1-2. Ki nou pou examine dan sa lartik-la?

PARFWA, kan nou reflesi lor kouma nou lavi li kourt ek “ranpli ar problem,” li normal ki nou santi nou dekouraze. (Zob 14:1) Boukou serviter Zeova dan lepase ti ena mem santiman. Sertin ti mem anvi mor. (1 Ler. 19:2-4; Zob 3:1-3, 11; 7:15, 16) Me Zeova ti touletan rekonfort zot ek donn zot lafors. Nou kapav aprann boukou ar zot lexanp ek sa kapav ankouraz nou.​—Rom. 15:4.

² Dan sa lartik-la, nou pou get lexanp bann serviter Zeova ki’nn andir bann sitiasion ki ti bien dekouraz zot. Par exanp, ena Zozef, garson Zakob, Noemi ek so belfi Rut, Levit ki ti ekrir Psom 73, ek lapot Pier. Kouma Zeova ti donn zot lafors? Ek ki bann leson nou kapav aprann ar zot lexanp? Repons sa bann kestion-la pou rasir nou ki “Zeova pre ar bann dimounn ki zot leker inn kase; ek Li sov bann ki dekouraze.”​—Ps. 34:18, NW.

3-4. Ki ti ariv Zozef kan li ti zenn?

³ Zozef ti ena apepre 17 an kan li ti fer de rev, ek toulede rev ti sorti kot Bondie. Sa bann rev-la ti montre ki Zozef ti pou vinn enn kikenn bien inportan ek ki so fami ti pou ena enn gran respe pou li. (Zen. 37:5-10) Me inpe apre ki Zozef ti fer sa bann rev-la, so lavi ti sanze net. Olie ki so bann frer respekte li, zot ti vann li ek li ti vinn esklav enn ofisie Ezipsien ki ti apel Potifar. (Zen. 37:21-28) Dan bien tigit letan, Zozef so lavi ti sanze enn sel kout. Li ti nepli  lakaz avek so papa ki ti bien kontan li. Li ti vinn enn esklav ki pena linportans dan Lezip, ek li ti bizin travay pou enn ofisie ki pa ti servi Zeova.​—Zen. 39:1.

⁴ Apre sa, sitiasion Zozef ti vinn pli pir ankor. Madam Potifar ti met enn fos lakizasion lor Zozef. Li ti dir ki Zozef ti pe rod viol li. Olie ki Potifar ti esey konn laverite, li ti fer met Zozef dan prizon ek bann gard ti atas li ar lasenn. (Zen. 39:14-20; Ps. 105:17, 18) Sey mazine seki Zozef ti resanti kan ti met sa fos lakizasion-la lor li. Ek reflesi osi kouma sa lakizasion-la ti kapav zet dezoner lor nom Zeova. Zozef ti ena boukou rezon pou santi li dekouraze!

5. Ki Zozef ti fer pou ki li pa dekouraze?

⁵ Kan li ti enn esklav ek kan li ti dan prizon, Zozef pa ti kapav fer nanye pou sanz so sitiasion. Kouma li’nn reisi gard enn latitid ki pozitif? Olie ki li ti res konsantre lor bann kitsoz ki li ti nepli kapav fer, li ti fer so maximum pou akonpli bann travay ki li ti bizin fer. Me pli inportan, Zozef ti konsider Zeova kouma Kikenn pli inportan dan so lavi. Ek Zeova ti beni tou seki Zozef ti fer.​—Zen. 39:21-23.

6. Kouma Zozef so bann rev ti rekonfort li?

⁶ Kitfwa sa ti rekonfort Zozef kan li ti reflesi lor bann rev ki li ti fer avan. Sa bann rev-la ti montre ki li ti pou retrouv so fami ek ki so sitiasion ti pou ameliore. Ek samem ki ti arive. Kan Zozef ti ena apepre 37 an, so bann rev ti koumans realize dan enn fason extraordiner!​—Zen. 37:7, 9, 10; 42:6, 9.

7. Dapre 1 Pier 5:10, ki kitsoz pou ed nou pou andir bann difikilte?

⁷ Ki leson nou aprann? Lexanp Zozef rapel nou ki sa lemond-la li kriel ek ki bann dimounn pou tret nou dan enn fason inzis. Mem enn konpagnon Kretien kapav  bles nou. Me si nou konsider Zeova kouma nou Fortres, nou pa pou dekouraze ouswa aret servi Li. (Ps. 62:6, 7; lir 1 Pier 5:10, NW. *) Rapel osi ki Zozef ti ena apepre 17 an kan Zeova ti fer li gagn sa bann rev-la. Alor, sa montre nou ki Zeova fer bann zenn konfians. Azordi, ena boukou zenn ki parey kouma Zozef. Zot osi zot ena lafwa an Zeova. Sertin parmi zot finn mem al dan prizon akoz zot fidelite anver Zeova.​—Ps. 110:3.

