Non. Seki David ti ekrir ti vre ek exakt.

Anou gete seki David inn ekrir dan sa verse-la ek dan lezot verse: “Mo pou selebre to louanz toultan, sak zour mo pou onor mo promes.” “Mo pou sant to grander ar sinserite, O Segner [“Zeova,” NW] mo Bondie; mo pou glorifie to nom pou touzour.” “Mo pou sant to louanz aster, pli divan, toultan.”​—Ps. 61:8; 86:12; 145:1, 2.

Kan David ti ekrir sa bann parol-la, li pa ti panse ki zame li pa ti pou mor. Li ti kone ki rezilta pese, se lamor ek li ti rekonet ki li ti enn peser. (Zen. 3:3, 17-19; Ps. 51:4, 5) Li ti kone ki mem bann zom fidel kouma Abraam, Izaak, ek Zakob ti mor. Ek David ti kone ki li osi enn zour li ti pou mor. (Ps. 37:25; 39:4) Me seki li ti ekrir dan Psom 61:8 ti montre ki li ti vremem anvi loue Bondie pou touletan, setadir toutlong so lavi.​—2 Sam. 7:12.

David souvan ti ekrir lor so prop lexperyans, kouma nou trouve dan not ki ena lao dan Psom 18, 51, ek 52. Dan Psom 23, David dekrir Zeova kouma enn berze ki gid nou, ki donn nou kouraz, ek ki protez nou. David ti enn berze ki ti ena sa bann kalite-la, ek li ti anvi servi Zeova ‘toulezour so lavi.’​—Ps. 23:6.

Nou bizin rapel osi ki se Zeova ki’nn fer David ekrir sa bann parol-la. Li ti ekrir osi bann profesi ki ti pou realize dan lavenir. Par exanp, dan Psom 110, David koz lor lepok kot so Segner pou “asiz la, dan [Bondie so] kote drwat” dan lesiel, ek li pou gagn enn gran pouvwar. Lerla, li pou gagn laviktwar lor bann lennmi Bondie ek li pou “ziz bann nasion” lor later. David ti enn anset Lemesi, setadir sa kikenn ki ti pou dirize depi lesiel la ek ki ti pou vinn “pret pou touletan.” (Ps. 110:1-6) Zezi ti dir ki profesi ki trouv dan Psom 110 ti pe koz lor limem ek ki sa ti pou realize dan lavenir.​—Mat. 22:41-45.

Zeova ti gid David pou ekrir seki ti arive dan so lepok, ek osi dan lepok kot li ti pou resisite dan lavenir, kot li ti pou kapav loue Zeova pou touletan. Psom 37:10, 11, ek 29 inn realize dan lepok bann Izraelit, ek li pou realize dan lavenir kan Zeova pou realiz tou so bann promes.​—Get paragraf 8 dan lartik “To Pou Avek Mwa dan Paradi” dan sa Latour Degard-la.

Alor, Psom 61:8 ek bann lezot verse montre ki David ti anvi loue Zeova ziska ki li mor. Sa montre nou osi seki David pou fer dan lavenir kan Zeova pou resisit li.