1. Kouma Zeova souvan reponn lapriyer so bann serviter?

 ESKI to kone ki Zeova kapav servi twa pou reponn lapriyer enn kikenn? Tou dimounn kapav ede, ki to enn ansien, enn asistan ministeryel, enn pionie, ouswa enn proklamater. To kapav osi ede mem si to zenn ouswa vie, ouswa si to enn frer ouswa enn ser. Kan enn kikenn ki kontan Zeova demann Li so led, Zeova souvan servi bann ansien ouswa bann lezot frer ek ser pou vinn enn “konsolasion” pou sa dimounn-la. (Kol. 4:11) Se enn gran privilez ki Zeova servi nou pou ed nou bann frer ek ser! Nou kapav ed zot kan ena enn lepidemi, enn katastrof, ouswa kan zot gagn persekision.

2. Kan ena enn lepidemi, ki difikilte nou kapav gagne pou ed lezot?

² Nou kapav gagn difikilte pou ed lezot kan ena enn lepidemi ouswa enn pandemi. Par exanp, kitfwa nou pou anvi al get nou bann kamarad, me li pa pou pridan ki nou fer sa. Kitfwa nou pou anvi invit bann frer ek ser ki inpe mizer pou vinn manz enn manze kot nou, me sa osi li pa pou posib. Kitfwa nou pou anvi ed lezot, me sa pou bien difisil si noumem nou fami malad. Me malgre sa bann sitiasion-la, nou anvi ed nou bann frer ek ser, ek Zeova bien kontan kan nou fer tou seki nou kapav pou ed zot. (Prov. 3:27; 19:17) Me ki nou kapav fer pou ed zot?

3. Ki nou kapav aprann ar lexanp bann ansien dan lasanble Desi? (Zeremi 23:4)

³ Seki bann ansien kapav fer. Si to enn ansien, aprann konn to bann frer ek ser bien. (Lir Zeremi 23:4.) Desi, enn ser ki nou ti mansione dan lartik avan, dir: “Avan COVID, bann ansien ki dan mo group predikasion ti abitie pres ansam ar nou, ek nou ti osi organiz bann ti program ansam.” b  Gras-a bann zefor ki sa bann ansien-la ti fer, li ti pli fasil pou zot ed Desi pandan pandemi COVID-19. Anplis, sa ti osi permet zot pou ankouraz Desi kan sertin manb so fami ti mor akoz sa viris-la.

4. Kouma bann ansien ti reisi ed Desi, ek ki leson bann ansien kapav aprann?

⁴ Desi dir: “Parski mo ti deza kamarad ar bann ansien, li ti pli fasil pou mwa pou dir zot seki mo ti resanti ek pou dir zot mo bann traka.” Ki leson bann ansien kapav aprann? Ansien, to bizin pran swin to bann frer ek ser avan ki bann difikilte arive. To bizin vinn zot kamarad. Si akoz enn lepidemi to pa kapav al get zot, rod bann lezot fason pou kontakte zot. Desi dir: “Parfwa, plizir ansien ti telefonn mwa ouswa ti avoy mwa bann mesaz mem zour. Bann verse Labib ki zot ti partaz ar mwa ti bien ankouraz mwa, mem si mo ti deza konn sa bann verse-la.”

5. Kouma bann ansien kapav kone seki zot bann frer ek ser bizin, ek kouma zot kapav ed bann-la?

⁵ Pou to kone ki bann kitsoz to bann frer ek ser bizin, to kapav poz zot bann kestion. Me fode pa ki to bann kestion met zot malalez. (Prov. 20:5) Eski zot ena ase manze, medsinn, ouswa bann lezot kitsoz? Eski ena enn posibilite ki zot perdi zot travay, ouswa eski zot ena ase kas pou pey lakaz? Eski zot bizin ki nou ed zot pou gagn enn led ar gouvernman? Bann frer ek ser ti ed Desi ek zot ti donn li bann kitsoz materyel. Me seki ti plis ed li, se lamour ki bann ansien ti montre anver li ek bann lankourazman ki zot ti donn li. Desi dir: “Bann ansien ti priye pou mwa. Mo pa tro rapel seki zot ti dir. Selman, mo rapel seki mo ti resanti. Kan zot ti priye pou mwa, se koumadir Zeova ti pe dir mwa, ‘To pa tousel.’”​—Iza. 41:10, 13.

