LARTIK LETID 52
Paran—Form To Zanfan pou Kontan Zeova
“Enn zanfan li enn kado LESEGNER [“Zeova,” NW].”—PS. 127:3.
KANTIK 134 Bann Zanfan, enn Leritaz Bondie
REZIME *
1. Ki responsabilite Zeova inn donn bann paran?
ZEOVA ti kree premie koup avek dezir pou gagn bann zanfan. Labib dir: “Enn zanfan li enn kado LESEGNER [“Zeova,” NW].” (Ps. 127:3) Ki savedir? Fer koumadir enn bon kamarad konfie twa enn gro som larzan. Ki to pou resanti? Sirman, to pou kontan parski li fer twa konfians. Me kitfwa to pou demann tomem kouma to pou gard sa kas-la an sekirite. Zeova, nou pli bon Kamarad, inn konfie bann paran enn kitsoz ki ena boukou plis valer ki larzan. Li’nn donn bann paran responsabilite pou pran swin zot zanfan ek pou fer an-sort ki zot ere.
2. Ki bann kestion nou pou examine?
2 Kisannla bizin deside si enn koup marye pou gagn zanfan ouswa kan eski zot pou gagn zanfan? Ek ki bann paran bizin fer pou ki zot bann zanfan ere? Anou examinn de-trwa prinsip Labib ki kapav ed bann koup Kretien pou pran bann bon desizion.
RESPEKTE DESIZION KI ENN KOUP PRAN
3. (a) Kisannla bizin deside si enn koup bizin gagn zanfan? (b) Ki prinsip Labib bann kamarad ek fami enn koup marye bizin swiv?
3 Dan sertin kiltir, bann dimounn panse ki bann koup ki fek marye bizin gagn zanfan deswit apre zot maryaz. Bien souvan, se zot fami ouswa bann kamarad ki met presion lor zot pou gagn zanfan. Jethro, enn frer ki viv dan l’Asie, dir: “Dan nou lasanble, bann frer ek ser ki ena zanfan souvan ankouraz bann koup ki pena zanfan pou gagn zanfan.” Jeffrey, enn lot frer dan l’Asie, dir: “Sertin dir bann koup ki pena zanfan, ki zot pa pou ena personn pou get zot kan zot vinn vie.” Me selman, sak koup bizin deside par limem si li pou gagn zanfan ouswa non. Se zot ki bizin deside; se zot responsabilite. (Gal. 6:5) Kan enn koup fek marye, li normal ki bann kamarad ek bann fami anvi ki zot ere. Me nou tou nou bizin konpran ki se sa koup-la ki bizin deside si zot pou gagn zanfan ouswa non.—1 Tes. 4:11.
4-5. Ki de kestion bann koup bizin poz zotmem, ek kan eski zot bizin koz lor sa size-la? Explike.
4 Enn koup ki desid pou gagn zanfan bizin poz zotmem de kestion inportan: Premierman, kan eski zot anvi gagn zanfan? Deziemman, komie zanfan zot anvi gagne? Me kan eski enn koup bizin koz lor sa size-la? Ek kifer sa de kestion-la inportan?
5 Dan laplipar bann ka, li bon ki enn koup koz lor sa size-la avan ki zot marye. Kifer? Parski li bien inportan ki zot toulede ena mem fason panse lor sa size-la. Ek zot bizin examine osi si zot pre pou asim sa responsabilite-la. Sertin koup desid pou atann omwin enn an ouswa de-z-an apre zot maryaz pou gagn zanfan, parski zot kone ki sa demann boukou letan ek lenerzi pou pran swin bann zanfan. Zot pran sa desizion-la parski zot anvi pran letan ki bizin pou adapte zot ar zot lavi maryaz ek pou vinn pli pros ar zot konzwin.—Efe. 5:33.
6. Ki sertin koup finn deside pou fer akoz “bann moman difisil” ki nou pe viv?
6 Lezot koup Kretien finn swazir pou imit lexanp trwa garson Noe ek zot madam. Sa trwa koup-la pa ti gagn zanfan deswit. (Zen. 6:18; 9:18, 19; 10:1; 2 Pier 2:5) Zezi ti konpar nou lepok ar “lepok Noe,” ek pena dout ki nou pe viv dan “bann moman difisil.” (Mat. 24:37; 2 Tim. 3:1) Akoz sa, sertin koup desid pou atann avan ki zot gagn zanfan. Lerla, sa permet zot pou fer plis dan servis Zeova.
