1, 2. (a) Kifer nou trakase? (Get zimaz dan koumansman lartik.) (b) Ki nou pou examine dan sa lartik-la?

ZORDI, Satan “pe fer letour kouma enn lion feros; li pe rod kikenn pou devore.” (1 Pier 5:8; Revelasion 12:17) Akoz samem ki lavi stresan, ek mem bann serviter Bondie gagn traka. Bann serviter Bondie dan lepase osi ti konn bann moman kot zot ti trakase. Par exanp, Labib rakonte kouma Lerwa David parfwa ti gagn traka. (Psom 13:2) Lapot Pol ti “trakase pou tou bann kongregasion.” (2 Korintien 11:28, NW.) Me ki nou kapav fer kan nou deborde ar traka?

² Nou Papa ki dan lesiel ek ki ena lamour pou nou, ti ed so bann serviter dan lepase pou sirmont zot traka. Li anvi fer parey pou nou azordi. Labib donn nou sa konsey-la: “Met tou zot traka lor li, parski li pran zot swin.” (1 Pier 5:7) Me, kouma to kapav fer sa? Anou examinn kat fason. To kapav (1) priye, (2) lir ek medit lor Parol  Bondie, (3) les lespri sin Zeova ed twa, ek (4) koz lor seki to resanti avek enn kikenn ki to fer konfians. Amezir ki nou examinn sa kat fason-la, esey trouve dan ki domenn to kapav ameliore.

3. Kouma to kapav “zet to fardo lor Zeova”?

³ Premie fason ki nou kapav zet nou traka lor Zeova, se par enn lapriyer sinser. Kan to trakase, to Papa ki dan lesiel ek ki ena lamour, anvi ki to exprim to bann santiman bien profon ar Li. David ti sipliy Zeova ek ti dir Li: “A Bondie, ekout mo lapriyer.” Dan sa mem Psom-la, David ti dir osi: “Zet to fardo lor Zeova, ek Li pou soutenir twa.” (Psom 55:1, 22, NW.) Apre ki to finn fer tou seki to kapav pou regle enn problem, priye Zeova avek tou to leker. Vomie to fer sa ki to trakase. Me kouma lapriyer fonksione? Kouma sa kapav ed nou pou evit santi nou deborde ar traka?​—Psom 94:18, 19.

4. Kifer lapriyer bien inportan kan nou trakase?

⁴ Lir Filipien 4:6, 7. Kan nou priye avek tou nou leker ek nou persevere dan lapriyer, kouma Zeova reponn nou? Li kapav ed nou pou santi nou kalm ek pou evit bann panse ek bann santiman negatif. Olie ki nou trakase ek nou per, Bondie ed nou pou resanti enn gran lape dan fon noumem, enn lape ki kitfwa zame nou pa finn resanti. Boukou frer ek ser finn resanti sa lape-la. Twa osi to kapav resanti sa. “Lape Bondie” kapav ed twa pou sirmont ninport ki problem! To kapav ena enn konfians total dan promes Zeova kan Li dir: “Pa trakase, parski mo to Bondie. Mo pou fortifie twa, wi, mo pou ed twa.”​—Izai 41:10.

5. Kouma Parol Bondie kapav ed twa pou trouv lape dan fon tomem?

⁵ Enn deziem fason pou trouv lape dan fon noumem, se kan nou lir ek nou medit lor bann verse Labib. Kifer sa li inportan? Parski Labib se Parol Bondie. Ek ladan nou Kreater donn nou bann konsey ki saz ek pratik. Ninport kan to trakase, to kapav reflesi lor bann panse Bondie ek medit lor kouma so bann konsey kapav donn twa lafors. Sa pou ed twa pou sirmont, ouswa diminie, ouswa mem evit bann traka. Zeova inn montre bien kouma kan nou lir Labib sa kapav ed nou pou “pran kouraz ek vinn for” ek “pa tranble ek pa per.”​—Zozwe 1:7-9.

6. Kouma bann parol Zezi kapav ed twa?

⁶ Dan Parol Bondie, nou trouve kouma Zezi ti koz avek bann dimounn. Zot ti kontan ekout li parski so bann  parol ti konsol zot ek ti rekonfort zot, sirtou kan zot ti santi zot feb ouswa deprime. (Lir Matie 11:28-30, NW.) Zezi ti interes li ar seki lezot ti resanti. (Mark 6:30-32) Parey kouma Zezi ti promet pou ed so bann zapot ki ti vwayaz avek li, li pou ed nou osi azordi. Nou pa bizin ki li akote nou pou li fer sa. Antan ki nou Lerwa dan lesiel, Zezi pe kontign montre so lamour pou nou. Alor, kan to trakase, to kapav sir ki li pou la pou twa ek li pou ed twa dan ler ki bizin. Zezi donn nou lespwar ek kouraz, ek sa ed nou pou sirmont bann traka.​—Ebre 2:17, 18; 4:16.