6. Kouma sakenn dan lasanble kapav ed lezot? (Get zimaz.)

⁶ Seki lezot kapav fer. Nou kone ki bann ansien bizin pran swin zot bann frer ek ser. Selman, Zeova anvi ki tou dimounn dan lasanble ankouraz ek ed zot kamarad. (Gal. 6:10) Mem si nou fer enn ti kitsoz pou enn kikenn ki malad, sa kapav ena enn gran lefe lor li. Par exanp, enn zanfan kapav fer enn ti desin ouswa enn ti kart pou ankouraz enn frer. Enn zenn kapav al laboutik pou enn ser ouswa al pran de-trwa ti komision pou li. Lezot kapav kwi enn ti manze pou enn kikenn ki malad ek al kit sa kot li. Kan ena enn lepidemi, li normal ki nou  tou dan lasanble nou bizin lankourazman. Alor, kitfwa nou kapav res inpe pli lontan apre renion, ki nou dan Lasal ouswa par video-konferans, pou ankouraz nou bann frer ek ser. Bann ansien osi bizin lankourazman. Sertin frer ek ser inn avoy bann ansien enn ti kart pou remersie zot, parski zot kone ki bann-la ti bien okipe pandan pandemi. Li bien inportan ki nou fer zefor pou kontign ‘ankouraz ek fortifie’ lezot!​—1 Tes. 5:11.

7. Ki difikilte nou kapav gagne kan ena enn katastrof?

⁷ Kan ena enn katastrof, nou lavi kapav sanze net. Nou kapav perdi nou bann dibien, nou lakaz, ek mem bann dimounn ki nou kontan. Bann kitsoz koumsa kapav ariv nou bann frer ek ser. Ki nou kapav fer pou ed zot?

8. Ki kitsoz bann ansien ek bann sef fami bizin fer avan ki ena enn katastrof?

⁸ Seki bann ansien kapav fer. Ansien, ed to bann frer ek ser pou prepar zot avan ki enn katastrof arive. Fer sir ki tou dimounn dan lasanble kone ki zot bizin kontakte bann ansien kan ena enn katastrof, ek ki zot kone osi seki zot bizin fer pou ki zot res an sekirite. Margaret, enn ser ki nou ti mansione dan lartik avan, dir: “Bann ansien ti fer enn bezwin pou nou lasanble, ek zot ti rapel nou ki ti ankor ena enn risk ki dife pran dan lafore pre kot nou reste. Zot ti dir nou ki, si nou santi nou an-danze, ouswa si bann lotorite dir nou kit nou lakaz, nou bizin degaze ale.” Bann frer ti fer sa size-la dan bon moman, parski sink semenn apre, enn gro dife ti pran dan lafore. Bann sef fami kapav prepar zot fami pou enn katastrof. Par exanp, pandan enn ladorasion an fami, zot kapav koz lor seki sak manb lafami kapav fer si ena enn katastrof. Lerla, sa pou ed twa ek to fami pou res kalm kan ena enn katastrof.

9. Ki kitsoz bann ansien bizin fer avan ek apre enn katastrof?

⁹ Si to enn responsab group, pa atann ki enn katastrof arive pou to fer sir ki to ena nimero telefonn ek ladres tou bann dimounn ki dan to group. To bizin ena enn lalis ek li bizin azour. Koumsa, kan enn katastrof arive, to pou kapav kontakte sak proklamater ki dan to group pou gete kisann-la ki bizin led. Kouma to fini gagn sa bann linformasion-la, kontakte kordinater komite bann ansien deswit, pou ki li kapav kontakte responsab sirkonskripsion. Kan sa bann frer-la travay ansam, zot plis kapav ed bann frer ek ser. Kan dife ti pran dan lafore kot Margaret ti pe reste, responsab sirkonskripsion pa ti dormi pandan apepre 36 er-tan. Li ti pe organiz travay bann ansien, ki ti bizin kontakte ek okip apepre 450 frer ek ser ki ti kit zot lakaz. (2 Kor. 11:27) Gras-a zot bon travay, sa bann frer ek ser-la ti reisi gagn enn plas pou reste.

