1-2. Kouma nou kapav swiv tras Zezi? Servi enn lexanp pou explike.

FER koumadir to form parti enn group ki pe fer enn randone dan enn dezer ki bien danzere. Zot gid ena boukou lexperyans ek li pe mars devan tou dimounn. Pandan ki li pe marse, li pe les bann tras deryer li dan disab. Ariv enn moman, to nepli trouv gid-la! Me to pa panike. Kifer? Parski twa ek lezot ki dan group-la, zot pe kapav swiv bann tras ki gid-la inn les deryer li dan disab.

² Azordi, sa move lemond-la li koumadir enn dezer bien danzere, ek bann vre Kretien zot kouma sa group ki pe fer randone-la. Me erezman, Zeova inn donn nou enn Gid parfe, so Garson, Zezi Kris, ek nou kapav swiv bien so bann tras. (1 Pier 2:21, NW) Konsernan text tem sa lartik-la, enn referans Biblik dir ki Pier ti pe konpar Zezi ar enn gid. Parey kouma enn gid ki’nn les so bann tras deryer li, Zezi inn les so bann tras pou ki nou kapav swiv. Asterla, anou examinn trwa kestion: Ki savedir swiv bann tras Zezi? Kifer nou bizin fer sa? Ek kouma nou kapav fer sa?

3. Ki savedir swiv tras enn kikenn?

³ Ki savedir swiv tras enn kikenn? Dan Labib, mo “mars” ek “lipie” parfwa fer referans ar fason ki enn dimounn viv so lavi. (Zen. 6:9; Prov. 4:26) Nou kapav konpar fason ki enn dimounn viv so lavi ar bann tras ki li les deryer li kan li marse. Alor, swiv tras enn kikenn vedir swiv so lexanp, ouswa imit li.

4. Ki savedir swiv tras Zezi?

 ⁴ Ki savedir swiv tras Zezi? Dan enn fason sinp, savedir ki nou bizin imit so lexanp. Dan text tem pou sa lartik-la, lapot Pier ti pe koz lor bon lexanp ki Zezi finn lese kan li’nn andir bann kitsoz ki’nn fer li bien soufer. Me ena lezot kitsoz ankor ki Zezi inn fer ek ki nou kapav imite. (1 Pier 2:18-25, NW) An realite, fason ki Zezi ti viv so lavi, setadir tou seki li ti dir ek fer, se enn bon lexanp ki nou bizin swiv.

5. Eski bann dimounn inparfe kapav vremem swiv lexanp Zezi? Explike.

⁵ Eski nou kapav vremem swiv lexanp Zezi, alor ki nou bann dimounn inparfe? Wi, nou kapav. Pier pa’nn dir nou swiv bann tras Zezi dan enn fason parfe. Li’nn ankouraz nou pou ‘swiv bien tras Zezi.’ Si nou swiv bien tras Zezi, setadir nou fer nou maximum pou imit li mem si nou inparfe, nou pou swiv konsey ki lapot Zan ti done pou kontign “mars parey kouma [Zezi].”​—1 Zan 2:6.

6-7. Kifer nou kapav dir ki, kan nou swiv bann tras Zezi, sa fer nou vinn pros ar Zeova?

⁶ Swiv bann tras Zezi fer nou vinn pli pros ar Zeova. Kifer nou dir sa? Premierman, Zezi finn les nou enn bon lexanp parski li ti viv dan enn fason ki fer Bondie plezir. (Zan 8:29) Alor, kan nou swiv bann tras Zezi, nou pou fer Zeova plezir. Nou kapav sir ki nou Papa pou vinn pros ar bann dimounn ki fer zefor pou vinn so kamarad!​—Zak 4:8.

