1. Kouma boukou dimounn konsider travay?

KOUMA eski laplipar dimounn kot to reste konsider travay? Dan boukou pei, bann dimounn pe travay pli dir ek pe pas pli boukou letan dan zot travay. Bann dimounn ki travay plis ki bizin souvan tro okipe pou repoze, pou pas letan avek zot fami, ouswa pou kontign aprann lor Bondie. (Ekle. 2:23) Parkont, ena osi bann dimounn ki pa kontan travay ek zot tir tou kalite pretext pou pa travay.​—Prov. 26:13, 14.

2-3. Ki lexanp Zeova ek Zezi inn done konsernan travay?

² Alor ki dan sa lemond-la boukou dimounn pena enn bon fason panse lor travay, anou gete kouma Zeova ek Zezi konsider travay. Pena dout ki Zeova bien kontan travay. Se seki Zezi ti explike kan li ti dir: “Mo Papa ankor pe travay e mwa osi mo pe travay.” (Zan 5:17) Reflesi lor tou seki Zeova inn kree! Par exanp, Li’nn kree bann milye anz, zetwal, ek planet. Ena osi bann zoli kitsoz ki Li’nn kree lor later. Enn ekrivin Psom ti ena rezon kan li ti dir: “To’nn fer boukou kitsoz, O Zeova! To’nn fer tousala avek sazes. Later ranpli ar seki to’nn fer.”​—Ps. 104:24, NW.

³ Zezi ti swiv lexanp so Papa. Li ti ede kan Bondie “ti prepar lesiel.” Li ti avek Zeova “kouma enn zouvriye kalifie.” (Prov. 8:27-31) Bien apre, kan Zezi ti lor later, li ti fer enn extra bon travay. Li ti konsider so travay kouma manze ek tou seki li ti fer lor later ti montre ki se Bondie ki ti avoy li.​—Zan 4:34; 5:36; 14:10, NW.

4. Ki leson Zeova ek Zezi inn donn nou konsernan repo?

⁴ Zeova ek Zezi inn montre nou linportans pou travay dir. Me eski savedir ki nou bizin pa repoze? Non! Zeova zame fatige, alor Li pa bizin repoze. Pourtan, Labib dir ki apre ki Zeova ti kree lesiel ek later, Li “ti aret so travay ek  Li ti repoze.” (Ex. 31:17) Savedir ki Zeova ti aret kree bann kitsoz ek Li ti pran letan pou apresie seki Li ti kree. Ek mem si Zezi ti travay bien dir kan li ti lor later, li ti pran letan pou repoze ek pou manze ansam avek so bann kamarad.​—Mat. 14:13; Lik 7:34.

5. Ki difikilte boukou serviter Zeova gagne?

⁵ Labib ankouraz bann serviter Zeova pou kontan travay. Bann serviter Zeova bizin travay dir ek fode pa zot pares. (Prov. 15:19) Kitfwa to travay pou donn to fami seki zot bizin. Anplis, tou bann disip Zezi ena responsabilite pou pres bonn nouvel. Kanmem sa, to bizin osi trouv letan pou repoze. Eski parfwa to gagn difikilte pou trouv enn lekilib ant letan ki to pase dan travay, predikasion, ek pou repoze? Kouma nou pou kone komie letan nou pou pase pou travay ek komie letan pou repoze?

6. Kouma Mark 6:30-34 montre ki Zezi ti ena enn bon fason panse lor travay ek repo?

⁶ Li bien inportan ki nou ena enn bon fason panse lor travay. Zeova ti inspir Lerwa Salomon pou ekrir: “Pou tou kitsoz ena enn ler fixe.” Salomon ti explike ki ena enn ler pou plante, konstrir, plore, riye, danse, ek pou fer lezot laktivite. (Ekle. 3:1-8) Li kler ki travay ek repo se de kitsoz bien inportan dan lavi. Zezi ti ena enn bon fason panse lor travay ek repo. Enn zour, apre ki bann zapot ti retourne depi enn kanpagn predikasion, zot ti telman okipe ki “zot pa ti mem gagn letan pou manz enn bouse manze.” Zezi ti dir zot: “Vinn avek mwa dan enn landrwa trankil kot nou pou tousel; repoz zot inpe.” (Lir Mark 6:30-34.) Mem si Zezi ek so bann disip pa ti touletan reisi repoz zot kouma zot ti anvi, Zezi ti kone ki zot ti bizin repoze.

