1, 2. Apre ki Zezi ti al dan lesiel, ki kitfwa bann zapot ti pe demann zotmem?

BANN zapot Zezi lor Mont des Oliviers. Zot pe get zot met ek zot kamarad, Zezi, mont dan lesiel ziska ki enn niaz kasiet li. (Zistwar Bann Apot 1:9, 10) Pandan apepre de-z-an, Zezi ti ansegn zot, ankouraz zot, ek gid zot. Me aster ki li nepli la, ki zot pou fer?

² Avan ki li al dan lesiel, Zezi ti dir so bann disip: “Zot pou vinn mo temwin dan Zerizalem, dan Zide ek Samari e partou lor later.” (Zistwar Bann Apot 1:8) Kouma zot ti pou reisi fer sa travay-la? Zezi ti promet zot ki lespri sin Bondie ti pou ed zot. (Zistwar Bann Apot 1:5) Me kisannla ti pou gid zot ek organiz sa travay predikasion ki ti pou fer partou lor later la? Bann zapot ti kone ki, dan lepase, Zeova ti servi bann zom pou gid bann Izraelit. Alor, kitfwa zot ti pe demann zot si Zeova ti pou swazir enn nouvo gid.

3. (a) Apre ki Zezi ti al dan lesiel, ki desizion inportan bann zapot fidel ti pran? (b) Ki kestion nou pou reponn dan sa lartik-la?

 ³ Inpe letan apre ki Zezi ti al dan lesiel, bann disip ti examinn bann Lekritir, zot ti rod led Bondie dan lapriyer, ek zot ti swazir Matias pou ranplas Zida Iskaryot kouma 12^em zapot. (Zistwar Bann Apot 1:15-26) Kifer sa desizion-la ti inportan pou zot ek pou Zeova? Bann disip ti konpran ki ti bizin ena 12 zapot. * (Get not.) Zezi ti swazir bann zapot ek ti form zot pou okip enn responsabilite bien inportan dan pep Bondie. Ki ti sa responsabilite-la, ek kouma eski Zeova ek Zezi ti prepar zot pou asim sa? Ki dispozision, ki ti existe dan lepase, ankor touzour existe azordi? Ek kouma nou kapav “pa bliye bann ki pe diriz” nou, sirtou “lesklav fidel ek saz”?—Ebre 13:7; Matie 24:45, NW.

4. Ki responsabilite bann zapot ek bann lezot ansien dan Zerizalem ti ena?

⁴ Bann zapot ti koumans pran latet dan kongregasion Kretien apartir Lapantkot lane 33. Labib dir ki “Pier ti diboute avek lezot onz apot” ek ti ansegn enn gran lafoul bann verite ki sov lavi. (Zistwar Bann Apot 2:14, 15) Boukou dimounn parmi sa lafoul-la ti vinn bann Kretien. Apre, sa bann nouvo Kretien-la “ti devoue zot letan pou ekout lansegnman bann apot.” (Zistwar Bann Apot 2:42) Bann zapot ti ena responsabilite pou zer larzan kongregasion. (Zistwar Bann Apot 4:34, 35) Bann zapot ti osi ansegn pep Bondie ek ti priye pou zot. Zot ti dir: “Nou bizin konsakre nou pou lapriyer ek pou minister ki konsern laparol.” (Zistwar Bann Apot 6:4, NW.) Ek zot ti avoy bann Kretien ki ena lexperyans pou pres dan bann nouvo teritwar. (Zistwar Bann Apot 8:14, 15) Plitar, bann lezot ansien ki ti ena lesperans pou al dan lesiel ti pran latet dan kongregasion ansam ar bann zapot. Zot ti form enn komite santral ek zot ti donn bann instriksion tou bann kongregasion.—Zistwar Bann Apot 15:2.

5, 6. (a) Kouma lespri sin ti donn lafors komite santral? (Get zimaz dan koumansman lartik.) (b) Kouma komite santral ti gagn led bann anz? (c) Kouma komite santral ti les Parol Bondie gid zot?

⁵ Bann Kretien dan premie siek ti kone ki Zeova ti pe gid komite santral atraver Zezi. Kouma eski zot ti konn sa? Premierman, komite santral ti gagn lafors gras-a lespri sin. (Zan 16:13) Tou bann Kretien ki ena lesperans pou al dan lesiel ti gagn lespri sin Bondie.  Me lespri sin ti donn lafors sirtou bann zapot ek bann ansien pou asim zot rol kouma sirveyan. Par exanp, lane 49, lespri sin ti ed komite santral pou pran enn desizion konsernan sirkonsizion. Bann kongregasion ti swiv bann instriksion ki zot ti gagne. Rezilta: Zot “ti pe vinn pli for dan lafwa e zot kantite ti pe ogmante zour apre zour.” (Zistwar Bann Apot 16:4, 5) Kan nou lir let ki bann kongregasion ti gagne konsernan sirkonsizion, nou trouve ki komite santral ti ena lespri Bondie, ek zot ti manifeste bann kalite kouma lamour ek lafwa.—Zistwar Bann Apot 15:11, 25-29; Galat 5:22, 23.

