Non. Lediab pa ti dir Ev ki si li manz frwi ki Bondie ti defann zot manze, ki so lekor ti pou mor me ki enn parti dan li ki invizib (seki sertin azordi apel enn nam imortel) ti pou kontign viv dan enn lot plas. Atraver enn serpan, Satan ti pretann ki si Ev manz frwi pie konesans bon ek move, ‘li pa ti pou mor’ ditou. Li ti pe rod dir ki Ev ti pou kontign viv lor later, ki li ti pou ena enn pli bon lavi, enn lavi kot li pa ti pou bizin direksion Bondie.​—Zen. 2:17; 3:3-5.

Me si fos lansegnman lor nam imortel, ki bann dimounn ansegne azordi, pa finn aparet dan zardin Edenn, kan eski li finn aparet? Nou pa kone vremem. Nou kone ki tou bann fos ladorasion ti disparet dan lepok Noe. Kifer? Parski pa ti ena okenn dimounn ki ti ansegn bann fos lansegnman ki ti sape kan ti ena Deliz. Zis Noe ek so fami ki ti bann vre adorater ki ti sape.

Alor, lansegnman lor nam imortel, ki bann dimounn ansegne azordi, finn bizin aparet apre Deliz. Kouma sa lansegnman-la finn fane? Kan Bondie ti fer bann dimounn koz plizir lang dan lepok Babel, bann dimounn ti “disperse partou lor later.” (Zen. 11:8, 9) Pena dout ki zot ti amenn avek zot, sa krwayans ki bann dimounn ena enn nam imortel la. Mem si nou pa kone exakteman kan sa lansegnman-la inn vremem aparet, nou kapav sir ki li sorti kot Satan Lediab. Pena dout ki Satan, “papa bann manter” ti bien kontan kan li’nn trouv sa lansegnman-la fane partou lor later.​—Zan 8:44.