1. Ki kitsoz nou sir?

 NOU bann serviter Zeova, alor nou sir ki Li kontan nou ek Li anvi ki nou ena enn zoli lavi. (Rom. 8:35-39) Nou sir osi ki nou touletan gagn bann bienfe kan nou met an pratik bann prinsip ki ena dan Labib. (Iza. 48:17, 18) Me kouma nou bizin reazir kan nou gagn bann difikilte ki nou pa atann?

2. Ki difikilte kitfwa nou pe gagne, ek ki kestion kitfwa nou kapav poz noumem akoz sa?

² Tou bann serviter Zeova gagn bann difikilte. Par exanp, kitfwa enn manb nou fami inn desevwar nou. Kitfwa nou ena enn problem lasante ki pe anpes nou fer seki nou anvi pou Zeova. Kitfwa nou pe soufer akoz enn katastrof natirel. Ouswa kitfwa nou pe gagn persekision akoz nou bann krwayans. Kan nou gagn bann difikilte koumsa, kitfwa nou kapav demann noumem: ‘Kifer sa pe ariv mwa? Ki mo’nn fer demal? Eski savedir ki mo pa pe gagn benediksion Zeova?’ Eski to’nn deza ena sa santiman-la? Si wi, fode pa to dekouraze. Boukou fidel serviter Zeova inn deza ena sa bann santiman-la.​—Ps. 22:1, 2; Abak. 1:2, 3.

3. Ki nou kapav aprann dan Psom 34:19?

³ Lir Psom 34:19, NW. b Rapel de pwin inportan sa psom-la: (1) Bann dimounn drwat gagn bann difikilte.  (2) Zeova ed nou dan nou bann difikilte. Kouma Li fer sa? Enn fason Li fer sa, se kan Li ed nou pou trouv bann kitsoz dan enn fason realist. Mem si Zeova promet nou ki nou kapav zwaye kan nou servi Li, Li pa’nn promet nou ki nou pa pou gagn bann difikilte dan sa lemond-la. (Iza. 66:14) Parkont, Li ankouraz nou pou res konsantre lor lavenir; lor lepok kot nou pou viv ere pou touletan. (2 Kor. 4:16-18) Me an-atandan, Li ed nou pou nou kontign andire sak zour.​—Lam. 3:22-24.

4. Ki nou pou examine dan sa lartik-la?

⁴ Anou gete seki nou kapav aprann ar lexanp bann fidel serviter Zeova dan lepase ek dan nou lepok. Nou pou trouve ki, mem si nou gagn bann difikilte ki nou pa atann, si nou kont lor Zeova Li pou touletan soutenir nou. (Ps. 55:22) Amezir ki nou examinn sa bann lexanp-la, to kapav demann tomem: ‘Kouma mo ti pou reazir dan sa sitiasion-la? Kouma sa lexanp-la fer mwa ena plis konfians an Zeova? Ki leson sa aprann mwa, ek kouma mo kapav met sa an pratik dan mo lavi?’

5. Ki difikilte Zakob ti gagne akoz Labann? (Get zimaz lor kouvertir.)

⁵ Bann serviter Zeova dan lepase inn gagn bann difikilte ki zot pa ti atann. Anou get lexanp Zakob. So papa ti dir li al kot Labann, enn so fami ki ti pe ador Zeova, pou marye ar enn so bann tifi. Li ti osi dir li ki si li fer sa, li ti pou gagn benediksion Zeova. (Zen. 28:1-4) Alor, Zakob ti ekout so papa. Li ti kit Kanaan ek li ti al kot Labann. Labann ti ena de tifi, Lea ek Rasel. Zakob ti tom amoure ar Rasel, pli zenn tifi Labann, ek li ti tom dakor ar Labann pou travay set an pou li, avan ki li marye ar Rasel. (Zen. 29:18) Me sa pa ti pas koumsa, parski Labann ti fer malonet ar Zakob. Li ti fer Zakob marye ar so premie tifi, Lea. Me Labann ti aksepte ki Zakob marye ar Rasel enn semenn apre. Selman, li ti bizin travay ankor set an pou li. (Zen. 29:25-27) Labann inn bien manday Zakob kan Zakob ti pe travay pou li. Antou, Labann inn explwat Zakob pandan 20 an!​—Zen. 31:41, 42.

