1. Sit enn rezon kifer Zezi ti konpar so bann disip ar bann mouton.

ZEZI ti konpar relasion ki li ena avek so bann disip, ar relasion ki enn berze ena avek so bann mouton. (Zan 10:14) Sa konparezon-la bien apropriye! Kifer? Parski bann mouton konn lavwa zot berze ek zot ekout li. Enn touris ti fer sa lexperyans-la. Li dir: “Nou ti anvi filme bann mouton ek nou ti apel zot pou zot vinn pli pre. Me zot pa ti ekout nou parski zot pa ti konn nou lavwa. Lerla, zot berze, enn ti garson, ti vini ek deswit kouma li ti apel zot, zot ti swiv li.”

2-3. (a) Kouma bann disip Zezi montre ki zot ekout so lavwa? (b) Ki nou pou examine dan sa lartik-la ek dan prosin lartik?

² Lexperyans ki sa touris-la ti fer rapel nou bann parol ki Zezi ti dir konsernan so bann mouton, setadir so bann disip. Li ti dir: “Zot pou ekout mo lavwa.” (Zan 10:16) Me Zezi, li dan lesiel. Alor, kouma nou kapav ekout li? Nou ekout li kan nou fer bann kitsoz ki li ansegn nou.​—Mat. 7:24, 25.

³ Dan sa lartik-la ek dan prosin lartik, nou pou examinn sertin lansegnman Zezi. Nou pou trouve ki Zezi inn ansegn nou ki nou bizin aret fer sertin kitsoz ek ki nou bizin fer lezot kitsoz. Pou koumanse, anou get de kitsoz ki nou bon berze inn donn nou lord pou aret fer.

4. Dapre Lik 12:29, ki kitsoz kapav fer nou “trakase”?

⁴ Lir Lik 12:29, NW. * Zezi ti ankouraz so bann disip pou “aret trakase” pou bann kitsoz materyel. Nou kone ki Zezi touletan donn bann konsey ki bien saz. Alor, nou anvi swiv so bann konsey. Me parfwa, nou kapav trouv sa difisil. Kifer?

5. Kifer sertin dimounn trakase pou bann kitsoz materyel?

 ⁵ Sertin dimounn trakase pou bann kitsoz materyel, kouma manze, linz, ek enn plas pou reste. Kitfwa zot res dan enn pei kot bann dimounn bien pov ek kot li difisil pou gagn enn travay. Kitfwa zot pa gagn ase larzan pou pran swin zot fami. Ouswa sel dimounn ki ti pe travay dan lafami inn mor, ek akoz sa, lafami gagn bann problem finans. Boukou dimounn osi inn perdi zot travay akoz pandemi COVID-19. (Ekle. 9:11) Si to pe pas par bann sitiasion koumsa, kouma to kapav obeir lord Zezi pou aret trakase?

6. Explike seki ti ariv lapot Pier pandan enn tanpet.

⁶ Enn zour, lapot Pier ek bann lezot zapot ti dan enn bato lor lamer Galile pandan enn tanpet, ek zot ti trouv Zezi pe mars lor delo. Pier ti dir: “Segner, si tomem sa, donn lord ki mo mars lor dilo.” Lerla, Zezi ti dir li: “Vini.” Pier ti sorti dan bato ek li ti “koumans mars lor dilo dan direksion Zezi.” Me remarke ki arive apre. “Letan [Pier] remark lafors divan, li gagn per e li koumans koule; li kriye, ‘Segner sov mwa!’” Lerla, Zezi ti trap li ek ti sov li. Tanki  Pier ti res konsantre lor Zezi, li ti kapav mars lor delo. Me kan li’nn koumans konsantre li lor tanpet ki ti otour li, li’nn koumans gagn per ek li’nn koumans ena bann dout. Lerla, li’nn koumans koule.​—Mat. 14:24-31.

7. Ki nou kapav aprann ar lexanp lapot Pier?

⁷ Anou gete seki nou kapav aprann ar lexanp lapot Pier. Kan Pier ti sorti lor bato pou mars lor delo, li pa ti panse ki li ti pou trakase akoz sa tanpet-la ek ki li ti pou koumans koule. Li ti anvi kontign mars lor delo ziska ki li ariv kot Zezi. Me olie ki li ti res konsantre lor Zezi, li ti koumans trakase akoz sa tanpet-la. Azordi, nou bizin ena lafwa pou andir nou bann problem, parey kouma Pier ti bizin ena lafwa pou mars lor delo. Si nou pa res konsantre lor Zeova ek so bann promes, nou lafwa pou vinn feb, ek nou pou koumans koule lor plan spiritiel. Alor, ninport ki difikilte ki nou ena dan lavi, nou bizin res konsantre lor Zeova. Nou bizin sir ki Li ena kapasite pou ed nou. Kouma nou kapav fer sa?