Kan zot deside si zot pou gagn zanfan ek komie zanfan zot pou gagne, bann koup ki ena matirite “kalkile komie sa pou kout” zot (Get paragraf 7) *
7. Kouma bann prinsip ki trouv dan Lik 14:28, 29 ek Proverb 21:5 kapav ed bann koup?
7 Kan zot deside si zot pou gagn zanfan ek komie zanfan zot pou gagne, bann koup ki ena matirite “pou kalkile komie sa pou kout” zot. (Lir Lik 14:28, 29.) Bann paran ki ena lexperyans dir ki pou elve bann zanfan sa pa zis kout ser, me sa demann osi boukou letan ek lenerzi. Alor, li inportan ki enn koup poz zotmem bann kestion kouma: ‘Eski nou toulede pou bizin travay pou nou kapav aste bann kitsoz ki neseser pou nou fami? Eski nou toulede dakor lor bann kitsoz ki vremem neseser pou nou fami? Si nou toulede bizin travay, kisannla pou get nou bann zanfan? Ek lerla, kisannla pou inflians zot fason panse ek zot bann aksion?’ Bann koup ki pran letan pou koz lor sa bann size-la met an pratik bann parol ki trouv dan Proverb 21:5.—Lir. *
Enn mari ki kontan so madam pou fer seki li kapav pou ed so madam (Get paragraf 8)
8. Ki bann difikilte bann koup bizin prepar zot pou fer fas, ek ki kitsoz enn mari ki kontan so madam pou fer?
8 Pou elve bann zanfan sa demann boukou letan ek lenerzi pou toulede paran. Ek si enn koup ena bann zanfan ki ena apepre mem laz, zot kapav trouv sa difisil pou donn sak zanfan latansion ki li bizin. Sertin koup ki’nn pas dan sa sitiasion-la rekonet ki ena fwa zot ti nepli kone ki pou fer. Par exanp, enn mama kapav santi li extra fatige lor plan fizik ek emosionel. Li kapav telman fatige ki li pena ase lenerzi pou etidie, priye, ek prese regilierman. Li kapav osi gagn difikilte pou swiv dan renion ek pou profit sa bann renion-la. Biensir, enn misie ki kontan so madam pou fer seki li kapav pou ed so madam okip bann zanfan, ki li dan renion ouswa dan lakaz. Par exanp, li kapav ed so madam ar bann louvraz lakaz. Li pou fer zefor pou ki sak manb lafami gagn bann bienfe gras-a enn Ladorasion an Fami ki regilie. Ek li pou organiz li pou prese ansam avek so fami souvan.
ANSEGN BANN ZANFAN POU KONTAN ZEOVA
9-10. Ki kitsoz inportan bann paran bizin fer pou ed zot zanfan?
9 Kouma bann paran kapav ed zot zanfan pou aprann kontan Zeova? Kouma zot kapav protez zot zanfan kont sa move lemond-la? Anou examinn sertin kitsoz ki bann paran kapav fer.
10 Priye pou gagn led Zeova. Anou get lexanp bann paran Sanson, Manoa ek so madam. Kan Manoa ti kone ki li ek so madam pou gagn enn zanfan, li ti sipliy Zeova pou gid zot lor fason ki zot bizin elve zot zanfan.
11. Kouma bann paran kapav imit lexanp Manoa, parey kouma nou trouve dan Ziz 13:8?
11 Nihad ek Alma, ki res dan Bosnie-Herzégovine, ti imit lexanp Manoa. Zot dir: “Parey kouma Manoa, nou osi nou ti sipliy Zeova pou gid nou pou vinn bann bon paran. Zeova ti reponn nou bann lapriyer dan diferan fason, par exanp atraver Labib, bann piblikasion, bann renion, ek bann lasanble.”—Lir Ziz 13:8. *
12. Ki lexanp Zozef ek Mari ti donn zot bann zanfan?
12 Ansegn zot par to lexanp. Mem si seki to dir inportan, seki to fer pou ena enn pli gran linflians lor to zanfan. Nou kapav sir ki Zozef ek Mari ti donn zot bann zanfan, parmi ti ena Zezi osi, enn bon lexanp. Zozef ti travay dir pou pran swin so fami. Anplis, Zozef ti aprann zot pou kontan servi Zeova. (Det. 4:9, 10) Mem si dapre Lalwa, Zozef pa ti oblize amenn so fami avek li dan Zerizalem pou selebre Pak, “toulezan” Zozef ti fer li. (Lik 2:41, 42) Dan sa lepok-la, kitfwa sertin papa ti panse ki sa ti tro difisil, ti pran tro boukou letan, ek ti kout tro ser pou ki zot fami fer sa vwayaz-la. Me Zozef ti kontan bann kitsoz spiritiel ek li ti ansegn so bann zanfan pou fer parey. Mari li, li ti konn bien bann Lekritir. Alor, pena dout ki par so bann parol ek so bann aksion, Mari ti ansegn so bann zanfan pou kontan Parol Bondie.
