1. Kan nou reflesi lor promes konsernan lavi eternel, ki lefe sa ena lor nou?

 ZEOVA promet ki bann ki obeir Li pou gagn “lavi eternel.” (Rom. 6:23) Kan nou reflesi lor sa promes-la, nou lamour pou Li vinn pli for. Reflesi lor la: Nou Papa telman kontan nou, ki Li donn nou sa kado-la pou ki zame nou pa al lwin ar Li.

2. Kouma promes pou viv pou touletan kapav ed nou?

² Promes pou viv pou touletan kapav ed nou pou andir nou bann difikilte. Ek mem si nou bann lennmi menas pou touy nou, nou pa pou aret servi Zeova. Kifer? Enn rezon se parski si nou mor fidel, nou kone ki Li pou resisit nou ek Li pou donn nou posibilite pou viv pou touletan. (Zan 5:28, 29; 1 Kor. 15:55-58; Ebre 2:15) Kifer nou sir ki nou kapav viv pou touletan? Anou get de-trwa rezon.

3. Kifer nou sir ki Zeova kapav fer nou viv pou touletan? (Psom 102:12, 24, 27)

³ Nou kone ki Zeova kapav fer nou viv pou touletan, parski Limem Lasours lavi ek Li viv pou touletan. (Ps. 36:9) Anou get de-trwa verse Labib ki montre nou ki Zeova inn touletan existe ek ki Li pou touletan existe. Psom 90:2 dir ki Zeova Li existe “depi touzour e pour touzour.” Psom 102 osi koz lor mem kitsoz. (Lir Psom 102:12, 24, 27.) Konsernan Zeova, profet Abakuk ti dir: “A! Zeova, eski to pa existe depi touletan? A! mo Bondie, twa ki Sin, to pa mor.”​—Abak. 1:12.

4. Eski nou bizin trakase si nou trouv sa difisil pou konpran ki Zeova inn touletan existe? Explike.

 ⁴ Eski to trouv sa difisil pou konpran ki Zeova inn “touletan” existe? (Iza. 40:28) Parey kouma twa, boukou dimounn trouv sa difisil pou konpran. Konsernan Bondie, Eliou ti dir: “Pa kapav kont kantite lane ki Li existe.” (Zob 36:26) Me se pa parski nou pa konpran enn kitsoz ki savedir ki li fos. Par exanp, mem si nou pa tro konpran kouma kouran ete, eski savedir ki kouran pa existe? Non, li existe! Dan mem fason, kitfwa zame nou pa pou konpran kouma Zeova inn touletan existe ek ki Li pou touletan existe. Me sa pa vedir ki Zeova pa kapav viv pou touletan. So lexistans pa depann lor seki nou konpran ek lor seki nou pa konpran. (Rom. 11:33-36) Zeova existe avan ki liniver, soley, ek bann zetwal existe. Nou sir ki Zeova “Limem sa Kikenn ki’nn kree later par so lafors.” Wi, Li existe avan mem “ki’nn etal lesiel.” (Zer. 51:15; Zist. 17:24) Anou get enn lot rezon kifer nou sir ki nou kapav viv pou touletan?

5. Ki posibilite Adan ek Ev ti ena?

⁵ Tou bann kitsoz vivan ki Zeova inn kree lor later, avek letan zot ti pou bizin mor. Parkont, Zeova pa’nn kree bann dimounn pou ki zot mor. Li’nn donn zis bann dimounn posibilite pou viv pou touletan. Selman, Zeova ti dir Adan: “Konsernan pie konesans bon ek move, fode pa ki to manz so frwi, parski zour ki to manz sa, vremem to pou mor.” (Zen. 2:17) Si Adan ek Ev ti obeir Zeova, zot pa ti pou mor. Anplis, li lozik pou panse ki, ariv enn moman, Zeova ti pou les zot manz frwi “pie lavi.” Lerla, zot ti pou sir ki zot ti pou “viv pou touletan.” b​—Zen. 3:22.

6-7. (a) Ki kitsoz ankor montre ki Zeova inn kree nou pou ki nou pa mor? (b) Dan lavenir, ki kitsoz to ti pou kontan fer? (Get zimaz.)