8. Ki kitsoz kapav ed nou pou nou aret trakase pou bann kitsoz ki nou bizin?

⁸ Olie ki nou trakase akoz nou bann problem, nou bizin ena konfians an Zeova. Fode pa nou bliye ki Zeova promet ki Li pou donn nou seki nou bizin, si nou met bann kitsoz spiritiel an premie dan nou lavi. (Mat. 6:32, 33) Zeova touletan respekte so bann promes. (Det. 8:4, 15, 16; Ps. 37:25) Si Zeova donn bann fler ek bann zwazo seki zot bizin, to kapav sir ki Li pou donn twa seki to bizin! (Mat. 6:26-30; Fil. 4:6, 7) Parey kouma bann paran donn zot zanfan seki zot bizin parski zot kontan zot zanfan, Zeova donn nou seki nou bizin parski Li kontan nou. Wi, to kapav sir ki Zeova pou pran twa swin!

9. Ki nou kapav aprann ar lexperyans ki enn koup inn fer?

⁹ Anou get enn lexperyans ki montre kouma Zeova donn so bann serviter seki zot bizin. Enn koup, ki dan servis aplintan, ti roul plis ki enn-er-tan, dan zot vie loto, pou al pran bann ser ki ti dan enn sant refiz pou amenn zot renion. Frer-la dir: “Apre renion, nou ti invit sa bann ser-la pou pran enn repa. Me apre, nou ti realize ki nou pa ti ena nanye pou donn zot.” Ki ti arive apre? Frer-la dir: “Kan nou ti ariv lakaz, nou ti trouv de gro sak ranpli ar komision devan nou laport. Nou pa kone kisannla ti amenn sa pou nou. Me Zeova ti pran nou swin.” Plitar, loto sa koup-la ti tom an-pann. Zot ti bien bizin zot loto pou prese. Selman, zot pa ti ena ase kas pou repar li. Zot ti amenn zot loto kot enn mekanisien pou kone komie sa pou kout zot. Lerla, enn misie ti rantre ek ti demande: “Pou kisannla sa loto-la?” Frer-la ti reponn ki sa ti so loto, ek ki loto-la ti bizin de-trwa reparasion. Misie-la ti reponn: “Pa fer nanye. Mo madam pe rod sa kalite loto-la ek li pe rod sa kouler lamem. Komie ou pou vann li?” Frer-la ti vann loto-la ek li ti gagn ase kas pou aste enn lot loto. Frer-la dir: “Sa zour-la, nou ti extra zwaye. Nou kone ki sa pa ti arive par azar. Zeova ti ed nou.”

10. Kouma Psom 37:5 ankouraz nou pou pa trakase pou bann kitsoz ki nou bizin?

¹⁰ Kan nou ekout nou bon berze ek nou aret trakase pou bann kitsoz materyel,  nou kapav sir ki Zeova pou donn nou seki nou bizin. (Lir Psom 37:5; 1 Pier 5:7) Reflesi lor bann difikilte ki mansione dan  paragraf 5. Ziska ler, kitfwa Zeova ti pe servi nou sef fami ouswa nou patron pou donn nou seki nou bizin toulezour. Me si nou sef fami nepli kapav donn nou seki nou bizin, ouswa si nou’nn perdi nou travay, Zeova pou trouv bann lezot fason pou donn nou seki nou bizin. Nou kapav sir ki Li pou pran nou swin. Asterla, anou get enn lot kitsoz ki nou bon berze demann nou pou aret fer.

11. Dapre Matie 7:1, 2, ki Zezi inn demann nou pou aret fer, ek kifer sa kapav bien difisil?

¹¹ Lir Matie 7:1, 2. Zezi ti kone ki bann imin inparfe, ek ki zot ena tandans pou kritik lezot. Akoz sa, li ti dir: “Pa ziz lezot.” Kitfwa nou fer boukou zefor pou nou pa ziz nou bann konpagnon Kretien. Selman, nou tou nou inparfe. Alor, si parfwa nou trouv sa difisil pou pa kritik lezot, ki nou bizin fer? Ekout Zezi, ek fer zefor pou pa ziz lezot.

12-13. Kouma lexanp Zeova kapav ed nou pou pa ziz lezot?

¹² Nou pou gagn bann bienfe kan nou medit lor lexanp Zeova. Zeova res konsantre lor bann zoli kalite ki bann dimounn ena. Nou trouv sa dan fason ki Li ti azir ar Lerwa David, enn zom ki ti fer bann pese bien grav. David ti komet limoralite sexiel avek Betsabe, ek li ti mem fer touy so mari. (2 Sam. 11:2-4, 14, 15, 24) Akoz seki li ti fer, David ek so fami, ek so bann lezot madam osi, ti bien soufer. (2 Sam. 12:10, 11) Apre sa, David ti montre ki li pa ti ena ase konfians an Zeova, kan li ti fer kont bann zom ki ti ena dan larme Izrael, alor ki Zeova pa ti demann li fer sa. Kitfwa David ti fer sa parski li ti fier ki li ti ena enn gran larme ek li ti ena konfians dan so bann zom. Ki ti arive akoz sa? Apepre 70,000 Izraelit ti mor akoz enn lepidemi!​—2 Sam. 24:1-4, 10-15.

