Felisa: Mo’nn grandi dan enn fami bien modes dan l’Espagne. Mo papa ti fabrik bann kitsoz an feray ek mo mama ti travay dan karo. Nou ti wit zanfan, ek mwa mo ti pli gran. Mo fami ti Katolik ek nou ti bien relizie. Ofet 13 parmi mo bann fami ti bann pret ouswa ti travay pou legliz. Kouzin mo mama ti enn pret ek enn profeser dan enn lekol Katolik. Kan li ti mor, Lepap Jean-Paul II ti mem onor ek deklar li kouma enn sin.

Kan mo ti ena 12 an, enn lager sivil ti koumanse dan l’Espagne. Apre lager, ti met mo papa dan prizon parski gouvernman pa ti dakor avek so bann lide politik. Pou mo mama, sa ti bien difisil pou trouv ase manze pou nou tou. Alor, li ti avoy mo trwa ti-ser, Araceli, Lauri, ek Ramoni, al res avek bann leser dan enn kouvan dan lavil Bilbao. Laba, mo bann ser ti pou gagn ase manze.

Araceli: Sa lepok-la mo ti ena 14 an, Lauri ti ena 12 an ek Ramoni ti ena 10 an. Nou ti bien mank nou fami. Dan kouvan, travay ki ti donn nou se pou netwaye. De-z-an plitar, bann leser ti avoy nou dan enn pli gran kouvan dan Saragosse, kot ti okip bann vie dimounn. Nou ti bizin travay dir pou netway lakwizinn, ek nou ti bien fatige.

Felisa: Kan mo bann ser ti al dan kouvan Saragosse, mo mama ek mo tonton, ki ti enn pret, ti desid pou avoy mo’si laba. Zot ti pe esey fer mwa res lwin ar enn garson ki ti kontan mwa. Mo ti bien kontan pou pas inpe letan dan kouvan  parski mo ti kontan Bondie. Mo ti al legliz toulezour, mo ti mem anvi vinn enn misioner Katolik parey kouma mo kouzin ki l’Afrique.

Me dan kouvan, mo’nn realize ki mo pa ti pou kapav fer tou seki mo ti anvi. Bann leser pa ti ankouraz mwa pou servi Bondie dan enn lot pei, parey kouma mo ti pe anvi. Alor enn an apre, mo ti retourn lakaz pou okip mo tonton ki ti enn pret. Mo ti fer so bann louvraz lakaz ek, ansam, toule aswar nou ti fer seki nou apel « les prières du chapelet. » Mo ti osi kontan dres bann fler dan legliz, ek dekor bann foto Marie ek bann “sin.”

Araceli: Pandan ki mo ti Saragosse, mo ti fer mo bann premie promes ki ti bizin pou vinn enn leser. Apre sa, bann leser ti desid pou separ mwa avek mo bann ser. Alor zot ti avoy mwa dan enn kouvan dan Madrid ek ti avoy Lauri dan enn kouvan dan Valence. Me Ramoni ti res dan kouvan Saragosse. Dan Madrid, mo ti fer bann lezot promes pou vinn enn leser. Boukou dimounn, par exanp, bann zelev ek bann vie dimounn ti vinn res dan kouvan. Alor ti ena boukou travay pou fer. Mo ti travay dan lopital ki ti ena kouvan.

Mo ti pe atann pou vinn enn leser mo’si. Mo ti panse nou pou pas boukou letan pou lir ek pou aprann lor Labib. Me mo ti bien sagrin parski personn laba pa ti servi Labib ouswa mem koz lor Bondie ek Zezi. Mo ti aprann inpe Latin, mo ti etidie lavi “bann sin” Katolik, ek mo ti ador Mari. Me laplipar ditan, nou ti zis travay dir.

Mo ti koumans strese ek trakase. Mo ti panse ki mo ti bizin travay ek gagn inpe kas pou ed mo fami, olie ki mo travay dan kouvan pou ed lezot dimounn vinn ris. Alor, mo ti al koz ar Matronn ki ti diriz kouvan ek mo ti dir li ki mo ti anvi kit kouvan. Me li ti ferm mwa dan enn selil. Li ti panse ki sa ti pou konvink mwa pou reste.

