1-2. (a) Dan ki fason Satan finn anbet bann dimounn? (b) Ki nou pou examine dan sa lartik-la?

SATAN, “papa bann manter,” finn anbet bann dimounn depi koumansman listwar limanite. (Zan 8:44) Par exanp, li fann bann fos lansegnman konsernan lamor ek lavi apre lamor. Boukou bann koutim ouswa bann siperstision baze lor sa bann lansegnman-la. Akoz sa bann lansegnman-la, boukou nou bann frer ek ser pe bizin “lite dan lafwa” kan enn kikenn dan zot fami ouswa dan landrwa mor.​—Zid 3.

² Si pe met presion lor twa pou partisip dan sa bann koutim-la, ki kapav ed twa pou res atase ar seki Labib ansegne lor lamor? (Efe. 6:11) Kouma to kapav rekonfort ek fortifie enn Kretien ki pe gagn presion pou partisip dan bann koutim ki pa fer Bondie plezir? Sa lartik-la pou montre nou kouma Zeova ed nou. Premierman, anou gete seki Labib dir lor lamor.

3. Ki bann konsekans finn ena akoz premie manti ki finn koze?

³ Bondie pa ti anvi ki bann dimounn mor. Me pou viv pou touletan, Adan ek Ev ti bizin obeir Zeova. Zeova ti donn zot enn komannman bien sinp: “Konsernan pie konesans bon ek move, fode pa ki to manz so frwi, parski zour ki to manz sa, vremem to pou mor.” (Zen. 2:16, 17) Apre sa, Satan finn kree bann problem. Atraver enn serpan, li ti dir Ev: “Non, vremem zot pa pou mor.” Malerezman, li ti krwar sa foste-la ek li ti manz sa frwi-la. Plitar, so misie osi ti manz sa frwi-la. (Zen. 3:4, 6) Dan sa fason-la, pese ek lamor finn rant dan lemond.​—Rom. 5:12.

4-5. Kouma Satan finn kontign anbet bann dimounn?

 ⁴ Adan ek Ev ti mor parey kouma Bondie ti dir. Me Satan pa finn aret koz manti konsernan lamor. Plitar, li ti fann lezot foste ankor. Par exanp, li fer krwar ki kan enn dimounn mor, enn parti dan lekor sa dimounn-la kontign viv ek al dan lemond bann lespri. Sa bann foste-la ek lezot ankor finn anbet boukou dimounn ziska zordi.​—1 Tim. 4:1.

⁵ Kouma Satan pe reisi anbet tou sa dimounn-la? Satan kone seki bann dimounn resanti konsernan lamor ek li servi sa linformasion-la pou anbet zot. Nou finn kree pou viv pou touletan, akoz sa, nou pa anvi mor. (Ekle. 3:11) Nou konsider lamor kouma enn lennmi.​—1 Kor. 15:26.

6-7. (a) Eski Satan finn reisi kasiet laverite lor bann mor? Explike. (b) Kouma laverite ki ena dan Labib ed nou pou pa per bann mor?

⁶ Malgre bann zefor ki Satan finn fer, li pa’nn reisi kasiet laverite konsernan lamor. An realite, boukou dimounn azordi kone ek anons seki Labib ansegne lor kondision bann mor ek lor lespwar ki ena pou bann mor. (Ekle. 9:5, 10; Zist. 24:15) Sa bann verite-la rekonfort nou ek ed nou pou pa per ek doute lor seki arive kan enn dimounn mor. Par exanp, nou pa per bann dimounn mor, ni nou per pou zot. Nou kone ki zot pa vivan ek zot pa kapav fer personn ditor. Se koumadir zot dan enn profon somey. (Zan 11:11-14) Nou kone osi ki bann mor pena okenn nosion letan. Alor kan pou ena rezireksion, mem bann ki’nn mor depi plizir siek pou trouv letan inn pase kouma enn batman lizie.

⁷ Eski to pa dakor ki laverite lor kondision bann mor li kler, sinp, ek lozik? Sa li bien diferan ar bann foste ki Satan fane! Sa bann foste-la pa zis anbet bann dimounn, me zot osi gat repitasion nou Kreater. Pou ed nou konpran pli bien bann ditor ki Satan finn fer, nou pou examinn sa bann kestion-la: Kouma bann foste ki Satan inn fane finn gat repitasion Zeova? Kouma sa finn fer bann dimounn panse ki li pa neseser ki zot krwar dan sakrifis Zezi? Kouma sa finn ogmant tristes ek soufrans bann dimounn?