¹³ Si to ti viv dan Izrael sa lepok-la, ki to ti pou panse lor lerwa David? Eski to ti pou panse ki li pa merit pardon Zeova? Zeova pa ti pans koumsa. Zeova ti kone ki David ti fidel anver Li toutlong so lavi, ek Li ti kone osi ki David ti repanti pou so bann pese. Akoz sa, Zeova ti pardonn David. Zeova ti kone ki David ti bien kontan Li ek ki li ti anvi fer seki bon. Nou bien rekonesan ki Zeova konsantre Li lor bann zoli kalite ki nou ena, pa vre?​—1 Ler. 9:4; 1 Kro. 29:10, 17.

14. Ki kitsoz kapav ed bann Kretien pou pa ziz lezot?

¹⁴ Zeova pa atann ki nou parfe. Alor, nou osi fode pa nou atann ki lezot parfe. Nou bizin rod bann zoli kalite ki zot ena. Li bien fasil pou trouv defo lezot ek pou kritik zot. Selman, enn kikenn ki spiritiel pou kontign ena enn bon lamitie avek lezot, mem si li trouv zot bann defo. Dan so leta natirel, kitfwa enn diaman pa tro zoli. Selman, enn kikenn ki ena sazes, li kone ki sa diaman-la pou ena valer ek ki li pou vinn bien zoli, apre ki’nn tay li ek poli li. Parey kouma Zeova ek Zezi, fode pa nou konsantre nou lor defo lezot, me plito lor bann zoli kalite ki zot ena.

15. Kan nou reflesi lor sitiasion bann dimounn, kouma sa kapav ed nou pou pa ziz zot?

¹⁵ Anplis ki nou rod bann zoli kalite ki lezot ena, ki kitsoz kapav ed nou pou  pa ziz zot? Esey reflesi lor zot sitiasion. Anou pran enn lexanp. Enn zour, kan Zezi ti dan tanp, li ti trouv enn vev bien mizer met de pies ki pena boukou valer dan bwat kontribision. Zezi pa ti dir: “Kifer li pa’nn met plis?” Olie ki li ti konsantre li lor kantite kas ki sa vev-la ti mete, Zezi ti reflesi lor motivasion ek sitiasion sa vev-la, ek li ti bien kontan parski sa vev-la ti fer so maximum.​—Lik 21:1-4.

16. Ki nou kapav aprann ar lexanp Veronica?

¹⁶ Anou get lexanp enn ser ki apel Veronica. So lexanp pou montre nou kifer li inportan ki nou reflesi lor sitiasion bann dimounn. Dan lasanble kot li ti ete, ti ena enn ser ki ti pe elve so garson tousel. Veronica dir: “Mo pa ti trouv zot souvan dan renion ek predikasion. Akoz sa, mo ti ena enn move lopinion lor zot. Me enn zour, mo ti pres ansam avek mama-la. Li ti rakont mwa bann difikilte ki li gagne avek so garson ki otis. Li ti fer so maximum pou okip so fami ek pou gard enn bon relasion avek Zeova. Ek parfwa, akoz lasante so garson, li ti asiste renion dan enn lot lasanble.” Alafin, Veronica dir: “Mo pa ti realize ki kantite difikilte sa ser-la ti ena. Asterla, mo bien apresie sa ser-la ek mo ena boukou respe pou li, parski li fer tou seki li kapav pou servi Zeova.”

17. Dapre Zak 2:8, ki nou bizin fer, ek kouma nou kapav fer sa?

 ¹⁷ Ki nou bizin fer si nou realize ki nou’nn ziz enn konpagnon Kretien? Nou bizin rapel ki nou bizin kontan nou bann frer ek ser. (Lir Zak 2:8.) Nou bizin osi priye Zeova ek sipliy Li pou ki nou pa ziz lezot. Pou ki nou azir an-akor avek nou lapriyer, nou kapav pas letan avek sa dimounn ki nou’nn kritike la. Koumsa, nou pou aprann konn li pli bien. Nou kapav invit li pou pres ansam avek nou, ouswa pou pran enn repa avek nou. Amezir ki nou aprann konn li pli bien, nou kapav swiv lexanp Zeova ek Zezi, kan nou rod bann zoli kalite ki li ena. Kan nou fer sa, nou montre ki nou pe ekout lord ki nou bon berze inn donn nou pou pa ziz lezot.

18. Kouma nou kapav montre ki nou pe ekout lavwa nou bon berze?

¹⁸ Parey kouma bann mouton ki ekout lavwa zot berze, bann disip Zezi ekout lavwa zot Met. Si nou fer zefor pou aret trakase pou bann kitsoz materyel ek pou pa ziz lezot, Zeova ek Zezi pou beni nou bann zefor. Ki nou form parti dan “ti troupo” ouswa dan bann “lezot mouton,” anou kontign ekout ek obeir lavwa nou bon berze. (Lik 12:32; Zan 10:11, 14, 16) Dan prosin lartik, nou pou get de kitsoz ki Zezi ti dir so bann disip zot bizin fer.