8. Ki ti ariv Noemi ek Rut?

⁸ Noemi ek so fami ti kit zot lakaz dan Zida parski ti ena enn gran lafaminn ek zot ti al etabli dan Moab kouma bann etranze. Malerezman, Noemi so mari, Elimelek, ti mor dan pei Moab, ek Noemi ti bizin okip so de garson tousel. Plitar, so de garson ti marye ar bann madam Moabit, Rut ek Orpa. Me apepre di-z-an plitar, Noemi so bann garson osi ti mor, ek zot pa ti ena zanfan. (Rut 1:1-5) Mazine ki kantite sa trwa madam-la ti bien sagrin! Biensir, Rut ek Orpa ti kapav remarye. Me selman, kisannla ti pou okip Noemi, ki ti pe vinn vie? Noemi ti telman dekouraze ki li ti dir: “Pa apel mwa Noemi. Apel mwa Mara, parski Tou-Pwisan inn rann mo lavi bien amer.” Apre tou sa bann sitiasion difisil la, Noemi ti desid pou retourn Betleem, ek Rut ti al avek li.​—Rut 1:7, 18-20.

9. Dapre Rut 1:16, 17, 22, kouma Rut ti ankouraz Noemi?

⁹ Ki kitsoz ti ed Noemi? Se lamour fidel. Par exanp, Rut ti montre lamour fidel anver Noemi kan li ti res avek li. (Lir Rut 1:16, 17, 22. *) Dan Betleem, Rut ti travay bien dir pou ramas lorz pou li ek Noemi. Akoz sa, tou dimounn ti kapav trouve ki Rut ti enn bon madam ki ti travay bien dir.​—Rut 3:11; 4:15.

10. Kouma Zeova ti montre lamour pou bann pov kouma Noemi ek Rut?

¹⁰ Zeova ti donn pep Izrael enn lalwa ki ti montre ki Li ti ena konpasion pou bann dimounn pov, kouma Noemi ek Rut. Li ti dir so pep ki fode pa zot rekolte enn karo an-antie. Zot ti bizin kit enn parti pou bann pov. (Lev. 19:9, 10) Alor, Noemi ek Rut pa ti bizin demann sarite pou gagn manze.

11-12. Kouma Noemi ek Rut ti regagn zot lazwa gras-a Boaz?

¹¹ Proprieter karo kot Rut ti pe glane ti apel Boaz, ek li ti enn zom bien ris. Li ti bien inpresione kan li ti trouve kouma Rut ti res fidel ar Noemi ek ki kantite Rut ti kontan Noemi. Plitar, Boaz ti marye ar Rut, ek li ti re-aste zot leritaz familial. (Rut 4:9-13) Boaz ek Rut ti gagn enn zanfan ki ti apel Obed, ki plitar ti vinn granper Lerwa David.​—Rut 4:17.

¹² Mazinn lazwa ki Noemi ti gagne kan li ti pran Obed dan so lebra ek ti remersie Zeova dan enn lapriyer! Me Noemi ek Rut pou pli zwaye ankor kan zot pou resisite. Kifer? Parski zot pou aprann ki  Obed ti enn anset Lemesi, setadir Zezi Kris!

13. Ki bann leson bien inportan nou kapav aprann ar lexanp Noemi ek Rut?

¹³ Ki leson nou aprann? Kan nou pas par bann sitiasion difisil, nou kapav santi nou dekouraze. Kitfwa nou panse ki pena okenn solision pou nou bann problem. Dan bann moman koumsa, nou bizin fer foul konfians nou Papa ki dan lesiel ek res pros ar nou bann frer ek ser dan lasanble. Biensir, kitfwa Zeova pa pou tir nou bann problem. Par exanp, Li pa ti resisit Noemi so mari ek so bann garson. Me Zeova pou ed nou, ek parfwa Li fer sa gras-a lamour ki nou bann frer ek ser manifeste anver nou.​—Prov. 17:17.

14. Kifer enn Levit ti bien dekouraze?

¹⁴ Ekrivin Psom 73 ti enn Levit. Alor, li ti ena privilez pou servi dan tanp Zeova. Pourtan, ti ariv enn moman dan so lavi kot li ti bien dekouraze. Kifer? Li ti koumans zalou bann move dimounn ek bann ki arogan, pa parski li ti anvi fer bann move kitsoz, me parski zot ti paret pli dan bien. (Ps. 73:2-9, 11-14, NW) Zot ti paret ena tou kitsoz, kouma larises, enn bon lavi, ek zot pa ti ena okenn traka. Kan sa Levit-la ti trouv sa, li ti bien dekouraze ek li ti dir: “Se pou nanye ki mo finn pirifie mo leker, ek ki mo lav mo lame dan linosans.” Sa sitiasion-la ti kapav fer li aret servi Zeova.

