1. Ki metod Frer Russell ek so bann kamarad ti servi pou etidie Labib, ek kifer sa metod-la ti efikas?

PLIS ki san-t-an inn pase depi ki Frer Charles Russell ek so bann asosie, enn ti group dimounn ki ti etidie Labib, ti koumans zwenn ansam. Zot ti anvi konpran seki Labib ansegne vremem lor Zeova, Zezi Kris, kondision bann mor, ek laranson. Zot ti servi enn metod bien sinp pou etidie Labib. Enn kikenn ti poz enn kestion, ek zot tou ti examinn sak verse Labib ki koz lor sa size-la. Apre sa, zot ti ekrir tou seki zot ti aprann lor sa size-la. Zeova ti ed sa bann zom-la pou konpran boukou lansegnman Biblik bien inportan ki ankor ena valer pou nou azordi.

2. Kan nou pe esey konpran enn profesi Biblik, kifer li kapav arive ki nou mal konpran li?

² Me sa bann Etidian Labib la ti realize ki, konpare ar enn lansegnman Biblik inportan, li pli difisil pou konpran enn profesi Biblik. Kifer? Parski bien souvan, li pli fasil pou konpran enn profesi kan li’nn fini akonpli ouswa kan li pe akonpli. Me ena enn lot rezon osi. Pou konpran bien enn profesi, nou bizin osi examinn so kontex. Si nou konsantre zis lor enn laspe profesi-la ek nou pa pran kont so bann lezot laspe, nou kapav mal konpran li. Li posib ki se samem ki finn arive konsernan enn profesi ki ena dan liv Zoel. Anou re-examinn sa profesi-la ek anou gete kifer nou bizin sanz fason ki nou ti pe konpran li.

3-4. Ziska ler, kouma nou ti konpran profesi ki ena dan Zoel 2:7-9?

 ³ Lir Zoel 2:7-9. * Zoel ti predir ki bann sotrel ti pou anvayir Izrael. Zot ledan ek zot lamaswar ti pou koumadir ledan ek lamaswar bann lion, ek zot ti pou manz tou seki ti ena lor zot semin. (Zoel 1:4, 6) Pandan lontan, nou ti panse ki sa profesi-la ti predir ki bann serviter Zeova ti pou kontign prese ek ki personn pa ti pou kapav aret zot, parey kouma personn pa kapav aret enn larme sotrel. Nou ti konpran ki laktivite predikasion ti pou ena enn gran lefe lor “pei,” setadir lor bann dimounn ki anba kontrol bann sef relizie. *

⁴ Si nou baz nou zis lor Zoel 2:7-9, sa lexplikasion-la kapav paret bon. Selman, kan nou reflesi bien lor kontex sa profesi-la, nou realize ki nou bizin konpran li dan enn lot fason. Anou get kat rezon kifer.

5-6. Ki bann kestion nou kapav poz noumem konsernan (a) Zoel 2:20? (b) Zoel 2:25?

⁵ Premierman, get promes ki Zeova fer konsernan bann sotrel dan Zoel 2:20: “Mo pou pous bann ki sorti dan lenor [bann sotrel] lwin ar zot.” Si sa bann sotrel-la ti reprezant bann Temwin Zeova ki pe obeir lord Zezi pou prese ek pou fer bann disip, kifer Zeova ti pou pous zot? (Eze. 33:7-9; Mat. 28:19, 20) Li kler ki Zeova pa pou pous so bann serviter ki fidel. Okontrer, Li pou pous enn kitsoz ouswa enn kikenn ki anvi fer ditor so bann serviter.

⁶ Deziemman, dan Zoel 2:25, Zeova dir: “Mo pou dedomaz zot pou tou seki bann sotrel inn manze pandan tou sa bann lane-la, bann sotrel ki ena lezel, sotrel ki pena lezel, sotrel ki voras, ek sotrel ki devore, mo gran larme ki mo ti avoy kont zot.” Remarke ki Zeova promet ki Li pou “dedomaz” zot pou tou bann dega ki bann sotrel inn fer. Si sa bann sotrel-la ti reprezant bann proklamater Rwayom Bondie, kifer profesi-la ti anonse ki zot mesaz ti pou fer bann dega? Sa mesaz-la kapav sov lavi bann dimounn ek li kapav motiv bann move dimounn pou repanti. (Eze. 33:8, 19) Alor, sa mesaz-la enn vre benediksion pou zot!

7. Dapre Zoel 2:28, 29, ki nou konpran par lexpresion “apre sa”?

⁷ Lir Zoel 2:28, 29. * Trwaziem rezon-la ena enn lien avek lord ki bann levennman deroule dan sa profesi-la. Remarke ki Zeova dir: “Apre sa, mo pou avoy mo lespri sin,” setadir apre ki bann sotrel fini fer zot travay. Si bann sotrel ti reprezant bann proklamater Rwayom Bondie, kifer Zeova ti pou avoy so lespri sin lor zot apre ki zot fini prese? An realite, san lespri sin Bondie, zot pa ti pou kapav kontign prese pandan plizir lane, malgre lopozision ek mem dan bann pei kot nou laktivite interdi.

