1-2. Ki lexanp Angelito montre nou?

ESKI to bann paran Temwin Zeova? Si wi, rapel ki to pa pou vinn kamarad Zeova zis parski to bann paran kamarad avek Li. Ki nou bann paran servi Bondie ouswa non, sakenn parmi nou bizin devlop so prop lamitie avek Zeova.

² Anou get lexanp enn frer ki apel Angelito. Li ti grandi dan enn fami Temwin Zeova. Me kan li ti pli zenn, li pa ti vremem santi li pros avek Bondie. Li dir: “Mo ti pe servi Zeova zis parski mo ti anvi fer kouma mo fami.” Me enn zour, Angelito ti desid pou lir Labib pli regilierman ek pou medit lor la. Li ti osi koumans priye Zeova pli souvan. Ki rezilta sa finn ena? Angelito dir: “Mo finn konpran ki sel fason pou vinn pros avek mo Papa, Zeova, se kan mo aprann konn Li par momem.” Lexanp Angelito fer nou reflesi lor sa bann kestion bien inportan la: Ki diferans ena ant konn sertin kitsoz lor Zeova ek konn Li bien? Ek kouma nou kapav vremem konn Zeova?

3. Ki diferans ena ant konn sertin kitsoz lor Zeova ek konn Li vremem?

³ Kitfwa nou panse ki nou konn Zeova parski nou konn so nom ouswa parski nou konn sertin kitsoz ki Li’nn dir ouswa fer. Me vremem konn Zeova inplik plis ki sa. Li inportan ki nou pran letan pou aprann konn Zeova ek bann  kalite extraordiner ki Li ena. Se zis kan nou fer sa ki nou pou kapav konpran kifer Li dir ek fer bann kitsoz. Sa pou ed nou pou kone si nou bann panse ek nou bann aksion pe fer Li plezir. Ek kan nou’nn kone ki Zeova anvi nou fer, nou bizin fer li.

4. Kouma bann lexanp ki ena dan Labib kapav ed nou?

⁴ Sertin dimounn kitfwa boufonn nou parski nou anvi servi Zeova, ek kitfwa zot mem persekit nou kan nou koumans asiste bann renion. Me selman, si nou fer Zeova konfians, zame Li pa pou abandonn nou. Lerla, nou pou koumans devlop enn zoli lamitie avek Bondie ki pou dire pou touletan. Me eski vremem nou kapav vinn sa kantite pros-la avek Bondie? Wi, nou kapav! Lexanp bann zom inparfe, kouma Moiz ek Lerwa David montre ki sa li posib. Amezir ki nou pou examinn seki zot inn fer, nou pou reponn sa de kestion-la: Kouma zot inn aprann konn Zeova? Ek ki nou kapav aprann ar zot lexanp?

5. Ki Moiz ti swazir pou fer?

⁵ Moiz ti swazir pou servi Bondie. Kan li ti ena apepre 40 an, Moiz ti swazir pou form parti pep Bondie, olie ki apel li “garson tifi Faraon.” (Ebre 11:24) Moiz ti abandonn enn gran pozision. Kan li ti soutenir bann Izraelit, Moiz ti kone ki Faraon ti pou bien ankoler. Faraon ti enn lerwa bien pwisan, ek bann Ezipsien ti konsider li kouma enn bondie. Sa montre lafwa solid ki Moiz ti ena. Moiz ti fer Zeova konfians, ek gras-a sa li ti ena enn bon lamitie avek Zeova toutlong so lavi.​—Prov. 3:5.

6. Ki nou kapav aprann ar lexanp Moiz?

⁶ Ki leson nou aprann? Parey kouma Moiz, nou tou nou ena enn desizion pou pran: Eski nou pou swazir pou servi Zeova ek zwenn ansam avek so pep? Kitfwa nou pou bizin fer bann sakrifis pou servi Bondie, ek kitfwa bann dimounn ki pa konn Zeova pou persekit nou. Me si nou fer nou Papa ki dan lesiel konfians, nou kapav sir ki Li pou soutenir nou.

7-8. Ki Moiz ti kontign aprann lor Zeova?

⁷ Moiz ti kontign aprann konn bann kalite Zeova ek li ti kontign fer So volonte. Par exanp, kan Zeova ti demann Moiz pou liber nasion Izrael depi Lezip, Moiz ti mank konfians an limem ek plizir fwa li ti dir Zeova ki li pa kalifie pou sa mision-la. Me Bondie ti reazir avek boukou konpasion, Li ti konpran seki Moiz ti resanti ek Li ti ed li. (Ex. 4:10-16) Gras-a led Zeova, Moiz ti reisi anons Faraon bann mesaz zizman bien pwisan. Lerla, Moiz ti trouv Zeova servi so gran pouvwar pou sap bann Izraelit ek pou detrir Faraon ek so larme dan Lamer Rouz.​—Ex. 14:26-31; Ps. 136:15.

