1. Kifer nou kapav dir ki tou kitsoz pou Zeova? (Get zimaz dan koumansman lartik.)

TOU kitsoz pou Zeova! “Lesiel, mem lesiel bann lesiel, ek later avek tou seki lor la” pou Zeova. (Deteronom 10:14; Revelasion 4:11) Zeova finn kree tou bann dimounn, akoz sa Li nou Proprieter. (Psom 100:3) Me parmi tou bann dimounn ki finn existe, Bondie finn swazir sertin pou vinn pou Li dan enn fason spesial.

2. Dapre Labib, kisannla Zeova ti swazir pou vinn pou Li dan enn fason spesial?

² Par exanp, Psom 135 dekrir bann fidel serviter Zeova dan ansien Izrael kouma “so dibien spesial.” (Psom 135:4, NW.) Anplis, Oze ti profetize ki sertin dimounn ki pa ti bann Izraelit ti pou vinn pep Zeova. (Oze 2:23) Sa profesi-la ti realize kan Zeova ti koumans swazir bann dimounn ki pa ti bann Izraelit pou regne dan lesiel avek Zezi Kris. (Zistwar Bann Apot 10:45; Romin 9:23-26)  Lespri sin finn swazir zot ek apel zot “enn nasion sin.” Zot “dibien spesial” Zeova. (1 Pier 2:9, 10, NW.) Me ki nou kapav dir konsernan tou bann Kretien fidel ki ena lesperans pou viv pou touletan lor later? Zeova apel zot osi “mo pep” ek “bann ki mo’nn swazir.”​—Izai 65:22.

3. (a) Kisannla ki ena enn relasion spesial avek Zeova azordi? (b) Ki nou pou examine dan sa lartik-la?

³ Azordi, “ti troupo,” ki ena lesperans pou viv pou touletan dan lesiel, ek bann “lezot mouton,” ki ena lesperans pou viv pou touletan lor later, pe ador Zeova ansam kouma “enn sel troupo.” (Lik 12:32; Zan 10:16) Nou anvi montre Zeova ki kantite nou rekonesan ki nou ena enn relasion spesial avek Li. Dan sa lartik-la, nou pou examine kouma nou kapav montre Zeova nou rekonesans pou sa loner spesial ki Li’nn fer nou la.

4. Kouma nou kapav remersie Zeova ki’nn permet nou ena enn relasion spesial avek Li, ek kouma Zezi osi ti fer parey?

⁴ Nou montre nou rekonesans anver Zeova kan nou vwe nou lavi ar Li ek pran batem. Lerla zot tou pou trouve ki nou pou Zeova ek nou bien anvi obeir Li. (Ebre 12:9) Zezi ti fer enn kitsoz koumsa kan li ti pran batem. Mem si li ti deza form parti dan enn nasion ki ti vwe ar Zeova, li ti ofer limem ar Zeova. Se koumadir li ti pe dir: “Mo ena boukou plezir obeyir to volonte, Bondie.”​—Psom 40:7, 8.

5, 6. (a) Ki Zeova ti dir kan Zezi ti pran batem? (b) Ki lexanp kapav ed nou pou konpran seki Zeova resanti kan nou vwe nou lavi ar Li?

⁵ Ki Zeova ti resanti kan Zezi ti pran batem? Labib dir: “Zis kouma Zezi fini batize, li sorti dan dilo; lesiel fann an-de e Lespri Sin parey kouma enn kolonb desann lor li. Enn lavwa dan lesiel dir, ‘limem mo Garson ki mo bien kontan; li donn mwa boukou lazwa.’” (Matie 3:16, 17) Mem si Zezi ti deza pou Bondie, Zeova ti kontan kan Li ti trouv Zezi vwe so lavi pou servi zis Li tousel. Ek Zeova kontan osi kan nou vwe nou lavi ar Li, ek Li pou beni nou.​—Psom 149:4, NW.

⁶ Me tou kitsoz deza pou Zeova! Ki nou kapav donn Li? Sey mazinn enn misie ki ena bann zoli fler dan so zardin. Enn zour so tipti tifi kas enn fler ladan ek donn li. Mem si sa fler-la deza pou li, sa fer papa-la so leker extra kontan kan so tifi donn li sa kado-la. Sa montre ki so tifi kontan li. Sa fler ki so tifi inn donn li la ena plis valer pou li ki bann lezot fler dan so zardin. Dan mem fason, Zeova bien kontan kan avek tou nou leker nou swazir pou vwe nou lavi ar Li.​—Exod 34:14.

