1. Ki bann bienfe laranson permet nou gagne?

GRAS-A sakrifis Zezi nou gagn boukou benediksion. Par exanp, laranson ouver laport pou ki tou bann zanfan Adan ki kontan lazistis kapav enn zour form parti dan fami Zeova. Enn lot bienfe laranson se ki nou kapav viv ere pou touletan. Me pli inportan, laranson ena enn lien avek bann kestion bien inportan ki konsern tou bann ki dan lesiel ek lor later.—Ebre 1:8, 9.

2. (a) Ki bann pwin bien inportan ena dan lapriyer Zezi? (Get zimaz dan koumansman lartik.) (b) Ki nou pou examine dan sa lartik-la?

² Anviron de-z-an avan so lamor, Zezi ti montre so bann disip pou priye koumsa: “Nou Papa ki dan lesiel, ki to nom sanktifie. Ki to Rwayom vini. Ki to volonte fer lor later, parey kouma dan lesiel.” (Matie 6:9, 10, NW.) Anou gete kouma laranson ena enn lien avek (1) sanktifie nom Zeova, (2) regn Rwayom Bondie, ek (3) realizasion volonte Bondie.

3. (a) Ki nom Zeova reprezante? (b) Kouma Satan inn sali nom Zeova?

³ Premierman, Zezi ti priye pou ki nom Zeova sanktifie, setadir konsider So nom kouma enn kitsoz ki sakre. Sinifikasion nom Zeova reprezant Zeova Limem, setadir kisannla Li ete. Zeova Limem Personaz pli drwat ek pli pwisan ki ena dan liniver. Zezi ti osi apel Li “Papa ki sin.” (Zan 17:11, NW.) Zeova Li sin ek akoz sa, tou seki Li fer ek tou so bann lalwa, zot sakre. Me dan zardin Edenn, Satan ti met an dout drwa ki Zeova ena pou etabli bann lalwa pou bann dimounn. Li’nn koz manti lor Zeova ek li’nn sali nom Bondie ouswa so repitasion.—Zenez 3:1-5.

4. Kouma Zezi ti sanktifie nom Zeova?

⁴ Parkont, Zezi ti vremem kontan nom Zeova. Li ti fer tou seki li ti kapav pou sanktifie so nom. (Zan 17:25, 26) Kouma? Li’nn montre par so fason azir ek so lansegnman ki Zeova ena drwa pou etabli bann lalwa, ek ki tou seki Bondie demann nou fer, se pou nou prop dibien. (Lir Psom 40:8-10, NW.) Zezi ti res fidel mem kan Satan ti fer li soufer ziska so lamor. Kan li ti fer sa, Zezi ti montre ki enn zom parfe kapav obeir Zeova san poursan.

5. Kouma nou kapav sanktifie nom Zeova?

⁵ Kouma nou kapav montre ki nou kontan nom Zeova? Nou kapav montre sa par fason ki nou azir. Zeova anvi ki nou vinn bann dimounn ki “sin.” (Lir 1 Pier 1:15, 16.) Savedir ki nou bizin ador zis Li tousel ek obeir Li avek tou nou leker. Mem kan nou gagn persekision, nou fer tou pou viv dan fason ki Zeova ansegn nou. Kan nou aplik so bann lalwa dan nou lavi, nou fer so nom gagn laglwar. (Matie 5:14-16) Nou prouve ki bann lalwa Zeova bon, ek ki Satan enn manter. Li vre ki nou pa parfe, alor nou pou fer bann erer. Me kan sa arive, nou repanti ek nou fer tou pou aret fer bann kitsoz ki zet dezoner lor nom Zeova.—Psom 79:9.

6. Kifer Zeova kapav konsider nou kouma bann dimounn ki zis, mem si nou inparfe?

⁶ Mem si nou ena lesperans pou al dan lesiel ouswa nou form parti “bann lezot brebi,” Zeova pardonn nou bann pese si nou ena lafwa dan laranson. Tou bann ki vwe zot lavi ar Li, Li aksepte zot kouma so bann adorater. Bann ki pou al dan lesiel, Zeova deklar zot “zis,” antan ki so bann garson ek Li deklar bann “lezot brebi” “zis,” antan ki so bann kamarad. (Zan 10:16; Romin 5:1, 2; Zak 2:21-25) Alor, depi asterla mem, laranson permet nou ena enn bon relasion avek nou Papa ek sanktifie so nom.