10. Kifer li inportan ki bann ansien pran swin zot bann frer ek ser? (Zan 21:16)

¹⁰ Bann ansien ena responsabilite pou soutenir bann frer ek ser lor plan spiritiel ek emosionel. (1 Pier 5:2) Kan ena enn katastrof, zot bizin verifie ki sak frer ek ser an sekirite ek ki zot ena manze, linz, ek enn plas pou reste. Ek kitfwa pandan plizir mwa apre, zot pou bizin kontign soutenir sa bann frer ek ser-la lor plan spiritiel ek emosionel. (Lir Zan 21:16.) Harold, enn frer ki enn manb Komite Biro Nasional, inn zwenn plizir frer ek ser ki’nn soufer akoz enn katastrof. Li dir: “Sa bann frer ek ser-la bizin letan pou ki zot refer. Tigit-tigit zot kapav rekoumans santi zot bien. Me kan zot rapel bann kitsoz ki zot inn perdi, bann fami ek bann kamarad ki’nn mor, ouswa  bann difikilte ki zot inn gagne, sa kapav fer zot regagn bann santiman negatif. Selman, fode pa nou panse ki zot mank lafwa. Se enn santiman ki normal.”

11. Kouma bann ansien kapav ed bann fami?

¹¹ Bann ansien swiv konsey Labib ki dir “partaz lapenn avek bann ki dan lapenn.” (Rom. 12:15) Zot bizin rasir bann frer ek ser ki’nn pas par bann katastrof, ki Zeova ek zot bann frer ek ser ankor kontan zot. Bann ansien pou osi ed bann fami pou ki zot gard bann bon labitid spiritiel, kouma par exanp priye, etidie, asiste bann renion, ek prese. Bann ansien kapav osi ankouraz bann paran pou ki zot ed zot zanfan pou res konsantre lor bann kitsoz ki okenn katastrof pa kapav detrir. Paran, rapel zot bann zanfan ki Zeova pou touletan zot Kamarad ek ki Li pou touletan la pou zot. Ek rapel zot osi ki zot form parti enn fami internasional bann frer ek ser ki pou touletan la pou ed zot.​—1 Pier 2:17.

12. Kouma lezot kapav ede kan ena enn katastrof? (Get zimaz.)

¹² Seki lezot kapav fer. Si ena enn katastrof dan to landrwa, demann bann ansien kouma to kapav ede. Si sertin fami inn perdi zot lakaz, ouswa si bann volonter inn vinn ede, kitfwa to kapav donn zot enn plas pou reste. Kitfwa to kapav ed bann proklamater ki bizin led, donn zot inpe manze, ouswa bann lezot kitsoz ki zot bizin. Si ena enn katastrof dan enn lot landrwa, la osi to kapav ede. Kouma? To kapav priye pou bann ki pe soufer akoz sa sitiasion-la. (2 Kor. 1:8-11) To kapav osi fer enn donasion pou travay mondial nou lorganizasion. (2 Kor. 8:2-5) Si to kapav al ede dan enn landrwa kot ena enn katastrof, demann bann ansien seki to kapav fer pou ede. Lerla, si lorganizasion demann twa pou al ede, sirman to pou gagn enn formasion pou ki to kapav al ede.

13. Ki difikilte bann ansien gagne dan bann pei kot nou laktivite interdi?

¹³ Dan bann pei kot nou laktivite interdi, nou bann frer ek ser kitfwa gagn persekision, ek sa kapav rann zot lavi pli difisil ankor. Anplis, zot bizin osi fer fas ar bann problem ekonomik, ar maladi, ek ar lamor bann dimounn ki zot kontan. Ek akoz nou laktivite interdi, bann ansien kitfwa pa reisi al get sa bann frer ek ser-la kot zot. Si  bann ansien reisi kontakte zot, kitfwa zot pa kapav ankouraz sa bann frer ek ser-la kouma bizin parski kitfwa bann lotorite pe ekout zot. Anou get lexanp Andrei, enn frer ki nou ti mansione dan lartik avan. Enn ser dan so group predikasion ti pe gagn bann problem finans. Anplis, li ti osi fer enn aksidan loto. Li ti bizin fer plizir loperasion ek li pa ti kapav travay. Malgre pandemi ek linterdiksion ki ti ena dan zot pei, bann frer ti fer seki zot kapav pou ed li. Zeova ti trouv sitiasion sa ser-la ek Li ti motiv bann frer ek ser pou ed li.

