Avan so lamor, kifer Zezi ti dir bann parol ki trouv dan Psom 22:1?

Parmi bann dernie parol ki Zezi ti dir avan so lamor, ena bann parol ki trouv dan Matie 27:46, ki dir: “Bondie, Bondie, kifer to finn abandonn mwa?” Kan li ti dir sa, Zezi ti akonpli bann parol ki David ti ekrir dan Psom 22:1. (Mark 15:34) Me fode pa nou panse ki Zezi ti dir sa bann parol-la parski Zeova ti desevwar li ouswa parski li ti mank lafwa an Zeova. Zezi ti konpran bien rezon pou kifer li ti bizin mor, ek li ti dispoze pou donn so lavi. (Mat. 16:21; 20:28) Li ti kone osi ki, inpe letan avan so lamor, Zeova ti pou bizin aret protez li. (Zob 1:10) Alor, Zeova ti aret protez Zezi pou ki Zezi kapav montre ki li ti pou touletan res fidel, mem si li ti bizin mor dan bann kondision bien difisil.​—Mark 14:35, 36.

Me kifer Zezi ti dir bann parol ki trouv dan Psom 22:1? Mem si nou pa sir kifer Zezi ti dir sa bann parol-la, anou get sertin posibilite. *

Kan li ti dir sa bann parol-la, kitfwa Zezi ti pe rod dir ki Zeova pa ti pou intervenir dan so lamor. Zezi ti bizin donn so lavi an ranson san ki Zeova ed li. Li ti bizin mor kouma enn imin pou ki li kapav “gout lamor pou tou dimoun.”​—Ebre 2:9.

 Kan Zezi ti mansionn premie verse sa Psom-la, eski li ti rod atir latansion lor Psom-la an-antie? Dan sa lepok-la, bann Zwif ti abitie aprann bann Psom par-ker. Lerla, kan zot ti tann enn verse dan enn Psom, otomatikman zot ti pou rapel Psom-la an-antie. Si se samem ki Zezi ti anvi fer, alor li ti anvi ki so bann disip rapel bann profesi ki ena dan sa Psom-la, ki koz lor bann kitsoz ki ti pou arive avan so lamor. (Ps. 22:7, 8, 15, 16, 18, 24) Anplis, bann dernie verse sa Psom-la donn loner Zeova, ek li montre ki Zeova Li Lerwa lor later antie.​—Ps. 22:27-31.

Kan li ti dir sa bann parol-la, eski Zezi ti pe dir ki li ti inosan? Avan so lamor, Zezi ti pas devan lakour dan enn fason ilegal ek bann manb Sanedrin ti akiz li ki li ti blasfeme. (Mat. 26:65, 66) Bann manb Sanedrin ti rasanble bien vit, tar aswar, pou fer sa zizman-la ek sa ti enn kitsoz ki ti ilegal. (Mat. 26:59; Mark 14:56-59) Alor, kan Zezi ti dir: “Bondie, Bondie, kifer to finn abandonn mwa?” kitfwa li ti anvi montre ki li pa ti fer nanye demal ek ki li pa ti merit sa kalite pinision-la.

Zezi kitfwa ti anvi fer lezot rapel osi ki, David, ki ti ekrir sa Psom-la, ti soufer li osi, me kanmem sa li pa ti perdi faver Zeova. Mem si David ti poz sa kestion-la, sa pa vedir ki li ti mank lafwa an Zeova. Apre ki li ti poz sa kestion-la, li ti dir ki li ti ena konfians ki Zeova ti pou sov so pep, ek Zeova ti kontign beni li. (Ps. 22:23, 24, 27) Dan mem fason, mem si Zezi, “Garson David,” ti soufer lor enn poto, sa pa vedir ki li ti nepli ena faver Zeova.​—Mat. 21:9.

Par sa bann parol-la, eski Zezi ti pe montre ki li bien sagrin parski Zeova ti pou bizin tir So proteksion lor li pou ki li kapav montre so fidelite? Li pa ti dan proze Zeova ki so Garson soufer ek mor. Me sa ti vinn neseser apre dezobeisans Adan ek Ev. Zezi pa ti fer nanye demal, me li ti bizin soufer ek mor pou reponn bann kestion ki Satan ti souleve ek pou donn so lavi kouma enn ranson pou ki bann imin kapav regagn seki zot ti perdi. (Mark 8:31; 1 Pier 2:21-24, NW) Ek sa ti pou posib zis si Zeova, pandan enn moman, ti aret protez Zezi pou premie fwa dan so lavi.

Eski Zezi ti pe esey ed so bann disip pou konpran kifer Zeova ti permet ki li mor lor enn poto? * Zezi ti kone ki so lamor kouma enn kriminel lor enn poto ti pou afekte boukou parmi so bann disip. (1 Kor. 1:23, NW) Me si so bann disip ti konsantre zot lor vre rezon pou kifer Zezi ti bizin mor, zot ti pou konpran vre sinifikasion so lamor. (Gal. 3:13, 14, NW) Lerla, zot ti pou konsider li kouma enn Sover, pa kouma enn bandi.

Ninport ki rezon pou kifer Zezi ti dir sa bann parol-la, li ti kone ki so lamor lor enn poto ti pou akonpli volonte Zeova. Inpe apre ki Zezi ti dir bann parol sa Psom-la, li ti dir: “Sa finn akonpli!” (Zan 19:30, NW; Lik 22:37) Wi, pandan enn moman, Zeova inn aret protez Zezi ek sa finn permet Zezi pou akonpli mision ki so Papa ti avoy li pou fer. Sa finn osi permet Zezi pou akonpli tou seki ti ekrir lor li “dan Lalwa Moiz, Liv bann profet e bann Psom.”​—Lik 24:44.