⁶ Deziemman, komite santral ti gagn led bann anz. Par exanp, enn anz ti dir Korney al rod lapot Pier. Ek apre ki Pier ti pres ar Korney ek so fami, zot ti gagn lespri sin, mem si bann zom dan sa fami-la pa ti sirkonsi. Korney ti premie Non-Zwif ki ti vinn Kretien. Kan bann zapot ek bann lezot frer ti gagn sa nouvel-la, zot ti aksepte volonte Bondie ek zot ti akeyir dan kongregasion Kretien bann Non-Zwif ki pa ti sirkonsi. (Zistwar Bann Apot 11:13-18) Sa lexanp-la montre nou ki bann anz ti soutenir san poursan travay predikasion ki komite santral ti pe dirize. (Zistwar Bann Apot 5:19, 20) Trwaziemman, komite santral ti les Parol Bondie gid zot. Sa bann zom-la ti servi bann Lekritir pou pran bann desizion inportan konsernan krwayans bann Kretien ek pou diriz bann kongregasion.—Zistwar Bann Apot 1:20-22; 15:15-20.

7. Kifer nou kapav dir ki se Zezi ki ti gid bann premie Kretien?

⁷ Mem si komite santral ti ena lotorite lor bann kongregasion, bann manb sa komite-la ti konpran ki se Zezi Kris ki ti zot Sef. Kouma nou konn sa? Lapot Pol ti dir ki se Zezi Kris ki ti etabli sertin kouma bann “apot.” Li ti dir osi ki Zezi Kris ti “latet,” ouswa Sef kongregasion. (Efezien 4:11, 15) Ek olie ki zot ti apel zot group dapre nom enn zapot, se “Bondie [ki] ti fer bann disip port nom Kretien.” (Zistwar Bann Apot 11:26, NW.) Pol ti kone ki li ti inportan pou swiv lansegnman bann zapot ek bann zom ki ti pran latet parski zot lansegnman ti baze lor Lekritir. Me kanmem sa, Pol ti dir: “Mo anvi ki zot kone ki sef tou bann zom se Kris.” Ek sa inplik osi tou bann manb komite santral. Apre Pol ti dir: “Sef Kris se Bondie.” (1 Korintien 11:2, 3, NW.) Li kler ki se Zeova ki’nn etabli so Garson, Zezi Kris kouma Sef kongregasion.

8, 9. Ki rol inportan Frer Russell ti ena?

⁸ Depi 1870, Charles Russell ek sertin so bann kamarad ti koumans ador Bondie an-akor avek Labib ek zot ti ed lezot osi pou fer parey. Sa ti inplik osi bann dimounn ki ti koz diferan lang. Alor, an 1884, Frer Russell ti kree lasosiasion Zion’s Watch Tower Tract Society ek limem ti prezidan sa lasosiasion-la. * (Get not.) Li ti etidie Labib an profonder ek li pa ti per pou dir bann dimounn  ki bann lansegnman legliz, kouma lor nam ek Trinite, pa ti sorti dan Labib. Li ti konpran ki retour Zezi Kris ti pou invizib ek ki “letan fixe bann nasion” ti pou fini an 1914. (Lik 21:24, NW.) Frer Russell ti servi so letan, so lenerzi, ek so larzan pou ansegn lezot sa bann verite-la. Li kler ki Zeova ek Zezi ti servi Frer Russell kouma enn gid dan enn lepok inportan dan listwar.

⁹ Frer Russell pa ti anvi ki lezot donn li enn latansion spesial. An 1896, li ti ekrir ki li ek bann lezot zom ki ti ena bann responsabilite pa ti anvi gagn okenn loner. Zot pa ti anvi ki donn zot bann tit spesial ouswa ki servi zot nom pou apel enn group dimounn. Plitar li ti dir: “Se pa travay enn zom sa.”

10. (a) Kan eski Zezi ti etabli “lesklav fidel ek saz”? (b) Explike kouma nou finn konpran ki Komite Santral ti diferan ar Watch Tower Society.