13. Kouma enn koup ti swiv lexanp Zozef ek Mari?
13 Nihad ek Alma, ki nou ti mansione avan, ti anvi swiv lexanp Zozef ek Mari. Kouma sa lexanp-la ti ed zot pou elve zot garson ek ansegn li pou kontan Zeova ek pou servi Li? Zot dir: “Par nou fason viv, nou ti esey montre nou garson ki nou gagn bann benediksion kan nou respekte bann prinsip Zeova.” Nihad azoute: “To bizin vinn sa kalite dimounn ki to anvi to zanfan vini la.”
14. Kifer bann paran bizin kone ar kisannla zot zanfan fer kamarad?
14 Ed to zanfan pou swazir bann bon kamarad. Toulede paran bizin kone ar kisannla zot zanfan pe fer kamarad ek ki zot zanfan pe fer. Savedir ki bann paran bizin kone ar kisannla zot zanfan pe gagn kontak lor portab ek lor bann rezo sosial. Kifer? Parski zot kamarad kapav inflians zot fason panse ek azir.—1 Kor. 15:33, NW.
15. Ki bann paran kapav aprann ar lexanp Jessie?
15 Ki bann paran kapav fer si zot pa tro konn servi enn ordinater ouswa bann laparey elektronik? Jessie, enn papa ki res Philippines, dir: “Nou ti konn bien tigit kitsoz lor bann teknolozi. Me sa pa ti anpes nou pou met nou bann zanfan angard kont bann danze ki bann laparey elektronik kapav ena.” Ek mem si Jessie pa ti tro konn servi bann laparey elektronik, li pa ti anpes so bann zanfan pou servi zot. Li dir: “Mo ti ankouraz mo bann zanfan pou servi zot laparey elektronik pou aprann enn nouvo lang, pou prepar bann renion, ek pou lir Labib toulezour.” Lor jw.org®, dan seksion « Adolescents », ena bann bon konsey lor avoy bann mesaz ek partaz bann foto lor Internet. Si to enn paran, eski to’nn lir sa bann konsey-la ek koz sa avek to zanfan? Eski to’nn get bann video Qui contrôle qui ? ek Réseaux sociaux : ne te laisse pas avoir ! * avek to bann zanfan? Sa bann zouti-la kapav bien itil pou ansegn to zanfan kouma pou servi bann laparey elektronik avek sazes.—Prov. 13:20.
16. Ki kitsoz boukou paran inn fer, ek ki rezilta sa finn ena?
16 Boukou paran pran bann dispozision pou ki zot zanfan pas letan avek bann frer ek ser ki donn enn bon lexanp dan zot servis pou Zeova. Par exanp, N’Déni ek Bomine, enn koup ki res Côte d’Ivoire, souvan ti invit responsab sirkonskripsion pou vinn res kot zot. N’Déni dir: “Sa ti ena enn bon lefe lor nou garson. Li ti koumans fer pionie ek asterla li pe servi kouma enn ranplasan responsab sirkonskripsion.” Eski twa osi to kapav pran bann dispozision koumsa pou to bann zanfan?
17-18. Apartir kan bann paran bizin koumans form zot zanfan?
17 Koumans form to zanfan depi bien boner. Plis bann paran koumans form zot zanfan depi boner, plis li bon. (Prov. 22:6) Anou get lexanp Timote. Kan li ti vinn gran, li ti akonpagn lapot Pol dan so bann vwayaz. Enis, mama Timote, ek Lois, so granmer, ti form li “depi [so] lanfans.”—2 Tim. 1:5; 3:15.
18 Enn lot koup ki res Côte d’Ivoire, Jean-Claude ek Peace, ena sis zanfan. Zot inn reisi ed zot sis zanfan pou kontan Zeova ek pou servi Li. Kouma zot inn reisi fer sa? Zot ti swiv lexanp Enis ek Lois. Zot dir: “Nou ti ansegn nou bann zanfan Parol Bondie depi ki zot bien tipti. Nou ti koumans ansegn zot deswit kouma zot inn ne.”—Det. 6:6, 7.