⁷ Deziemman, Zezi ti imit so Papa dan enn fason parfe. Akoz sa, Zezi ti kapav dir: “Seki finn trouv mwa finn trouv mo Papa.” (Zan 14:9) Nou kapav imit Zezi so bann kalite ek fason ki li ti tret lezot. Par exanp, li ti ena pitie anver enn kikenn ki ti ena lalep, li ti resanti soufrans enn madam ki ti ena enn maladi bien grav, ek li ti ena konpasion pou bann ki ti perdi enn kikenn dan lamor. Kan nou imit Zezi, an realite nou pe imit Zeova. (Mark 1:40, 41; 5:25-34; Zan 11:33-35) Ek plis nou imit bann kalite Zeova, plis nou lamitie avek Li pou vinn pli for.

8. Kifer kan nou swiv bann tras Zezi sa ed nou pou “gagn laviktwar lor lemonn”?

 ⁸ Si nou swiv bann tras Zezi, nou pa pou les sa move lemond-la anpes nou res konsantre lor nou servis pou Zeova. Lanwit avan so lamor, Zezi ti dir: “Mo finn sorti vinker lor lemonn.” (Zan 16:33) Li ti pe rod dir ki li pa ti les li inflianse par bann fason panse, bann aksion, ek bann lobzektif bann dimounn sa lemond-la. Zezi zame pa ti bliye rezon pou kifer li ti vinn lor later, setadir pou sanktifie nom Zeova. Dan sa lemond-la, ena boukou kitsoz ki kapav anpes nou pou res konsantre lor nou servis pou Zeova. Me si parey kouma Zezi, nou res konsantre pou fer volonte Zeova, nou osi nou pou “gagn laviktwar lor lemonn.”​—1 Zan 5:5.

9. Ki nou bizin fer pou res lor semin ki amenn ver lavi eternel?

⁹ Si nou swiv bann tras Zezi, nou pou gagn lavi eternel. Kan enn zenn zom ris ti demande seki li bizin fer pou gagn lavi eternel, Zezi ti reponn li: “Vini, swiv mwa.” (Mat. 19:16-21) Sertin Zwif pa ti krwar ki Zezi ti Lekris, ek Zezi ti dir zot: “Mo brebi . . . swiv mwa. Mo donn zot lavi eternel.” (Zan 10:24-29) Ek kan Nikodem, enn manb Sanedrin, ti interese ar bann lansegnman Zezi, Zezi ti dir li ki “tou dimoun ki krwar dan Li” pou “gagn lavi eternel.” (Zan 3:16) Nou montre ki nou ena lafwa an Zezi kan nou met so bann lansegnman an pratik ek nou swiv so lexanp. Si nou fer sa, nou pou res lor semin ki amenn ver lavi eternel.​—Mat. 7:14, NW.

10. Ki sa vedir “aprann konn” Zezi pli bien? (Zan 17:3, NW)

¹⁰ Pou ki nou kapav swiv bien bann tras Zezi, nou bizin aprann konn li. (Lir Zan 17:3, NW. *) “Aprann konn” Zezi, se enn kitsoz ki nou bizin kontign fer. Pou ki nou kapav aprann konn Zezi pli bien, nou bizin aprann konn so bann kalite, so fason panse, ek so bann prinsip. Ek ninport ki kantite letan nou dan laverite, nou bizin kontign fer zefor pou “aprann konn” Zeova ek so Garson.

11. Ki nou kapav aprann dan bann Levanzil?

 ¹¹ Pou ki nou aprann konn so Garson, Zeova inn fer ekrir kat liv dan Labib ki rakont lavi ek minister Zezi. Sa bann liv-la, setadir bann Levanzil, rakont seki Zezi ti dir, seki li ti fer, ek seki li ti resanti. Sa kat liv-la ed nou pou “reflesi bien” lor lexanp Zezi. (Ebre 12:3, NW) An realite, dan sa kat liv-la, ena bann tras ki Zezi finn lese pou ki nou swiv. Alor, kan nou examinn bann Levanzil, nou pou aprann konn Zezi pli bien. Lerla, nou pou kapav swiv bien so bann tras.