¹⁰ An 1919, trwa-z-an apre lamor Frer Russell, Zezi ti etabli “lesklav fidel ek saz.” Pou ki rezon? Pou donn bann disip Zezi “nouritir dan ler ki bizin.” (Matie 24:45, NW.) Deza dan sa lepok-la, enn ti group Kretien ki ena lesperans pou al dan lesiel ti donn bann disip Zezi zot nouritir spiritiel. Zot biro mondial ti dan Brooklyn, New York. Apre 1940, ti koumans servi lexpresion “komite santral” dan nou bann piblikasion. Sa lepok-la, boukou ti panse ki komite santral ti bien pros ar lasosiasion Watch Tower Bible and Tract Society. Me selman, an 1971, nou finn konpran ki Komite Santral ti diferan ar Watch Tower Society, ki ti okip zis bann kestion legal. Depi sa lepok-la, bann frer ki ena lesperans pou al dan lesiel ti nepli bizin vinn direkter lasosiete Watch Tower pou ki zot form parti dan Komite Santral. Depi inpe letan asterla, bann ansien ki form parti bann “lezot brebi” pe servi kouma bann direkter Watch Tower Society ek lezot lasosiasion ki pep Bondie inn forme. Koumsa, Komite Santral kapav konsantre lor lansegnman ek direksion ki zot donn pep Bondie. (Zan 10:16; Zistwar Bann Apot 6:4) Latour Degard 15 Ziliet 2013, ti explike ki “lesklav fidel ek saz” se enn ti group frer ki ena lesperans pou al dan lesiel ek se zotmem Komite Santral.

11. Kouma eski Komite Santral pran bann desizion?

¹¹ Sak semenn, bann manb Komite Santral zwenn ansam antan ki enn group pou pran bann desizion inportan. Kan zot zwenn dan sa fason-la, sa ed zot pou ena enn bon kominikasion ek pou res dan linite. (Proverb 20:18) Pena okenn manb Komite Santral ki pli inportan ki so kamarad. Se pou sa rezon-la ki toule lane, sakenn so tour diriz bann renion. (1 Pier 5:1) Li parey osi pou sa sis komite ki  travay anba direksion Komite Santral la. Okenn manb Komite Santral pa panse ki li sef lor so bann frer. Sakenn parmi zot enn domestik. Zot gagn zot nouritir spiritiel ar lesklav fidel ek saz, ek zot swiv so direksion.

12. Ki bann kestion nou pou examine?

¹² Komite Santral pa gagn bann revelasion ar Bondie, ek zot pa parfe. Li kapav arive ki sa komite-la fer bann erer kan li explik Labib ouswa kan li diriz lorganizasion. Par exanp, dan Index des publications des Témoins de Jéhovah, ena enn size ki apel « Compréhensions affinées » ki donn enn lalis bann sanzman ki finn ena depi 1870 lor fason ki nou ti explik Labib. Zezi pa ti dir ki so lesklav fidel ek saz ti pou donn enn nouritir spiritiel ki parfe. Alor, kouma nou kapav reponn sa kestion ki Zezi ti poze la: “Kisannla ki vremem lesklav  fidel ek saz?” (Matie 24:45, NW.) Ki prev nou ena ki Komite Santral se lesklav fidel ek saz? Anou gete kouma sa trwa kitsoz ki ti ed komite santral dan lepok bann zapot la, ankor pe ed Komite Santral azordi.

13. Kouma eski lespri sin ti ed Komite Santral?

¹³ Lespri sin ed Komite Santral. Lespri sin inn ed Komite Santral pou konpran bann verite Biblik ki pa ti konpran avan. Par exanp, get lalis bann « Compréhensions affinées » ki nou ti mansione lao. Okenn imin pa ti pou kapav konpran ek explik sa “bann kitsoz profon ki konsern Bondie” la par limem! (Lir 1 Korintien 2:10, NW.) Komite Santral ena mem santiman ki lapot Pol ki ti dir: “Sa bann kitsoz ki nou pe dir la osi, se pa bann parol ki nou’nn aprann par sazes imin, me avek bann parol ki nou’nn aprann gras-a lespri sin.” (1 Korintien 2:13, NW.) Pandan bann santenn lane, finn ena bann fos lansegnman ek pa finn ena enn bon direksion spiritiel. Me kifer depi 1919, finn ena sa kantite eklersisman-la lor fason ki nou konpran Labib? Sel explikasion ki kapav ena se ki Bondie ti pe ed so bann serviter par so lespri sin!

14. Dapre Revelasion 14:6, 7, kouma eski bann anz pe ed Komite Santral ek pep Bondie azordi?

¹⁴ Bann anz ed Komite Santral. Komite Santral ena enn gran responsabilite pou diriz travay predikasion ki pe fer dan lemond antie par plis ki wit milyon proklamater. Kifer eski sa travay-la finn gagn otan sikse? Enn parmi bann rezon se parski bann anz soutenir sa travay-la. (Lir Revelasion 14:6, 7.) Dan boukou lokazion, bann anz finn diriz bann proklamater kot enn kikenn ki ti fek fini rod led Bondie dan lapriyer! * (Get not.) Travay predikasion ek lansegnman pe kontign ogmante malgre lopozision. Ek sa osi li posib zis parski bann anz soutenir sa travay-la.