8. Kisannla bann sotrel ki mansione dan Revelasion 9:1-11 reprezante? (Get zimaz lor kouvertir.)

 ⁸ Lir Revelasion 9:1-11. Asterla, anou get enn katriem rezon. Avan, nou ti panse ki profesi bann sotrel ki trouv dan liv Zoel ti ena enn lien avek travay predikasion akoz enn lot profesi ki trouv dan liv Revelasion ek ki inpe parey. Sa profesi-la dekrir enn larme sotrel ki ti ena bann ‘kouronn an-or lor zot latet e zot figir ti parey kouma figir dimoun.’ (Rev. 9:7) Zot ti tortir “bann dimoun [bann lennmi Bondie] ki pena sele Bondie lor zot fron” pandan sink mwa, ki reprezant kantite letan ki enn sotrel viv. (Rev. 9:4, 5) Li paret ki sa profesi-la pe dekrir bann Kretien ki ena lesperans pou al dan lesiel ki pe anons avek kouraz bann zizman Bondie kont sa move lemond-la. Bann dimounn ki soutenir sa move lemond-la bien soufer akoz sa mesaz-la.

9. Ki gran diferans ena ant bann sotrel ki ena dan profesi Zoel ek bann sotrel ki ena dan profesi Zan?

⁹ Li vre ki ena bann pwin komin ant profesi Revelasion ek profesi Zoel. Selman, ena bann gran diferans osi. Par exanp, dan profesi Zoel, bann sotrel detrir tou bann verdir. (Zoel 1:4, 6, 7) Parkont dan vizion Zan, bann sotrel gagn lord pou “pa detrir bann lerb ni okenn verdir.” (Rev. 9:4) Bann sotrel ki Zoel ti trouve ti sorti depi lenor. (Zoel 2:20)  Bann sotrel ki Zan ti trouve ti sorti dan “pwi-san-fon.” (Rev. 9:2, 3) Bann sotrel ki ena dan profesi Zoel ti gagn pouse. Me dan liv Revelasion, bann sotrel pa gagn pouse. Okontrer, finn les zot fini zot travay. Okenn par dan Labib pa dir ki Zeova ti kondann sa bann sotrel-la.​—Get lankadre “ Profesi Konsernan Bann Sotrel​—Bann Diferans.”

10. Donn enn lexanp Biblik ki montre ki bann sotrel ki Zoel ek Zan inn trouve kapav reprezant diferan kitsoz.

¹⁰ Bann gran diferans ki ena ant sa de profesi-la montre ki pena okenn lien ant zot. Eski savedir ki bann sotrel ki Zoel dekrir zot diferan ar bann sotrel ki ena dan liv Revelasion? Wi. Dan Labib, li kapav arive ki enn kitsoz ena diferan sinifikasion, me sa pou depann lor so kontex. Par exanp, Revelasion 5:5 dekrir Zezi kouma “lion tribi Zida,” me 1 Pier 5:8 dekrir Lediab kouma “enn lion feros.” Sa kat rezon ki nou finn trouve la montre ki nou bizin rod enn lot lexplikasion pou profesi Zoel.

11. Kouma Zoel 1:6 ek 2:1, 8, 11 ed nou pou konpran kisannla bann sotrel reprezante?

¹¹ Kan nou examinn pli bien profesi Zoel avek so kontex, nou trouve ki Zoel ti pe predir enn latak militer. (Zoel 1:6; 2:1, 8, 11) Zeova ti dir ki Li ti pou servi so “gran larme” (bann solda Babilonien) pou pini bann Izraelit ki ti dezobeir Li. (Zoel 2:25) Li bien apropriye ki apel sa gran larme-la “bann ki sorti dan lenor” parski bann Babilonien ti pou atak Izrael depi lenor. (Zoel 2:20) Sa larme-la ti parey kouma enn larme sotrel ki bien organize. Dan so profesi, Zoel ti dir: “Sakenn [sak solda] swiv so semin. . . . Vit-vit zot rant dan lavil, zot galoupe lor miray. Zot mont lor bann lakaz, zot pas par lafnet kouma voler.” (Zoel 2:8, 9) Esey mazinn sa senn-la. Partou ena bann solda. Pa kapav kasiet okenn par. Personn pa kapav sape devan lepe bann Babilonien!

12. Kouma profesi Zoel konsernan bann sotrel ti akonpli?

¹² Parey kouma bann sotrel, bann Babilonien (ouswa bann Kaldeen) ti anvayir lavil Zerizalem an 607 Avan Nou Lepok. Labib dir: “Lerwa bann Kaldeen . . . ki ti touy zot bann zenom par lepe . . . pa ti ena okenn konpasion pou bann zenom ek bann vierz, bann vie ouswa bann andikape. Bondie ti met tou dan so lame. Li ti bril lakaz vre Bondie, ti kraz bann miray Zerizalem, ti bril tou bann latour ar dife, ek li ti detrir tou bann kitsoz ki ena valer.” (2 Kro. 36:17, 19) Apre sa latak-la, Zerizalem ti “dan lame bann Kaldeen.” Li ti vinn “enn landrwa dezer kot okenn zom ni okenn zanimo reste.”​—Zer. 32:43.