7. Kouma nou gagn lespri sin Bondie?

⁷ Zezi ti promet ki nou Papa ki dan lesiel pou donn nou lespri sin kan nou demann Li. (Lik 11:10-13) Kouma sa trwaziem fason-la kapav ed nou pou diminie nou traka? Lespri sin Bondie, ouswa so lafors aktif, ed nou pou devlop bann kalite ki nou Bondie tou-pwisan ena. (Kolosien 3:10) Dan Labib, apel sa bann kalite-la “frwi lespri.” (Lir Galat 5:22, 23, NW.) Kan nou devlop sa bann bon kalite-la, nou relasion avek lezot pou ameliore, ek nou pou evit bann sitiasion ki kapav fer nou gagn traka. Anou gete kouma frwi lespri pou ed nou dan bann sitiasion presi.

8-12. Kouma frwi lespri Bondie kapav ed twa?

⁸ “Lamour, lazwa, lape.” Kan to tret lezot avek respe, to pou trouve ki to pou ena mwins traka. Kouma? Kan to montre lamour fraternel, lafeksion, ek to donn lezot loner, sa pou fer twa evit bann sitiasion ki kapav fer twa ena bann santiman negatif kouma koler, rankinn ek stres. Lerla li pou pli fasil pou prezerv lape avek lezot.​—Romin 12:10.

⁹ “Pasians, zantiyes, bonte.” Labib dir: “Vinn bon sakenn anver so prosin, ena enn gran konpasion, sakenn bizin pardonn so prosin avek tou so leker.” (Efezien 4:32, NW.) Kan nou swiv sa konsey-la, nou pou ena bann bon relasion avek lezot, ek nou pou evit bann sitiasion ki kapav fer nou gagn traka. Anplis, li pou pli fasil osi pou fer fas ar bann sitiasion ki arive parski nou inparfe.

¹⁰ “Lafwa.” Zordi, souvan nou trakase akoz larzan ek bann kitsoz materyel. (Proverb 18:11) Kouma nou kapav evit sa bann traka-la? Nou bizin swiv konsey ki lapot Pol donn nou pou ‘kontant nou avek seki nou ena.’ Enn lafwa for an Zeova pou ed nou pou ena konfians ki Li pou donn nou seki nou bizin avek amour. Li’nn fer sa promes-la: “Zame mo pa pou kit twa, ni abandonn twa.” Akoz sa, nou kapav dir kouma Pol: “[Zeova], limem mo  sekour, Mo pa pou per nanye. Ki dimounn kapav fer kont mwa?”​—Ebre 13:5, 6.

¹¹ “Douser, metriz lor noumem.” Reflesi enn kou ki kantite li pratik ek itil kan nou ena douser ek metriz lor noumem. Sa bann kalite-la pou anpes nou fer ouswa dir bann kitsoz ki pou fer nou trakase. Ek sa pou anpes nou “vinn amer anver lezot, aret fer laraz, ankoler, kriye, dir bann parol pou insilte lezot.”​—Efezien 4:31, NW.

¹² To bizin limilite pou to kapav fer konfians “lame pwisan Bondie” ek pou “met tou [to] traka lor li.” (1 Pier 5:6, 7) Si to ena limilite, Zeova pou soutenir twa ek pran twa swin. Anplis, kan to rekonet seki to kapav fer ek seki to pa kapav fer, to pa pou kont lor tomem. Lerla, to pou ena mwins traka parski to pou kont lor Zeova.​—Mika 6:8.

13. Zezi ti dir: “Zame pa trakase.” Ki li ti pe rod dir?

¹³ An Matie 6:34 (NW) (lir), Zezi donn sa konsey bien saz la: “Zame pa trakase.” Sa konsey-la kitfwa paret inposib pou nou aplike. Me ki Zezi ti pe rod dir? Nou finn aprann ki parfwa David ek Pol ti gagn traka. Zezi pa ti pe rod dir ki enn serviter Bondie zame pou gagn traka. Okontrer, Zezi ti pe ed so bann disip pou konpran ki bann traka initil, ouswa kan zot tro trakase, sa pa regle bann problem. Toulezour pou ena bann problem. Akoz sa, fode pa ki bann Kretien azout plis traka kan zot pans lor bann problem ki zot ti ena, ouswa bann problem ki pou ena dan lavenir. Kouma konsey Zezi kapav ed twa pou diminie bann traka initil?

14. Parey kouma David, kouma nou kapav diminie nou traka?

¹⁴ Parfwa bann dimounn trakase akoz bann erer ki zot inn fer dan lepase. Kitfwa zot ankor santi zot bien koupab pou seki zot finn fer, mem si plizir lane finn pase. Parfwa bann erer Lerwa David ti pez lour lor li. Li ti rekonet: “Mo leker pe soufer, mo nek plegne.” (Psom 38:3, 4, 8, 18) Dan sa sitiasion-la, David ti azir avek sazes. Li ti ena konfians ki Zeova pou ena pitie pou li ek pou pardonn li. Ek apre David  ti santi li zwaye kan li’nn kone ki Bondie ti’nn pardonn li.​—Lir Psom 32:1-3, 5, NW.

