LARTIK LETID 14
KANTIK 56 Viv Laverite!
“Kontign Fer Zefor pou Gagn Matirite”
“Anou kontign fer zefor pou gagn matirite.”—EBRE 6:1.
PWIN PRINSIPAL
Nou pou gete kouma bann Kretien ki ena matirite, zot azir ek zot pans parey kouma Zeova, ek gras-a sa zot pran bann bon desizion.
1. Ki kitsoz Zeova anvi?
KAN enn koup gagn enn zanfan, se enn parmi bann moman pli zwaye dan zot lavi! Me mem si zot bien kontan zot ti-baba, zot pa pou anvi ki li res enn ti-baba touletan, pa vre! Avredir, zot pou bien trakase si zanfan-la pa grandi! Dan mem fason, Zeova bien kontan kan nou koumans aprann konn Li. Selman, Li pa anvi ki nou res bann ti-baba lor plan spiritiel. (1 Kor. 3:1) Okontrer, Li anvi ki nou “vinn kouma bann adilt” lor plan spiritiel, setadir ki nou vinn bann Kretien ki ena matirite.—1 Kor. 14:20.
2. Ki kestion nou pou reponn dan sa lartik-la?
2 Me ki savedir vinn enn Kretien ki ena matirite? Ki nou bizin fer pou nou gagn matirite? Kan nou etidie bann lansegnman profon ki ena dan Labib, kouma sa ed nou pou grandi lor plan spiritiel? Ek kifer nou bizin kontign fer zefor pou res bann Kretien ki ena matirite? Dan sa lartik-la, nou pou reponn sa bann kestion-la.
KI SAVEDIR VINN ENN KRETIEN KI ENA MATIRITE?
3. Ki savedir vinn “bann adilt” lor plan spiritiel?
3 Dan Labib, mo Grek ki’nn servi pou “adilt” vedir osi “matirite,” “parfe,” ek “konple.” a (Efe. 4:13, not.) Parey kouma enn zanfan ki grandi ziska ki li vinn enn adilt, nou osi nou bizin kontign grandi lor plan spiritiel ek vinn pli pros ar Zeova. Se koumsa ki nou vinn bann Kretien ki ena matirite. Ek mem si nou’nn gagn matirite, fode pa nou panse ki nou nepli bizin progrese. (1 Tim. 4:15) Nou tou, ki nou zenn ouswa vie, nou kapav vinn bann Kretien ki ena matirite. Me ki kitsoz montre ki enn Kretien ena matirite?
4. Ki kitsoz montre ki enn Kretien ena matirite?
4 Enn Kretien ki ena matirite, li pa swazir ki prinsip Zeova li pou swiv; li swiv tou bann prinsip Zeova. Biensir, akoz li inparfe, li pou fer bann erer. Selman, dan so lavi toulezour, li pou kontign fer zefor pou viv an-akor ar volonte Zeova. Li’nn met nouvo personalite lor li, ek li kontign fer zefor pou azir ek pans parey kouma Zeova. (Efe. 4:22-24) Parski li’nn reflesi lor bann lalwa ek bann prinsip Zeova, li’nn aprann pran bann bon desizion. Akoz sa, li pa bizin enn lalis bann lalwa pou li kone seki li gagn drwa ouswa pa gagn drwa fer. Ek kan li pran enn desizion, li fer boukou zefor pou fer seki li’nn deside.—1 Kor. 9:26, 27.
5. Ki kitsoz montre ki enn Kretien pena matirite? (Efezien 4:14, 15)
5 Parkont, enn Kretien ki pena matirite, fasilman li les lezot “anbet” li. Par exanp, kitfwa li pou krwar bann fos linformasion, bann rimer, ouswa bann fos zistwar ki pase lor radio, televizion, lagazet, ouswa Internet. Kitfwa li pou osi les bann aposta anbet li. b (Lir Efezien 4:14, 15.) Kan enn kikenn pena matirite, li kapav zalou lezot, li met dezord ant lezot, ouswa li pou ofanse vit. Ek kan li gagn enn tantasion pou fer enn move kitsoz, souvan li fer li.—1 Kor. 3:3.