⁸ Me apre ki Moiz ti liber bann Izraelit depi Lezip, zot ti touletan pe plengne. Lerla, Moiz ti trouv gran pasians ki Zeova ti manifeste anver sa pep ki Li ti libere la. (Ps. 78:40-43) Moiz ti osi gagn lokazion pou trouv gran limilite Zeova, parski Zeova ti aksepte pou sanz So desizion kan Moiz ti demann Li.​—Ex. 32:9-14.

9. Dapre Ebre 11:27, ki kantite Moiz ti pros avek Zeova?

⁹ Apre ki nasion Izrael ti sorti Lezip,  lamitie ki ti ena ant Moiz ek Zeova ti vinn telman solid ki koumadir Moiz ti kapav trouv so Papa ki dan lesiel. (Lir Ebre 11:27.) Labib montre ki kantite zot ti pros kan li dir: “Zeova ti koz ar Moiz fas-a-fas parey kouma enn zom koz avek enn lot.”​—Ex. 33:11.

10. Ki nou bizin fer pou konn Zeova bien?

¹⁰ Ki leson nou aprann? Pou konn Zeova bien, li pa ase ki nou zis konn so bann kalite me nou bizin osi fer so volonte. Ki volonte Zeova azordi? Li anvi ki “tou sort kalite dimounn gagn lavi sov ek gagn enn konesans exakt lor laverite.” (1 Tim. 2:3, 4, NW) Enn fason ki nou fer volonte Zeova, se kan nou ansegn lezot lor Li.

11. Kifer sa ed nou pou konn Zeova pli bien kan nou ansegn lezot lor Li?

¹¹ Souvan kan nou ansegn lezot lor Zeova, noumem nou aprann konn Li pli bien. Par exanp, nou trouv bien Zeova so konpasion kan Li gid nou ver bann dimounn ki anvi vinn so kamarad. (Zan 6:44, NW; Zist. 13:48, NW) Nou trouv osi pouvwar ki Bondie ena kan bann dimounn ki etidie Labib avek nou aret zot bann move labitid ek fer bann sanzman dan zot personalite. (Kol. 3:9, 10, NW) Nou trouv osi Bondie so pasians kan Li donn bann dimounn dan nou teritwar plizir lokazion pou aprann konn Li ek pou gagn lavi sov.​—Rom. 10:13-15.

12. Dapre Exod 33:13, ki Moiz ti demande, ek kifer?

¹² Moiz ti akord enn gran valer so lamitie avek Zeova. Zeova ti servi Moiz pou fer bann mirak extraordiner, alor Moiz ti konn Zeova bien. Me kanmem sa, Moiz ti demann Zeova pou ed li pou aprann konn Li pli bien. (Lir Exod 33:13. *) Moiz ti ena plis ki 80 an kan li ti demann sa Zeova, me li ti kone ki li ti ena ankor boukou pou aprann lor so Papa ki ranpli ar lamour.

13. Sit enn fason kouma nou montre ki nou akord enn gran valer nou lamitie avek Zeova.

¹³ Ki leson nou aprann? Mem si nou pe servi Zeova depi bien lontan, nou bizin touletan akord enn gran valer nou lamitie avek Zeova. Enn fason ki nou montre sa, se kan nou koz avek Li dan lapriyer.

14. Kouma lapriyer ed nou pou vinn pli pros ar Bondie?

¹⁴ Pou ki enn lamitie vinn for, li bien inportan ki ena enn bon kominikasion. Alor, pou ena enn bon lamitie avek Bondie, nou bizin priye Li souvan ek pa per pou dir Li seki nou panse ek resanti. (Efe. 6:18) Krista, ki res dan Turquie, dir: “Sak fwa ki mo dir Zeova seki mo resanti ek ki mo trouve kouma Li ed mwa, mo lamour pou Li ek mo konfians an Li ogmante. Kan mo trouve kouma Zeova reponn mo bann lapriyer, sa ed mwa pou trouv Li kouma enn Papa ek enn Kamarad.”

15. Kouma Zeova ti dekrir Lerwa David?

¹⁵ Lerwa David ti ne dan enn nasion ki ti ador Zeova. Me David pa ti ador Zeova parski so fami ti ador Zeova. Li ti devlop so prop lamitie avek Bondie, ek Zeova ti bien kontan li. Zeova ti dekrir David kouma enn “kikenn ki [So]  leker bien kontan.” (Zist. 13:22) Kouma eski David ti vinn sa kantite pros-la avek Zeova?

16. Ki David ti aprann lor Zeova kan li ti get kreasion?

¹⁶ David ti aprann konn Zeova kan li ti get kreasion. Kan David ti zenn, li ti pas boukou letan deor pou okip bann mouton so papa. Kitfwa se lerla mem ki li ti koumans medit lor kreasion Zeova. Par exanp, kan David ti pe get lesiel aswar li pa ti zis trouv bann milye zetwal, li ti osi trouv bann kalite sa Kikenn ki ti kree sa bann zetwal-la. Sa ti pous David pou ekrir: “Lesiel revel klerman laglwar Bondie! Travay so lame proklame par zetwal lao dan lesiel.” (Ps. 19:1, 2) Kan David ti reflesi lor fason ki Zeova ti kree bann dimounn, sa ti fer li trouv gran sazes Zeova. (Ps. 139:14) Kan David ti medit lor bann kitsoz ki Zeova inn kree, sa ti fer li konpran ki kantite li tipti konpare ar Zeova.​—Ps. 139:6.

