Zeova ti dir bann Izraelit ki zot bizin enn pep ki sin. Pou ed zot vinn sin, Li ti dir zot: “Fode pa to al partou-partou parmi to pep, pou koz an mal lor lezot. Fode pa to rod touy to prosin. Momem Zeova.”​—Lev. 19:2, 16.

Kan inn tradir sa verse-la, lexpresion “pa rod touy,” exprim bien lide sa lexpresion Ebre la. Me ki sa lexpresion-la vedir? Enn liv Zwif, ki koz lor liv Levitik, dir: “Sa fraz-la . . . bien difisil pou konpran, parski li difisil pou kone ki sa lexpresion Ebre la inplike. An realite, sa lexpresion-la vedir, ‘fode pa to lor, to res pre, akote.’”

Sertin exper panse ki sa fraz-la ena enn lien avek verse 15, ki dir : “Fode pa zot azir dan enn fason inzis kan zot pe zize. Fode pa to fer preferans ar bann pov ouswa montre preferans anver bann ris. To bizin ziz to konpagnon avek lazistis.” (Lev. 19:15) Dan sa ka-la, lord ki ena dan verse 16, setadir pou pa “rod touy” enn kikenn, vedir ki bann Izraelit ti bizin pa fer nanye ki inzis devan lakour, dan zot biznes, ek dan zot fami. Zot ti bizin osi pa fer nanye ki malonet pou zot prop lintere. Li vre ki fode pa nou fer sa bann kitsoz la, me ena enn fason pli lozik pou konpran sa lexpresion ki dan verse 16 la.

Anou examinn koumansman verse 16. Bondie ti donn so pep lord pou pa “koz an mal lor lezot.” Li vre ki, kan enn kikenn koz koze lezot, li kapav kree bann problem. Me kan enn kikenn dir bann foste lor lezot, sa pli pir ankor. (Prov. 10:19; Ekle. 10:12-14; 1 Tim. 5:11-15; Zak 3:6) Kan enn kikenn fer sa, souvan li koz manti pou gat repitasion enn lot dimounn. Li kapav mem fer bann fos temwaniaz lor enn lot dimounn, mem si sa dimounn-la kapav perdi lavi akoz sa. Pa bliye ki bann dimounn ti koz manti lor Nabot, ek akoz sa, lepep ti lapid li ek li ti mor. (1 Ler. 21:8-13) Alor, parey kouma deziem parti Levitik 19:16 mansione, enn kikenn kapav fer touy so prosin kan li dir bann foste lor li.

Anplis, enn dimounn kapav koz manti pou gat repitasion enn kikenn, parski li ena laenn pou li. 1 Zan 3:15 dir: “Seki air so frer ou so ser, li enn kriminel, e zot kone ki okenn kriminel pena lavi eternel dan li.” Apre ki Bondie ti dir, “Fode pa to rod touy to prosin,” Li ti osi dir, “Fode pa ki to ena laenn pou to frer dan to leker.”​—Lev. 19:17.

Levitik 19:16 donn enn konsey bien inportan pou bann Kretien. Nou bizin rezet bann move panse, ek fode zame nou dir bann foste lor lezot. Si nou “rod touy nou prosin,” setadir nou dir bann foste lor li parski nou pa kontan li ouswa nou zalou li, sa montre ki nou ena laenn pou li. Alor, li bien inportan ki bann Kretien rezet sa latitid-la.​—Mat. 12:36, 37.