7. Kouma Malaki ed nou pou konpran seki Zeova resanti pou bann ki servi Li avek tou zot leker?

⁷ Lir Malaki 3:16. * Kifer li inportan sa kantite-la ki to vwe to lavi ar Zeova  ek pran batem? Li vre ki apartir moman ki to koumans existe, to deza pou to Kreater, Zeova. Me sey mazine ki kantite Zeova pou kontan kan to aksepte Li kouma to Dirizan ek to vwe to lavi ar Li! (Proverb 23:15) Zeova kone ki bann ki pe servi Li avek tou zot leker ek Li ekrir zot nom dan so “liv souvenir.”

8, 9. Ki Zeova atann ar bann ki ena zot nom dan so “liv souvenir”?

⁸ Si nou anvi ki nou nom res dan “liv souvenir” Zeova, ena enn kitsoz ki nou bizin fer. Malaki ti dir ki nou bizin ena lakrint pou Zeova ek nou bizin medit lor so nom. Si nou ador enn lot kikenn ouswa enn lot kitsoz, Zeova pou tir nou nom dan so liv!​—Exod 32:33; Psom 69:28.

⁹ Alor li pa ase ki nou zis promet pou fer volonte Zeova ek pran batem. Sa se bann kitsoz ki nou fer enn sel fwa, me ador Zeova se enn fason viv. Toulezour, tanki nou vivan, nou bizin montre par nou bann aksion ki nou pe obeir Zeova.​—1 Pier 4:1, 2, NW.

10. Ki gran diferans bizin ena ant bann dimounn ki servi Zeova ek bann ki pa servi Li?

¹⁰ Dan lartik avan, nou ti aprann ki Kain, Salomon, ek bann Izraelit ti dir ki zot pe ador Zeova me zot pa ti fidel anver Li. Sa bann lexanp-la finn montre nou ki li pa ase ki nou zis dir ki nou ador Zeova. Nou bizin deteste seki pa bon ek kontan seki bon. (Romin 12:9) Zeova dir ki pou ena enn gran diferans “ant enn bon dimounn ek enn move dimounn, ant enn dimounn ki pe servi Bondie ek enn dimounn ki pa pe servi Li.”​—Malaki 3:18.

11. Kifer li bizin fasil pou tou dimounn trouve ki nou pe ador zis Zeova tousel?

¹¹ Nou rekonesan anver Zeova ki Li finn swazir nou pou vinn so pep! Li bizin fasil pou tou dimounn trouve ki nou dan kote Zeova. (Matie 5:16; 1 Timote 4:15) Demann tomem: ‘Eski lezot trouve ki mo fidel ar Zeova dan tou seki mo fer? Eski mo fier pou dir lezot ki mo enn Temwin Zeova?’ Sey mazine ki kantite sa pou fer Zeova lapenn si nou onte pou dir lezot ki nou pou Li.​—Psom 119:46; lir Mark 8:38.

12, 13. Kifer li difisil pou idantifie sertin kouma bann Temwin Zeova?

¹² Li bien tris, ki mem sertin Temwin imit “lespri lemonn.” Finalman pena enn gran diferans ant zot ek bann ki pa pe servi Zeova. (1 Korintien 2:12) “Lespri lemonn” fer bann dimounn pans zis zot prop dezir egois. (Efezien 2:3) Par exanp, malgre tou bann konsey ki nou finn gagne, sertin swazir pou abiy dan enn fason ki pa modes. Zot met bann linz ki kole ek ki tro  montre bann parti zot lekor, mem dan bann rasanbleman Kretien. Ouswa zot swazir bann kwafir ki atir latansion lor zot. (1 Timote 2:9, 10) Akoz sa, parfwa li bien difisil pou lezot kone si zot bann Temwin Zeova ouswa non.​—Zak 4:4.

¹³ Ena lezot domenn kot sertin Temwin pa finn montre ki zot vremem diferan ar lemond. Par exanp, dan bann fet, sertin finn danse ek konport zot dan enn manier ki pa akseptab pou bann Kretien. Ena lezot ki finn met zot foto ek bann komanter lor bann rezo sosial ki montre bien ki zot ena bann panse lemond. Kitfwa zot pa finn gagn enn disiplinn dan kongregasion akoz enn pese grav, me zot kapav ena enn move linflians lor zot bann frer ek ser ki pe fer boukou zefor pou res diferan ar lemond.​—Lir 1 Pier 2:11, 12, NW.

