Mo’nn ne an 1955. Mo bann paran ti ena trwa garson, ek momem pli zenn. Mo’nn grandi pre ar lakot Finland, dan enn lavil ki azordi apel Vantaa.

Mo mama inn pran batem de-trwa lane avan mo nesans. Mo papa pa ti kontan laverite ek li pa ti les mo mama etidie ar nou ek amenn nou renion. Akoz sa, mama ti ansegn nou bann kitsoz inportan ki ena dan Labib zis kan papa pa ti la.

Depi ki mo zenn mo ti obeir Zeova. Par exanp, kan mo ti ena set an, mo profeser ti bien ankoler parski mo pa ti manz verilättyjä (enn gro krep Finlande ki fer ar disan). Alor, li ti pik enn bout krep ar enn fourset, ek avek enn lame, li ti ris mo lazou pou ki mo labous ouver, ek avek lot lame, li ti esey met fourset-la dan mo labous. Me mo ti tap fourset-la, ek fourset-la ti tom anba.

Mo papa inn mor kan mo ti ena 12 an. Apre so lamor, mo’nn koumans asiste bann renion. Bann frer dan lasanble ti bien kontan mwa, ek sa ti ed mwa pou vinn pli pros ar Zeova. Mo ti koumans lir Labib toulezour ek mo ti fer plis zefor pou etidie bann piblikasion. Gras-a sa bann bon labitid-la, mo ti pran batem laz 14 an, le 8 Out 1969.

 Kan mo’nn fini lekol, mo’nn koumans fer pionie. Ek de-trwa semenn apre, mo ti al servi kot ti bizin plis proklamater, dan Pielavesi, ki trouv dan sant Finland.

Se dan Pielavesi ki mo’nn zwenn mo madam, Sirkka. Seki mo’nn kontan ar Sirkka, seki li ena boukou limilite ek li bien kontan Zeova. Li pa ti rod grander, ni bann kitsoz materyel. Nou toule-de ti anvi fer nou maximum pou servi Zeova, ek nou ti pre pou fer tou seki ti demann nou pou fer. Nou’nn marye le 23 Mars 1974, ek olie ki nou fer nou linndemiel, nou ti al servi dan enn lasanble kot ti bizin plis proklamater, dan Karttula.

Deswit kouma nou’nn marye, Zeova inn montre nou ki Li pou pran nou swin, si nou met so Rwayom an premie dan nou lavi. (Mat. 6:33) Par exanp, kan nou ti dan Karttula, nou pa ti ena loto. O-koumansman, nou ti pe vwayaz lor bisiklet. Selman, pandan liver, ti fer bien fre laba. Anplis, teritwar nou lasanble ti bien gran. Alor, nou ti bien bizin enn loto. Selman, nou pa ti ena ase kas pou aste enn.

Enn zour, san ki nou atann, mo gran frer ti vinn get nou. Ek li ti donn nou so loto. Li ti fini pey lasirans-la tou. Nou ti zis bizin met lesans.

Zeova ti montre nou ki Li ti asim so responsabilite, setadir ki Li ti donn nou bann kitsoz ki nou bizin. Aster-la, nou ti bizin asim nou responsabilite, setadir met so Rwayom an premie.

An 1978, kan nou ti pe fer lekol pionie, Raimo Kuokkanen, a enn nou bann formater, ti ankouraz nou pou ranpli form pou Lekol Galaad. Alor, nou ti fixe sa lobzektif-la, ek nou ti koumans aprann Angle. Selman, an 1980, avan ki nou ti reisi ranpli nou form pou Lekol Galaad, bann frer ti invit nou pou vinn servi dan Betel Finland. Sa lepok-la, bann Betelit pa ti kapav ranpli form pou fer Galaad. Me nou ti anvi servi kot Zeova avoy nou, pa kot nou nou anvi. Akoz sa, nou ti al Betel. Selman, nou ti kontign aprann Angle tansion nou gagn lokazion pou ranpli nou form pou Lekol Galaad.

De-trwa lane apre, Komite Santral ti donn bann Betelit posibilite pou fer Lekol Galaad. Alor, deswit nou ti ranpli nou form.  Nou pa ti fer sa parski nou tris dan Betel, me parski nou ti anvi al servi kot bizin led. An Septam 1985, nou ti asiste 79^em klas Lekol Galaad. Apre sa, nou ti al servi dan Kolonbi.

Pou nou premie lafektasion dan Kolonbi, nou ti al servi dan Betel. Nou ti fer nou maximum laba. Me apre enn an, mo ti anvi sanz lafektasion. Se sel fwa ki mo’nn demande pou sanz lafektasion. Apre sa, nou ti al servi kouma misioner dan lavil Neiva, ki trouv dan rezion Huila.