14. Kouma bann ansien kapav montre ki zot kont lor Zeova?

¹⁴ Seki bann ansien kapav fer. Andrei ti priye Zeova ek li ti fer seki li ti kapav. Kouma Zeova ti reponn so lapriyer? Zeova ti motiv plizir frer ek ser dan lasanble ki ti ena plis posibilite pou ed nou ser. Sertin parmi zot ti amenn li so bann randevou kot dokter, ek lezot ti donn li enn ti kas. Zeova ti motiv zot pou ed nou ser, Li ti beni zot bann zefor, ek nou ser ti gagn tou seki li ti bizin. (Ebre 13:16) Ki leson bann ansien kapav aprann? Ansien, si arive ki demin nou laktivite interdi, rod led ar lezot. (Zer. 36:5, 6) Me pli inportan, kont lor Zeova. Li kapav ed twa pou to pran swin to bann frer ek ser.

15. Kouma nou kapav kontign gard nou linite kan nou gagn persekision?

¹⁵ Seki lezot kapav fer. Si nou laktivite interdi, kitfwa nou pou bizin reini ansam ar nou bann frer ek ser dan bann pli tipti group. Alor, li bien inportan ki nou viv anpe ar tou dimounn. Nou bizin lager kont Satan, pa kont sakenn nou kamarad. Pa konsantre lor erer to bann frer ek ser. Esey regle bann ti bizbiz ki to kapav ena ar lezot pli vit posib. (Prov. 19:11; Efe. 4:26) Fer to maximum pou ed lezot. (Tit 3:14) Kan bann frer ek ser dan group predikasion Andrei ti ed nou ser, sa ti ena enn bon lefe lor zot. Zot ti vinn pli pros; zot ti vinn enn fami.​—Ps. 133:1.

16. Dapre Kolosien 4:3, 18, kouma nou kapav ed nou bann frer ek ser ki pe gagn persekision?

¹⁶ Dan bann pei kot nou laktivite lor restriksion, bann milye frer ek ser pe kontign servi Zeova. Sertin parmi zot dan prizon akoz zot lafwa. Nou kapav priye pou zot ek pou zot fami. Nou kapav osi priye pou bann ki pe soutenir sa bann frer ek ser ki dan prizon la, mem si ena enn risk ki bann lotorite aret zot. Zot pe ankouraz sa bann  frer ek ser-la pou ki bann-la kontign fer Zeova konfians. Zot pe donn bann-la bann kitsoz ki zot bizin, ek zot pe defann bann-la devan lakour. c (Lir Kolosien 4:3, 18.) Fode zame nou bliye ki nou bann lapriyer kapav ed tou sa bann frer ek ser-la!​—2 Tes. 3:1, 2; 1 Tim. 2:1, 2.

17. Kouma to kapav prepar twa depi aster-la mem pou fer fas ar persekision?

¹⁷ Depi aster-la mem, twa ek to fami zot kapav fini koumans prepar zot pou fer fas ar persekision. (Zist. 14:22) Pa sey mazinn tou bann move kitsoz ki kapav ariv zot. Olie sa, fer zot lamitie avek Zeova vinn pli for ek ed zot bann zanfan osi pou fer sa. Ek si parfwa to santi twa strese kan to mazinn persekision, devid to leker ar Zeova. (Ps. 62:7, 8) Dan zot ladorasion an fami, koz lor tou bann rezon ki pous zot pou fer Zeova konfians. d Parey kouma sa pou ed to bann zanfan kan to prepar zot pou fer fas ar enn katastrof, sa pou ed zot osi kan to prepar zot pou fer fas ar persekision. Lerla, zot pou ena kouraz ek zot pou res kalm, parski to’nn ansegn zot pou fer Zeova konfians.

18. Ki pou arive dan lavenir?

¹⁸ Nou santi nou an sekirite kan nou ena lape Bondie. (Fil. 4:6, 7) Gras-a so lape, Zeova ed nou pou res kalm mem kan nou bizin fer fas ar bann lepidemi, bann katastrof, ek persekision. Zeova servi osi bann ansien pou pran nou swin. Ek Li donn sakenn parmi nou privilez pou ed nou kamarad. Biento, nou pou bizin fer fas ar bann pli gran leprev, kouma gran detres. (Mat. 24:21) Alor, depi aster-la mem, anou prepar nou pou fer fas ar sa bann leprev-la. Sa lepok-la, nou pou bizin gard nou lape ek ed lezot osi pou fer parey. Me apre gran detres, pou nepli ena okenn sitiasion difisil ki pou fer nou strese. Lerla, nou pou viv kouma Zeova ti touletan anvi ki nou viv, setadir nou pou parfe ek nou pou ena lape pou touletan.​—Iza. 26:3, 4.