7. Kouma seki nou aprann lor Saba kapav ed nou?

⁷ Parfwa, nou vremem bizin inpe repo ouswa fer enn ti sanzman dan nou bann labitid. Bondie ti montre sa par enn dispozision ki Li ti pran pou so pep dan lepase. Sa dispozision-la se Saba ki zot ti bizin fer toule semenn. Nou nepli anba Lalwa Mozaik, selman nou kapav aprann boukou kitsoz ar lalwa lor Saba. Seki nou pou aprann ar sa lalwa-la kapav ed nou pou trouve si nou ena enn bon fason panse lor travay ek repo.

8. Dapre Exod 31:12-15, ki ti lobzektif Saba?

⁸ Labib dir ki Bondie ti aret kree bann kitsoz lor later apre sis “zour” kreasion. (Zen. 2:2) Selman, Zeova kontan travay ek Li “ankor pe travay” dan lezot fason. (Zan 5:17) Parey kouma Zeova ti repoze lor “setiem zour,” bann Izraelit ti bizin repoz zot sak setiem zour lasemenn. Zeova ti explike ki Saba ti enn sign ant Li ek bann Izraelit. Saba ti enn zour “repo total . . . , enn kitsoz sakre pou Zeova.” (Lir Exod 31:12-15. *) Personn pa ti gagn drwa travay sa zour-la, ni bann zanfan ni bann esklav, pa mem bann  zanimo domestik. (Ex. 20:10) Sa ti permet lepep pou konsantre zot plis lor bann kitsoz spiritiel.

9. Dan lepok Zezi, ki move fason panse sertin dimounn ti ena lor Saba?

⁹ Lalwa lor Saba ti fer dibien bann serviter Bondie. Selman, dan lepok Zezi, boukou sef relizie ti etabli bann reg bien strik lor fason ki bizin swiv sa lalwa-la. Zot ti mem dir ki sa li kont lalwa pou kas de-trwa lagrin sereal pou manze ouswa pou geri enn dimounn ki malad zour Saba. (Mark 2:23-27; 3:2-5) Me sa bann reg-la pa ti an-akor avek fason panse Bondie. Ek Zezi ti explik sa dan enn fason bien kler ar bann dimounn ki ti ekout li.

10. Dapre Matie 12:9-12, ki Zezi ti panse lor Saba?

¹⁰ Zezi ek so bann disip ti fer Saba parski zot ti bann Zwif ek zot ti swiv Lalwa Mozaik. * Me Zezi ti dir ek fer boukou kitsoz ki montre ki pena nanye demal pou fer bann bon aksion ek pou ed lezot pandan zour Saba. Li ti dir dan enn fason bien kler: “Lalwa li permet fer dibien zour saba.” (Lir Matie 12:9-12.) Ki Zezi ti montre par so bann aksion? Li ti montre ki ti ena enn rezon inportan kifer Bondie ti demann so pep repoze zour Saba. Sa zour-la, pep Bondie pa ti fer bann travay ki zot ti abitie fer toulezour, alor zot ti kapav konsantre zot lor zot ladorasion pou Zeova. Zezi ti grandi dan enn fami ki ti profit zour Saba pou vinn pli pros ar  Bondie. Kouma nou konn sa? Kan Zezi ti retourn Nazaret, landrwa kot li ti grandi, Labib dir nou ki li ti ‘al dan sinagog zour saba, kouma li ti abitie fer ek li ti dibout pou lir.’​—Lik 4:15-19.

11. Kisannla ti donn Zezi enn bon lexanp konsernan travay?

¹¹ Zozef ti ena mem fason panse ki Zeova lor travay. Alor li ti ansegn so garson adoptif, Zezi, kouma pou vinn enn sarpantie. (Mat. 13:55, 56) Sak zour, Zezi ti osi trouv Zozef travay bien dir pou pran swin so fami ki ti bien gran. Plitar, Zezi ti dir so bann disip: “Enn zouvrie merit so saler.” (Lik 10:7) Zezi ti kone ki savedir travay dir.

12. Sit bann verse ki montre ki bann Kretien bizin travay dir.

¹² Lapot Pol osi ti travay bien dir. Ki ti so laktivite prinsipal? Li ti fer bann dimounn konn Zezi ek so bann lansegnman. Me Pol ti osi travay pou gagn seki li ti bizin pou viv. Bann Kretien dan Tesalonik ti kone kouma “avek lapenn ek kouraz” Pol ti travay “lanwit-lizour” pou pa “met okenn fardo” lor lezot. (2 Tes. 3:8; Zist. 20:34, 35) Kitfwa Pol ti pe koz lor travay ki li ti fer antan ki enn fabrikan latant. Kan li ti dan Korint, li ti res kot Akila ek Prisil ek li ti travay ansam avek zot “parski li ti fer mem metie ki zot.” Kan Pol dir ki li ti pe travay “lanwit-lizour,” sa pa vedir ki li ti travay san arete. Parfwa li ti fer bann poz, par exanp pandan bann zour Saba. Sa zour-la bann Zwif pa ti travay, alor Pol ti profite pou pres avek zot.​—Zist. 13:14-16, 42-44; 16:13; 18:1-4.

