1. Kouma enn garson ti montre ki li ti ena lafwa dan lesperans rezireksion?

 ENN garson ki apel Matthew ena enn maladi bien grav, ek li’nn fer boukou loperasion. Kan li ti ena set an, li ek so fami ti get enn Program Televizion JW. Ver lafin sa program-la, ti ena enn sante ki montre bann dimounn pe akeyir bann ki’nn resisite. b Apre sa program-la, Matthew ti trap lame so bann paran, ek li ti dir zot: “Ma, Pa, zot trouve? Mem si mo mor, mo pou resisite. Zot kapav atann mwa, tou pou korek.” Sey mazine seki sa bann paran-la inn resanti kan zot inn trouve ki lesperans rezireksion bien reel pou zot garson!

2-3. Kifer li bon ki nou reflesi lor promes rezireksion?

² Li bon ki nou reflesi lor promes rezireksion. (Zan 5:28, 29) Kifer? Parski kitfwa enn zour nou kapav gagn enn maladi grav, ouswa enn kikenn ki nou kontan kapav mor. (Ekle. 9:11; Zak 4:13, 14) Lesperans rezireksion kapav ed nou pou fer fas ar sa bann difikilte-la. (1 Tes. 4:13) Labib montre nou ki nou Papa Zeova konn nou bien, ek ki Li bien kontan nou. (Lik 12:7) Zeova bizin konn nou bien pou ki Li kapav resisit nou ar nou personalite ek nou bann souvenir. Zeova telman kontan nou ki Li’nn donn nou posibilite pou viv pou touletan, ek mem si nou mor, Li pou resisit nou.

³ Dan sa lartik-la, nou pou gete kifer nou kapav krwar dan promes rezireksion. Apre sa, nou pou examinn zistwar Biblik kot nou trouv nou text prinsipal pou sa lartik-la, setadir: “To frer pou resisite.” (Zan 11:23) Sa zistwar-la pou fer nou lafwa vinn pli for. An dernie, nou pou gete kouma nou kapav fer lesperans rezireksion vinn pli reel pou nou.

4. Pou nou krwar dan enn promes, ki kitsoz nou bizin sir? Donn enn lexanp.

⁴ Pou nou krwar dan enn promes, nou bizin sir ki sa dimounn ki fer sa promes-la, li anvi ek li kapav tini promes-la. Anou get enn lexanp. Fer koumadir to lakaz inn kraze akoz enn siklonn. Enn kamarad vinn get twa ek li promet twa ki li pou ed twa pou rekonstrir to lakaz. To kone ki to kapav kont lor li, ek to sir ki li anvi ed twa. Anplis, si li enn bon mason ek ki li ena bann zouti ki bizin, to kone ki li pou kapav ed twa. Akoz sa, to sir ki li pou tini so promes. Me ki nou kapav dir lor promes Zeova konsernan rezireksion? Eski Li vremem anvi ek eski Li kapav tini sa promes-la?

5-6. Kifer nou sir ki Zeova anvi resisit bann mor?

⁵ Eski Zeova anvi resisit bann mor? Biensir! Li’nn fer plizir ekrivin Labib, ekrir lor rezireksion ki pou ena dan lavenir. (Iza. 26:19; Oze 13:14; Rev. 20:11-13) Ek kan Zeova fer enn promes, touletan Li tini li. (Zozwe 23:14) An realite, Zeova ena enn gran dezir pou resisit bann mor. Kouma nou konn sa?

⁶ Anou reflesi lor seki Zob ti dir. Li ti sir ki si li mor, Zeova ti pou bien anvi retrouv li. (Zob 14:14, 15) Zeova ena mem santiman pou tou so bann serviter ki’nn mor. Li bien anvi resisit zot, ek retrouv zot an bonn sante ek ere. Me ki nou kapav dir lor bann milyar dimounn ki’nn mor ek ki pa’nn gagn lokazion pou aprann laverite lor Zeova? Nou Papa bien anvi resisit zot osi. (Zist. 24:15) Li anvi ki zot gagn lokazion pou vinn so kamarad ek ki zot viv pou touletan lor later. (Zan 3:16) Li kler ki Zeova anvi resisit bann mor.