Bann leser ti ouver laport ek ti fer mwa sorti, me kan zot ti realize ki mo ti ankor touzour pe anvi kit kouvan, zot inn referm mwa dan selil-la. Lor trwaziem fwa, zot ti dir mwa ki mo ti pou kapav ale si mo ti ekrir sa: “Mo pe kit kouvan parski mo prefer servi Satan ki Bondie.” Mo ti gagn sok. Mo ti vremem anvi kit kouvan, me mo pa ti pou ekrir sa bann parol-la. Finalman, mo ti dir bannla ki mo anvi koz ar enn pret, ek mo ti rakont li seki ti arive. Li ti gagn permision ar Levek pou retourn mwa dan kouvan Saragosse. Apre de-trwa mwa ki mo’nn pase laba, mo ti gagn permision pou kit kouvan. Enn tipe apre, Lauri ek Ramoni osi ti kit kouvan.

Felisa: Enn tipe apre, mo ti marye ek mo ti al res dan Cantabrique, enn provins dan l’Espagne. Mo ti ankor pe al legliz regilierman. Enn Dimans, dan legliz, pret-la ti ankoler ek ti dir bien for: “Get sa liv-la!” Li ti montre nou liv La vérité qui conduit à la vie éternelle. Li ti dir: “Si kikenn finn donn zot enn liv koumsa, donn mwa li ouswa zet li!”

Mo pa ti ena sa liv-la, me mo ti anvi gagn enn. Apre de-trwa zour, de madam ti vinn tap mo laport. Toule-de ti bann Temwin Zeova, ek zot ti ofer mwa sa liv-la. Mo ti lir liv-la so tanto mem. Kan bann madam-la ti retourne, zot ti demann mwa si mo ti anvi gagn enn letid Labib, ek mo ti aksepte.

Mo ti touletan anvi fer Bondie plezir. Apre ki mo ti aprann laverite lor Zeova, mo ti koumans ena enn gran lamour pou Li. Mo ti anvi koz lor Li ar tou dimounn. Mo ti batize an 1973. Sak fwa ki mo ti kapav, mo ti esey partaz laverite avek mo fami. Me mo fami, sirtou mo ser Araceli, ti sir ki mo bann krwayans ti fos.

Araceli: Bannla pa ti tret mwa bien dan kouvan, akoz sa mo ti ankoler ek mo pa ti ere dan mo relizion. Me mo ti kontign al legliz toule dimans, ek mo ti fer « les prières du chapelet » toulezour. Mo ti touzour anvi konpran Labib, ek mo ti demann Bondie so led. Apre sa, Felisa ti dir mwa seki li ti aprann. Li ti telman kontan seki li ti krwar ki mo ti panse li’nn vinn fol. Mo pa ti dakor avek seki li ti pe dir.

Plitar, mo ti retourn Madrid pou travay ek apre mo’nn marye. Pandan bann lane ki’nn pase, mo ti remarke ki bann dimounn ki regilierman ti pe al legliz pa ti vremem viv dapre bann lansegnman Zezi. Alor mo ti aret al legliz. Mo ti nepli krwar dan bann “sin” ouswa dan lanfer dife, ek mo pa ti krwar ki enn pret kapav pardonn bann pese. Mo ti mem debaras tou bann zimaz relizie ki mo ti ena. Mo pa ti kone si li ti bon seki mo ti pe fer. Mo ti dezespere, me mo ti kontign priye Bondie ek mo ti dir Li: “Mo anvi konn twa. Ed  mwa!” Mo rapel ki bann Temwin Zeova plizir fwa ti tap mo laport me zame mo ti ouver. Mo pa ti fer konfians okenn relizion.

Lauri ti pe res la France, ek Ramoni ti pe res l’Espagne. Ver 1980, zot ti koumans etidie Labib avek bann Temwin Zeova. Mo ti sir ki parey kouma Felisa, zot pa ti realize ki nanye pa ti vre dan tou seki zot ti pe aprann. Plitar mo’nn zwenn Angelines, enn parmi mo bann vwazin ek nou finn vinn bann bon kamarad. Li osi li ti enn Temwin Zeova. Plizir fwa Angelines ek so misie ti demann mwa si mo ti anvi etidie Labib avek zot. Zot ti realize ki mem si mo ti dir ki mo pa interese ar larelizion, mo ti vremem anvi kone ki ena dan Labib. Finalman mo ti dir zot: “Ok. Mo pou aksepte etidie avek zot, me zis si mo kapav servi mo prop Labib!” Mo ti ena enn tradiksion Labib ki apel Nácar-Colunga.

