ESKI to trouv twa kouma enn dimounn ki ena rekonesans? Nou tou nou bizin poz noumem sa kestion-la. Labib ti predir ki dan nou lepok, boukou dimounn ti pou “ingra.” (2 Tim. 3:2) Sirman to finn deza zwenn bann dimounn ki touletan atann ki lezot bizin fer kitsoz pou zot ouswa donn zot kitsoz. Zot donn linpresion ki li pa neseser ki zot montre rekonesans. Sirman to pou dakor ki li pa agreab pou pas letan avek sa bann kalite dimounn-la.

Parkont, Labib demann bann serviter Zeova pou “montre ki zot ena rekonesans.” (Kol. 3:15, NW) Avredir, kan nou kiltiv rekonesans, sa fer nou dibien. Anou gete kifer.

Enn rezon inportan kifer nou bizin kiltiv rekonesans, se parski sa ed nou pou santi nou bien. Kan enn dimounn remersie lezot, li ena plis sans pou santi li bien. Anplis, sa fer dibien sa dimounn ki li remersie la. Kifer kan nou ena rekonesans, sa rann nou ek lezot osi ere? Kan lezot dispoze pou fer kitsoz pou twa, eski sa pa montre ki to ena valer pou zot? Sa montre ki zot gagn to traka. Kan to trouv sa, sa fer twa santi twa bien. Kitfwa se seki Rut ti resanti. Boaz ti montre li zenere anver Rut ek pena dout ki sa ti fer Rut dibien kan li ti trouve ki enn kikenn ti gagn so traka.​—Rut 2:10-13.

Li sirtou inportan ki nou rekonesan anver Bondie. (1 Tes. 5:18, NW) Bondie finn donn nou boukou kado spiritiel ek materyel ek Li pe kontign donn nou sa. Sirman tomem to’nn gagn lokazion reflesi lor sa bann kado-la. (Det. 8:17, 18; Zist. 14:17) Me olie ki to zis reflesi lor la, pran letan pou medit lor tou bann benediksion ki Zeova finn donn twa ek bann dimounn ki to kontan. Kan to medit lor zenerozite to Kreater, sa pou ogmant to rekonesans pou Li ek pou rapel twa ki kantite Li kontan twa ek apresie twa.​—1 Zan 4:9.

Me nou bizin pa zis medit lor zenerozite Zeova, nou bizin osi remersie Li. (Ps. 100:4, 5) Enn letid finn montre ki kan nou remersie lezot, sa kontribie pou ki ena lazwa.

Enn lot rezon kifer li bon ki nou ena rekonesans se parski sa fer bann lamitie vinn pli solid. Nou tou nou bizin santi ki lezot apresie nou. Kan to remersie sinserman enn dimounn pou enn bon aksion ki li’nn fer, sa fer zot vinn pli pros. (Rom. 16:3, 4, NW) Anplis, bann dimounn ki ena rekonesans ena plis tandans pou ed lezot. Zot remarke kan lezot fer kitsoz pou zot ek sa motiv zot pou azir parey zot osi. Pena dout ki kan nou ed lezot sa rann nou ere. Parey kouma Zezi ti dir: “Ena plis benediksion kan done, ki kan resevwar.”​—Zist. 20:35.

Robert Emmons, enn profeser dan Liniversite Californie ti partisip dan enn letid lor rekonesans ek li ti dir: “Pou ki nou kapav ena rekonesans, nou bizin konpran ki nou depann lor lezot. Parfwa se nou ki done ek parfwa se nou ki gagne.” An realite, nou depann lor lezot dan plizir domenn nou lavi. Par exanp, kitfwa nou bizin depann lor lezot pou nouri nou ouswa pou okip nou kan nou malad. (1 Kor. 12:21) Enn dimounn ki ena rekonesans apresie seki lezot fer pou li. Eski twa to abitie montre rekonesans pou seki lezot fer pou twa?

Enn lot rezon pou ena rekonesans se parski sa ed nou pou konsantre lor seki pozitif. Ofet, nou servo filtre bann linformasion. Li permet nou fixe nou lespri lor sertin kitsoz ek anmemtan li blok sertin kitsoz. Enn dimounn ki ena rekonesans plis remark bann kitsoz pozitif ki bann kitsoz negatif. Plis to rekonesan, plis to pou trouv seki bon otour twa ek lerla to pou ena plis rekonesans ankor. Si to ena rekonesans pou bann bon kitsoz ki ariv twa dan lavi, sa pou ed twa pou fer seki lapot Pol ti dir: “Rezwir zot toultan dan Lesegner.”​—Fil. 4:4.

Kan to ena rekonesans, sa ed twa pou pa pans dan enn fason negatif. Apre tou, li difisil pou ena rekonesans ek anmemtan resanti zalouzi, sagrin, ouswa koler. Anplis, bann dimounn ki ena rekonesans ena mwins tandans pou vinn materyalis. Zot apresie seki zot ena ek zot pa rod plis.​—Fil. 4:12.

Antan ki Kretien, to konn bien ki Satan ti pou kontan ki to tris ek dekouraze akoz bann difikilte ki to pe gagne. Sa ti pou fer li plezir si to devlop enn move latitid ek to plengne pou tou kitsoz. Anplis, to pou gagn plis difikilte pou pres Bonn nouvel. An realite, rekonesans mars ansam avek frwi ki lespri Bondie prodir. Par exanp, kan nou trouv bann kitsoz ki Bondie finn donn nou, sa fer nou gagn lazwa ek nou ena lafwa dan so bann promes pou lavenir.​—Gal. 5:22, 23, NW.

Antan ki enn serviter Zeova, sirman to dakor avek seki sa lartik-la dir lor rekonesans. Me selman, to kone osi ki li pa touzour fasil pou res pozitif ek rekonesan. Pa les sa dekouraz twa! To kapav devlop rekonesans ek kontign manifeste sa kalite-la. Kouma? Sak zour, pran letan pou reflesi lor bann kitsoz ki pous twa pou ena rekonesans. Plis to fer sa, plis li pou pli fasil pou twa pou ena rekonesans. To pou boukou plis ere ki bann dimounn ki touletan pans lor zot bann difikilte. Pans lor bann bon kitsoz ki Bondie ek lezot fer pou ankouraz twa ek ki rann twa ere. To kapav osi gard enn karne kot sak zour to ekrir de-trwa kitsoz ki pous twa pou ena rekonesans.

Bann exper finn dekouver ki kan nou remersie lezot regilierman, sa kapav sanz fason ki nou servo fonksione ek lerla, li vinn pli fasil pou ena bann panse pozitif. Kan enn dimounn ena rekonesans, sa fer li ena plis lazwa. Alor, pans lor tou bann benediksion ki to’nn gagne, apresie bann zoli lexperyans ki to’nn fer, ek touletan montre rekonesans! Olie ki to konsider bann bon kitsoz ki to gagne kouma bann kitsoz banal, “remersie Zeova, parski Li bon.” Alor, “montre ki zot ena rekonesans.”​—1 Kro. 16:34; Kol. 3:15, NW.