6. Ki lezot difikilte Zakob ti gagne?

⁶ Zakob ti gagn lezot difikilte osi. Li ti ena enn gran fami, me so bann garson pa ti touletan dakor ant zot. Zot ti mem vann zot frer Zozef kouma enn esklav. De garson Zakob, Simeon ek Levi, ti zet dezoner lor zot fami ek lor nom Zeova. Anplis, madam ki Zakob ti bien kontan, Rasel, ti mor kan li ti akous so deziem zanfan. Ti ena osi enn gran lafaminn, ek akoz sa, Zakob ti oblize al res Lezip, mem si li ti bien vie.​—Zen. 34:30; 35:16-19; 37:28; 45:9-11, 28.

7. Kouma Zeova ti montre Zakob ki li ti ena So faver?

⁷ Malgre tou so bann difikilte, Zakob ti kontign ena lafwa dan Zeova ek So bann promes. Ek Zeova ti montre Zakob ki li ti ena So faver. Par exanp, mem si Labann ti malonet ar Zakob, Zeova ti fer Zakob gagn boukou dibien. Ek Zakob sirman ti bien rekonesan anver Zeova kan li ti retrouv so garson Zozef, ki li ti panse ti mor depi bien lontan. Zakob ti reisi andir so bann difikilte parski li ti ena enn bon lamitie ar Zeova.  (Zen. 30:43; 32:9, 10; 46:28-30) Si nou osi nou ena enn bon lamitie avek Zeova, nou pou kapav andir ninport ki difikilte nou gagne.

8. Ki kitsoz Lerwa David ti anvi fer?

⁸ Lerwa David pa ti reisi fer tou seki li anvi pou servi Zeova. Par exanp, David ti vremem anvi konstrir enn tanp pou Zeova. Li ti dir sa profet Natan, ek Natan ti dir li: “Fer tou seki to leker dir twa, parski vre Bondie avek twa.” (1 Kro. 17:1, 2) Nou sir ki bann parol Natan ti bien ankouraz David. Kitfwa deswit li ti koumans organize pou fer sa gran travay-la.

9. Kouma David ti reazir kan li ti gagn enn move nouvel?

⁹ Selman, Natan ti revinn get David avek enn move nouvel. “Sa swar-la mem,” Zeova ti dir Natan ki se pa David ki ti pou konstrir enn tanp pou li, me se enn so bann garson ki ti pou fer sa. (1 Kro. 17:3, 4, 11, 12) Kouma David ti reazir kan li ti gagn sa nouvel-la? Li ti adapte li. Li ti fer so maximum pou ramas larzan ek bann materyo, pou ki so garson Salomon konstrir tanp Zeova.​—1 Kro. 29:1-5.

10. Kouma Zeova ti beni David?

¹⁰ Deswit kouma David ti aprann ki li pa ti pou konstrir tanp, Zeova ti fer enn lalians ar li. Zeova ti promet David ki enn so bann desandan ti pou regne pou touletan. (2 Sam. 7:16) Dan lemond nouvo, pandan Regn Mil An Zezi Kris, David pou bien kontan pou aprann ki sa lerwa-la se enn parmi so bann desandan! Lexanp David montre nou ki, mem si nou pa reisi fer tou seki nou anvi pou Zeova, Zeova kapav donn nou lezot kitsoz ki nou pa atann.

11. Kouma Zeova ti beni bann Kretien dan premie siek, mem si Rwayom Bondie pa ti ariv dan moman ki zot ti pe atann? (Zistwar Bann Zapot 6:7)

¹¹ Bann Kretien dan premie siek osi ti gagn bann difikilte ki zot pa ti atann. Par exanp, zot ti anvi ki Rwayom Bondie vini. Selman, zot pa ti kone kan sa ti pou arive. (Zist. 1:6, 7) Alor, ki zot ti fer? Zot ti kontign res bien aktif dan predikasion. Plis zot ti pe prese, plis zot ti trouve kouma Zeova ti pe beni zot bann zefor.​—Lir Zistwar Bann Zapot 6:7.

12. Ki kitsoz bann Kretien dan premie siek ti fer kan ti ena lafaminn?

¹² Enn lepok, ti ena “enn gran lafaminn partou lor later.” (Zist. 11:28) Bann Kretien osi ti soufer akoz sa. Nou kapav sey mazine kouma sa lafaminn-la ti afekte zot! Sirman bann sef fami ti trakase tansion zot pa reisi donn zot fami seki zot bizin. Sirman sa ti pe afekte osi bann zenn ki ti pe pans pou fer plis dan predikasion. Kitfwa zot ti pe demann zotmem si zot bizin atann ki lafaminn pase pou zot fer plis pou Zeova. Mem si zot ti ena bann difikilte, sa bann Kretien-la ti adapte zot. Zot ti kontign prese kouma zot kapav, ek zot ti partaz seki zot ena ar zot bann frer ek ser dan Zide.​—Zist. 11:29, 30.

