1. Ki kapav arive kan nou santi nou dekouraze?

Sak zour, nou bizin fer fas ar bann problem ek nou fer nou maximum pou andir zot. Me li kapav bien difisil pou fer fas ar nou bann problem kan nou dekouraze. Alor, nou bizin konsider dekourazman kouma enn voler ki anvi kokin nou lazwa, nou kouraz, ek nou konfians an noumem. Proverb 24:10 dir: “Si to dekouraze zour ki maler vinn lor twa, to pou ena enn tigit lafors mem.” Wi, kan nou dekouraze, kitfwa nou santi nou feb ek li pli difisil pou nou andir nou bann problem.

2. Ki kitsoz kapav fer nou dekouraze, ek ki nou pou examine dan sa lartik-la?

² Ena plizir kitsoz ki kapav dekouraz nou, par exanp nou linperfeksion, nou bann febles ek maladi. Ouswa nou kapav dekouraze osi parski nou pa’nn gagn enn responsabilite ki nou ti anvi gagne dan servis Zeova, ouswa parski nou bizin pres dan enn teritwar kot laplipar dimounn pa interese ar nou mesaz. Dan sa lartik-la, nou pou gete ki nou kapav fer pou lit kont dekourazman.

3. Ki kitsoz kapav ed nou pou ena enn bon fason panse lor noumem akoz linperfeksion?

³ Li kapav arive ki nou ena enn move fason panse lor noumem akoz nou linperfeksion ek nou bann febles. Nou kapav panse ki akoz nou bann erer, Zeova pa pou les nou rant dan Paradi. Li bien danzere ki nou pans  koumsa. Kouma nou bizin konsider nou linperfeksion? Labib dir nou ki apart Zezi tou dimounn “fer pese.” (Rom. 3:23) Me Zeova pa konsantre Li lor nou bann erer ek Li pa atann ki nou azir dan enn fason parfe. Okontrer, Li enn Papa ki ranpli ar lamour ek ki anvi ede. Li ena pasians osi. Li kone ki boukou parmi nou pe fer zefor pou fer seki drwat ek pou ena enn bon fason panse lor noumem, ek Li dispoze ed nou pou fer sa.​—Rom. 7:18, 19.

4-5. Kouma 1 Zan 3:19, 20 ti ed de ser pou lit kont dekourazman?

⁴ Anou get lexanp Deborah ek Maria. * Kan li ti tipti, souvan Deborah so fami ti tret li dan enn move fason ek akoz sa, li ti panse ki li pa vo nanye. Bien rar zot ti felisit li. Deborah ti koumans devlop enn move fason panse lor limem. Kan li ti fer bann ti erer, li ti panse ki li ti enn lamone zete. Maria osi ti pas par mem sitiasion. So fami souvan ti rabes li. Ek akoz sa, li ti santi ki li pa vo nanye. Kan li ti vinn dan laverite, li ti mem panse ki li pa ti dign pou port nom Zeova!

⁵ Nou de ser pa ti aret servi Zeova. Kifer? Parski zot ti priye Zeova ek zot ti zet zot fardo lor Li. (Ps. 55:22) Zot ti konpran ki Zeova konn zot pase ek Li kone osi kifer zot ena sa fason panse-la lor zotmem. Anplis, Zeova trouv osi bann zoli kalite ki nou ena, mem si nou nou pa trouv zot.​—Lir 1 Zan 3:19, 20.

6. Kan enn kikenn fer mem erer, ki li bizin fer?

⁶ Li kapav arive ki enn kikenn pe fer boukou zefor pou aret fer enn move kitsoz. Me li refer mem erer ek sa dekouraz li. Li normal ki nou santi nou koupab kan nou fer enn pese. (2 Kor. 7:10) Selman, fode pa nou santi nou telman koupab ki nou kondann noumem, ek nou dir: ‘Mo pa vo nanye. Zeova zame pou pardonn mwa.’ Sa li fos, ek sa kalite panse-la kapav fer nou aret servi Zeova. Pa bliye ki Proverb 24:10 dir ki nou pou ena enn tigit lafors mem si nou dekouraze. Alor, priye Zeova, “remet bann kitsoz an-ord” avek Li, ek rod so pardon. (Iza. 1:18) Kan Zeova trouve ki to’nn vremem repanti pou seki to’nn fer ek ki to pe fer zefor pou sanze, Li pou pardonn twa. To kapav osi al get bann ansien. Avek pasians, zot pou ed twa pou regagn enn bon relasion avek Zeova.​—Zak 5:14, 15.