6. Kifer nou kapav konpar enn kikenn ki pe fer zefor pou gagn matirite ar enn zanfan ki pe grandi? (Get zimaz osi.)
6 Kouma nou’nn trouve dan koumansman sa lartik-la, Labib konpar enn kikenn ki pe fer zefor pou gagn matirite, ar enn zanfan ki pe grandi pou vinn enn adilt. Ena boukou kitsoz ki enn zanfan pa kone, ek akoz sa, li bizin enn adilt pou protez li ek gid li. Par exanp, enn mama pou trap lame so zanfan pou travers sime. Me amezir ki so zanfan grandi, mama-la pou les li travers sime li tousel. Selman, li pou rapel so zanfan ki li bizin get de kote avan ki li traverse. Ek kan zanfan-la vinn enn adilt, li pou kapav evit bann danze par li tousel. Parey kouma enn zanfan ki bizin led enn adilt pou evit enn danze, enn Kretien ki pena matirite souvan bizin led enn Kretien ki ena matirite pou evit bann danze ouswa pou pran bann bon desizion. Parkont, kan enn Kretien ki ena matirite bizin pran enn desizion, li reflesi lor bann prinsip Labib pou li kone seki Zeova panse lor la, ek apre li swiv sa bann prinsip-la.
Bann Kretien ki pena matirite bizin aprann kouma pou swiv bann prinsip Labib pou zot kapav pran bann bon desizion (Get paragraf 6)
7. Eski enn Kretien ki ena matirite pa bizin led?
7 Me eski sa vedir ki bann Kretien ki ena matirite pa bizin ki personn ed zot? Non. Zot osi parfwa zot bizin led. Me enn kikenn ki pena matirite, li pou atann ki lezot dir li seki li bizin fer, ouswa li pou les lezot pran bann desizion dan so plas. Parkont, kan enn Kretien ki ena matirite rod led ar lezot, li pou rod led ar bann ki ena plis sazes ek lexperyans ki li. Selman, li kone ki li pou bizin pran so prop desizion ek “sarye so prop sarz.”—Gal. 6:5.
8. Eski tou bann Kretien ki ena matirite bizin pans ek azir parey? Explike.
8 Eski tou bann Kretien ki ena matirite, zot ena bann mem kalite? Non. Par exanp, sertin kapav ena plis sazes ek lezot kapav ena plis kouraz. Ouswa, sertin kapav pli zenere, alor ki lezot kapav ena pli boukou konpasion. Anplis, si de Kretien ki ena matirite gagn mem difikilte, toule-de pou swiv bann prinsip Labib. Selman, kitfwa zot pa pou pran mem desizion. Kifer? Parski kitfwa sakenn inn pran so desizion dapre so konsians. Se pou sa rezon-la ki bann Kretien ki ena matirite pa ziz lezot kan lezot pa pran mem desizion ki zot. Okontrer, zot fer zefor pou gard linite.—Rom. 14:10; 1 Kor. 1:10.
KI NOU BIZIN FER POU NOU GAGN MATIRITE?
9. Pou vinn enn Kretien ki ena matirite, eski li otomatik? Explike.
9 Bann zanfan pa bizin fer zefor pou grandi. Se enn kitsoz ki otomatik. Parkont, pou ki enn Kretien vinn enn kikenn ki ena matirite, li pa otomatik; li bizin fer bann zefor. Bann Kretien dan Korint ti aksepte laverite, zot ti pran batem, zot ti gagn lespri sin, ek zot ti aprann boukou kitsoz ar lapot Pol. (Zist. 18:8-11) Selman, plizir lane apre zot batem, zot pa ti ankor gagn matirite. (1 Kor. 3:2) Ki nou bizin fer pou ki sa pa ariv nou?
10. Ki nou bizin fer pou nou vinn enn Kretien ki ena matirite? (Zid 20)
10 Pou nou vinn enn Kretien ki ena matirite, pou koumanse nou bizin ena dezir pou gagn matirite. Labib koz lor bann ki “kontan seki san lexperyans.” Sa bann dimounn-la, zot prefer res bann ti-baba lor plan spiritiel, ek akoz sa zot pa fer okenn progre. (Prov. 1:22) Nou pa anvi resanble bann adilt ki les zot paran pran bann desizion dan zot plas, pa vre! Okontrer, nou anvi pran nou prop responsabilite ek fer zefor pou ki nou lamitie ar Zeova kontign grandi. (Lir Zid 20.) Si to pe fer zefor pou gagn matirite, priye Zeova pou ki Li donn twa “dezir ek lafors toule-de pou azir.”—Fil. 2:13.
11. Pou nou vinn bann Kretien ki ena matirite, ki kitsoz Zeova inn donn nou? (Efezien 4:11-13)
11 Pou nou vinn bann Kretien ki ena matirite, ki kitsoz Zeova inn donn nou? Li’nn donn nou bann berze ek bann ansegnan dan lasanble, ki ed nou pou vinn bann “adilt” lor plan spiritiel, pou nou “ariv mem degre matirite ki Lekris.” (Lir Efezien 4:11-13.) Li’nn osi donn nou so lespri sin, ki ed nou pou “ena fason panse Kris.” (1 Kor. 2:14-16) Dan so Parol Labib, Li’nn osi donn nou kat Levanzil ki montre nou kouma Zezi ti azir kan li ti lor later. Ek si nou azir ek pans parey kouma Zezi, nou pou kapav vinn bann Kretien ki ena matirite.