8. Dapre Zeremi 19:5, kouma fos lansegnman ki Satan inn fane lor bann mor finn gat repitasion Zeova?

⁸ Bann fos lansegnman ki Satan inn fane lor bann mor finn gat repitasion Zeova. Parmi, ena fos lansegnman ki dir ki bann mor  soufer dan enn lanfer dife. Sa bann lansegnman-la gat repitasion Bondie! Kouma? An realite, sa bann lansegnman-la fer dimounn krwar ki Bondie, ki ena lamour, ena mem personalite ki Lediab. (1 Zan 4:8) Ki to resanti kan to konn sa? Me pli inportan, ki Zeova resanti Li? Apre tou, li deteste tou bann kitsoz kriel.​—Lir Zeremi 19:5. *

9. Kouma bann foste ki Satan inn fane finn inflians krwayans bann dimounn dan sakrifis Zezi ki finn dekrir dan Zan 3:16 ek 15:13?

⁹ Bann fos lansegnman ki Satan fane lor lamor finn fer bann dimounn panse ki li pa neseser ki zot krwar dan sakrifis Zezi. (Mat. 20:28) Enn lot foste ki Satan fane se li fer krwar ki bann dimounn ena enn nam imortel. Me si sa ti vre, savedir ki nou tou, nou ti pou viv pou touletan. Ek lerla, Zezi pa ti bizin donn so lavi an ranson pou nou gagn lavi eternel. Rapel bien ki sakrifis Zezi samem pli gran fason ki Zeova finn montre so lamour pou bann dimounn. (Lir Zan 3:16; 15:13.) Sey mazine seki Zeova ek so Garson resanti konsernan bann lansegnman ki fer krwar ki sa kado-la li pa neseser!

10. Kouma bann foste ki Satan inn fane lor lamor finn ogmant tristes ek soufrans bann dimounn?

¹⁰ Bann foste ki Satan inn fane ogmant tristes ek soufrans bann dimounn. Kan bann paran perdi enn zanfan dan lamor, souvan bann dimounn dir zot ki Bondie inn pran li kitfwa pou fer li vinn enn anz dan lesiel. Eski enn foste koumsa diminie zot soufrans ouswa ogmant zot soufrans? Fos lansegnman lor lanfer finn donn sertin enn bon rezon pou tortir bann dimounn, kouma par exanp, bril lor poto tou bann ki kont lansegnman legliz. Dapre enn liv lor enn lanket ki ti fer an Espagne, parmi bann ki responsab sa bann pratik kriel la, sertin ti krwar ki zot ti pe zis “donn lezot enn avangou lor seki lanfer resanble.” Zot ti pe fer sa pou ki bann ki pa dakor avek Legliz Katolik, repanti avan zot mor ek koumsa zot pa al dan lanfer dife. Dan boukou pei, bann dimounn santi zot oblize pou ador zot bann gran dimounn ki’nn mor, pou onor zot, ouswa pou rod enn benediksion ar zot. Lezot anvi apez nam zot bann anset pou ki bannla pa pini zot. Malerezman, sa bann krwayans ki baze lor bann foste ki Satan inn fane la, pa donn enn vre rekonfor. Okontrer, zot fer bann dimounn gagn traka pou nanye ouswa mem fer zot per.

11. Kouma bann fami ouswa bann kamarad ki ena bann bon lintansion kapav esey met presion lor nou pou ki nou al kont Parol Bondie?

¹¹ Nou lamour pou Bondie ek so Parol pou pous nou pou obeir Zeova mem kan bann fami ouswa bann kamarad ki ena bann bon lintansion esey met presion lor nou pou fer nou partisip dan bann koutim lor bann mor ki pa an-akor avek bann lansegnman Labib. Kitfwa zot esey fer nou gagn onte kan zot dir ki nou pa ti kontan ouswa respekte sa dimounn ki finn mor la. Ouswa, zot kapav dir ki akoz nou sa dimounn ki’nn mor la pou fer enn kikenn ditor. Kouma nou kapav defann bann verite ki ena dan Labib? Anou gete kouma to kapav met an pratik sa bann prinsip Labib la.