7-8. Kifer nou sir ki Zeova kapav resisit bann mor?

⁷ Eski Zeova kapav resisit bann mor? Biensir! Zeova Li “Tou-Pwisan.” (Rev. 1:8) Li telman pwisan ki Li kapav detrir ninport ki lennmi, mem lamor. (1 Kor. 15:26) Kan nou konn sa, sa rekonfort nou ek donn nou lafors, pa vre! Anou get lexanp enn ser ki apel Emma Arnold. Pandan Deziem Lager Mondial, li ek so fami ti gagn plizir difikilte ki’nn teste zot lafwa. Emma so tifi ti bien tris, parski plizir dimounn ki li kontan ti mor dan bann kan konsantrasion Nazi. Pou rekonfort so tifi, Emma ti dir: “Si bann dimounn mor pa resisite, savedir ki lamor pli for ki Bondie. Sa li fos!” Li kler ki pena nanye ki pli for ki Zeova! Nou Bondie Tou-Pwisan ki’nn kree lavi, kapav osi redonn lavi bann ki’nn mor.

⁸ Enn lot rezon ki montre ki Zeova kapav resisit bann mor, se ki Li ena enn memwar ki parfe. Li apel sak zetwal par so nom. (Iza. 40:26) Ek Li osi rapel tou bann ki’nn mor. (Zob 14:13; Lik 20:37, 38) Li rapel tou ti detay lor bann ki Li pou resisite. Par exanp, Li rapel zot figir, zot personalite, zot bann souvenir, ek bann levennman ki’nn arive dan zot lavi.

9. Kifer nou krwar dan promes rezireksion?

⁹ Wi, nou kapav krwar dan promes rezireksion, parski nou kone ki Zeova Li anvi ek Li kapav tini sa promes-la. Enn lot rezon kifer nou krwar dan  rezireksion se parski Zeova inn deza fer li. Dan lepase, Li ti donn sertin zom fidel, kouma par exanp Zezi, kapasite pou resisit bann mor. Anou examinn enn parmi bann rezireksion ki Zezi ti fer ek ki trouv dan Zan sapit 11.

10. Ki ti arive kan Zezi ti pe prese lot kote Zourdin, ek ki li ti fer? (Zan 11:1-3)

¹⁰ Lir Zan 11:1-3. Mazinn seki ti arive dan Betani ver lafin lane 32 Nou Lepok. Dan sa vilaz-la, Zezi ena bann bon kamarad, Lazar ek so de ser, Mari ek Mart. (Lik 10:38-42) Me Lazar tom malad, ek so bann ser bien trakase. Zot avoy Zezi enn mesaz. Zezi lot kote Zourdin, ek sa pran de zour pou sorti Betani pou al zwenn Zezi. (Zan 10:40) Malerezman, kan Zezi gagn mesaz-la, kitfwa se dan sa ler-la mem ki Lazar mor. Mem si Zezi kone ki so kamarad fek mor, li res ankor de zour dan sa landrwa-la, avan ki li al Betani. Alor, kan Zezi ariv Betani, Lazar ti fini mor depi kat zour. Me aster-la, Zezi pou fer enn kitsoz ki pou fer so bann kamarad kontan ek ki pou donn laglwar Bondie.​—Zan 11:4, 6, 11, 17.

11. Kouma nou kapav enn bon kamarad pou lezot?

¹¹ Sa zistwar-la montre nou kouma nou kapav enn bon kamarad pou lezot. Reflesi lor la: Kan Mari ek Mart ti avoy Zezi enn mesaz, zot pa ti demann li pou vinn Betani. Zot ti zis dir li ki so bon kamarad malad. (Zan 11:3) Kan Lazar ti mor, Zezi ti kapav resisit li depi kot li ti ete. Selman, Zezi ti desid pou al Betani pou li kapav soutenir so bann kamarad, Mari ek Mart. Eski to ena enn kamarad ki pou vinn ed twa, mem si to pa demann li so led? Alor, to kapav sir ki to kapav kont lor li dan “bann moman difisil.” (Prov. 17:17) Parey kouma Zezi, anou vinn sa kalite kamarad-la pou lezot! Aster-la, anou gete seki nou kapav aprann ankor dan sa zistwar-la.