KIFER NOU BIZIN ETIDIE BANN LANSEGNMAN PROFON KI ENA DAN LABIB?
12. Ki ete “bann lansegnman debaz lor Lekris”?
12 Pou nou gagn matirite, nou bizin konn plis ki “bann lansegnman debaz lor Lekris.” Parmi sa bann lansegnman debaz la, ena lansegnman lor repantans, lafwa, batem, ek rezireksion. (Ebre 6:1, 2) Sa bann lansegnman-la, se bann lansegnman inportan ki ena dan Labib. Se akoz sa ki lapot Pier ti koz lor sa bann lansegnman-la kan li ti pres ar bann dimounn Lapantkot 33 Nou Lepok. (Zist. 2:32-35, 38) Nou bizin aksepte sa bann lansegnman-la pou nou vinn enn disip Zezi. Par exanp, lapot Pol ti dir ki, si enn dimounn pa krwar dan rezireksion, li pa enn vre disip Zezi. (1 Kor. 15:12-14) Selman, pou nou vinn enn Kretien ki ena matirite, nou bizin aprann plis ki bann lansegnman debaz ki ena dan Labib.
13. Ki nou bizin fer pou nou gagn bann bienfe ar bann “manze solid”? (Ebre 5:14) (Get zimaz osi.)
13 Apart bann lansegnman debaz, nou bizin osi ‘manz’ bann “manze solid” ki ena dan Labib, setadir bann lalwa ek bann prinsip ki ed nou pou konpran fason panse Zeova. Pou nou gagn bann bienfe gras-a sa bann manze solid la, nou bizin etidie zot, reflesi lor la, ek met zot an pratik. Si nou fer sa, nou pou kapav pran bann desizion ki pou fer Zeova plezir. c—Lir Ebre 5:14.
Kan nou manz bann “manze solid,” nou pou kapav pran bann desizion ki pou fer Zeova plezir (Get paragraf 13) d
14. Kouma Pol ti ed bann Korintien pou vinn bann Kretien ki ena matirite?
14 Dan sertin sitiasion, bann Kretien ki pena matirite kapav gagn difikilte pou pran bann bon desizion. Kifer? Parski zot pa arive rezonn dapre bann prinsip Labib. Si pena enn lalwa presi dan Labib ki dir zot seki zot bizin fer, sertin kapav panse ki zot kapav fer seki zot anvi, ek lezot kapav rod enn lalwa pou swiv alor ki pena okenn lalwa. Par exanp, bann Kretien dan Korint kitfwa ti demann Pol enn lalwa pou zot kone si zot kapav “manz bann manze ki finn ofer ar bann zidol.” Me olie ki li ti dir zot seki zot bizin fer, Pol ti explik zot ki sakenn ena ‘drwa pou swazir’ dapre so konsians. Li ti osi montre zot sertin prinsip Labib ki ti pou ed zot pran enn desizion avek enn konsians kler, san ki zot fer lezot tonbe. (1 Kor. 8:4, 7-9) Pol ti montre zot kouma pou servi Labib pou zot pran zot prop desizion, olie ki zot depann lor lezot ouswa ki zot rod enn lalwa. Kan li ti fer sa, li ti ed zot pou vinn bann Kretien ki ena matirite.
15. Kouma Pol ti ed bann Kretien Ebre pou progrese lor plan spiritiel?
15 Dan let ki Pol ti ekrir bann Kretien Ebre, nou aprann enn lot leson inportan. Sertin parmi sa bann Kretien-la ti aret grandi lor plan spiritiel; “zot [ti] re-bizin dile ankor, olie manze solid.” (Ebre 5:12) Zot pa ti aprann ek aksepte bann nouvo kitsoz ki Zeova ti ansegn zot atraver lasanble. (Prov. 4:18) Par exanp, boukou Kretien Zwif ti ankor pe swiv Lalwa Moiz mem si zot ti nepli bizin swiv sa lalwa-la depi anviron 30 an. Sa lalwa-la ti aboli kan Zezi ti donn so lavi an sakrifis. (Rom. 10:4; Tit 1:10) Sa bann Kretien-la ti gagn anviron 30 an pou konpran ki zot ti nepli bizin swiv Lalwa Moiz. Ek dan let ki li ti ekrir bann Ebre, Pol ti esey fer zot aksepte sa lansegnman bien inportan la. So let ti ed zot pou konpran ki Zeova ti pran bann dispozision gras-a Zezi, pou ki zot ador Li dan enn nouvo fason ek dan enn pli bon fason. Let-la ti osi donn zot kouraz pou zot kontign prese malgre lopozision bann Zwif.—Ebre 10:19-23.