Felisa: Kan mo ti batize an 1973, ti ena apepre 70 Temwin dan Santander, ki kapital Cantabrique. Nou ti bizin vwayaz boukou pou pres ar tou bann dimounn dan bann santenn vilaz dan sa provins-la. Alor nou ti vwayaz par bis, ek plitar par loto, pou al dan sak vilaz.

Pandan bann lane ki’nn pase, mo’nn ansegn Labib boukou dimounn ek 11 parmi zot finn pran batem. Laplipar mo bann letid ti bann Katolik. Mo ti bizin ena boukou pasians avek zot, parski parey kouma mwa, zot ti bizin letan pou realize ki zot bann krwayans ti fos. Mo ti kone ki zis Labib ek lespri sin Zeova ki ti pou kapav ed enn dimounn pou sanz so fason panse ek konpran laverite. (Ebre 4:12) Mo misie, Bienvenido, ki ti enn lapolis, ti batize an 1979, ek mo mama ti koumans etidie Labib enn tipe avan ki li mor.

Araceli: Kan mo ti koumans etidie Labib avek bann Temwin Zeova, mo ti santi ki mo pa ti kapav fer zot konfians. Me amezir ki letan ti pase, mo ti nepli ena sa santiman-la. Bann Temwin Zeova pa ti zis ansegn Labib, me zot ti osi obeir bann lansegnman ki ena ladan. Mo lafwa an Zeova ek dan Labib ti ogmante ek mo ti pli ere. Sertin parmi mo bann vwazin ti remark sa sanzman-la ek zot ti dir mwa: “Araceli, kontign lor sa semin ki to finn swazir la!”

Mo rapel mo ti fer sa lapriyer-la: “Mersi Zeova, to pa’nn bes lebra ek to’nn donn mwa plizir lokazion pou trouv seki mo ti pe rode​—vre konesans lor Labib.” Mo ti osi demann mo ser Felisa pardon pou tou bann move kitsoz mo ti dir li. Depi sa, olie ki nou ti lager ar sakenn nou kamarad, nou ti kontan koz lor Labib. Mo ti pran batem an 1989, kan mo ti ena 61 an.

Felisa: Asterla mo ena 91 an. Mo misie inn mor, ek mo nepli kapav fer kouma mo ti pe fer avan. Me mo ankor lir Labib toulezour, mo al bann renion ek predikasion kan mo kapav.

Araceli: Mo kontan koz lor Zeova avek bann pret ek bann leser, kitfwa akoz mo’si mo ti enn leser. Mo’nn gagn bann bon konversasion avek plizir parmi zot, ek boukou finn pran bann liv ek bann magazinn. Mo rapel sirtou enn pret. Apre ki plizir fwa mo ti koz avek li, finalman li ti dakor ar seki mo ti dir li. Lerla li ti dir mwa: “Me kot mo pou ale sa laz-la? Ki bann fidel dan mo parwas ek mo fami pou dir?” Mo ti reponn li: “Ek ki Bondie pou dir?” Li ti realize ki mo ti ena rezon, ek li ti sagrin. Me li paret ki li pa ti ena ase kouraz pou sanze.

Zame mo pa pou bliye zour ki mo misie ti dir mwa ki li ti anvi vinn renion avek mwa. Li ti ena plis ki 80 an kan li ti asiste so premie renion, ek apre sa, zame li’nn rat enn renion. Li ti etidie Labib ek ti koumans prese. Mo ena bann zoli souvenir kan nou ti prese ansam. Li ti mor de mwa avan ki li pran batem.

Felisa: Kan mo ti koumans etidie Labib, mo trwa ti ser ti kont mwa. Me plitar, zot osi zot finn aksepte laverite. Sa se vremem meyer kitsoz ki’nn kapav ariv mwa. Apre sa, nou finn kapav pas letan ansam pou koz lor nou Bondie, Zeova ek So parol! Anfin, nou tou nou ti pe ador Zeova. *