7. Ki bann benediksion nou pou gagne gras-a laranson?

⁷ Dan lapriyer model, Zezi ti dir: “Ki to Rwayom vini.” Ki lien ena ant laranson ek Rwayom Bondie? Dan Rwayom Bondie, ouswa so gouvernman, ena Zezi ek 144,000 dimounn ki Bondie finn swazir. Gras-a laranson, sa bann dimounn-la kapav resisite pou al dan lesiel. (Revelasion 5:9, 10; 14:1) Zot pou vinn bann lerwa ek bann pret, ek zot pou diriz later ansam avek Zezi pandan mil an. Pandan sa mil an-la, Zeova pou  servi so Rwayom pou fer later vinn enn paradi, ek pou ed tou bann dimounn pou vinn parfe. Finalman, tou bann adorater Zeova dan lesiel ek lor later pou form enn sel fami. (Revelasion 5:13; 20:6) Zezi pou detrir Satan, ek pou repar tou bann dega ki Satan finn fer.—Zenez 3:15.

8. (a) Kouma Zezi ti ed so bann disip pou konpran ki Rwayom Bondie li inportan? (b) Kouma nou soutenir Rwayom Bondie azordi?

⁸ Zezi ti ed so bann disip pou konpran ki Rwayom Bondie li inportan. Kouma? Zis apre so batem, li ti koumans pres “Bonn Nouvel Rwayom Bondie” partou kot li ti ale. (Lik 4:43) Li ti osi donn lord so bann disip pou vinn so bann temwin “partou lor later.” (Zistwar Bann Apot 1:6-8) Azordi, gras-a predikasion bon nouvel lor Rwayom Bondie, bann dimounn pe gagn lokazion pou aprann ki ete laranson, ek pou vinn bann sitwayen Rwayom Bondie. Nou montre ki nou bann sitwayen fidel Rwayom Bondie kan nou ed bann ki ena lesperans pou al dan lesiel pou pres bonn nouvel dan lemond antie.—Matie 24:14; 25:40.

9. Kifer nou kapav sir ki Zeova pou realiz so proze?

⁹ Zezi ti dir: “Ki to volonte fer.” Me ki li ti pe rod dir? Kan Zeova dir ki enn kitsoz pou arive, pena bare, li pou arive. (Izai 55:11) Rebelion Satan pa’nn kapav aret Zeova. Me ki proze Zeova ti ena pou later? Li ti anvi ki later ranpli ar bann zanfan parfe ki Adan ek Ev ti pou gagne. (Zenez 1:28) Si Adan ek Ev ti mor san gagn zanfan, zame proze Zeova ti pou realize. Akoz sa, Li’nn permet zot gagn bann zanfan. Laranson donn tou bann ki ena lafwa posibilite pou vinn parfe ek pou viv pou touletan. Zeova kontan tou dimounn ek Li anvi ki nou gagn sa lavi extraordiner ki Li ti prevwar pou nou la.

10. Ki bienfe bann dimounn ki’nn mor pou gagne gras-a laranson?

¹⁰ Ki pou ariv bann milyar dimounn ki finn mor san ki zot konn Zeova? Zeova pa anvi ki bann dimounn mor, akoz sa Li pou resisit zot. Gras-a laranson bann mor pou resisite. Lerla, zot pou gagn lokazion pou aprann konn Zeova ek viv pou touletan. (Zistwar Bann Apot 24:15) Zeova Limem “lasours lavi.” Kan Zeova redonn lavi enn dimounn ki ti mor, Li vinn Papa sa dimounn-la. (Psom 36:9) Dan lapriyer model, Zezi ti dir ki Zeova Li “nou Papa ki dan lesiel.” (Matie 6:9, NW.) Zeova finn donn Zezi enn rol bien inportan an rapor avek rezireksion bann mor. Zezi ti dir: “Momem larezireksion, momem lavi.”—Zan 6:40, 44; 11:25.

11. Ki volonte Zeova pou “gran lafoul”?

¹¹ Zezi ti dir osi: “Ninport kisannla ki fer volonte Bondie, limem mo frer, limem mo ser, ek limem mo mama.” (Mark 3:35, NW.) Se volonte Zeova ki bann dimounn ki sorti dan tou nasion, tribi ek lang vinn so bann adorater. Labib dekrir zot kouma “enn gran lafoul, ki personn pa ti kapav konte.” Sa bann dimounn-la ena lafwa dan laranson ek zot anvi obeir Bondie. Zot donn Li laglwar kan zot dir: “Nou delivrans, nou  dwa sa nou Bondie ki pe asiz lor tronn, ek nou dwa sa Lagno.”—Revelasion 7:9, 10, NW.