Mo’nn touletan kontan prese. Kan mo ti selibater ek pionie dan Finland, parfwa mo ti lev boner pou al prese ek mo ti retourne tar aswar. Ek kan nou ti fek marye, Sirkka ek mwa, nou ti fer bann long zourne predikasion. Kan nou ti bizin al prese dan bann teritwar ki lwin, parfwa nou ti dormi dan nou loto. Lerla, nou ti pas mwins letan pou vwayaze ek nou ti kapav koumans prese pli boner gramatin.

Kan nou ti pe servi kouma misioner, nou ti regagn mem lazwa ki nou ti ena kan nou ti fek koumans nou servis pionie. Anplis, kantite proklamater dan nou lasanble ti pe ogmante, ek bann frer ek ser ti bien kontan nou.

Pa tro lwin ar Neiva, ti ena bann lavil kot pa ti ena okenn Temwin. Selman, ti ena bann solda rebel dan sa bann landrwa-la, ek bann etranze pa ti an sekirite laba. Akoz sa, mo ti pe demann momem kouma bann dimounn ki ti res laba ti pou tann koz lor bon nouvel. Alor, mo ti priye Zeova pou ki enn kikenn ki res laba kapav vinn enn Temwin. Me pou ki sa arive, li ti pou bizin gagn laverite dan Neiva. Mo ti osi priye pou ki apre so batem, li progrese ek li retourn dan so landrwa pou li prese. Mo ti priye pou ki sa arive, me Zeova ti ena enn pli bon solision ki sa.

Inpe apre, mo ti koumans etidie Labib avek enn zenn misie ki ti apel Fernando González. Li ti res dan Algeciras, enn parmi sa bann lavil kot pa ti ena okenn Temwin la. Fernando ti bizin vwayaz plis ki 50 kilomet pou li vinn travay dan Neiva. Li ti prepar bien sak letid ek deswit li ti koumans asiste tou so bann renion. Depi premie semenn ki li ti koumans etidie, Fernando ti fer enn ti group avek bann dimounn dan so landrwa ek li ti ansegn zot bann kitsoz ki li ti pe aprann dan so letid.

Fernando ti pran batem an Zanvie 1990, sis mwa apre ki li ti koumans etidie. Inpe apre, li ti vinn pionie permanan. Aster-la ki ti ena enn Temwin dan Algeciras, li ti pli fasil pou ki Betel avoy bann pionie spesial laba. An Fevriye 1992, enn lasanble ti forme dan sa lavil-la.

Me Fernando pa ti pres zis dan so landrwa! Apre so maryaz, li ek so madam ti al dan lavil Vicente del Caguán, enn lot landrwa kot pa ti ena okenn Temwin. Laba, zot ti ede pou form enn lot lasanble. An 2002, Fernando ti vinn enn responsab sirkonskripsion. Li ek so madam, Olga, ankor  pe servi dan sirkonskripsion ziska azordi.

Sa lexperyans-la inn aprann mwa ki kan sa konsern nou servis, li bien inportan ki nou fer bann lapriyer ki presi. Apre tou, nou nou zis bann travayer, me Zeova Li, Li “Proprieter karo”!—Mat. 9:38.

An 1990, nou ti koumans fer servis sirkonskripsion dan lavil Bogotá, kapital Kolonbi. Nou ti per tansion nou pa kapav asim sa responsabilite-la, parski mo madam ek mwa nou ti bann dimounn sinp ek nou pa ti ena bann gran-gran kapasite. Anplis, nou pa ti abitie viv dan enn gran lavil. Selman, nou’nn trouv Zeova realiz promes ki Li’nn fer dan Filipien 2:13, ki dir: “Se Bondie ki fer zot vinn for dapre seki fer li plezir, ek li donn zot dezir ek lafors toule-de pou azir.”

Apre sa, nou ti al dan servis sirkonskripsion dan lavil Medellín, lavil ki mo ti mansione dan koumansman sa lartik-la. Bann abitan sa lavil-la ti abitie ar laviolans, ek sa pa ti fer zot per. Par exanp, enn fwa kan mo ti pe fer letid enn kikenn, mo ti pe tann bann dimounn pe tir kout bal deor. Mo ti pou al zet mo lekor anba, me mo etidian ti res kalm ek li ti kontign lir so paragraf. Kan li ti fini lir, li ti al deor ek apre inpe letan li ti retourne avek so de zanfan. Avek enn lavwa bien kalm, li ti dir mwa: “Sori, me mo ti bizin al sers mo bann zanfan.”

