1. Kouma Zeova ti organiz so bann serviter dan premie siek?

 KAN Zeova donn so bann serviter enn travay, Li anvi ki zot fer sa dan enn fason organize. (1 Kor. 14:33) Par exanp, volonte Zeova se ki bon nouvel prese partou lor later. (Mat. 24:14) Zeova inn donn Zezi responsabilite pou diriz sa travay-la, ek Zezi inn fer an-sort ki sa travay-la bien organize. Par exanp, dan premie siek, kan ti etabli bann lasanble dan diferan landrwa, ti osi etabli bann ansien pou okip sa bann lasanble-la. (Zist. 14:23) Dan Zerizalem, ti ena enn group ansien ki ti pran bann desizion pou tou bann lasanble. Ek dan sak lasanble, bann ansien sa bann lasanble-la ti fer bann frer ek ser konn sa bann desizion-la. (Zist. 15:2; 16:4) Lerla, kan bann frer ek ser ti obeir bann instriksion ki zot ti gagne, “bann lasanble ti kontign vinn for dan lafwa ek kantite bann krwayan ti pe ogmante.”—Zist. 16:5.

2. Depi 1919, kouma Zeova pe organiz so bann serviter?

² Zeova pe kontign organiz so bann serviter azordi. Depi 1919, Zezi pe servi enn ti group Kretien ki ena lesperans pou al dan lesiel, pou organiz travay predikasion ek pou donn so bann disip zot manze dan ler ki bizin. a (Lik 12:42) Li kler ki Zeova pe beni zot travay.—Iza. 60:22; 65:13, 14.

3-4. (a) Servi enn lexanp pou montre ki nou gagn bann bienfe kan nou bien organize. (b) Ki nou pou examine dan sa lartik-la?

³ Si nou pa ti bien organize, nou pa ti pou kapav fer travay ki Zezi inn donn nou. (Mat. 28:19, 20) Par exanp, si  bann frer pa ti organiz bann teritwar pou nou prese, tou dimounn ti pou pres kot li anvi. Lerla, souvan nou ti pou fer sertin teritwar, ek kitfwa ti pou ena bann teritwar ki nou pa ti pou fer zame. Nou vremem gagn bann bienfe kan nou bien organize!

⁴ Parey kouma Zezi ti organiz so bann disip kan li ti lor later, azordi osi li pe kontign organiz pep Zeova. Dan sa lartik-la, nou pou gete kouma nou lorganizasion pe swiv lexanp Zezi. Nou pou gete osi kouma nou kapav ogmant nou konfians dan lorganizasion Zeova.

NOU LORGANIZASION SWIV LEXANP ZEZI

5. Kouma nou lorganizasion swiv lexanp Zezi azordi? (Zan 8:28)

⁵ Zezi ti dir ek ti fer tou seki so Papa ti ansegn li. Nou lorganizasion swiv lexanp Zezi azordi. Kouma? Li servi Parol Bondie, Labib, pou ansegn nou, pou gid nou, ek pou ed nou fer diferans ant seki bon ek seki pa bon. (Lir Zan 8:28; 2 Tim. 3:16, 17) Se akoz sa ki bien souvan nou lorganizasion rapel nou ki nou bizin lir Labib ek met li an pratik. Ki bienfe nou gagne kan nou swiv sa konsey-la?

6. Sit enn bienfe ki nou gagne kan nou servi bann piblikasion pou etidie Labib.

⁶ Nou gagn boukou bienfe kan nou servi bann piblikasion pou etidie Labib. Kan nou fer sa, sa ed nou pou konpar bann lansegnman ki ena dan Labib ar bann instriksion ki lorganizasion donn nou. Ek kan nou trouve ki sa bann instriksion-la sorti dan Labib, sa ogmant nou konfians dan lorganizasion Zeova.—Rom. 12:2.

7. Ki mesaz Zezi ti prese, ek kouma lorganizasion Zeova swiv so lexanp?

⁷ Zezi ti pres “bon nouvel lor Rwayom Bondie.” (Lik 4:43, 44) Ek li ti osi donn so bann disip lord pou fer sa. (Lik 9:1, 2; 10:8, 9) Azordi, ninport kotsa zot reste ek ninport ki kantite responsabilite zot ena dan lorganizasion, tou bann serviter Zeova bizin pres bon nouvel lor Rwayom Bondie.