12. Sit bann koutim lor lamor ki pa baze lor Labib.

¹² To bizin bien deside pou “res alekar” ar bann krwayans ek bann koutim ki pa baze lor Labib. (2 Kor. 6:17) Dan enn pei Caraïbes, boukou dimounn krwar ki kan enn kikenn mor, so “nam” vire tourne ek pini bann ki’nn fer li soufer. Enn liv referans dir  ki sa “nam-la” kapav mem “amenn maler lor tou bann dimounn dan landrwa.” Se enn koutim dan l’Afrique pou kouver bann laglas dan lakaz sa dimounn ki’nn mor la ek pou tourn tou bann foto lor miray. Pou ki rezon? Sertin pretann ki fode pa ki bann mor trouv zotmem! Antan ki bann serviter Zeova, zame nou pa pou krwar dan bann koutim ouswa partisip dan bann pratik ki baze lor bann foste ki Satan fane!​—1 Kor. 10:21, 22, NW.

13. Dapre Zak 1:5, si to ena bann dout konsernan enn koutim, ki to bizin fer?

¹³ Si to ena bann dout konsernan enn koutim ouswa enn pratik, priye Zeova pou demann Li so sazes. (Lir Zak 1:5.) Apre sa, fer bann resers dan nou bann piblikasion. Ek si bizin, demann konsey bann ansien dan to lasanble. Zot pa pou dir twa seki to bizin fer, me zot pou diriz twa ver bann prinsip Labib kouma bann ki nou pe examine dan sa lartik-la. Kan to swiv sa bann letap-la, to pe form to “bann kapasite pou diserne,” ek sa pou ed twa pou “fer diferans ant seki bien ek seki mal.”​—Ebre 5:14, NW.

14. Kouma nou kapav evit fer lezot tonbe?

¹⁴ Fer tou pou laglwar Bondie. Fer atansion ki zot pa fer personn tonbe. (1 Kor. 10:31, 32, NW) Kan nou bizin deside si nou pou partisip dan enn koutim ouswa enn tradision, nou bizin osi reflesi kouma nou desizion kapav afekte konsians lezot, sirtou nou bann konpagnon Kretien. Biensir, zame nou pa pou rod fer personn tonbe! (Mark 9:42, NW) Ek nou anvi evit ofans pou nanye bann ki pa Temwin. Lamour pou pous nou pou koz ar zot avek respe ek sa pou donn Zeova laglwar. Biensir, nou pa pou diskit avek bann dimounn ouswa boufonn zot bann tradision. Pa bliye ki lamour li bien pwisan! Kan nou montre sa lamour-la avek respe ek konsiderasion, nou kapav mem sanz latitid enn opozan.

15-16. (a) Kifer li bon ki to explik lezot to bann krwayans? Donn enn lexanp. (b) Kouma bann parol Pol ki trouv dan Romin 1:16 aplik ar nou?

¹⁵ Fer bann dimounn dan to landrwa kone ki to enn Temwin Zeova. (Iza. 43:10) Si enn kikenn dan to fami mor, to bann fami ek to bann vwazin kapav ankoler si to pa partisip dan sertin koutim. Si alavans to explik zot to bann krwayans, li kapav pli fasil pou to fer fas ar sa sitiasion-la. Francisco, ki viv dan Mozambique, dir: “Kan mwa ek mo  madam Carolina ti konn laverite, nou ti dir nou fami ki nou pou nepli ador bann dimounn mor. Nou desizion ti pas par enn test kan Carolina so ser ti mor. Dapre koutim sa pei-la, ti bizin bengn lekor sa dimounn ki’nn mor la pandan enn lapriyer. Lerla, fami ki pli pros ti bizin dormi pandan trwa zour dan sa plas kot ti zet sa delo-la. Sa bann koutim-la ti sipoze apez lespri sa dimounn ki’nn mor la. Fami Carolina ti atann ki li dormi dan sa plas kot ti zet sa delo-la.”