14. Ki nou bizin fer pou protez nou lamitie spesial avek Zeova?

¹⁴ Tou kitsoz dan lemond finn fer dan enn fason pou ki nou res konsantre lor “dezir laser, dezir lizie” ek pou ki nou “fer letalaz ar seki [nou] mwayin permet [nou] ena.” (1 Zan 2:16, NW.) Me nou nou diferan, parski nou pou Zeova. Nou “rezet seki Bondie pa kontan ek bann dezir sa lemond-la.” Anplis, nou “viv avek bon sans ek dan lazistis ek res atase ar Bondie, dan sa sistem-la.” (Tit 2:12, NW.) Nou lavi an-antie, parmi ena kouma nou koze, manze, bwar, abiye, ek travay, bizin fer tou dimounn trouve dan enn fason kler ki nou pou Zeova.​—Lir 1 Korintien 10:31, 32, NW.

15. Kifer nou bizin tret lezot Kretien avek bonte ek lamour?

¹⁵ Nou montre ki nou lamitie avek Zeova ena boukou valer par fason ki nou tret nou bann frer ek ser. Zot pou Zeova, parey kouma nou. Si nou rapel sa, nou pou touletan tret zot avek bonte ek lamour. (1 Tesalonisien 5:15) Kifer sa li bien inportan? Zezi ti dir so bann disip: “Si zot ena lamour pou zot kamarad, tou dimoun pou kone ki zot mo disip.”​—Zan 13:35.

16. Ki nou aprann dan Lalwa Mozaik konsernan lamour ki Zeova ena pou so pep?

¹⁶ Pou ed nou konpran kouma nou bizin tret lezot dan kongregasion anou pran enn lexanp dan Lalwa Mozaik. Dan tanp Zeova, ti ena bann resipian ki ti servi zis pou ladorasion. Lalwa ti explik dan enn fason kler kouma bann Levit ti bizin okip sa bann resipian-la, ek ti dir osi ki bizin touy bann ki pa ti swiv sa bann instriksion-la. (Nonb 1:50, 51) Zeova ti akord enn gran linportans fason ki bann dimounn ti tret bann resipian ki ti servi pou ador Li. Alor, komie plis Li akord linportans fason ki tret bann dimounn ki’nn vwe zot lavi ar Li ek ki pe ador Li avek fidelite! Li fer nou kone ki kantite nou ena valer pou Li kan Li dir: “Seki tous zot, pe tous mo lagrin lizie.”​—Zakari 2:8.

17. Ki Zeova ‘pe pran kont ek pe ekoute’?

¹⁷ Malaki ti dir ki Zeova ‘pe pran kont, ek pe ekoute’ kouma so pep tret sakenn zot kamarad. (Malaki 3:16) Zeova “konn so dimoun.” (2 Timote  2:19) Li konn tou seki nou dir ek fer. (Ebre 4:13) Zeova remarke kan nou pa azir bien anver nou bann frer ek ser. Me nou kapav sir osi ki Zeova remarke kan nou manifeste lospitalite, zenerozite, pardon ek bonte.​—Ebre 13:16; 1 Pier 4:8, 9, NW.

18. Kouma nou kapav remersie Zeova ki Li’nn swazir nou pou vinn so pep?

¹⁸ Nou anvi montre Zeova ki kantite nou rekonesan ki Li’nn swazir nou pou vinn so pep. Nou kone ki kan nou finn vwe nou lavi ar Li, se meyer desizion ki nou’nn pran. Mem si nou pe viv “omilie sa lemonn move ek perverti la,” nou kapav “san defo e san repros” ek “briye” kouma bann lalimier dan lemond. (Filipien 2:15) Alor, nou bien determine pou pa fer bann kitsoz ki Zeova deteste. (Zak 4:7) Ek nou kontan ek respekte nou bann frer ek ser parski zot osi zot pou Zeova.​—Romin 12:10.

19. Kouma Zeova rekonpans bann ki pou Li?

¹⁹ Labib promet nou ki Zeova “zame pou abandonn so pep.” (Psom 94:14) Se enn garanti ki ninport ki arive, Zeova pou avek nou. Mem si nou mor, Li pa pou bliye nou. (Romin 8:38, 39) “Si nou viv, nou viv pou Lesegner [“Zeova,” NW]; si nou mor, nou mor pou Lesegner [“Zeova,” NW]. Alor ki nou viv ou ki nou mor, nou apartenir ar Lesegner [“Zeova,” NW].” (Romin 14:8) Nou pe atann sa moman kot Zeova pou re-donn lavi tou so bann kamarad fidel ki finn mor. (Matie 22:32) Ek mem depi asterla nou pe kapav profit bann zoli kado ki nou Papa donn nou. Parey kouma Labib dir: “Ere sa nasion ki so Bondie li Zeova, pep ki Li’nn swazir kouma so prop dibien.”​—Psom 33:12, NW.