Eski to finn lir bann nimero Latour Degard pou sa lane-la? Alor, gete si to kapav reponn sa bann kestion-la:

Kouma nou bizin tret bann Kretien ki ena lesperans pou al dan lesiel?

Nou imit zot lafwa me nou pa donn zot tro boukou latansion. Nou pa ‘admir bann dimounn.’ (Zid 16, NW) Nou pa poz zot bann kestion personel konsernan zot lesperans.​—w20.01, p. 29.

Ki kitsoz bizin konvink twa ki Zeova remark twa personelman?

Labib montre ki Li ti remark twa avan to nesans. Li ekout to bann lapriyer. Li konn to bann panse, seki ena dan to leker, ek to bann aksion ena enn lefe lor Li. (1 Kro. 28:9; Prov. 27:11) Li finn atir twa ver Li.​—w20.02, p. 12.

Kan nou bizin koze ek kan nou bizin res trankil?

Nou kontan pou koz lor Zeova. Nou koze osi kan nou trouv enn kikenn pe pran enn move semin. Bann ansien koze kan zot bizin donn enn konsey. Nou pa donn bann linformasion konsernan nou laktivite dan bann pei kot nou laktivite interdi. Nou pa revel bann linformasion konfidansiel.​—w20.03, p. 20-21.

Ki diferans ena ant bann sotrel ki trouv dan Zoel sapit 2 ek bann sotrel ki trouv dan Revelasion sapit 9?

Zoel 2:20-29 dir ki Bondie pous bann sotrel ek Li promet pou dedomaz bann dega ki zot fer. Apre sa, Bondie avoy so lespri sin. Sa profesi-la ti realize kan bann Babylonien ti atak Izrael ek sa ti realize plitar osi. Revelasion 9:1-11 dekrir bann Kretien ki ena lesperans pou al dan lesiel ki pe anons avek kouraz bann zizman Bondie kont sa move lemond-la. Bann dimounn ki soutenir sa move lemond-la bien soufer akoz sa mesaz-la.​—w20.04, p. 3-6.

Kisannla lerwa dinor azordi?

La Russie ek so bann alie. Zot inn atak pep Bondie, interdi laktivite predikasion, ek finn montre laenn anver bann Temwin. Lerwa dinor inn kontign opoz li ar lerwa disid.​—w20.05, p. 13.

Eski dan “frwi lespri” ena zis bann kalite ki mansione dan Galat 5:22, 23?

Non. Lespri sin kapav ed nou pou kiltiv bann lezot kalite koumsa lazistis. (Efe. 5:8, 9, NW)​—w20.06, p. 17.

Ki danze ena kan nou poste bann kitsoz lor nou lor bann rezo sosial?

Sa kapav donn linpresion ki nou vantar, ek ki nou pena limilite.​—w20.07, p. 6-7.

Ki kitsoz bann Kretien kapav aprann ar lexanp bann peser ki bien efikas?

Zot lapes dan moman ek dan plas kot zot kapav gagn pwason. Zot ena bann bon ekipman ek zot konn servi sa. Ek zot travay avek kouraz mem kan letan pa bon. Nou osi nou kapav fer parey dan nou minister.​—w20.09, p. 5.

Kouma nou kapav ed nou bann etidian Labib pou ogmant zot lamour pou Zeova?

Nou kapav ankouraz zot pou lir Labib toulezour ek pou medit lor seki zot lir. Ek nou kapav ansegn zot pou priye.​—w20.11, p. 4.

Dan 1 Korintien 15:22, Labib dir: “Dan Lekris tou pou gagn lavi.” Kisannla form parti ladan?

Lapot Pol pa ti pe rod dir ki tou dimounn pou resisite. Li ti pe koz lor bann Kretien ki ena lesperans pou al dan lesiel, bann ki ‘Bondie finn met apar pou Li dan linite avek Zezi Kris.’ (1 Kor. 1:2; 15:18)​—w20.12, p. 5-6.

Ki kitsoz bann Kretien ki ena lesperans pou al dan lesiel pou fer apre ki zot inn ‘sanze dan enn miliem segonn, kan tronpet final sone’?​—1 Kor. 15:51-53.

Zot pou travay ansam avek Zezi ek zot pou diriz bann nasion avek bann baton lasie. (Rev. 2:26, 27)​—w20.12, p. 12-13.