¹⁶ Ki Francisco ek so madam ti fer? Francisco explike: “Parski nou kontan Zeova ek nou anvi fer Li plezir, nou ti refiz pou partisip dan sa koutim-la. Fami Carolina ti bien ankoler. Zot ti akiz nou ki nou pe mank respe anver sa dimounn ki’nn mor la. Zot ti osi dir ki lafami ti pou nepli vizit nou ouswa ed nou. Nou ti deza explik zot nou bann krwayans, akoz sa nou pa ti koz lor la kan zot ti ankoler. Sertin fami ti mem defann nou kan zot ti dir ki nou ti deza explik nou bann krwayans. Avek letan, bann fami Carolina ti kalme, ek nou ti reisi fer lape. Ena mem ti vinn kot nou pou demann bann piblikasion ki baze lor Labib.” Alor fode zame nou onte pou res fidel parski nou kone seki Labib ansegne lor lamor.​—Lir Romin 1:16.

17. Ki kapav ed nou pou vinn enn vre kamarad pou bann konpagnon Kretien ki an-dey?

¹⁷ Kan enn konpagnon Kretien perdi enn kikenn ki li kontan dan lamor, nou bizin fer zefor pou vinn “enn vre kamarad . . . , enn frer ki’nn ne pou bann moman difisil.” (Prov. 17:17) Kouma nou kapav vinn enn vre kamarad sirtou si enn frer ouswa enn ser ki an-dey pe gagn presion pou partisip dan bann pratik ki pa an-akor avek Labib? Anou get de prinsip Labib ki kapav ed nou pou rekonfort bann ki an-dey.

18. Kifer Zezi ti plore, ek ki nou aprann ar so lexanp?

¹⁸ “Partaz lapenn avek bann ki dan lapenn.” (Rom. 12:15) Kitfwa nou trouv sa difisil pou rekonfort enn dimounn ki inkonsolab. Defwa nou bann larm ena plis pwa ki nou bann parol. Kan Zezi so kamarad Lazar  ti mor, Mari, Mart, ek lezot ti plore pou zot frer ek zot kamarad ki zot ti bien kontan. Kan Zezi ti ariv laba kat zour plitar, li osi li ti “plore,” mem si li ti kone ki li ti pou resisit Lazar. (Zan 11:17, 33-35) Kan Zezi ti plore, sa ti montre seki Zeova ti resanti konsernan lamor Lazar. Sa ti konfirme ki Zezi ti kontan sa fami-la, ek pena dout ki sa ti rekonfort Mari ek Mart. Li parey, kan nou bann frer trouve ki nou kontan zot ek ki nou interese ar zot, zot kone ki zot pa tousel me zot antoure ar bann kamarad ki gagn zot traka ek ki soutenir zot.

19. Kan nou pe rekonfort enn konpagnon Kretien ki an-dey, kouma nou kapav met an pratik Ekleziast 3:7?

¹⁹ “Enn ler pou res trankil ek enn ler pou koze.” (Ekle. 3:7) Enn lot fason pou rekonfort enn konpagnon Kretien ki an-dey se kan nou zis ekout li. Les to frer devid so leker ek pa ofanse kan li dir “bann koze san reflesi.” (Zob 6:2, 3) Anplis so sagrin, kitfwa li pe strese parski so bann fami ki pa Temwin pe met boukou presion lor li. Alor, priye avek li. Sipliy sa Kikenn ki “ekzos nou lapriyer” la pou donn li kouraz ek ed li pou trouv bann kitsoz dan enn fason kler. (Ps. 65:2) Si sitiasion permet, lir Labib ansam avek li. Ouswa lir enn lartik apropriye ki sorti dan nou bann piblikasion, kouma par exanp enn biografi ki ankourazan.

20. Ki nou pou examine dan prosin lartik?

²⁰ Nou bien rekonesan ki nou konn laverite konsernan lamor ek lesperans extraordiner ki pe atann bann ki dan tom! (Zan 5:28, 29) Alor, ki li an parol ouswa an aksion, anou defann avek kouraz bann verite ki ena dan Labib ek partaz sa avek lezot sak fwa ki nou gagn lokazion. Dan prosin lartik, nou pou get enn lot fason ki Satan servi pou anpes bann dimounn pou konn laverite, setadir atraver spiritis. Nou pou gete kifer nou bizin evit bann pratik ek bann divertisman ki ena enn lien avek sa piez demoniak la.