Plizir fwa nou lavi ti an danze. Par exanp, enn fwa kan nou ti pe prese lakaz-lakaz, Sirkka ti galoupe pou vinn zwenn mwa. So figir ti paret bien trakase. Li ti dir mwa ki enn kikenn ti tir enn kout bal lor li. Mo ti gagn enn sok. Selman, plitar nou ti aprann ki sa dimounn-la pa ti pe viz Sirkka, me li ti pe viz enn zom ki ti akote avek Sirkka.

Avek letan, nou ti koumans abitie ar violans ki ti ena laba. Kan nou ti trouv lafors ki nou bann frer ek ser ena pou fer fas ar sa bann sitiasion difisil la, sa ti bien ankouraz nou. Nou ti konpran ki si Zeova ti pe ed zot, Li pou ed nou osi. Anplis, nou’nn touletan swiv konsey bann ansien, nou’nn pran nou bann prekosion, ek nou’nn les leres dan lame Zeova.

Me ti ena osi bann sitiasion ki pa ti osi danzere ki nou ti panse. Par exanp, enn fwa kan mo ti kot enn dimounn, mo ti tann de madam ki ti pe maltret zot kamarad lor sime. Mo pa ti anvi al get zot. Me dimounn-la ti dir mwa vinn lor so teras, ek kan mo ti sorti deor, mo ti rann mwa kont ki se de peroke ki ti pe imit bann vwazin.

An 1997, mo ti vinn enn formater pou Lekol Formasion Ministeryel. b Mo ti bien kontan asiste bann lekol. Me zame mo ti pou panse ki enn zour mo ti pou vinn enn formater pou enn lekol.

 Apre sa, mo ti servi kouma sirveyan distrik. Me kan ti nepli ena sa servis-la, mo ti retourn dan servis sirkonskripsion. Pandan plis ki 30 an, mo’nn servi kouma formater pou bann lekol ek kouma responsab sirkonskripsion. Sa bann responsabilite-la inn fer mwa gagn boukou benediksion. Selman, li pa ti touletan fasil. Les mo explik zot kifer.

Mo ena enn karakter for, ek sa finn ed mwa pou fer fas ar boukou difikilte. Me parfwa, sa ti enn febles kan mo ti esey dres sertin sitiasion difisil dan bann lasanble. Ena fwa, mo ti ankouraz bann frer ki zot ti bizin ena lamour ek ki zot ti bizin rezonab ar lezot. Selman parfwa, momem mo pa ti pe montre sa bann kalite-la.—Rom. 7:21-23.

Akoz mo bann defo, parfwa mo ti bien dekouraze. (Rom. 7:24) Enn fwa, mo ti mem priye Zeova, ek mo ti dir Li ki li pli bon ki mo aret mo servis misioner ek ki mo retourn Finland. Me so tanto, dan renion, mo ti gagn lankourazman ki mo ti bizin pou mo kontign res dan mo servis ek pou mo fer zefor pou mo amelior momem. Ziska zordi, kan mo mazine kouma Zeova inn reponn sa lapriyer-la, sa bien ankouraz mwa. Mo ena boukou rekonesans anver Zeova, parski avek bonte Li’nn ed mwa pou travay lor mo bann defo.

Sirkka ek mwa nou bien rekonesan ki Zeova inn donn nou privilez pou servi Li pandan tou sa letan-la dan servis aplintan. Mo bien kontan osi ki Zeova inn donn mwa enn madam ki fidel ek ki ena boukou lamour.

Biento mo pou gagn 70 an, ek mo pou nepli kapav servi kouma formater ek responsab sirkonskripsion. Selman, mo pa sagrin, parski mo sir ki seki pli inportan pou Zeova, se ki nou servi Li avek modesti, nou kontan Li, nou rekonesan anver Li, ek nou loue Li ar tou nou leker. (Mish. 6:8; Mark 12:32-34) Nou pa bizin ena bann gran privilez pou donn Zeova loner.

Kan mo reflesi lor bann responsabilite ki mo ena, mo rann mwa kont ki se pa parski mo pli bon ki lezot ouswa parski mo ena bann gran-gran kapasite ki mo’nn gagn sa. Okontrer, mo’nn gagn sa bann responsabilite-la parski Zeova bon anver mwa. Li’nn donn mwa sa bann privilez-la malgre mo bann defo. Ek mo kone ki san led Zeova, zame mo pa ti pou kapav asim sa bann responsabilite-la. Wi, malgre mo bann defo, Zeova inn servi mwa pou donn Li laglwar.—2 Kor. 12:9.