19. Kouma bann paran bizin ansegn zot zanfan Parol Bondie?
19 Deteronom 6:7 montre kouma bann paran bizin ansegn Parol Bondie zot zanfan. Zot bizin “kontign repet” Parol Bondie ar zot zanfan, setadir rapel zot regilierman seki Labib ansegne. Pou ki bann paran kapav fer sa, zot bizin pas letan regilierman avek zot zanfan. Parfwa, bann paran kapav dekouraze parski zot bizin repet bann mem kitsoz ar zot zanfan. Me selman, bann paran kapav trouv sa kouma enn mwayin pou ed zot zanfan konpran Parol Bondie ek met li an pratik.
Bann paran bizin kone kouma zot pou form sak zanfan (Get paragraf 20) *
20. Explike kouma to kapav aplik Psom 127:4 ar fason ki to elve to bann zanfan?
20 Konn bien to zanfan. Psom 127 konpar bann zanfan ar bann fles. (Lir Psom 127:4, NW. *) Souvan bann fles zot diferan tay ek zot fabrike ar diferan materyo. Parey, sak zanfan bien diferan. Alor, bann paran bizin kone kouma zot pou form sak zanfan. Enn koup ki res Israël inn reisi grandi zot de zanfan dan laverite. Ki finn ed zot? Zot dir: “Nou ti fer letid sak zanfan separeman.” Biensir, sak sef fami bizin deside si li neseser ek si li posib ki fer letid sak zanfan separeman.
ZEOVA POU ED TWA
21. Kouma Zeova kapav ed bann paran?
21 Parfwa, bann paran kapav trouv sa bien difisil pou ansegn zot zanfan akoz bann difikilte ki zot bizin fer fas. Me bann zanfan se enn kado ki Zeova inn donn bann paran. Zeova touletan pre pou ed bann paran. Li kontan ekout zot lapriyer. Ek Li reponn sa bann lapriyer-la par Labib, nou bann piblikasion, ek par lexanp ek konsey bann paran ki ena lexperyans.
22. Ki bann pli bon kitsoz bann paran kapav donn zot zanfan?
22 Ena dimounn dir ki sa pran 20 an pou elve enn zanfan, me bann paran zot travay zame fini. Parmi bann bon kitsoz ki bann paran kapav donn zot zanfan ena lamour, letan, ek enn ledikasion ki baze lor Labib. Sak zanfan pa reazir parey ar formasion ki li gagne. Selman, boukou zanfan ki finn elve par bann paran ki kontan Zeova ena mem santiman ki Joanna Mae, enn ser ki res l’Asie. Li dir: “Kan mo pans lor formasion ki mo bann paran inn donn mwa, mo bien rekonesan ki zot inn disiplinn mwa ek ansegn mwa pou kontan Zeova. Zot pa’nn zis donn mwa lavi, zot inn donn mwa enn lavi ki ena sans.” (Prov. 23:24, 25) Bann milyon frer ek ser ena mem santiman.
KANTIK 59 Loue Jah Ansam Avek Mwa
^ par. 5 Eski enn koup marye bizin gagn zanfan? Si enn koup desid pou gagn zanfan, komie zanfan zot bizin gagne? Ek kouma zot kapav form zot zanfan pou kontan Zeova ek pou servi Li? Dan sa lartik-la, nou pou get lexanp bann paran dan nou lepok ek nou pou osi examinn bann prinsip Labib ki pou ed nou reponn sa bann kestion-la.
^ par. 7 Proverb 21:5: “Bann plan enn kikenn ki travay dir vremem pou reisi, me tou bann ki tro prese pou azir vremem pou tom dan lamizer.”
^ par. 11 Ziz 13:8: “Manoa ti sipliy Zeova ek ti dir: ‘Pardon Zeova. To serviter ki to finn fek avoye la, silteple, fer li revinn get nou pou li donn nou bann instriksion, pou nou kone ki bizin fer konsernan sa zanfan ki pou ne la.’”
^ par. 15 Get osi Kaye Renion—Nou Lavi Kretien ek Nou Minister Zin 2018, “Bann Rezo Sosial: Evit Tom dan Bann Piez” ek Les jeunes s’interrogent. Réponses pratiques, Volim 1, sapit 36, et Volim 2, sapit 11, an Franse.
^ par. 20 Psom 127:4: “Bann garson ki enn zom gagne dan so zenes zot kouma bann fles dan lame enn zom for.”