FER ZEFOR POU RES BANN KRETIEN KI ENA MATIRITE
16. Mem si nou’nn gagn matirite, ki nou bizin fer?
16 Nou bizin fer zefor pou vinn bann Kretien ki ena matirite. Selman, nou bizin osi fer zefor pou res bann Kretien ki ena matirite. Alor, si nou’nn gagn matirite, fode zame nou panse ki nou nepli bizin amelior nou lamitie ar Zeova. (1 Kor. 10:12) Nou bizin “kontign examinn” nou-mem pou gete si nou pe kontign progrese.—2 Kor. 13:5.
17. Kouma let ki Pol ti ekrir bann Kolosien montre ki nou bizin res bann Kretien ki ena matirite?
17 Dan let ki li ti ekrir bann Kolosien, Pol koz lor linportans pou res bann Kretien ki ena matirite. Mem si bann Kolosien ti deza ena matirite, Pol ti dir zot ki zot bizin fer atansion ar fason panse bann dimounn sa lemond-la. (Kol. 2:6-10) Epafras, ki ti konn bien bann frer ek ser sa lasanble-la, touletan ti priye “pou ki finalman zot vinn konple,” setadir ki zot kontign ena matirite. (Kol. 4:12) Ki leson nou aprann? Pol ek Epafras toule-de ti konpran ki, si enn Kretien anvi kontign ena matirite, li bizin Zeova so led ek li bizin kontign amelior so lamitie avek Li. Pol ek Epafras ti anvi ki bann Kolosien kontign ena matirite ek ki zot res “bann adilt” lor plan spiritiel, malgre zot bann difikilte.
18. Ki kitsoz kapav ariv enn Kretien ki ena matirite? (Get zimaz osi.)
18 Pol ti explik bann Kretien Ebre ki, si enn Kretien ki ena matirite pa fer atansion, li kapav perdi net faver Zeova. Si par exanp, enn Kretien nepli anvi obeir Zeova, li riske al telman lwin ar Zeova ki li nepli posib ki li repanti ek gagn pardon Zeova. Erezman ki bann Kretien Ebre pa ti dan sa sitiasion-la! (Ebre 6:4-9) Me ki nou kapav dir lor bann ki’nn vinn inaktif ouswa ki’nn exkli, me ki apre inn retourn ar Zeova? Si avek limilite zot inn repanti, zot pa pou form parti bann dimounn ki’nn perdi net faver Zeova. Selman, kan zot retourn ar Zeova, zot pou bizin so led. (Eze. 34:15, 16) Se akoz sa ki bann ansien pran bann dispozision pou ki bann Kretien ki ena matirite ed sa bann frer ek ser la. Lerla, zot pou kapav revinn pros ar Zeova.
Zeova ed bann ki retourn ver Li (Get paragraf 18)
19. Ki lobzektif nou bizin ena?
19 Eski to pe fer zefor pou vinn enn Kretien ki ena matirite? To kapav realiz sa lobzektif-la! Kontign manz bann “manze solid” ki ena dan Parol Bondie, ek kontign fer zefor pou pans ek azir parey kouma Zeova. Ek si to deza enn Kretien ki ena matirite, fer tou seki to kapav pou to res koumsa pou touletan!
KOUMA TO POU REPONN?
-
Ki savedir vinn enn Kretien ki ena matirite?
-
Ki nou bizin fer pou nou gagn matirite?
-
Kifer nou bizin kontign fer zefor pou res bann Kretien ki ena matirite?
KANTIK 65 Avanse!
a Mem si dan bann Lekritir Ebre pena mo “matirite,” ena bann lexpresion ki ena enn lien ar sa mo-la. Par exanp, liv Proverb koz lor enn kikenn ki ena sazes ek lintelizans, ek ki bien diferan ar enn kikenn ki zenn ek ki pena lexperyans.—Prov. 1:4, 5.
b Lor jw.org ouswa JW Library, get lartik « Protégez-vous de la mésinformation » ki trouv dan « Divers » .
c Get “Bann Size ki To Kapav Etidie,” ki lor dernie paz sa Latour Degard-la.
d DESKRIPSION ZIMAZ: Enn frer pe met an pratik bann prinsip Labib ki li’nn aprann, kan li pe swazir fim ki li pou gete.