13. Ki nou aprann ar lexanp Pol?

¹³ Lapot Pol inn donn nou enn bon lexanp. Mem si li ti bizin travay, li ti fer so best pou partisip dan “travay sakre” setadir “anons Bonn Nouvel Bondie.” (Rom. 15:16; 2 Kor. 11:23) Anplis, li ti ankouraz lezot pou fer parey. Akila ek Prisil osi ti “kolabor ar [li] dan travay ki [zot] ti fer pou Zezi Kris.” (Rom. 12:11; 16:3) Pol ti ankouraz bann Kretien dan Korint pou “kontign progrese dan travay Lesegner.” (1 Kor. 15:58; 2 Kor. 9:8) Zeova ti mem inspir Pol pou ekrir: “Kikenn ki pale travay, li bizin pa manze osi.”​—2 Tes. 3:10.

14. Ki Zezi ti pe rod dir dan Zan 14:12?

¹⁴ Travay pli inportan ki nou kapav fer pandan sa bann dernie zour-la, se prese ek fer bann disip. Zezi ti predir ki so bann disip ti pou fer bann pli gran travay ki li. (Lir Zan 14:12.) Zezi pa ti pe rod dir ki nou pou fer bann mirak parey kouma li. Okontrer, li ti pe rod dir ki so bann disip ti pou prese ek ansegne dan enn pli gran teritwar, avek pli boukou dimounn, ek pandan enn pli long peryod letan.

15. Ki kestion nou bizin poz noumem, ek kifer?

¹⁵ Si to travay, poz tomem sa bann kestion-la: ‘Eski bann dimounn konn mwa kouma enn kikenn ki travay dir? Eski mo terminn mo travay atan ek donn mo best dan seki mo fer?’ Si wi, pena dout ki to pou gagn konfians to patron. Anplis, bann dimounn ki pe obzerv twa pou plis dispoze pou ekout bonn nouvel. Asterla, konsernan prese ek ansegne, poz tomem sa bann kestion-la: ‘Eski lezot konn mwa kouma enn kikenn ki travay dir dan predikasion? Eski mo prepar bien mo bann size konversasion pou premie kontak? Eski vit-vit mo re-al get bann dimounn ki interese? Ek eski mo partisip souvan dan diferan form predikasion?’ Si wi, to pou gagn lazwa dan to minister.

16. Kouma Zezi ek so bann zapot ti konsider repo, ek kouma eski sa li diferan ar seki boukou dimounn panse azordi?

¹⁶ Zezi ti kone ki li ek so bann disip ti bizin repoze detanzantan. Selman, boukou dimounn dan so lepok ek dan nou lepok osi ena mem latitid ki sa zom ris ki Zezi ti servi dan so lexanp la. Sa zom-la ti dir ar limem: “Repoz twa, manze, bwar, diverti.” (Lik 12:19; 2 Tim. 3:4) Sa zom-la ti panse ki bann kitsoz pli inportan dan lavi se repoze ek diverti. Parkont, Zezi ek so bann zapot pa ti fer zot bann plezir personel pas an premie dan zot lavi.

17. Kouma eski nou servi nou letan lib?

¹⁷ Azordi, nou esey imit lexanp Zezi dan fason ki nou servi nou letan. Kouma? Par exanp, nou pa servi nou letan lib zis pou repoze me osi pou fer bann bon aksion kouma prese ek asiste bann renion. An realite, predikasion ek renion telman inportan pou nou ki nou fer nou maximum pou partisip regilierman dan sa bann laktivite sakre la. (Ebre 10:24, 25) Mem kan nou an vakans, ninport kotsa nou ete, nou gard nou bann bon labitid spiritiel, setadir nou asiste nou bann renion ek nou esey pres avek bann dimounn ki nou zwenn.​—2 Tim. 4:2, NW.

18. Ki kitsoz Zezi Kris anvi nou fer?

¹⁸ Nou vremem rekonesan anver nou Lerwa, Zezi Kris, ki rezonab ek ki ed nou pou ena enn bon fason panse lor travay ek repo! (Ebre 4:15) Li anvi ki nou repoz nou bien. Me li anvi osi ki nou travay dir pou nou gagn seki nou bizin pou viv ek ki nou partisip dan predikasion. Dan prosin lartik, nou pou gete seki Zezi inn fer pou liber nou ar enn form lesklavaz ki bien kriel.