12. Dan lapriyer model, ki nou aprann lor proze ki Zeova ena pou bann dimounn?

¹² Dan lapriyer model, nou finn aprann boukou lor Zeova ek so proze pou bann dimounn. (1) Nou bizin fer tou pou donn loner Zeova ek sanktifie so nom. (Izai 8:13) Laranson fer nou gagn delivrans, ek donn loner nom Zeova. Ofet, nom Zezi vedir “Zeova Li delivrans.” (2) Zeova pou servi so Rwayom pou fer bann dimounn ki obeir Li gagn bann bienfe gras-a laranson. (3) Nou sir ki nanye pa kapav anpes volonte Zeova realize.—Psom 135:6; Izai 46:9, 10.

13. Kifer nou pran batem?

¹³ Enn fason ki nou montre nou rekonesans pou laranson se kan nou vwe nou lavi ar Zeova ek nou pran batem. Koumsa, nou montre ki nou ena lafwa dan laranson ek ki “nou pou Zeova.” (Romin 14:8, NW.) Kan nou pran batem, nou demann Li pou donn nou “enn bon konsians.” (1 Pier 3:21, NW.) Lerla, Zeova reponn nou kan Li donn nou bann bienfe ki gagne gras-a laranson. Ek nou pena okenn dout ki Li pou donn nou tou seki Li finn promet nou.—Romin 8:32.

14. Kifer Zeova donn nou lord pou kontan lezot?

¹⁴ Tou seki Zeova fer, Li fer sa par amour. So volonte se ki so bann adorater imit Li ek kontan sakenn zot kamarad. (1 Zan 4:8-11) Kan nou kontan lezot, nou montre dan enn fason bien kler ki nou anvi “vinn zanfan [nou] Papa ki dan lesiel.” (Matie 5:43-48) De pli gran komannman se, premierman kontan Zeova, ek deziemman kontan bann dimounn. (Matie 22:37-40) Enn fason pou montre nou lamour pou bann dimounn, se kan nou ansegn zot bon nouvel lor Rwayom Bondie. Si nou obeir komannman Zeova pou kontan lezot, sirtou nou bann frer, nou lamour pou Li pou “vinn parfe.”—1 Zan 4:12, 20.

15. (a) Ki bann bienfe nou pe gagne depi asterla mem ar Zeova? (b) Ki bann bienfe nou pou gagne dan lavenir?

¹⁵ Zeova donn nou lasirans ki si nou ena lafwa dan laranson, Li kapav “efas” net nou bann pese. Li kapav pardonn nou bann pese. (Lir Zistwar Bann Apot 3:19-21.) Parey kouma nou finn trouve dan sa lartik-la, gras-a laranson, Zeova kapav adopte sertin dimounn pou vinn so bann garson. Se zotmem ki Bondie finn swazire pou al dan lesiel. (Romin 8:15-17) Zeova invit osi lezot dimounn, setadir bann “lezot brebi,” pou vinn bann manb so fami lor later. Apre ki zot pou vinn parfe, zot pou pas enn test final. Si zot res fidel ar Zeova, Li pou adopte zot osi kouma so bann zanfan. (Romin 8:20, 21; Revelasion 20:7-9) Zeova pou touletan kontan so bann zanfan. Laranson pou fer nou gagn bann bienfe pou touletan. (Ebre 9:12) Se Zeova ki finn donn nou sa kado ki ena boukou valer la, ek personn pa pou kapav pran sa ar nou.

16. Kouma laranson liber nou?

¹⁶ Si nou repanti ar nou bann pese, Satan pa pou kapav fer nanye pou anpes nou form parti dan fami Zeova. Zezi inn mor “enn fwa pourtou.” Akoz sa, zame pa pou bizin pey laranson ankor. (Ebre 9:24-26) Adan finn donn nou lamor an eritaz, me sakrifis Zezi pou fer nou gagn lavi pou touletan. Laranson kapav liber nou ar lemond Satan ek fer nou aret per lamor.—Ebre 2:14, 15.

17. Ki lamour Zeova vedir pou twa?

¹⁷ Bann promes Zeova touletan realize. Zame Li pa pou desevwar nou. Parey kouma bann lalwa ki ena dan lanatir zame pa sanze, nou Kreater Zeova osi zame pa sanze. Zame li pa pou desevwar nou. (Malaki 3:6) Zeova pa zis donn nou lavi. Li donn nou so lamour. “Nou kone e nou krwar ki Bondie kontan nou. Bondie limem lamour.” (1 Zan 4:16) Li tini so bann promes touletan. Biento, later pou vinn enn zoli paradi. Tou bann dimounn pou imit Zeova ek zot pou ena lamour sakenn pou zot kamarad. Lerla, tou bann ki ador Zeova dan lesiel ek lor later pou dir: “Louanz, laglwar, lasazes, rekonesans, loner, pwisans ek lafors pou Bondie pou touzour ek touzour, Amen.”—Revelasion 7:12.