7. Kifer fode pa nou dekouraze si nou pe fer zefor pou lit kont nou bann febles?

⁷ Konsernan bann dimounn ki pe lit kont zot bann febles, Jean-Luc, enn  ansien ki res Lafrans, dir: “Enn dimounn ki drwat devan lizie Zeova, se pa enn dimounn ki pa fer erer zame, me se enn dimounn ki repanti pou so bann erer ek ki fer zefor pou sanze.” (Rom. 7:21-25) Alor, pa kondann tomem si to pe fer zefor pou lit kont to bann febles. Pa bliye ki nou tou nou fer erer, ek nou tou nou bizin Bondie so faver ki nou pa merite, ki Li donn nou gras-a laranson.​—Efe. 1:7; 1 Zan 4:10.

8. Kan nou dekouraze, ar kisannla nou bizin rod led?

⁸ Nou kapav kont lor nou bann frer ek ser dan lasanble pou ankouraz nou! Kan nou bizin koze, zot lamem pou ekout nou ek zot pou kapav ankouraz nou. (Prov. 12:25; 1 Tes. 5:14) Joy, enn ser ki res Nizerya ek ki finn bien soufer akoz dekourazman, dir: “Kot mo ti pou ete san mo bann frer ek ser! Lankourazman ki mo gagne ar mo bann frer ek ser, samem prev ki Zeova reponn mo bann lapriyer. Gras-a zot, mo finn mem aprann kouma pou ankouraz lezot.” Selman, nou bizin rapel ki nou bann frer ek ser pa touletan kone kan nou bizin lankourazman. Alor, kan nou bizin led, nou bizin pran linisiativ pou al get enn Kretien ki ena matirite ek ouver nou leker avek li.

9. Kouma Psom 41:3 ek 94:19 ankouraz nou?

⁹ Kont lor Zeova ek Li pou soutenir twa. Nou kapav trouv sa difisil pou pans bann kitsoz pozitif kan nou pa tro bien ouswa kan nou ena enn maladi kronik. Mem si Zeova pa pou fer enn mirak pou geri nou, Li rekonfort nou ek Li donn nou lafors ki nou bizin pou nou kapav andire. (Lir Psom 41:3; 94:19.) Par exanp, Li kapav servi enn frer ouswa enn ser, pou donn nou enn koudme ar nou louvraz lakaz ouswa pou fer bann komision pou nou. Li kapav motiv nou bann frer pou priye pou nou. Ouswa Li kapav fer nou rapel bann verse Biblik ki pou ankouraz nou, bann verse ki koz lor nou lesperans pou viv dan enn nouvo lemond kot nou pou parfe ek nou pa pou malad.​—Rom. 15:4.

10. Kifer Isang pa ti res dekouraze apre so aksidan?

¹⁰ Isang, enn frer ki res Nizerya, ti fer enn aksidan ek li ti paralize. So dokter ti dir li ki zame li pa pou kapav marse ankor. Isang dir: “Mo ti abat net ek mo ti dekouraze.” Me eski Isang ti res dekouraze? Non! Ki kitsoz ti ed li? Li dir: “Mo madam ek mwa nou ti kontign priye Zeova ek nou ti kontign etidie Labib. Nou ti osi rekonesan pou bann benediksion ki nou ti ena, parmi ena nou lesperans pou viv dan lemond nouvo.”