13. Explik Zeremi 16:16, 18.

¹³ Anviron 200 an apre profesi Zoel, Zeova ti servi Zeremi pou predir enn lot kitsoz lor sa latak-la. Li ti dir ki bann ki ti pou anvayir Izrael ti pou rod partou bann Izraelit ki ti fer bann move kitsoz ek ti pou trap zot. Zeova ti dir: “Mo pou fer boukou peser vini pou lapes bannla. . . . Apre sa, mo pou fer boukou saser vini, ek zot pou lasas bannla lor tou bann montagn, tou bann kolinn, ek dan bann fant ki ena ant bann ros. . . . Mo pou fer zot pey net zot bann erer ek zot bann pese.” Kan bann Babilonien ti anvayir Izrael, bann Izraelit ki pa ti repanti pa ti kapav kasiet okenn par, ni dan lamer, ni dan lafore.​—Zer. 16:16, 18.

14. Kan eski Zoel 2:28, 29 ti akonpli?

¹⁴ Dan profesi Zoel, ena osi bann bon nouvel. Par exanp, pei Izrael ti pou regagn bann bon rekolt ankor. (Zoel 2:23-26) Ek dan lavenir, ti pou ena osi manze spiritiel an abondans. Zeova ti dir: “Mo pou avoy mo lespri lor tou sort kalite dimounn, ek zot bann garson ek zot bann tifi pou profetize . . . Ek mem lor mo bann serviter ek mo bann servant mo pou avoy mo lespri.” (Zoel 2:28, 29) Eski sa levennman-la ti arive zis apre ki bann Izraelit ti sorti Babilonn ek ti retourn kot zot? Non. Sa ti arive plizir santenn lane plitar, pandan Lapantkot lane 33 Nou Lepok. Kouma nou konn sa?

15. Dapre Zistwar Bann Apot 2:16, 17, ki sanzman Pier ti fer ar bann parol ki ena dan Zoel 2:28, ek ki sa montre?

¹⁵ Lespri sin ti gid lapot Pier pou aplik bann parol ki ena dan Zoel 2:28, 29 ar enn levennman extraordiner ki ti arive zour Lapantkot. Sa zour-la, ver nef-er gramatin, Bondie ti avoy so lespri sin lor sertin dimounn ek zot ti koumans “rakont mervey Bondie” dan diferan lang. (Zist. 2:11) Lespri sin ti gid Pier pou sanz inpe bann parol ki ena dan profesi Zoel. Eski to’nn remarke ki sanzman li ti fer? (Lir Zistwar Bann Apot 2:16, 17.) Olie ki li ti servi lexpresion “apre sa,” Pier ti servi lexpresion “dan bann dernie zour.” Dan sa kontex-la, lexpresion “bann dernie zour” fer referans ar lepok kot Zerizalem ek so tanp ti pou detrir. Sa lepok-la, Zeova ti avoy so lespri sin lor ‘tou sort kalite dimounn.’ Sa montre ki boukou letan ti pou pase avan ki profesi Zoel akonpli.

16. Ki lefe lespri sin Bondie ti ena lor predikasion dan premie siek, ek ki lefe li ena azordi?

 ¹⁶ Apre ki Zeova ti avoy so lespri sin lor bann Kretien dan premie siek, zot ti koumans travay predikasion ki plitar ti pou fer partou lor later. Ver 61 Nou Lepok, kan Pol ti ekrir enn let bann Kolosien, li ti dir ki bonn nouvel ti prese “ar tou kreatir anba lesiel.” (Kol. 1:23) Kan Pol ti servi lexpresion “ar tou kreatir anba lesiel,” li ti pe rod dir partou kot li ek so bann konpagnon ti ale. Azordi, gras-a lespri sin Zeova, travay predikasion pe fer dan “lemonn antie”!​—Zist. 13:47; get lankadre “ Mo Pou Avoy Mo Lespri” lor Mo Bann Serviter.

17. Ki sanzman finn ena dan fason ki nou ti konpran profesi Zoel konsernan bann sotrel?

¹⁷ Ki sanzman finn ena? Asterla, nou konpran profesi ki ena dan Zoel 2:7-9 dan enn fason pli exakt. Li kler ki sa bann verse-la pa pe koz lor predikasion, me lor latak bann Babilonien kan zot ti anvayir Zerizalem an 607 Avan Nou Lepok.

18. Ki kitsoz pa finn sanze pou bann serviter Zeova?

¹⁸ Ki kitsoz pa finn sanze? Bann serviter Zeova pe kontign pres bonn nouvel partou lor later, ek zot servi plizir metod pou fer sa. (Mat. 24:14) Okenn gouvernman pa kapav anpes nou obeir lord ki nou’nn gagne pou prese. Gras-a benediksion Zeova, nou pres avek kouraz ek nou pli aktif ki avan! Avek limilite, nou kontign demann Zeova so led pou konpran bann profesi Biblik, ek nou sir ki dan ler ki Li’nn deside, Li “pou gid [nou] dan tou seki konsern laverite”!​—Zan 16:13, NW.