15. (a) Ki nou aprann ankor ar lexanp David? (b) Ki to kapav fer pou diminie to traka? (Get lankadre “ Sertin Fason Pratik pou Diminie Traka.”)

¹⁵ Parfwa li arive ki nou trakase pou seki pe arive asterla. Par exanp, kan David ti ekrir Psom 55, li ti pe gagn traka pou so lavi, tansion bann dimounn touy li. (Psom 55:2-5) Mem dan sa sitiasion-la, li pa ti les traka fer li perdi so konfians an Zeova. David ti sipliy Zeova pou ed li dan so bann problem. Me li ti kone osi ki li inportan ki li pa res lebra krwaze. (2 Samiel 15:30-34) To kapav aprann enn leson ar lexanp David. Olie ki to les twa deborde ar traka, fer tou seki to kapav pou regle problem-la ek fer Zeova konfians ki Li pou pran twa swin.

16. Kouma sinifikasion nom Bondie kapav fortifie to lafwa?

¹⁶ Parfwa enn Kretien kapav trakase pou bann problem ki kapav arive dan lavenir. Me to pa bizin trakase pou bann kitsoz ki pankor arive. Kifer? Parski bien souvan sa bann move kitsoz-la pa arive kouma seki nou ti pe panse. Rapel osi ki pena okenn sitiasion ki Zeova pa kapav kontrole. So nom mem vedir : “Li Fer Arive.” (Exod 3:14) Alor, nou pa bizin trakase pou lavenir, parski nom Bondie montre ki tou so bann proze konsernan bann dimounn pou realize. To kapav sir ki Bondie pou beni bann ki fidel anver Li ek Li pou ed zot pou diminie zot traka konsernan lepase, seki pe arive asterla, ek dan lavenir.

17, 18. Kouma enn bon kominikasion kapav ed twa kan to trakase?

¹⁷ Enn katriem fason pou gagn led kan to trakase, se kan to koz fran avek enn kikenn ki to fer konfians. To konzwin, enn bon kamarad, ouswa enn ansien dan kongregasion kapav ed twa pou konpran to sitiasion pli bien. Labib dir nou: “Kan enn dimounn dan gran traka, sa fer so leker lour, me enn bon parol rann li zwaye.” (Proverb 12:25) Labib dir osi ki nou bann plan pa pou reisi si nou pa demann  konsey, me “zot reisi kan ena enn kantite konseye.”​—Proverb 15:22.

¹⁸ Nou bann renion ed nou pou diminie nou bann traka. Sak semenn, to pas letan avek bann frer ek ser dan kongregasion, ki gagn to traka ek ki anvi ankouraz twa. (Ebre 10:24, 25) Kan nou “ankouraz [sakenn] nou kamarad” sa pou fer twa gagn plis lafors ek li pou pli fasil pou to sirmont ninport ki traka.​—Romin 1:12.

19. Kifer to kapav sir ki to relasion avek Bondie pou fer twa gagn plis lafors?

¹⁹ Enn ansien dan Canada ti aprann ki kantite li inportan pou zet tou so traka lor Zeova. So travay ti fer li gagn boukou stres. Li enn profeser ek enn konseye pou bann zelev. Li ena osi enn problem lasante ki fer li strese. Ki finn ed li pou gagn lafors? Dabor, li’nn fer boukou zefor pou fer so relasion avek Zeova vinn pli for. Apre, bann vre kamarad finn bien ed li dan bann moman difisil, ek li’nn koz fran ar so madam lor so bann santiman. Anplis, bann ansien ek sirveyan sirkonskripsion finn ed li pou reget so sitiasion dapre fason panse Zeova. Li finn osi get enn dokter ki’nn ed li pou konpran so maladi pli bien, ek li’nn kapav fer bann sanzman dan so program pou li gagn letan repoze ek fer lexersis. Tigit-tigit, li’nn aprann pou kontrol so sitiasion ek so bann santiman. Kan ena bann sitiasion kot li pena okenn kontrol, li kont lor Zeova pou ed li.

20. (a) Kouma nou kapav zet nou traka lor Bondie? (b) Ki nou pou examine dan prosin lartik?

²⁰ Dan sa lartik-la, nou finn aprann ki kantite li inportan pou zet nou traka lor Zeova kan nou priye Li ek kan nou lir ek medit lor so Parol. Nou finn aprann osi kifer li inportan pou les lespri sin Zeova ed nou, pou koz avek enn kikenn ki nou fer konfians, ek pou asiste bann renion. Dan prosin lartik, nou pou aprann kouma Zeova ed nou kan Li donn nou lespwar ki Li pou rekonpans nou.​—Ebre 11:6.