Eski To’nn Pare pou “Erit Later”?
NOU tou nou pe atann ki promes Zezi realize. Li ti dir: “Bienere zot ki dou e ranpli avek imilite, zot pou erit later.” (Mat. 5:5) Bann ki ena lesperans pou viv dan lesiel pou erit later kan zot pou vinn lerwa ek zot pou regne dan lesiel ansam avek Zezi. (Rev. 5:10; 20:6) Me laplipar bann vre Kretien azordi pe atann pou viv pou touletan lor later. Zot pou vinn parfe, zot pou ere, ek zot pou viv dan lape. Pou ki tousala arive, zot pou ena bann travay bien inportan pou fer. Par exanp, zot pou ede pou fer later vinn enn paradi, zot pou fer sir ki bann ki pou regagn lavi dan Paradi ena tou seki zot bizin, ek zot pou ansegn bann-la. Reflesi seki to kapav fer depi aster-la mem pou montre ki to anvi fer sa bann kitsoz-la dan lemond nouvo.
ESKI TO’NN PARE POU FER LATER VINN ENN PARADI?
Kan Zeova ti donn bann imin lord pou “ranpli later ek ena kontrol lor li,” Li ti pe rod dir ki, avek letan, later ti pou vinn enn paradi. (Zen. 1:28) Bann ki pou viv pou touletan pou bizin obeir sa lord-la. Me selman, pa pou ena enn ti bout later ki deza enn paradi, parski zardin Edenn nepli existe. Zis apre Armagedon, nou pou ena boukou travay pou fer pou netway bann landrwa lor later kot ena boukou dega. Nou pou vremem ena boukou travay pou fer!
Sa fer nou rapel travay ki bann Izraelit ti bizin fer kan zot ti sorti Babilonn. Personn pa ti res dan zot pei pandan 70 an. Me Izai ti predir ki avek led Zeova, zot ti pou kapav refer sa pei-la vinn zoli. Sa profesi-la ti dir: “Li pou fer so dezer vinn kouma zardin Edenn ek so bann laplenn kot nanye pa pouse pou vinn kouma zardin Zeova.” (Iza. 51:3) Zeova ti ed bann Izraelit pou fer zot pei vinn bien zoli. Dan mem fason, Zeova pou ed bann ki pou erit later pou fer later vinn enn zoli paradi. Ek ena boukou kitsoz ki nou kapav fer depi aster-la mem pou montre ki nou anvi partisip dan sa travay-la.
To kapav fer sa kan to fer to maximum pou gard to lakaz ek to lakour prop ek an-ord. Ek to kapav fer sa mem si to bann vwazin pa prop ek an-ord. To kapav osi ede pou netway Lasal Renion ek Lasal Lasanble. Si to sitiasion permet twa, to kapav osi ranpli enn form pou ede kan ena bann katastrof. Lerla, to pou montre ki to anvi ed to bann frer ek ser. Demann tomem, ‘Eski depi aster-la mem mo kapav aprann fer bann ti travay ki mo pou kapav kontign fer si mo reisi rant dan Paradi?’
ESKI TO’NN PARE POU ED BANN RESISITE?
Deswit apre ki Zezi ti resisit tifi Zair, Zezi ti dir zot donn tifi-la enn kitsoz pou manze. (Mark 5:42, 43) Li pa ti enn kitsoz difisil pou fer pou pran swin sa tifi ki ti ena 12 an la. Me reflesi ki kantite travay nou pou ena pou fer kan Zezi pou realiz promes ki dir ki “tou dimoun ki dan tom pou tann so lavwa” ek “pou sorti dan tom.” (Zan 5:28, 29) Mem si Labib pa donn nou boukou detay lor la, nou kone ki bann resisite pou bizin led pou gagn manze, enn plas pou reste, ek linz pou zot mete. Depi aster-la mem, to kapav montre ki to’nn pare pou ede. Anou get sertin kitsoz ki to kapav fer.
Ki kitsoz to kapav fer azordi ki montre ki to’nn pare pou erit later?
Kan anonse ki responsab sirkonskripsion pe vinn vizit to lasanble, eski to donn to nom pou invit li pou manze? Kan enn Betelit so lafektasion sanze ek li vinn servi dan to teritwar, ouswa kan enn responsab sirkonskripsion aret so servis dan sirkonskripsion, eski to kapav ed zot pou rod enn plas kot zot kapav reste? Si ena enn lasanble rezional ouswa spesial ki pe fer dan to landrwa, eski to kapav donn to nom pou ede avan ouswa apre lasanble, ouswa pou akeyir bann delege?
ESKI TO’NN PARE POU ANSEGN BANN RESISITE?
Kan nou lir Zistwar Bann Zapot 24:15, nou konpran ki bann milyar dimounn pou resisite. Boukou parmi zot pa’nn gagn lokazion pou konn Zeova. Me kan zot pou resisite, zot pou kapav aprann konn Zeova. a Bann serviter Zeova ki fidel ek ki ena lexperyans pou ede pou ansegn sa bann dimounn-la. (Iza. 11:9) Charlotte, enn ser ki’nn prese dan Lerop, Lamerik Disid, ek dan Lafrik, pe vremem atann sa moman-la. Li dir: “Mo pe atann pou ansegn bann dimounn ki pou resisite. Kan mo lir lor enn dimounn ki’nn viv dan lepase, souvan mo dir ar momem: ‘Si sa dimounn-la ti konn Zeova, so lavi pa ti pou koumsa.’ Mo pe vremem atann pou koz lor Zeova ar bann dimounn ki pou resisite ek pou explik zot kouma zot lavi pou vinn meyer si zot servi Zeova.”
Mem bann serviter Zeova ki ti viv avan lepok Zezi pou ena boukou pou aprann. Reflesi lor lazwa ek privilez ki nou pou gagne pou explik Daniel kouma bann profesi ki li’nn ekrir inn realize. (Dan. 12:8) Nou pou osi gagn lokazion pou explik Rit ek Noemi ki Lemesi ti enn parmi zot bann desandan. Nou pou vremem kontan pou ansegn bann dimounn partou lor later, ek pa pou ena nanye ki pou anpes nou fer sa!
Ki to kapav fer depi aster-la mem pou montre ki to’nn pare pou ansegn bann resisite? To kapav fer to maximum pou vinn enn pli bon ansegnan ek pou prese regilierman. (Mat. 24:14) Kitfwa aster-la to pa pe kapav pres kantite ki to ti pou anvi, akoz to laz ouswa bann lezot rezon. Me kanmem sa, to kapav montre ki to vremem anvi ansegn bann ki pou resisite, kan to fer to maximum aster-la mem dan predikasion.
Li bon ki to reflesi lor sa bann kestion bien inportan-la: Eski mo vremem inpasian pou erit later? Eski mo vremem inpasian pou fer later vinn enn paradi, pou ed bann ki pou resisite ek ansegn zot? To kapav montre ki to’nn pare pou viv pou touletan lor later, kan to partisip dan bann travay ki parey kouma bann travay ki to pou fer kan to pou erit later!
a Get lartik “Amenn enn Kantite Dimounn ver Lazistis” dan Latour Degard Septam 2022.