8. Ki privilez nou ena?

⁸ Se vremem enn gran privilez pou pres bon nouvel lor Rwayom Bondie! Kifer? Parski pa tou dimounn ki gagn sa privilez-la. Par exanp, kan bann demon ti pe kriye ki Zezi li Garson Bondie, Zezi “ti anpes zot koze.” (Lik 4:41) Azordi, avan ki enn kikenn gagn privilez pou pres bon nouvel, li bizin ranpli bann kondision ki bizin. Kouma nou montre ki nou apresie privilez ki nou ena pou pres bon nouvel? Se kan nou sezi tou lokazion ki nou gagne pou prese. Nou anvi swiv lexanp Zezi, ek fer nou maximum pou pres ar lezot ek pou ansegn zot laverite.—Mat. 13:3, 23; 1 Kor. 3:6.

9. Kouma nou lorganizasion inn fer bann dimounn konn nom Bondie?

⁹ Zezi ti fer bann dimounn konn nom Bondie. Dan enn lapriyer, Zezi ti dir so Papa: “Mo finn fer zot konn to nom.” (Zan 17:26) Azordi, nou lorganizasion swiv lexanp Zezi kan li fer tou seki li kapav pou fer bann dimounn konn nom Bondie. Par exanp, dan Labib Tradiksion Lemond Nouvo. Bann Lekritir Sakre, nou lorganizasion inn remet nom Bondie dan bann plas ki bizin. Sa tradiksion-la, li disponib an-antie ouswa an parti dan plis ki 270 lang. Brosir Enn Gid pou  Pli Konpran Parol Bondie, paz 1-13, explike kifer nou lorganizasion inn remet nom Bondie dan Labib. Li explike osi kifer bizin ena 237 fwa nom Bondie dan bann Lekritir Grek Kretien.

10. Ki nou kapav aprann ar lexanp enn madam ki res Miannmar?

¹⁰ Parey kouma Zezi, nou anvi ed maximum dimounn pou konn nom Bondie. Kan enn madam ki ena 67 an ek ki res Miannmar ti aprann ki Bondie ena enn nom, li ti plore. Li ti dir: “Se premie fwa dan mo lavi ki mo tande ki Bondie ena enn nom ek ki Li apel Zeova. . . . Pou mwa, samem kitsoz pli inportan ki mo’nn aprann.” Sa lexanp-la montre nou ki, kan bann dimounn aprann ki Bondie ena enn nom, sa kapav sanz zot lavi.

KONTIGN OGMANT TO KONFIANS DAN LORGANIZASION ZEOVA

11. Kouma bann ansien kapav montre ki zot ena konfians dan lorganizasion Zeova? (Get zimaz osi.)

¹¹ Kouma bann ansien kapav montre ki zot ena konfians dan lorganizasion Zeova? Zot fer sa kan zot lir bien bann instriksion ki zot gagne ek kan zot met sa an pratik. Par exanp, zot gagn bann instriksion ki montre zot kouma zot bizin fer bann size dan renion, kouma zot bizin priye pou lasanble, ek osi kouma zot bizin pran swin zot bann frer ek ser. Kan bann ansien swiv tou bann instriksion ki lorganizasion donn zot, zot bann frer ek ser santi ki Zeova kontan zot ek ki Li pran zot swin.

12. (a) Kifer nou bizin obeir ek soumet ar bann ki pe diriz nou? (Ebre 13:7, 17) (b) Kifer nou bizin res konsantre lor bann zoli kalite ki bann ansien ena?

¹² Kan bann ansien donn nou bann instriksion, nou bizin swiv sa bann instriksion-la. Kan nou fer sa, bann ansien pou kapav fer zot travay pli bien. Labib ankouraz nou pou obeir ek pou soumet ar bann ki pe diriz nou. (Lir Ebre 13:7, 17.) Selman, li pa touletan fasil pou fer sa. Kifer? Parski bann ansien zot inparfe. Ek si nou konsantre nou lor zot bann defo, olie ki nou res konsantre lor zot bann zoli kalite, se koumadir nou pe ed nou bann lennmi. Kifer nou dir sa? Parski nou bann lennmi anvi ki nou ena bann dout lor lorganizasion Zeova. Alor, si nou koumans pans bann kitsoz negatif lor bann ansien, nou pou koumans pans bann kitsoz negatif lor lorganizasion Zeova osi, ek lerla nou pou nepli ena konfians dan so lorganizasion. Aster-la, anou gete kouma nou kapav rekonet ek rezet bann mansonz ki nou bann lennmi pe fane lor lorganizasion Zeova.

PA LES LEZOT FER TWA PERDI KONFIANS DAN LORGANIZASION ZEOVA

13. Kouma bann lennmi Bondie esey fer nou trouv lorganizasion Zeova dan enn fason negatif?

¹³ Bann lennmi Bondie anvi fer nou trouv dan enn fason negatif bann bon kitsoz ki lorganizasion fer pou nou. Par exanp, Labib montre nou ki Zeova anvi ki so bann serviter res prop lor plan fizik, moral, ek spiritiel. Akoz sa, kan enn kikenn pe kontign fer enn move kitsoz ek ki li pa repanti, bizin exkli li. (1 Kor. 5:11-13; 6:9, 10) Se enn komannman ki ena dan Labib, ek nou bizin obeir li. Selman, nou bann lennmi kapav servi sa kont nou ek dir ki nou pena tolerans, ki nou kondann bann dimounn, ek ki nou pena lamour.