17. Ki nou kapav aprann si nou medit lor kreasion?

¹⁷ Ki leson nou aprann? Li inportan ki nou interes nou ar kreasion. Pran letan pou admir sa zoli lemond ki Zeova inn kree la. Dan to lavi toulezour, medit lor kreasion ki ena otour twa, setadir bann plant, bann zanimo, ek bann dimounn, ek reflesi lor seki sa aprann twa lor Zeova. Si to fer sa, sak zour to pou aprann plis lor to Papa ki ena boukou lamour. (Rom. 1:20) Lerla, sak zour to pou trouv to lamour pou Li vinn pli for.

18. Dapre Psom 18, ki David ti kone?

¹⁸ David ti trouve ki Zeova ti pe ed li. Par exanp, kan David ti protez mouton so papa kont enn lion ek enn lours, li ti kone ki se Zeova ki ti ed li pou touy sa bann zanimo sovaz la. Kan li ti gagn laviktwar lor Goliat, ki ti enn zean, David ti kone ki se Zeova ki ti pe gid li. (1 Sam. 17:37) Ek kan li ti bizin sove akoz zalouzi Lerwa Sail, David ti kone ki se Zeova ki ti sap li. (Dapre not ki ena lao Ps. 18) Si David ti enn dimounn ki ti ena lorgey, kitfwa li ti pou panse ki li’nn reisi fer tousala gras-a so prop lafors. Me parski li ti ena limilite, David ti kapav trouv lame Zeova dan so lavi.​—Ps. 138:6, NW.

19. Ki nou aprann ar lexanp David?

¹⁹ Ki leson nou aprann? Fode pa nou zis demann Zeova so led. Nou bizin osi esey trouve kan ek kouma Li ed nou. Si nou ena limilite, nou pou rekonet ki nou pa kapav fer tou kitsoz par noumem ek ki se Zeova ki ed nou pou fer bann kitsoz ki nou pa kapav. Lerla, sak fwa ki nou trouv Zeova ed nou, sa pou ranforsi nou lamitie avek Li. Isaac, enn frer ki res dan Fidji ek ki’nn servi Zeova pandan plizir lane, finn fer enn lexperyans koumsa. Li dir: “Kan mo repans lor mo lavi, mo trouve kouma Zeova finn ed mwa depi ki mo’nn koumans etidie Labib ziska zordi. Asterla, mo bien pros ar Zeova.”

20. Ki nou kapav aprann ar relasion ki David ti ena avek Bondie?

²⁰ David ti imit bann kalite Zeova. Zeova inn kree nou avek kapasite pou imit so bann kalite. (Zen. 1:26) Plis nou aprann konn bann kalite Zeova, plis nou pou kapav imit Li. David ti aprann konn Zeova bien, akoz sa li ti kapav imit Zeova dan so relasion avek lezot. Anou get enn lexanp. Mem si David ti fer pese kont Zeova kan li ti komet ladilter avek  Betsabe ek ti fer touy so mari, Zeova ti swazir pou manifeste mizerikord anver li. (2 Sam. 11:1-4, 15) Kifer? Parski David ti imit Zeova ek ti ena mizerikord anver lezot. Lerwa David ti bien pros avek Zeova, akoz sa bann Izraelit ti bien kontan li. Plitar, Zeova ti osi servi li kouma enn referans pou bann lezot lerwa Izrael.​—1 Ler. 15:11; 2 Ler. 14:1-3.

21. Dapre Efezien 4:24 ek 5:1, ki rezilta nou gagne kan nou “imit” Bondie?

²¹ Ki leson nou aprann? Nou bizin “imit” Bondie. Kan nou fer sa, nou pa zis gagn bann bienfe, me nou osi aprann konn Bondie pli bien. Anplis, kan nou imit bann kalite Bondie, nou montre ki nou so bann zanfan.​—Lir Efezien 4:24, NW; * 5:1.

22-23. Ki pou arive si nou met an pratik seki nou aprann lor Zeova?

²² Kouma nou finn trouve, nou kapav aprann konn Zeova atraver so kreasion ek atraver so Parol, Labib. Dan Labib ena boukou lexanp bann serviter fidel ki nou kapav imite, kouma par exanp, Moiz ek David. Zeova inn fer so par. Asterla, nou nou bizin fer nou par ek kontign aprann plis lor Li.

²³ Nou pou touletan ena kitsoz pou aprann lor Zeova. (Ekle. 3:11) Seki pli inportan se pa ki kantite nou konn Zeova, me plito kouma nou pe servi seki nou kone lor Zeova. Si nou met an pratik seki nou aprann ek nou esey imit nou Papa ki ranpli ar lamour, Li pou kontign vinn pros ar nou. (Zak 4:8) Atraver so Parol, Zeova rasir nou ki zame Li pa pou abandonn bann ki rod Li.