe tini ferm, fer atansion ki to pa tonbe.” (1 Korintien 10:6, 7, 11, 12) Parey kouma Pol ti montre, mem bann ki ador Zeova kapav fer bann move kitsoz. Zot kapav mem panse ki Zeova pe ankor donn zot so faver. Me sa pa vedir ki Zeova pe donn so faver enn dimounn, zis parski dimounn-la anvi vinn so kamarad ouswa dir ki li fidel anver Zeova.​—1 Korintien 10:1-5, NW.

18. Ki kitsoz kapav elwagn nou ar Zeova, ek ki konsekans sa pou ena?

¹⁸ Kan bann Izraelit pa ti trouv Moiz  desann depi Sinai osi vit ki zot ti pe atann, zot ti koumans trakase. Si lafin sa sistem-la pa vinn osi vit ki nou ti pe atann, nou osi nou kapav trakase. Nou kapav koumans panse ki bann zoli promes ki Zeova inn fer pou lavenir zot telman lwin ouswa zot tro zoli pou krwar, ek lerla nou koumans fixe nou latansion lor seki nou anvi olie lor seki Zeova anvi. Si nou pa fer atansion, nou pou elwagn nou ar Zeova ek fer bann kitsoz ki zame nou ti pou panse nou pou fer.

19. Ki nou bizin touletan rapel, ek kifer?

¹⁹ Zeova oule ki nou obeir Li avek tou nou leker ek ador zis Li tousel. (Exod 20:5) Kifer Li demann nou sa? Parski Li kontan nou. Si nou pa fer seki Zeova anvi, nou pou fer seki Satan anvi, ek sa pou fer nou ditor. Pol ti dir: “Zot pa kapav bwar anmemtan dan koup Zeova ek dan koup bann demon; zot pa kapav manz anmemtan lor ‘latab Zeova’ ek lor latab bann demon.”​—1 Korintien 10:21, NW.

20. Kouma Zeova kapav ed nou mem kan nou’nn fer enn erer?

²⁰ Kain, Salomon, ek bann Izraelit zot tou ti ena lokazion pou repanti ek sanz zot konportman. (Zistwar Bann Apot 3:19) Li kler ki Zeova pa abandonn bann dimounn deswit kouma zot fer enn erer. Reflesi kouma Li ti pardonn Aaron. Azordi, Zeova avek lamour donn nou bann lavertisman pou protez nou pou ki nou pa fer seki move. Li servi Labib, bann piblikasion, ek mem bann lezot Kretien. Kan nou pran kont bann lavertisman Zeova, nou kapav sir ki Li pou montre mizerikord anver nou.

21. Kan nou fidelite anver Zeova pas par bann test, ki nou bizin fer?

²¹ Ena enn rezon kifer Zeova donn nou so faver ki nou pa merite. (2 Korintien 6:1) Sa donn nou lokazion “pou rezet seki Bondie pa kontan ek bann dezir sa lemond-la.” (Lir Tit 2:11-14, NW.) Dan sa sistem-la, pou touletan ena bann sitiasion ki pou teste nou fidelite anver Zeova. Nou bizin bien determine pou res dan kote Zeova, ek rapel ki se pou “Zeova to Bondie ki to bizin ena lakrint, se Li ki to bizin servi,” ek “se ar Li ki to bizin res atase”!​—Deteronom 10:20.