14. Kisann-la pe fann bann mansonz lor lorganizasion Zeova?

 ¹⁴ Nou bizin konpran kisann-la pe vremem atak nou. Se Satan ki pe fann bann mansonz lor lorganizasion Zeova. Labib dir ki li “papa bann manter.” (Zan 8:44; Zen. 3:1-5) Alor, fode pa sa etonn nou kan Satan servi bann dimounn pou fann bann mansonz lor lorganizasion. Se seki li ti fer dan premie siek osi.

15. Ki kitsoz bann sef relizie ti fer ar Zezi ek so bann disip?

¹⁵ Mem si Zezi ti parfe ek ki li ti fer bann mirak extraordiner, Satan ti servi bann dimounn pou fann bann mansonz lor li. Par exanp, bann sef relizie ti dir lepep ki Zezi ti “pe tir bann demon par mwayin sef bann demon.” (Mark 3:22) Kan Zezi ti pas devan lakour, bann sef relizie ti dir ki Zezi pa ti ena respe pou Bondie, ek zot ti ankouraz lafoul pou fer touy Zezi. (Mat. 27:20) Dan premie siek, kan bann disip Zezi ti pe pres bon nouvel, bann lennmi Bondie “ti mont latet bann dimounn” pou ki bann-la persekit sa bann Kretien-la. (Zist. 14:2, 19) Konsernan Zistwar Bann Zapot 14:2, Latour Degard 1^e Desam 1998 dir: “Bann lennmi Bondie pa ti zis rezet mesaz ki bann Kretien ti pe prese, me zot ti osi fann bann foste lor bann Kretien, pou ki bann dimounn pa ekout zot ek ena laenn pou zot.”

16. Ki nou bizin rapel kan nou tann bann mansonz lor lorganizasion Zeova?

¹⁶ Satan ankor pe fann bann mansonz azordi. Li ankor “pe met bann dimounn lor later antie dan lerer.” (Rev. 12:9) Alor, si to tann bann kitsoz negatif lor nou lorganizasion ouswa lor bann  ansien, pa bliye ki bann lennmi Bondie ti fer sa ar Zezi ek ar bann Kretien dan premie siek osi. Zezi ti dir ki bann dimounn ti pou persekit bann serviter Zeova ek ti pou dir bann foste lor zot. Se seki pe arive azordi! (Mat. 5:11, 12) Alor, kan nou tann bann mansonz lor nou lorganizasion, nou bizin rapel ki se Satan ki pe atak nou ek ki nou bizin azir deswit. Me kouma nou kapav protez nou kont bann mansonz Satan?

17. Kouma nou kapav “rezet bann fos zistwar”? (2 Timote 1:13) (Get osi lankadre “ Ki Nou Bizin Fer kan Nou Tann ‘Bann Fos Zistwar’?”)

¹⁷ Pa ekout bann mansonz ki Satan pe fane. Lapot Pol ti donn bann instriksion bien kler lor seki nou bizin fer kan nou tann bann mansonz. Li ti dir Timote pou “donn lord sertin pou pa . . . pran kont bann fos zistwar” ek pou “rezet bann fos zistwar ki dezonor Bondie.” (1 Tim. 1:3, 4; 4:7) Enn ti-baba kapav ramas enn kitsoz anba ek met sa dan so labous. Parkont, enn adilt pa pou fer sa, parski li kone ki sa kapav bien danzere pou so lasante. Dan mem fason, kan nou tann bann fos zistwar, fode pa nou ekoute parski nou kone ki se Satan ki pe fann sa bann mansonz-la. Alor, pou protez nou, nou bizin ekout zis “bann bon parol” laverite.—Lir 2 Timote 1:13.

18. Kouma nou montre ki nou ena konfians dan lorganizasion Zeova?

¹⁸ Dan sa lartik-la, nou’nn trouv zis trwa fason kouma nou lorganizasion swiv lexanp Zezi. Kan to etidie Labib, rod bann lezot fason kouma nou lorganizasion swiv lexanp Zezi. Ed lezot dan to lasanble pou ogmant zot konfians dan lorganizasion Zeova. Ek kontign montre ki to ena konfians dan nou lorganizasion kan to servi Zeova ar fidelite ek kan to swiv bann instriksion ki lorganizasion done. (Ps. 37:28) Anou touletan montre nou rekonesan pou privilez ki nou ena pou form parti bann fidel serviter Zeova.