⁶ Depi ki enn dimounn ne ziska ki li mor, li kapav stok enn sertin kantite linformasion dan so servo. Selman, sertin siantis inn dekouver ki enn servo imin kapav stok boukou plis linformasion ki sa. An 2010, enn zournal ti explike ki nou servo kapav stok enn video ki dir anviron trwa milyon lertan,  savedir ki pou bizin plis ki 300 an pou get sa video-la. Ek li posib osi ki nou servo kapav stok pli boukou linformasion ki sa. Sa montre ki Zeova inn kree nou servo avek kapasite pou stok plis ki 70 ouswa 80 lane linformasion.​—Ps. 90:10.

⁷ Zeova inn osi kree nou avek enn gran dezir pou viv. Labib dir ki Bondie inn “met leternite dan leker bann dimounn.” (Ekle. 3:11) Se akoz sa ki nou konsider lamor kouma enn lennmi. (1 Kor. 15:26) Par exanp, si nou bien malad, nou pa pou zis atann ki nou mor. Nou pou al get enn dokter, ek kitfwa nou pou pran bann medsinn pou ki nou bien. Ofet, nou pou fer tou seki nou kapav pou ki nou pa mor. Ek kan enn kikenn ki nou kontan mor, ki li zenn ouswa vie, nou bien soufer! (Zan 11:32, 33) Li kler ki Zeova inn kree nou avek enn gran dezir pou viv. Li’nn osi donn nou kapasite pou stok boukou linformasion. Sa montre ki li ti dan proze Zeova ki nou viv pou touletan. Me ena lezot rezon ankor ki montre nou ki nou kapav viv pou touletan. Aster-la, anou gete seki Zeova inn fer dan lepase ek seki Li pe fer azordi, ki montre ki so proze pa’nn sanze.

8. Ki kitsoz Izai 55:11 ansegn nou lor proze ki Zeova ena pou nou?

⁸ Mem si Adan ek Ev inn fer pese, ek ki nou mor akoz zot, Zeova pa’nn sanz so proze. (Lir Izai 55:11.) Li touzour anvi ki bann dimounn fidel viv pou touletan. Nou konpran sa kan nou reflesi  lor bann kitsoz ki Zeova inn dir ek fer pou ki so proze realize.

9. Ki promes Bondie inn fer? (Daniel 12:2, 13)

⁹ Zeova inn promet ki Li pou resisit bann dimounn ki’nn mor, ek ki Li pou donn zot posibilite pou viv pou touletan. (Zist. 24:15; Tit 1:1, 2) Zob ti sir ki Zeova vremem anvi resisit bann ki’nn mor. (Zob 14:14, 15) Profet Daniel ti kone ki bann dimounn ti pou resisite ek ki zot ti pou kapav viv pou touletan. (Ps. 37:29; lir Daniel 12:2, 13.) Dan lepok Zezi, bann Zwif osi ti kone ki Zeova ti kapav donn so bann serviter ki fidel “lavi eternel.” (Lik 10:25; 18:18) Zezi plizir fwa ti koz lor sa promes-la. Anplis, Zezi limem ti fer sa lexperyans-la parski so Papa ti resisit li.​—Mat. 19:29; 22:31, 32; Lik 18:30; Zan 11:25.

10. Ki nou aprann ar bann rezireksion ki ti ena dan lepase? (Get zimaz.)

¹⁰ Zeova Li Lasours lavi, ek Li ena pouvwar pou resisit bann dimounn. Li ti donn profet Eli pouvwar pou resisit garson enn vev ki ti res Sarepta. (1 Ler. 17:21-23) Apre sa, gras-a led Bondie, profet Elize ti resisit garson enn Sounamit. (2 Ler. 4:18-20, 34-37) Sa bann rezireksion-la, ek lezot ankor, montre ki Zeova ena pouvwar pou redonn bann dimounn lavi. Kan li ti lor later, Zezi ti montre ki so Papa ti donn li sa pouvwar-la. (Zan 11:23-25, 43, 44) Aster-la, Zezi dan lesiel ek Zeova inn donn li “tou pouvwar dan lesiel ek lor later.” Alor, li kapav realiz promes pou resisit “tou dimoun ki dan tom” pou ki zot gagn posibilite pou viv pou touletan.​—Mat. 28:18; Zan 5:25-29.