13. Ki benediksion bann Kretien inn gagne pandan lafaminn?

¹³ Ki benediksion bann Kretien inn gagne pandan lafaminn? Bann ki ti gagn led, ti trouv lame Zeova dan zot lavi. (Mat. 6:31-33) Sirman zot ti vinn pli pros ar bann frer ek ser ki ti ed zot. Ek bann ki ti ede, ouswa ki ti partaz seki zot ti ena, ti ere parski zot ti pe ed lezot. (Zist. 20:35) Zeova ti beni zot tou, parski  zot ti adapte zot kan zot sitiasion ti sanze.

14. Ki ti ariv Pol ek Barnabas, ek ki rezilta sa finn ena? (Zistwar Bann Zapot 14:21, 22)

¹⁴ Bann Kretien dan premie siek souvan ti gagn persekision, ek parfwa sa ti arive kan zot pa ti atann. Anou gete seki ti ariv Pol ek Barnabas kan zot ti pe prese dan List. O-koumansman, bann dimounn ki ti pe ekout zot, ti bien akeyir zot. Me plitar, bann opozan “ti inflians lafoul,” ek sertin parmi bann dimounn ki ti pe ekout Pol, ti avoy li kout ros pou touy li. “Zot ti trenn li andeor lavil parski zot ti panse li’nn mor.” (Zist. 14:19) Kanmem sa, Pol ek Barnabas ti al dan enn lot landrwa ek zot ti kontign prese. Ki rezilta sa finn ena? “Zot ti fer boukou disip.” Anplis, par zot parol ek zot lexanp, zot ti fer lafwa zot bann frer ek ser vinn pli for. (Lir Zistwar Bann Zapot 14:21, 22.) Boukou dimounn inn gagn bann bienfe parski Pol ek Barnabas pa’nn bes lebra kan zot inn gagn persekision. Alor, tanki nou pa bes lebra ek ki nou kontign fer travay ki Zeova inn donn nou, nou pou gagn bann benediksion.

15. Ki nou kapav aprann ar lexanp Frer Macmillan?

¹⁵ Bann serviter Zeova ti panse ki boukou kitsoz ti pou arive an 1914. Anou get lexanp Frer Alexander Macmillan. Parey kouma boukou frer ek ser sa lepok-la, Frer Macmillan ti panse ki li ti pou al dan lesiel biento. Dan enn diskour ki li ti fer an Septam 1914, li ti dir: “Kitfwa se dernie fwa ki mo pe fer enn diskour piblik.” Me biensir, sa pa ti so dernie diskour. Inpe apre, Frer Macmillan ti dir: “Kitfwa sertin parmi nou ti inpe tro prese, ek nou ti panse ki nou ti pou al dan lesiel deswit.” Apre sa, li ti dir: “Seki nou bizin fer se kontign res bien okipe dan travay nou Segner.” Frer Macmillan ti vremem res bien okipe dan so servis pou Zeova. Li ti bien aktif dan predikasion. Li ti osi gagn privilez pou ankouraz bann frer ki ti al dan prizon parski zot pa ti fer servis militer. Ek li ti kontign asiste bann renion mem kan li ti vinn bien vie. An-atandan ki li al dan lesiel, ki benediksion Frer Macmillan inn gagne parski li’nn res bien okipe dan servis Zeova? Inpe avan so lamor an 1966, li ti dir: “Mo lafwa inn kontign res for.” Frer Macmillan enn zoli lexanp pou nou imite, sirtou si sa fer lontan ki nou pe andir enn difikilte!​—Ebre 13:7.

16. Ki difikilte Frer Jennings ek so madam ti gagne? (Zak 4:14)

¹⁶ Boukou serviter Zeova gagn bann maladi ki zot pa atann. Par exanp, dan so biografi, Frer Herbert Jennings c explike kouma li ek so madam zot ti bien kontan zot servis misioner dan Gana. Selman, avek letan, li ti gagn enn maladi mantal bien grav. Frer Jennings mansionn Zak 4:14 kan li explike ki zot pa ti pe atann sa sitiasion-la ditou. (Lir.) Li dir: “Nou ti bizin realist. Alor, nou ti kit Gana, ek tou bann kamarad ki nou ti ena laba, ek nou ti retourn Kanada [pou mo kapav gagn mo bann tretman medikal].” Zeova ti ed Frer Jennings ek so madam, ek zot ti kontign servi Li avek fidelite malgre bann difikilte ki zot ti ena.

