Lobzektif prinsipal bann verse ki trouv dan Deteronom 22:25-27 se pa pou prouve si misie-la an-tor ouswa non, parski ti deza konsider li kouma koupab. Lobzektif sa lalwa-la se sirtou pou kone si tifi-la ti inosan. Anou get kontex sa bann verse-la.

Bann verse ki ena zis avan koz lor enn misie ki ti gagn bann relasion sexiel “dan lavil” avek enn tifi ki ti deza fianse. Dan sa ka-la, misie-la ti koupab ki li’nn komet ladilter parski enn tifi ki ti fianse ti koumadir enn tifi ki ti deza marye. Me eski tifi-la osi ti koupab? “Li pa’nn kriye dan lavil.” Si li ti kriye, pena dout ki lezot dimounn ti pou tann li ek ti pou defann li. Me parski li pa’nn kriye, ti konsider li osi kouma enn kikenn ki’nn komet ladilter. Alor, dapre Lalwa toulede ti koupab.​—Det. 22:23, 24.

Apre sa, Lalwa koz lor enn lot sitiasion: “Me selman, si misie-la zwenn sa tifi ki deza fianse la dan karo ek ki li fors li pou gagn bann relasion sexiel avek li, se zis misie-la ki bizin mor. Fode pa fer tifi-la nanye. Tifi-la pa’nn fer okenn pese ki merit lamor. Sa ka-la parey kouma kan enn zom atak so prosin ek touy li. Misie-la finn zwenn sa tifi ki fianse la dan karo. Tifi-la inn kriye, me pa ti ena personn pou sap li.”​—Det. 22:25-27.

Dan sa ka-la, bann ziz ti krwar tifi-la. Kifer? Parski zot ti sipoze ki “li’nn kriye, me pa ti ena personn pou sap li.” Alor, li pa’nn komet ladilter. Parkont, misie-la ti koupab ki li’nn viol sa tifi ki ti deza fianse-la ek li’nn komet ladilter parski li ti ‘fors sa tifi-la pou gagn relasion sexiel avek li.’

Alor, mem si lobzektif sa lalwa-la ti sirtou pou kone si tifi-la ti inosan, li kler ki sa lalwa-la ti konsider misie-la kouma koupab enn viol ek enn ladilter. Nou kapav sir ki bann ziz ti fer “enn lanket aprofondi” ek ti pran enn desizion ki ti an-akor avek bann prinsip bien kler ki Bondie ti repete plizir fwa dan Lalwa.​—Det. 13:14; 17:4; Ex. 20:14.