Non. Ni Labib, ni listwar pa montre ki bann Kretien ti pran batem dan plas bann dimounn ki’nn mor.

Fason ki’nn tradir sa verse-la dan boukou Labib fer sertin dimounn panse ki ti ena sa pratik-la dan lepok bann premie Kretien. Par exanp, sertin Labib dir: “Si bann mor pa resisite ditou, kifer dimoun batize dan zot plas?”

Selman, remarke seki de exper lor Labib ti dir. Enn Biblis ki apel Dr. Gregory Lockwood ti dir ki pena okenn prev dan Labib ouswa dan listwar ki montre ki enn kikenn ti pran batem dan plas enn dimounn ki’nn mor. Enn lot Biblis, Profeser Gordon D. Fee ti ekrir ki pena okenn tras dan listwar ek dan Labib ki montre ki ti ena sa kalite batem-la. Li dir ki Nouvo Testaman pa koz ditou lor la. Li dir osi ki pena okenn prev ki bann premie Kretien ouswa bann legliz ki ti forme apre lamor bann zapot, ti pratik sa kalite batem-la.

Labib dir ki bann disip Zezi ti bizin “al dan tou bann pep ki ena e fer zot vinn [so] bann disip; batiz zot. . . . Montre zot met anpratik tou seki [li] finn komann zot.” (Mat. 28:19, 20) Avan ki enn kikenn vinn enn disip, li ti bizin aprann konn Zeova ek So Garson, ena lafwa an zot ek obeir zot. Enn kikenn ki ti deza mor ek ki ti dan tom, pa ti pou kapav fer sa, ek enn lot Kretien osi pa ti pou kapav fer sa pou li.​—Ekle. 9:5, 10; Zan 4:1; 1 Kor. 1:14-16.

Alor, ki Pol ti pe rod dir?

Sertin Korintien ti dir ki bann mor pa ti pou resisite. (1 Kor. 15:12) Me Pol ti montre zot ki zot ti ena tor. Kouma? Li ti explik zot ki ‘sak zour li ti riske so lavi,’ me li ti sir ki apre so lamor, li ti pou resisite antan ki enn lespri bien pwisan, parey kouma Zezi.​—1 Kor. 15:30-32, 42-44.

Bann Korintien ti bizin konpran ki, antan ki bann Kretien ki ena lesperans pou al dan lesiel, zot ti pou gagn bann leprev sak zour ek zot ti pou bizin mor avan ki zot resisite. Alor, kan zot finn “batize dan Lekris,” zot finn osi “batize dan so lamor.” (Rom. 6:3) Savedir ki, parey kouma Zezi, zot ti pou gagn bann leprev ek zot ti pou bizin mor pou ki zot resisite.

Plis ki de-z-an apre ki Zezi ti pran batem dan delo, li ti dir de parmi so bann zapot: “Batem ki mo pou batize, zot pou batize.” (Mark 10:38, 39) Zezi pa ti pe koz lor so batem ki li ti pran dan delo. Par sa bann parol-la, Zezi ti pe rod dir ki li ti pou bizin mor akoz so fidelite anver Bondie. Pol ti explike ki bann Kretien ki ena lesperans pou al dan lesiel ti pou bizin “soufer avek Lekris” pou ki zot glorifie ansam avek li. (Rom. 8:16, 17; 2 Kor. 4:17) Alor, zot osi zot ti pou bizin mor pou ki zot kapav resisite pou al dan lesiel.

Alor, ti kapav tradir bann parol Pol koumsa: “Si bann mor pa pou resisite, alor ki pou ariv bann ki’nn batize dan lamor? Si bann mor pa pou resisite, alor kifer zot pe gagn sa kalite batem-la?”