AVAN ki sa arive, mo ti deza interese ar laverite. Mo mama ti gagn sertin magazinn ki baze lor Labib, ek sa bann magazinn-la ti bien inpresionn mwa. Mo ti sirtou kontan bann zimaz. Mo papa pa ti anvi ki mo mama koz lor seki li ti pe aprann avek mwa. Me, mo ti bien anvi kone ek mo ti poz boukou kestion, alor mo mama ti fer mo letid kan mo papa pa ti lakaz. Finalman, mwa osi mo ti desid pou vwe mo lavi ar Zeova. An 1943 mo ti pran batem dan Blackpool, an Angleterre. Mo ti ena di-z-an.

Depi sa moman-la, regilierman mwa ek mo mama nou ti sorti predikasion ansam. Sa lepok-la, nou ti servi fonograf pou prese. Zot ti gro ek lour, ek ti pez apepre 4.5 kilo. Esey imazinn mwa, enn zenn garson pe sey sarye enn fonograf koumsa!

 Mo ti anvi koumans fer pionie laz 14 an. Mo mama ti dir mwa ki avan mo ti bizin koz sa avek serviter bann frer (azordi nou apel sirveyan sirkonskripsion). Li ti konsey mwa pou aprann enn metie ki kapav ed mwa pou fer pionie. Se seki mo ti fer. Apre ki mo finn travay pandan de-z-an, mo ti demann enn lot sirveyan sirkonskripsion si mo kapav fer pionie. Li ti dir:“Al delavan!”

Alor an Avril 1949, mwa ek mo mama nou ti vann tou nou bann meb ek nou ti demenaze pou al res dan Middleton, pre ar Manchester. Nou ti koumans fer pionie laba. Apre kat mwa mo ti swazir enn konpagnon servis. Biro nasional ti propoz nou pou al dan enn kongregasion ki ti fek forme dan Irlam. Mo mama ti fer pionie avek enn ser dan enn lot kongregasion.

Dan sa nouvo kongregasion-la ti ena bien tigit frer kalifie. Akoz sa mwa ek mo konpagnon servis nou ti responsab pou diriz bann renion, mem si mo ti ena zis 17 an. Plitar, mo ti al dan kongregasion Buxton kot ti ena bien tigit proklamater ek zot ti bizin led. Sa bann lexperyans-la ti prepar mwa pou bann afektasion ki mo ti pou gagne plitar.

An 1951, mo ti ranpli form pou asiste Lekol Gilead. Apre sa, an Desam 1952, ti apel mwa pou fer servis militer. Mo ti demann pou pa fer servis militer parski mo ti enn minis relizie aplintan. Me lakour pa ti aksepte, ek ti kondann mwa pou fer sis mwa prizon. Mo ti dan prizon kan mo ti gagn mo linvitasion pou asiste 22^em klas Gilead. An Ziliet 1953, zis apre ki mo ti libere, mo ti vwayaz dan enn bato ki ti apel Georgic pou al New York.

Deswit kouma mo ti arive, mo ti asiste lasanble « La société du monde nouveau » ki ti fer an 1953. Apre sa mo ti vwayaz par trin pou al South Lansing, dan New York, kot ti pou fer lekol. Mo ti fek sorti dan prizon, alor mo ti ena bien tigit kas. Kan mo ti sorti dan trin mo ti pran enn bis pou al South  Lansing, me mo ti bizin pran 25 sou prete ar enn lot pasaze pou pey mo transpor.

Dan Lekol Gilead nou ti gagn enn formasion extraordiner pou ed nou “vinn tou kitsoz pou tou sort kalite dimounn.” (1 Korintien 9:22, NW.) Ti avoy mwa pou al servi dan Philippines ansam avek Paul Bruun ek Raymond Leach. Me nou ti bizin atann plizir mwa pou gagn nou viza. Apre nou ti vwayaz par bato pou al Rotterdam, dan Pays-Bas. Apre sa nou’nn travers lamer Méditerranée, kanal Suez, ek losean Indien pou al Malaisie ek apre sa Hong Kong. Finalman, apre 47 zour vwayaz lor lamer, nou ti ariv Manille le 19 Novam 1954.

Laba, nou ti bizin adapte nou ar enn nouvo kiltir, enn nouvo pei, ek enn nouvo lang. Erezman, o-koumansman ti met nou dan enn kongregasion dan lavil Quezon City, kot boukou dimounn ti koz Angle. Me apre sis mwa, nou ti konn zis de trwa mo an Tagalog. Sa ti pou sanze dan nou prosin afektasion.

Enn zour an Me 1955, kan nou ti ariv lakaz apre predikasion, mwa ek Frer Leach ti trouv de-trwa let ki dir ki nou pou al servi antan ki sirveyan sirkonskripsion. Mo ti ena zis 22 an, me dan sa nouvo servis-la mo ti pou aprann bann nouvo fason pou “vinn tou kitsoz pou tou sort kalite dimounn.”