11. Kouma Cindy ti reisi res zwaye mem si li ti bien malad?

¹¹ Cindy, enn ser ki res Mexik, ti aprann ki li ti ena enn maladi bien grav. Kouma li ti fer pou andir sa sitiasion-la? Toulezour, kan li ti pe gagn so tretman, li ti fixe li lobzektif pou prese. Li explike: “Kan mo ti fer sa, sa ti ed mwa pou konsantre plis lor lezot olie ki mo konsantre mwa lor mo loperasion, mo soufrans, ek mo maladi. Kan mo ti pe koz avek bann dokter ek bann ners, souvan mo ti pran nouvel zot fami. Apre sa, mo ti demann zot kifer zot ti swazir enn travay difisil koumsa. Sa ti ed mwa pou kone ki size ti pou tous zot leker. Boukou ti dir mwa ki li rar ki enn pasian pran zot nouvel, ek zot ti remersie mwa ki mo gagn zot traka. Sertin ti mem donn mwa zot ladres ek zot  nimero telefonn. Mo ti kone ki Zeova ti pou ed mwa pou andir sa sitiasion difisil la. Me mo ti etone ar kantite lazwa ki Li ti donn mwa!”​—Prov. 15:15.

12-13. Kouma sertin Kretien ki malad ouswa andikape fer pou prese, ek ki rezilta sa finn ena?

¹² Nou bann frer ek ser ki malad ouswa ki andikape, kitfwa zot dekouraze parski zot pa kapav prese otan ki zot anvi. Me kanmem sa, boukou parmi zot finn trouv bann fason pou prese. Par exanp, enn ser ki apel Laurel ek ki res Letazini, ti bizin res alonze pandan 37 an dan enn masinn ki ti ed li pou respire! Li ti gagn enn kanser, li ti fer boukou gran loperasion, ek li ti gagn enn maladi lapo. Malgre so sitiasion, Laurel ti kontign prese. Li ti pres ar bann ners ek bann infirmier ki ti vinn kot li. Ki rezilta sa finn ena? Li’nn ed 17 dimounn pou aprann konn Zeova! *

¹³ Richard, enn ansien ki res Lafrans, ena enn bon lide pou bann frer ek ser ki bizin res konfine kot zot, ouswa ki res dan bann home. Li dir: “Mo ankouraz zot pou met enn ti prezantwar kot zot. Kan bann dimounn vinn vizit zot, zot pou trouv prezantwar-la ek zot pou anvi konn plis lor la. Sa kapav bien ankouraz bann frer ek ser ki nepli kapav prese lakaz-lakaz.” Bann ki konfine kot zot kapav osi prese par let ouswa par telefonn.

14. Ki bon lexanp Lerwa David inn donn nou?

¹⁴ Ena plizir rezon kifer enn kikenn pa gagn enn responsabilite ki li anvi dan so servis pou Zeova. Par exanp, kitfwa li tro vie, ouswa li ena bann problem lasante, ek ena lezot rezon ankor. Si nou dan sa sitiasion-la, lexanp Lerwa David kapav ed nou. David ti bien anvi aranz tanp Bondie, me Zeova ti swazir enn lot kikenn pou fer sa. Kanmem sa, David ti soutenir sa dimounn ki ti gagn sa responsabilite-la, ek li ti donn enn gran kantite lor ek larzan pou fer travay-la. David finn donn nou enn bon lexanp, pa vre!​—2 Sam. 7:12, 13; 1 Kro. 29:1, 3-5.

15. Kouma Hugues ti lit kont dekourazman?

¹⁵ Hugues, enn frer ki res Lafrans, ti aret servi kouma ansien akoz so lasante. Li pa ti mem kapav fer bann ti travay sinp kot li. Li dir: “O-koumansman, mo ti santi mwa initil ek sa ti bien dekouraz mwa. Me avek letan, mo ti konpran ki li inportan ki mo aksepte mo bann limit. Sa ti ed mwa pou trouv lazwa dan seki mo ti pe kapav fer pou Zeova. Mo bien determine  pou pa bes lebra. Parey kouma Zedeon ek so 300 zom, ki ti bien fatige, mo pou kontign lite!”​—Ziz 8:4.

16. Ki nou kapav aprann ar lexanp bann anz?

¹⁶ Nou kapav osi aprann ar lexanp bann anz. Pandan regn Lerwa Akab, Zeova ti demann bann anz zot lopinion lor fason ki ti kapav anbet Lerwa Akab. Plizir anz ti donn bann lide. Me Zeova ti swazir lide enn anz ek ti dir li ki so lide ti pou marse. (1 Ler. 22:19-22) Eski bann lezot anz ti dekouraze akoz sa? Eski zot ti panse ki zot ti perdi zot letan pou donn bann sigzesion? Non, zot pa ti pans koumsa. Bann anz ena limilite, ek zot anvi donn Zeova loner.​—Ziz 13:16-18; Rev. 19:10.