12. Ki nou bizin fer pou ki nou tir maximum profi ar bann Levanzil?

¹² Pou ki nou kapav tir maximum profi ar bann Levanzil, fode pa nou zis lir zot. Nou bizin pran letan pou etidie zot bien ek pou medit lor la an profonder. (Konpar Zozwe 1:8, not.) Anou get de sigzesion ki kapav ed nou pou medit ek pou met an pratik seki nou aprann dan bann Levanzil.

13. Kouma to kapav fer bann Levanzil vinn pli reel pou twa?

¹³ Premierman, fer bann Levanzil vinn pli reel pou twa. Kan to lir bann Levanzil, servi to limazinasion pou trouv, tann, ek resanti seki pe arive. Pou to reisi fer sa, servi bann zouti ki lorganizasion Zeova donn twa pou fer bann resers. Examinn so kontex, setadir bann levennman ki’nn arive avan ek apre sa parti ki to pe etidie la. Rod bann linformasion lor bann dimounn ek bann plas ki mansione dan sa zistwar-la. Rod sa levennman ki to pe etidie la dan enn lot Levanzil ek konpar toulede. Parfwa, ekrivin enn Levanzil kapav koz lor bann detay ki enn lot ekrivin pa’nn mansione.

14-15. Kouma nou kapav met an pratik bann leson ki nou aprann dan bann Levanzil?

¹⁴ Deziemman, met an pratik seki to pe  aprann dan bann Levanzil. (Zan 13:17) Apre ki to’nn etidie enn zistwar dan enn Levanzil, demann tomem: ‘Eski ena enn leson dan sa zistwar-la ki mo kapav met an pratik dan mo lavi? Kouma sa zistwar-la kapav ed mwa pou ed enn kikenn?’ Esey pans enn kikenn ki to kone, ek lerla avek boukou lamour ek avek takt, partaz avek li seki to’nn aprann.

¹⁵ Anou get enn lexanp ki pou montre nou kouma nou kapav met an pratik sa de sigzesion-la. Nou pou examinn lexanp enn vev ki ti pov ek ki Zezi ti remarke dan tanp.

16. Rakonte seki arive dan Mark 12:41.

¹⁶ Fer sa zistwar-la vinn reel pou twa. (Lir Mark 12:41.) Esey mazinn sa senn-la. Nou le 11 Nizan lane 33 Nou Lepok, mwins ki enn semenn avan lamor Zezi. Zezi enn zourne inn ansegne dan tanp. Ek bann sef relizie pe kontign opoz ar li. Inpe pli boner, sertin parmi zot ti demann Zezi kisannla inn donn li lotorite pou fer tou seki li pe fer. Lezot pe esey piez li ar zot bann kestion. (Mark 11:27-33; 12:13-34) Asterla, Zezi al dan enn lot parti dan tanp, kitfwa dan enn plas ki zot apel Lakour bann Madam. Depi laba, Zezi kapav trouv bann bwat kontribision. Zezi asize ek li pe get bann dimounn met kas dan bann bwat kontribision. Li trouv bann dimounn ris pe met enn ta kas dan bann bwat. Zezi kitfwa ase pre pou tann tapaz ki sa bann pies-la fer kan zot tom dan bwat kontribision.

17. Ki kitsoz sa vev ki mansione dan Mark 12:42 ti fer?

¹⁷ Lir Mark 12:42. Enn tigit letan apre, Zezi remark enn madam. Se “enn pov vev.” (Lik 21:2) So lavi bien difisil, ek kitfwa li pena ase kas pou aste seki li bizin pou viv. Kanmem sa, li al kot enn bwat kontribision, ek san ki personn remark li, li met de ti-pies ladan. Kitfwa sa de ti-pies-la pa fer okenn tapaz kan zot tom dan bwat-la. Me Zezi kone komie sa vev-la inn mete. Li’nn met de lepton, pli tipti pies ki ti ena sa lepok-la. Sa kas-la pa ti mem ase pou aste enn mwano, enn parmi bann zwazo pli bomarse ki ti kapav aste pou manze.