Par exanp, mo ti fer mo premie diskour antan ki sirveyan sirkonskripsion dan enn vilaz andeor enn laboutik. Sa lepok-la, dan Philippines ti pe fer bann diskour piblik dan bann plas piblik! Kan mo ti vizit diferan kongregasion dan sirkonskripsion, mo ti fer diskour dan bann kiosk piblik, dan bazar, devan bann lasal piblik, lor terin basketball, dan bann zardin, ek souvan dan kwin semin. Enn zour mo pa ti reisi fer mo diskour dan enn bazar dan lavil San Pablo akoz enn gro lapli. Alor mo ti propoz bann  frer responsab pou mo fer sa diskour-la dan Lasal kot nou fer renion. Apre sa, bann frer ti demann mwa si zot kapav kont sa kouma enn renion piblik parski pa ti fer sa dan enn plas piblik!

Touletan mo ti res kot bann frer. Mem si zot lakaz ti sinp, li ti prop. Laplipar ditan mo lili ti zis enn ti nat bien fin lor enn sali an dibwa. Sel plas kot mo ti kapav begne se andeor lakaz, kot tou dimounn ti kapav trouv mwa. Alor mo ti aprann pou kouver mo lekor kan mo begne. Mo ti vwayaz par bis ek parfwa mem par bato pou al lor bann lezot lil. Pandan tou sa letan ki mo ti dan servis la, zame mo’nn aste enn loto.

Mo ti aprann lang Tagalog, mem si zame mo ti swiv enn kour. Mo ti reisi fer sa kan mo ti ekout bann frer koze dan predikasion ek dan renion. Bann frer ti anvi ed mwa pou aprann, ek mo bien rekonesan pou zot pasians ek zot bann remark bien fran.

Amezir ki letan finn pase, mo ti bizin fer ankor sanzman pou adapte akoz mo bann nouvo responsabilite. An 1956, kan Frer Nathan Knorr ti vizit nou, nou ti ena enn lasanble nasional. Mo ti gagn responsabilite pou kominik avek bann media. Mo pa ti ena okenn lexperyans dan sa domenn-la, me lezot ti ed mwa pou aprann. Mwins ki enn lane apre, nou ti ena enn lot lasanble nasional, ek mo ti sirveyan sa lasanble-la. Frer Frederick Franz ti vizit nou depi biro mondial, ek mo ti aprann boukou ar li. Kan li ti fer so diskour piblik, li ti met enn barong Tagalog, linz tradisionel bann filipin. Bann frer ek ser dan sa pei-la ti bien  kontan, ek sa ti aprann mwa pou dispoze adapte mwa ar bann dimounn.

Mo ti bizin adapte ankor kan mo ti vinn enn sirveyan distrik. Sa lepok-la nou ti montre fim Le bonheur de la société du Monde Nouveau. Preske touletan nou ti zwe sa fim-la dan bann plas piblik, alor parfwa bann insekt ti agas nou. Lalimier sa prozekter-la ti atir zot, ek zot ti tas dan prozekter. Sa ti demann boukou travay pou netway sa apre! Li pa ti fasil pou organiz sa bann levennman-la, me sa ti fer plezir pou trouv bann dimounn vini ek aprann lor Zeova so lorganizasion internasional.

Dan sertin landrwa bann pret Katolik ti met presion lor bann lotorite pou ki zot pa donn nou permi pou fer bann lasanble. Kan nou ti fer bann diskour pre ar zot bann legliz, zot ti mem sonn bann laklos dan legliz pou ki bann dimounn pa tann bann frer ki pe fer diskour. Malgre tousala, bann dimounn ti kontign aprann laverite, ek boukou dan sa bann landrwa-la pe ador Zeova azordi.

An 1959, ti demann mwa pou al servi dan biro nasional. Mo’nn aprann boukou ar bann lexperyans ki mo’nn fer laba. Apre inpe letan, ti demann mwa pou al vizit lezot pei antan ki sirveyan zonn. Dan enn parmi sa bann vwayaz-la mo ti fer konesans Janet Dumond, enn ser misioner dan Thailand. Nou ti ekrir nou kamarad bann let pandan inpe letan, apre nou ti marye. Sa fer 51 an depi ki nou pe servi Zeova ansam dan lazwa.

Mo’nn gagn lazwa pou vizit bann frer ek ser dan 33 pei. Mo bien kontan ki mo bann  premie afektasion finn ed mwa pou aprann pou adapte ar bann dimounn ki sorti diferan plas ek ena diferan kiltir! Sa bann vizit-la finn ed mwa pou konpran dan enn fason kler ki Zeova kontan tou sort kalite dimounn.​—Zistwar Bann Apot 10:34, 35.

Sa ti enn gran lazwa pou mwa ek Janet pou servi bann frer ek ser dan Philippines, ek nou pe kontign servi dan biro nasional Quezon City. Asterla ena dis fwa plis proklamater ki 60 an avan kan mo ti koumans servi laba. Mem apre sa bann lane-la, mo ankor pe bizin adapte mwa ar seki Zeova demande. Par exanp, akoz bann sanzman ki finn ena resaman dan lorganizasion, nou ankor pe bizin adapte nou.

Nou’nn fer tou seki nou kapav pou swiv bann instriksion ki Zeova done, ek sa fason viv la finn donn nou boukou lazwa. Nou’nn osi esey fer tou bann sanzman ki bizin pou ki nou kapav servi nou bann frer pli bien. Wi, tanki Zeova anvi, nou bien determine pou “vinn tou kitsoz pou tou sort kalite dimounn.”