17. Ki nou bizin fer si nou dekouraze parski nou pa’nn gagn enn responsabilite dan servis Zeova?

¹⁷ Pli gran loner ki nou kapav ena se pou port nom Zeova ek pou pres so Rwayom. Nou kapav gagn bann responsabilite ek nou kapav perdi nou bann responsabilite, me se pa sa ki fer nou ena valer devan lizie Bondie. Se kan nou ena limilite ek modesti ki nou vremem ena valer pou Zeova ek pou nou bann frer ek ser. Alor, sipliy Zeova pou ki to kontign ena modesti ek limilite. Reflesi lor bann zoli lexanp Biblik bann serviter Zeova ki ti ena limilite. Ek fer to maximum pou servi to bann frer ek ser.​—Ps. 138:6; 1 Pier 5:5.

18-19. Kouma to kapav zwaye dan to minister mem si bann dimounn pa interese ar nou mesaz?

¹⁸ Eski parfwa to dekouraze parski to pa pe gagn bann bon rezilta dan to teritwar? Dan sa sitiasion-la, ki to kapav fer pou kontign gard ouswa ogmant to lazwa? To kapav gagn bann sigzesion pratik dan lankadre “ Kouma To Kapav Vinn Pli Efikas dan To Minister?” Li bien inportan osi ki nou ena enn bon fason panse lor nou minister. Ki sa inplike?

¹⁹ Pa bliye ki rezon prinsipal kifer nou prese se pou fer bann dimounn konn nom Bondie ek so Rwayom. Zezi ti dir ki bien tigit dimounn ti pou swiv li. (Mat. 7:13, 14) Kan nou prese, nou ena loner pou travay ansam avek Zeova, Zezi, ek bann anz. (Mat. 28:19, 20; 1 Kor. 3:9; Rev. 14:6, 7) Se Zeova ki atir bann dimounn ver Li. (Zan 6:44, NW) Alor, mem si enn dimounn pa interese ar nou mesaz asterla,  kitfwa prosenn fwa kan nou koz ar li, li pou ekoute.

20. Kouma Zeremi 20:8, 9 kapav ed nou pou lit kont dekourazman?

²⁰ Nou kapav aprann boukou ar lexanp Zeremi. Zeremi ti pres dan enn teritwar ki ti bien difisil. Bann dimounn ti insilte li ek maltret li “toutlong lazourne.” (Lir Zeremi 20:8, 9. *) Enn fwa, li ti telman dekouraze ki li ti anvi aret prese. Me kanmem sa, li ti kontign prese. Kifer? Parski “parol Zeova” ti kouma enn dife dan Zeremi ek li pa ti kapav tini li! Sa pou parey pou nou osi si nou kontign ranpli nou leker ek nou lespri ar Parol Bondie. Se enn parmi bann rezon kifer nou etidie Labib toulezour ek nou medit lor la. Lerla, nou lazwa pou kontign ogmante ek nou pou pli efikas dan nou minister.​—Zer. 15:16.

21. Kouma nou kapav gagn laviktwar lor dekourazman?

²¹ Deborah, ki nou ti mansione avan, dir: “Satan kapav servi dekourazman kouma enn zarm bien efikas kont nou.” Me Zeova pli pwisan ki Satan ek so bann zarm. Alor, kan ninport ki kitsoz dekouraz twa, sipliy Zeova ek Li pou soutenir twa. Li pou ed twa pou fer fas ar to linperfeksion ek to bann febles. Li pou soutenir twa kan to malad. Li pou ed twa pou ena enn bon fason panse lor bann responsabilite ki nou kapav gagne dan servis Zeova. Ek Li pou osi ed twa pou trouv to minister dan enn fason pozitif. Alor, priye to Papa ki dan lesiel ek dir Li exakteman seki to resanti. Avek so led, to pou kapav gagn laviktwar lor dekourazman.