Eski to kapav reponn sa bann kestion ki baze lor bann Latour Degard 2019 la?

Ki sa promes Bondie la vedir: “Okenn zarm ki forme kont twa pa pou reisi”? (Iza. 54:17)

Nou kapav ena konfians ki Bondie pou protez nou kont “koler bann dimounn ki san pitie.” (Iza. 25:4, 5) Nou bann lennmi pa pou reisi fer nou bann ditor ki pou dire pou touletan.​—w19.01, p. 6-7.

Kouma fason ki Bondie ti azir avek bann Kananeen ek bann Izraelit rebel montre so lazistis?

Zeova ti amenn enn zizman lor bann ki ti pe pratik bann akt sexiel degoutan ek lor bann ki ti maltret bann fam ek bann zanfan san defans. Li ti beni bann ki ti fidel anver Li ek ki ti tret sakenn so kamarad avek zistis.​—w19.02, p. 22.

Ki nou bizin fer si nou trouv nou dan enn sitiasion kot se enn kikenn ki pa Temwin ki pe fer lapriyer?

Nou kapav res trankil ek montre respe. Me nou pa pou ni dir “amen” ni trap lame bann lezot dimounn pandan lapriyer-la. Nou kapav swazir pou fer nou prop lapriyer trankil.​—w19.03, p. 31.

Kifer bann agresion sexiel lor bann zanfan zot grav?

Agresion sexiel lor bann zanfan se enn pese kont viktim-la, kont lasanble, kont gouvernman, ek kont Bondie. Dan bann pei kot lalwa demann bann dimounn pou raport bann ka kot kitfwa finn ena enn agresion sexiel lor enn zanfan, bann ansien obeir sa lalwa-la.​—w19.05, p. 9-10.

Kouma to kapav renouvle to leker ek to lespri?

Bann kitsoz inportan ki to kapav fer se: Koz ar Zeova dan lapriyer. Medite avek lobzektif pou analiz tomem. Swazir to bann kamarad avek sazes.​—w19.06, p. 11.

Ki nou kapav fer depi asterla mem pou fer fas ar persekision?

Nou bizin fortifie nou relasion avek Zeova. Nou bizin ena konfians ki Li kontan nou ek ki zame Li pa pou abandonn nou. Lir Labib toulezour, ek priye regilierman. Nou bizin sir ki bann promes Rwayom Bondie pou realize. Aprann par-ker nou bann verse prefere ek bann sante ki loue Zeova.​—w19.07, p. 2-4.

Ki nou kapav fer pou ed nou fami gagn lavi sov?

Li inportan ki nou ena konsiderasion, ki nou donn enn bon lexanp, ek ki nou ena pasians ek takt.​—w19.08, p. 15-17.

Kouma eski nou gagn rekonfor, parey kouma Zezi inn promet dan Matie 11:28, NW?

Nou gagn rekonfor gras-a bann responsab ki kontan nou, bann pli bon kamarad ki ena, ek pli bon travay ki ena.​—w19.09, p. 23.

Kouma Bondie kapav donn nou dezir ek kapasite pou azir? (Fil. 2:13, NW)

Amezir ki nou lir ek medit lor so Parol, Bondie kapav donn nou lenerzi ek dezir pou fer so volonte, ek lafors pou azir. So lespri sin kapav amelior nou bann kapasite.​—w19.10, p. 21.

Ki bann letap nou bizin swiv avan ki nou pran enn desizion inportan?

Nou bizin fer bann resers aprofondi, priye pou gagn sazes, analiz nou bann mobil, fixe bann lobzektif bien presi ek nou bizin realist.​—w19.11, p. 27-29.

Kan Satan ti koz avek Ev, eski li ti rod fer Ev krwar ki li ena enn nam imortel?

Non. Satan pa ti dir Ev ki so lekor pou mor ek ki enn parti dan li pou kontign viv, me plito ki li pa pou mor ditou. Tou bann fos lansegnman ti disparet dan lepok Noe. Me sa krwayans lor nam imortel la kitfwa ti aparet avan ki Bondie dispers bann dimounn ki ti pe ranz latour Babel.​—w19.12, p. 15.