18. Dapre Mark 12:43, 44, ki Zezi ti dir lor sa vev-la?

¹⁸ Lir Mark 12:43, 44. Zezi bien inpresione par sa vev-la. Alor li apel so bann disip, li montre zot sa vev-la, ek li dir: “Sa pov vev la, finn met plis ki zot tou.” Apre sa, li explike: “Zot tou [sirtou bann dimounn ris] zot finn met saki zot ti ena anplis, me li, vev la, li finn pran lor so rasion, lor saki li ti ena pou viv.” Sa zour-la, sa vev-la ti met tou seki li ti ena dan bwat kontribision ek li ti ena konfians ki Zeova ti pou pran li swin.​—Ps. 26:3.

19. Ki leson inportan nou aprann ar seki Zezi ti dir konsernan sa vev ki ti pov la?

¹⁹ Met an pratik seki to’nn aprann. Demann tomem: ‘Ki leson mo kapav aprann ar seki Zezi ti dir lor sa vev ki ti pov la?’ Reflesi lor lexanp sa vev-la. Pena dout ki li ti anvi donn Zeova plis ki sa. Me li ti fer tou seki li ti kapav. Li ti donn Zeova so best. Ek Zezi ti kone ki kontribision sa vev-la ti ena boukou valer pou Zeova. Ki leson nou aprann? Zeova kontan kan nou donn Li nou best, setadir kan nou servi Li avek tou nou leker ek tou nou lavi. (Mat. 22:37; Kol. 3:23) Zeova kontan kan Li trouve ki nou pe fer tou seki nou kapav! Sa aplik osi ar kantite letan  ek lenerzi ki nou depanse dan nou ladorasion pou Li, kouma par exanp kan nou partisip dan predikasion ek nou asiste nou bann renion.

20. Kouma to kapav met an pratik bann leson ki to’nn aprann ar lexanp sa vev-la? Donn enn lexanp.

²⁰ Kouma to kapav met an pratik seki to’nn aprann ar lexanp sa vev-la? Reflesi kisannla to pou kapav ankouraze kan to dir li ki Zeova bien kontan bann zefor ki li pe fer pou servi Li. Par exanp, kitfwa to konn enn ser aze ki ena enn move lasante, ki pena boukou lafors, ek ki santi li koupab ouswa initil parski li nepli kapav fer boukou dan predikasion. Ouswa, kitfwa to konn enn frer ki dekouraze parski li ena enn maladi kronik ek li nepli kapav asiste bann renion regilierman. To kapav ed sa bann frer ek ser-la kan to ena “bann parol ki fortifie.” (Efe. 4:29) Partaz avek zot bann zoli leson ki to’nn aprann ar lexanp sa vev ki ti pov la. To bann parol ankourazan kapav rasir zot ki Zeova kontan ki zot pe fer zot best pou Li. (Prov. 15:23; 1 Tes. 5:11) To pe swiv bann tras Zezi kan to felisit lezot parski zot pe fer zot best pou Zeova, mem si seki zot pe fer paret bien tigit.

21. Ki kitsoz to bien deside pou fer?

²¹ Nou bien kontan ki nou ena bann Levanzil ki donn nou boukou detay lor lavi Zezi! Sa ed nou pou imit li ek pou swiv bien so bann tras. Dan to letid personel ouswa to ladorasion an fami, eski to kapav fixe twa lobzektif pou etidie bann Levanzil? Pou ki nou kapav tir maximum profi ar sa letid-la, pa bliye ki nou bizin fer sa bann zistwar-la vinn reel pou nou ek osi met zot an pratik. Nou bizin imit seki Zezi ti fer, me nou bizin osi ekout seki li ti dir. Dan prosin lartik, nou pou gete seki nou kapav aprann ar bann dernie parol ki Zezi ti dir avan so lamor.