12. Ki kitsoz Zezi ti promet Mart, ek kifer Mart ti kapav krwar dan sa promes-la? (Zan 11:23-26)

¹² Lir Zan 11:23-26. Kan Mart aprann ki Zezi pre ar Betani, deswit li al zwenn Zezi ek li dir li: “Segner, si to ti la, mo frer pa ti pou mor.” (Zan 11:21) Li vre ki Zezi ti kapav geri Lazar. Me Zezi ti anvi fer enn kitsoz pli extraordiner ankor. Li fer Mart sa promes-la: “To frer pou resisite.” Li donn Mart enn lot rezon pou krwar dan sa promes-la. Li dir Mart: “Momem rezireksion ek lavi.” Wi, Zeova inn donn Zezi pouvwar pou resisit bann mor. Inpe avan, li ti resisit enn zenn tifi ki ti fek mor. Ek kan enn zenn garson ti mor, li ti resisit li mem zour. (Lik 7:11-15; 8:49-55) Me eski li pou kapav resisit enn kikenn  ki’nn mor depi kat zour, alor ki so lekor inn fini koumans dekonpoze?

13. Dapre Zan 11:32-35, kouma Zezi reazir kan li trouv Mari ek lezot plore? (Get zimaz osi.)

¹³ Lir Zan 11:32-35. Reflesi lor seki arive apre. Mari, lot ser Lazar, al get Zezi, ek parey kouma Mart, li dir Zezi: “Segner, si to ti la, mo frer pa ti pou mor.” Mari ek bann lezot dimounn ki la, bien sagrin. Kan Zezi trouv bann-la plore, li osi li bien sagrin. Sa telman tous li, ki li osi li koumans plore. Zezi konpran ki kantite bann dimounn soufer kan enn kikenn ki zot kontan mor. Nou kapav sir ki Zezi bien anvi ki bann dimounn aret soufer akoz lamor!

14. Kan nou reflesi lor fason ki Zezi ti reazir kan Mari ti plore, ki sa aprann nou lor Zeova?

¹⁴ Fason ki Zezi inn reazir kan li’nn trouv Mari plore, aprann nou ki Zeova Li enn Bondie ki ena boukou konpasion. Kifer nou dir sa? Kouma nou’nn trouve dan lartik avan, Zezi imit so Papa dan enn fason parfe. Li ena mem fason panse ek mem santiman ki so Papa. (Zan 12:45) Zezi ti plore kan li ti resanti soufrans so kamarad. Alor, nou kapav sir ki Zeova osi resanti nou soufrans kan Li trouv nou plore. (Ps. 56:8) Eski sa pa fer twa anvi vinn pli pros ar to Papa Zeova?

15. Dapre Zan 11:41-44, ki ti arive kot tom Lazar? (Get zimaz osi.)

¹⁵ Lir Zan 11:41-44. Zezi ariv kot tom Lazar, ek li demann pou ouver tom-la. Me Mart pa dakor, ek li dir ki lekor Lazar sirman inn bizin koumans santi. Lerla, Zezi dir li: “Eski mo pa’nn dir twa ki si to krwar to pou trouv laglwar Bondie?” (Zan 11:39, 40) Zezi get lesiel ek li fer enn lapriyer devan tou dimounn. Li anvi ki Zeova gagn laglwar pou seki pou arive apre. Lerla, Zezi kriye: “Lazar, sorti deor!” Ek Lazar sorti dan tom-la! Zezi inn fer enn kitsoz ki boukou dimounn ti panse inposib.​—Get not pou letid pou Zan 11:17.