15. Dapre Psom 73:16-19, 22-25, ki ti ed enn Levit kan li ti dekouraze?

¹⁵ Lir Psom 73:16-19, 22-25. Sa Levit-la ti rant dan “Tanp” kot ti ena bann lezot serviter Bondie. Laba, li ti dan enn plas kalm kot li ti kapav reflesi ek priye lor so sitiasion. Li ti konpran ki li pa ti ena enn bon fason panse, ek ki li ti kapav perdi so lamitie avek Zeova. Li ti osi konpran ki bann move dimounn zot “lor [enn] terin glisan” ek ki “zot lafin orib.” Sa Levit-la ti bizin ena mem fason panse ki Zeova pou ki li nepli dekouraze ek zalou bann move  dimounn. Kan li ti fer sa, li ti nepli dekouraze, ek li ti ere. Li ti dir: “Si mo ena [Zeova] ki lezot mo bizin lor later?”

16. Ki leson nou kapav aprann ar enn Levit?

¹⁶ Ki leson nou aprann? Fode zame nou zalou bann dimounn ki paret dan bien. Zot ere zis pou enn tan, ek zot pa pou viv pou touletan. (Ekle. 8:12, 13) Si nou zalou zot, nou pou dekouraze ek nou kapav mem perdi nou lamitie avek Zeova. Alor, si to trouve ki to pe koumans pans parey kouma sa Levit-la, fer seki li’nn fer. Obeir bann konsey Zeova ek zwenn ansam avek bann lezot serviter Zeova. Kan to kontan Zeova plis ki tou kitsoz, to pou konn vre boner. Anplis, to pou res lor sime “vre lavi.”​—1 Tim. 6:19.

17. Kifer Pier ti dekouraze?

¹⁷ Lapot Pier ti enn kikenn bien dinamik. Me parfwa, li ti dir ek fer bann kitsoz san reflesi ki li ti regrete apre. Par exanp, kan Zezi ti dir so bann zapot ki li ti pou soufer ek mor, Pier ti repran Zezi ek ti dir li: “Sa pa pou zame ariv twa.” (Mat. 16:21-23) Zezi ti koriz Pier. Inpe apre, kan enn lafoul ti vinn aret Zezi, Pier ti azir san reflesi ek li ti koup zorey serviter gran pret. (Zan 18:10, 11) Ankor enn fwa, Zezi ti koriz Pier. Enn lot fwa, Pier ti fer vantar ek li ti dir ki mem si tou lezot zapot abandonn Zezi, li zame li pa pou fer sa! (Mat. 26:33) Me Pier pa ti sa kantite for-la. Plitar sa lanwit-la, li ti gagn per ek trwa fwa li ti dir ki li pa konn Zezi. Pier ti telman dekouraze, ki li ti “sorti deor, li [ti] al plore ar enn gro sagrin dan leker.” (Mat. 26:69-75) Sirman li ti pe demann limem si Zezi ti pou kapav pardonn li enn zour.

18. Kouma Zezi ti ed Pier kan li ti dekouraze?

¹⁸ Mem si Pier ti dekouraze, li pa ti les sa santiman-la fer li aret servi Zeova.  Apre ki li ti fer sa erer-la, li ti kontign servi Zeova avek bann lezot zapot. (Zan 21:1-3; Zist. 1:15, 16) Ki kitsoz ti ed li? Li ti rapel ki, inpe letan avan, Zezi ti priye pou ki so lafwa pa diminie, ek Zezi ti ankouraz li pou ‘retourne ek pou fortifie so bann frer.’ Zeova ti reponn lapriyer Zezi. Plitar, Zezi ti aparet ar Pier, kitfwa pou ankouraz li. (Lik 22:32, NW; 24:33, 34; 1 Kor. 15:5) Zezi ti osi aparet ar tou bann zapot apre ki zot ti lapes enn nwit ek ki zot pa ti gagn nanye. Dan sa moman-la, Zezi ti donn Pier lokazion pou dir li ki kantite li kontan li. Zezi ti pardonn so bon kamarad, ek li ti donn li plis responsabilite.​—Zan 21:15-17, NW.

19. Kouma Psom 103:13, 14 ed nou pou konn Zeova so fason panse kan nou fer enn pese?

¹⁹ Ki leson nou aprann? Fason ki Zezi ti tret Pier montre nou ki Zezi ti ena mizerikord parey kouma so Papa. Alor, kan nou fer enn erer, fode zame nou panse ki nou enn ka dezespere. Pa bliye ki se Satan ki anvi nou pans koumsa. Okontrer, nou bizin mazine ki kantite Zeova kontan nou, Li konpran nou bann limit, ek Li dispoze pou pardonn nou. Ek nou osi, nou bizin imit Zeova kan lezot fer bann kitsoz ki bles nou.​—Lir Psom 103:13, 14.

20. Ki nou pou examine dan prosin lartik?

²⁰ Lexanp Zozef, enn Levit, Pier, Noemi ek Rut rasir nou ki Zeova “pre ar bann dimounn ki zot leker inn kase.” (Ps. 34:18, NW) Li vre ki, parfwa, Li permet ki nou gagn bann leprev ek ki nou dekouraze. Me selman, kan nou andir sa bann difikilte-la avek led Zeova, nou lafwa vinn pli for. (1 Pier 1:6, 7) Dan prosin lartik, nou pou trouve kouma Zeova soutenir so bann serviter fidel ki dekouraze akoz zot linperfeksion ek bann lezot sitiasion difisil.