15. Ki diferans ena ant Komite Santral ek bann sef relizie ki swadizan Kretien? Donn enn lexanp.

¹⁵ Komite Santral les Parol Bondie gid li. (Lir Zan 17:17.) Get seki ti arive an 1973. Latour Degard 1^er Septam, an Franse, ti poz sa kestion-la: “Eski bann dimounn ki pa finn aret fime ranpli bann kondision pou pran batem?” Repons ki sa Latour Degard-la ti done ti baze lor bann prinsip Labib, ek repons-la ti: “Non!” Li ti mansionn plizir verse Labib ek ti explike kifer ti bizin exkli enn dimounn ki pa ti anvi aret fime. (1 Korintien 5:7; 2 Korintien 7:1) Sa Latour Degard-la ti explike ki se pa bann dimounn ki ti etabli sa prinsip-la me “Bondie, ki koz ar nou par so Parol.” Pena okenn lezot lorganizasion relizie ki fer Labib otan konfians mem si parfwa sa difisil pou sertin so bann manb. Enn liv ki koz lor larelizion dan L’Amérique dir: “Souvan bann sef relizie Kretien adapte zot lansegnman avek krwayans ek lopinion zot bann manb ek bann dimounn an zeneral.” Me Komite Santral pa les preferans bann dimounn  gid li. Okontrer, so bann manb les Parol Bondie gid zot ek sa se enn prev ki se vremem Zeova ki pe gid so pep azordi.

16. Sit enn fason kouma nou kapav mazinn Komite Santral.

¹⁶ Lir Ebre 13:7, NW. Labib dir nou “pa bliye bann ki pe diriz [nou].” Enn fason ki nou kapav fer sa se kan nou mazinn Komite Santral dan nou bann lapriyer. (Efezien 6:18) Zot ena boukou responsabilite. Zot donn nou manze lor plan spiritiel, zot diriz travay predikasion ki fer dan lemond antie, ek zot zer bann donasion ki lorganizasion gagne. Alor, zot vremem bizin ki nou mazinn zot dan nou bann lapriyer!

17, 18. (a) Kouma eski nou swiv direksion ki Komite Santral done? (b) Kouma kan nou prese, nou soutenir Komite Santral ek Zezi?

¹⁷ Nou kapav osi mazinn Komite Santral kan nou swiv bann instriksion ek direksion ki li done. Komite Santral donn nou sa atraver bann piblikasion, bann renion, ek bann lasanble. Li nomm bann sirveyan sirkonskripsion ek zot, zot nomm bann ansien. Kan zot swiv bien direksion ki zot gagne, bann sirveyan sirkonskripsion ek bann ansien montre ki zot mazinn Komite Santral. Ek nou tou nou montre ki nou ena respe pou nou Sef, Zezi, kan nou obeir bann zom ki li pe servi azordi.—Ebre 13:17.

¹⁸ Enn lot fason ki nou kapav mazinn Komite Santral se kan nou fer nou maximum dan travay predikasion. Ebre 13:7 ankouraz bann Kretien pou imit lafwa bann ki pe diriz zot. Komite Santral montre enn gran lafwa kan li pres bonn nouvel avek zel ek kan li fer an-sort ki bonn nouvel prese partou lor later. Eski nou pe soutenir sa bann frer-la dan sa travay inportan la? Si nou pe fer sa, nou pou kontan kan nou tann Zezi dir nou: “Sak fwa ki zot finn fer sa pou enn ki pli tipti parmi mo bann frer, se pou mwa ki zot finn fer sa.”—Matie 25:34-40, NW.

19. Kifer to determine pou swiv nou Sef, Zezi?

¹⁹ Kan Zezi ti retourn dan lesiel, li pa ti abandonn so bann disip. (Matie 28:20) Li ti kone ki lespri sin, bann anz, ek Parol Bondie ti ed li kan li ti lor later. Azordi, li donn sa led-la so lesklav fidel ek saz. Komite Santral kontign “swiv Lagno,” Zezi, “ninport kot li ale.” (Revelasion 14:4, NW.) Alor, kan nou swiv direksion ki Komite Santral done, nou swiv nou Sef, Zezi. Biento, li pou fer nou gagn lavi pou touletan. (Revelasion 7:14-17) Ek pena okenn zom ki kapav promet nou sa!