16. Kouma seki’nn arive dan Zan sapit 11 fer nou ena plis lafwa dan lesperans rezireksion?

 ¹⁶ Seki’nn arive dan Zan sapit 11 fer nou ena plis lafwa dan lesperans rezireksion. Kifer nou dir sa? Parski Zezi ti fer Mart sa promes-la: “To frer pou resisite.” (Zan 11:23) Parey kouma so Papa, Zezi anvi ek li kapav tini sa promes-la. Kan li’nn plore, Zezi inn montre ki li anvi resisit bann dimounn ki’nn mor, ek ki li anvi ki bann dimounn aret soufer akoz lamor. Ek kan Lazar inn sorti dan tom, Zezi ankor enn fwa inn montre ki li ena pouvwar pou resisit bann mor. Pa bliye osi ki Zezi ti dir Mart: “Eski mo pa’nn dir twa ki si to krwar to pou trouv laglwar Bondie?” (Zan 11:40) Alor, tousala montre nou ki nou kapav krwar ki Zezi pou tini so promes pou resisit bann mor. Selman, kouma nou kapav fer lesperans rezireksion vinn pli reel pou nou?

17. Lor ki kitsoz nou bizin reflesi kan nou lir lor bann rezireksion ki mansione dan Labib?

¹⁷ Lir ek reflesi lor bann rezireksion ki’nn arive dan lepase. Labib koz lor wit dimounn ki’nn resisite pou viv lor later. c Pran letan pou etidie sa bann rezireksion-la bien. Kan to fer sa, esey resanti seki sa bann dimounn-la inn resanti. Rod bann leson ki to kapav aprann ar zot lexanp. Ek reflesi kouma sak lexanp montre ki Zeova anvi ek ena pouvwar pou resisit bann mor. Reflesi sirtou lor rezireksion pli inportan ki mansione dan Labib, setadir rezireksion Zezi. Plizir santenn dimounn ti trouv Zezi apre so rezireksion, ek sa se enn bon rezon pou nou ena lafwa dan rezireksion.​—1 Kor. 15:3-6, 20-22.

18. Ki nou bizin fer ar bann sante ki koz lor rezireksion? (Get not osi.)

 ¹⁸ Ekout, sant, ek reflesi lor “bann sante” ki koz lor rezireksion. d (Efe. 5:19) Sa bann sante-la fer lesperans rezireksion vinn pli reel pou nou. Zot kapav osi fer nou ena plis lafwa dan sa lesperans-la. Alor, ekout zot bien, sant zot souvan, ek koz lor zot bann parol dan to ladorasion an fami. Aprann zot bann parol par-ker, pou ki sa bann sante-la tous to leker. Lerla, si enn kikenn ki to kontan mor, ouswa si to tom bien malad, lespri sin Zeova pou kapav fer twa rapel sa bann sante-la. Koumsa, to pou kapav gagn rekonfor ek lafors ki to bizin.

19. Kouma nou kapav servi nou limazinasion kan nou pans lor rezireksion? (Get lankadre “Ki To Pou Demann Zot?”)

¹⁹ Servi to limazinasion. Zeova inn donn nou kapasite pou nou mazinn nou dan lemond nouvo. Enn ser dir: “Mo’nn pas telman boukou letan pou mazinn mwa dan lemond nouvo, ki mo kapav santi parfin bann roz ki dan Paradi.” Mazine ki to pe zwenn bann serviter Zeova ki’nn viv dan lepase. Kisann-la to ti pou kontan zwenn? Ki kestion to ti pou kontan poz li? Mazine ki to’nn retrouv bann dimounn ki to kontan ek ki’nn resisite. Mazinn bann premie kitsoz ki to pou dir zot, kouma to pe may zot dan to lebra, ek kouma to bien kontan ki to’nn retrouv zot.

20. Ki kitsoz nou bien deside pou fer?

²⁰ Nou bien rekonesan anver Zeova, ki promet nou ki pou ena enn rezireksion! Nou kapav sir ki pou ena enn rezireksion, parski Zeova anvi ek Li kapav tini sa promes-la. Anou bien deside pou kontign ogmant nou lafwa dan lesperans rezireksion. Kan nou fer sa, nou pou vinn pli pros ar Bondie ki fer nou sa promes-la, ‘Bann dimounn ki to kontan pou resisite!’