NOU minister li inportan ek li ena enn gran valer. Me pa tou bann dimounn avek ki nou prese ki konpran sa. Mem si bann dimounn interese ar seki Labib dir, pa touletan ki zot trouv sa neseser pou etidie Parol Bondie avek nou.

Anou get lexanp Gavin. Li ti pe asiste bann renion dan Lasal bann Temwin Zeova, me li pa ti anvi etidie Labib. Gavin explike ki li ti konn bien tigit kitsoz lor Labib ek li pa ti anvi lezot dimounn konn sa. Li ti gagn per tansion bannla demann li pou rant dan enn relizion, ek li pa ti anvi ki okenn relizion anbet li. Ki to panse? Eski li ti posib pou ed Gavin? Reflesi lor bon lefe ki bann lansegnman dan Labib kapav ena lor enn dimounn. Zeova ti dir bann Izraelit: “Mo parol pou tonbe kouma laroze, parey kouma bann ti lapli lor lerb.” (Deteronom 31:19, 30; 32:2) Anou get sertin detay lor laroze ek anou konpar zot ar nou minister. Koumsa, nou pou pli kapav ed “tou sort kalite dimounn.”​—1 Timote 2:3, 4.

Laroze li dous. Laroze forme amezir ki limidite ki ena dan ler transforme ek vinn bann ti gout delo. Kouma bann parol Zeova ti “tonbe kouma laroze”? Li ti koz ar so pep avek douser, bonte ek Li ti bien pran zot kont. Nou imit Li kan nou respekte krwayans lezot. Nou ankouraz zot pou rezone par zotmem ek pou pran zot prop desizion. Kan nou montre enn lintere personel pou bann dimounn, zot pou pli dispoze pou aksepte seki nou dir zot, ek nou minister pou vinn pli efikas.

Laroze li rafresisan. Nou minister pou rafresi lezot, setadir pou fer zot dibien, si nou reflesi kouma nou kapav ed zot pou aprann plis lor laverite. Chris, enn frer ki premie fwa ti propoz Gavin enn letid Labib, pa ti esey met presion lor Gavin pou li aksepte. Okontrer, li ti rod plizir fason pou ki Gavin santi li pli alez pou koz lor Labib. Chris ti dir Gavin ki ena enn mesaz inportan dan Labib ek si li konn sa mesaz-la, sa pou ed li pou konpran bann renion pli bien. Apre sa, Chris ti explike ki bann profesi ki ena dan Labib finn konvink limem ki Labib pa koz manti. Finalman, zot inn gagn boukou konversasion lor fason ki bann profesi finn realize. Sa bann konversasion-la ti rafresi Gavin, ek finalman li ti aksepte enn letid Labib.

Laroze li inportan pou lavi. Pandan bann sezon kot fer so an Israël, parfwa lapli pa tonbe pandan plizir mwa. San sa limidite ki laroze prodir la, bann pie sek ek mor. Zeova ti predir ki dan nou lepok, koumadir pou ena lasesres, setadir, bann dimounn pou swaf “bann parol Zeova.” (Amos 8:11) Zeova ti promet ki bann Kretien ki ena lesperans pou al dan lesiel ti pou “parey kouma laroze ki sorti kot Zeova” kan zot pres bon nouvel lor Rwayom Bondie. “Bann lezot brebi” ti pou soutenir zot. (Mika 5:7; Zan 10:16) Mesaz ki nou prese li enn dispozision ki Zeova inn pran pou donn lavi bann ki swaf laverite. Eski sa mesaz-la ena valer pou nou?

Laroze li enn benediksion Zeova. (Deteronom 33:13) Nou minister kapav vinn enn benediksion, ouswa enn kado, pou bann ki aksepte nou mesaz. Enn letid Labib ti enn benediksion pou Gavin parski sa finn ed li pou gagn bann repons pou tou so bann kestion. Bien vit li ti fer bann progre, li ti pran batem, ek asterla, li kontan pou pres bon nouvel lor Rwayom Bondie ansam avek so madam ki apel Joyce.

Kan nou konpar nou predikasion ar laroze, sa kapav osi ed nou pou konpran ki zefor ki sakenn parmi nou fer dan nou minister, li ena enn gran valer. Kouma? Enn sel gout delo, li pa tro itil, me kan ena bann milyon gout laroze, ena limidite partou lor later. Li parey, seki nou fer personelman dan predikasion, kitfwa nou trouv sa bien tigit. Me kan nou azout bann zefor ki plizir milyon Temwin Zeova fer ansam, sa ede pou ki nou rann temwaniaz ar “tou bann nasion.” (Matie 24:14) Eski nou minister pou vinn enn benediksion ki sorti kot Zeova pou lezot? Wi, nou mesaz pou vinn kouma laroze, setadir, dous, rafresisan ek inportan pou lavi!