17. Ki bienfe bann frer ek ser inn gagne ar lexanp Frer Jennings?

 ¹⁷ Dan so biografi, Frer Jennings ti bien sinser, ek sa finn tous boukou frer ek ser. Enn ser dir: “Zame enn lartik inn tous mwa otan. . . . Kan mo’nn trouve kouma Frer Jennings ti bizin abandonn enn responsabilite pou pran swin so lasante, sa inn ed mwa pou trouv mo sitiasion dan enn fason pozitif.” Enn frer ti dir: “Pandan di-z-an, mo’nn servi kouma ansien. Me apre mo pa’nn kapav kontigne parski mo ti ena enn maladi mantal. Mo’nn santi mwa telman initil apre sa ki mo pa ti pe kapav lir bann biografi. . . . Me landirans Frer Jennings inn bien ankouraz mwa.” Sa bann lexanp-la montre nou ki, kan nou andir bann difikilte ki nou pa atann, sa kapav ankouraz lezot. Mem kan nou sitiasion sanze ek ki nou lavi vinn pli difisil, nou ankor kapav enn lexanp lafwa ek landirans pou lezot.​—1 Pier 5:9.

18. Parey kouma nou trouve lor zimaz pou sa paragraf-la, ki nou kapav aprann ar lexanp sa vev ki res Nizeria la?

¹⁸ Bann katastrof kouma pandemi COVID-19 inn rann lavi boukou serviter Zeova bien difisil. Anou get lexanp enn vev ki res Nizeria. Li pa ti ena boukou manze ek li ti res bien tigit kas. Enn gramatin, so tifi ti demann li seki zot ti pou manze apre ki zot kwi dernie lamok diri ki zot reste. Nou ser ti dir so tifi ki zot pa ti ena ase larzan ek manze, me ki zot ti pou swiv lexanp vev Sarepta, setadir zot ti pou prepar zot dernie repa ek zot ti pou kont lor Zeova. (1 Ler. 17:8-16) Avan mem ki zot mazine seki zot ti pou manze sa zour-la, bann frer ek ser ti avoy inpe komision pou zot. Zot ti gagn manze pou plis ki de semenn. Nou ser  dir ki li pa ti rann li kont ki kantite Zeova ti pe ekout konversasion ki li ti gagne ar so tifi. Wi, kan nou kont lor Zeova kan nou gagn bann difikilte, sa fer nou vinn pli pros ar Li.​—1 Pier 5:6, 7.

19. Ki persekision Frer Yershov ti gagne?

¹⁹ Sa bann dernie lane-la, boukou frer ek ser inn gagn persekision alor ki zot pa ti atann sa. Anou get lexanp Frer Aleksey Yershov, ki res Larisi. Kan li ti pran batem an 1994, bann frer ek ser ti ena enn sertenn liberte pou prese dan sa pei-la. Selman, avek letan, sitiasion inn sanze dan Larisi. An 2020, bann gard inn fer enn landing ek enn lafouy dan lakaz Frer Yershov, ek zot inn sezi so bann dibien. Plizir mwa apre, gouvernman ti met enn case kriminel kont li. Me seki pli pir, se ki bann prev ki gouvernman ti ena, ti bann video ki enn kikenn ti fer. Pandan plis ki enn-an, sa dimounn-la ti fer krwar ki li ti interese pou etidie Labib. Enn move tret sa!

20. Kouma Frer Yershov so lamitie avek Zeova inn vinn pli for?

²⁰ Ki lefe persekision inn ena lor Frer Yershov? So lamitie avek Zeova inn vinn pli for. Li dir: “Mo madam ek mwa nou priye pli souvan ansam. . . . Mo kone ki mo pa ti pou kapav andir sa sitiasion-la san led Zeova. . . . Mo letid personel inn ed mwa pou mo pa dekouraze. Mo reflesi lor lexanp bann fidel serviter Zeova dan lepase. Dan Labib, ena boukou zistwar ki montre mwa ki li inportan ki mo res kalm ek ki mo fer Zeova konfians.”

21. Ki nou’nn aprann dan sa lartik-la?

²¹ Ki nou’nn aprann dan sa lartik-la? Parfwa, nou kapav gagn bann difikilte ki nou pa atann. Kanmem sa, Zeova touletan ed so bann serviter kan zot kont lor Li. Kouma nou text prinsipal dir, “enn dimounn drwat gagn boukou maler, me Zeova delivre li ar tousala.” (Ps. 34:19) Alor, anou kontign res konsantre lor led ki Zeova kapav donn nou, pa lor nou bann difikilte. Lerla, parey kouma Pol, nou pou kapav dir: “Pou tou kitsoz mo ena lafors gras-a sa kikenn ki donn mwa pwisans la.”​—Fil. 4:13.