11. Kouma laranson donn nou posibilite pou gagn lavi eternel?

¹¹ Kifer Zeova inn les so Garson ki Li bien kontan, soufer ek mor? Zezi explik nou rezon-la. Li dir: “Bondie finn telman kontan lemonn, ki li finn donn so Sel Garson pouki tou dimoun ki krwar dan Li, pa mor me gagn lavi eternel.” (Zan 3:16) Zeova inn donn so Garson kouma enn ranson pou ki nou kapav gagn pardon nou bann pese. Kan Li’nn fer sa, Li’nn donn nou posibilite pou gagn lavi eternel. (Mat. 20:28) Lapot Pol ti koz lor rol inportan ki laranson ena dan proze Bondie. Li ti dir: “Parey kouma lamor finn arive par enn zom, parey rezireksion finn arive par enn zom. Tou bann dimoun mor parski zot lie ar Adam; dan Lekris tou pou gagn lavi.”​—1 Kor. 15:21, 22.

12. Kouma Rwayom Bondie pou realiz proze ki Zeova ena pou nou?

¹² Zezi ti dir so bann disip priye pou ki Rwayom Bondie vini, ek ki Bondie so volonte fer lor later. (Mat. 6:9, 10) Bondie anvi ki bann dimounn viv pou touletan lor later. Se pou sa rezon-la ki Zeova inn etabli so Garson kouma Lerwa dan Rwayom Bondie. Li’nn osi rasanble 144,000 dimounn depi lor later, pou ki zot travay ansam avek Zezi pou realiz So volonte.​—Rev. 5:9, 10.

13. Ki Zeova pe fer azordi, ek kouma sa konsern twa?

¹³ Azordi, Zeova pe rasanble “enn gran lafoul” dimounn. Li pe form zot pou ki zot vinn bann sitwayen Rwayom Bondie. (Rev. 7:9, 10; Zak 2:8) Mem si ena divizion parmi bann dimounn azordi akoz laenn ek lager ki ena dan sa  lemond-la, sa gran lafoul-la pe fer zefor pou tir tou laenn ki ena dan zot leker. Par zot bann aksion, zot montre ki zot pe fer zot “lepe vinn bann zouti pou travay later.” (Mish. 4:3) Olie ki zot partisip dan bann lager, zot ed bann dimounn pou gagn “vre lavi.” Zot fer sa kan zot ed sa bann dimounn-la pou aprann konn vre Bondie ek so proze. (1 Tim. 6:19) Akoz zot pe soutenir Rwayom Bondie, kitfwa zot pena ase kas pou viv, ouswa kitfwa zot fami pe vir kont zot. Selman, Zeova pe fer sir ki zot gagn seki zot bizin. (Mat. 6:25, 30-33; Lik 18:29, 30) Tousala montre ki Rwayom Bondie li enn realite, ek ki li pou kontign realiz proze Bondie.

14-15. Kouma lamor pou detrir?

¹⁴ Aster-la, Zezi Lerwa dan Rwayom Bondie, ek li pou realiz tou bann promes ki Zeova inn fer. (2 Kor. 1:20) Depi 1914, Zezi inn koumans gagn laviktwar lor so bann lennmi. (Ps. 110:1, 2) Ek biento, Zezi ek bann 144,000 pou gagn enn viktwar total lor zot bann lennmi, ek zot pou detrir tou bann move dimounn.​—Rev. 6:2.

¹⁵ Pandan Regn Mil An Zezi Kris, bann mor pou resisite, ek bann dimounn  ki obeir Zeova pou vinn parfe. Apre leprev final, bann dimounn ki Zeova konsider kouma zis “pou posed later e viv lor la pou toultan.” (Ps. 37:10, 11, 29) Lerla, “dernie lennmi ki pou detrir, se lamor.”​—1 Kor. 15:26.

16. Kifer nou servi Zeova?

¹⁶ Dan sa lartik-la, nou’nn trouve ki nou lesperans pou viv pou touletan li sorti dan Parol Bondie. Sa lesperans-la kapav ed nou pou res fidel malgre bann difikilte ki nou gagne dan bann dernie zour. Selman, fode pa nou fer Zeova plezir zis parski nou pa anvi mor. Rezon pli inportan kifer nou bizin res fidel ar Zeova ek Zezi, se parski nou vremem kontan zot. (2 Kor. 5:14, 15) Lerla, sa lamour-la pou motiv nou pou imit zot ek pou partaz nou lesperans ar lezot. (Rom. 10:13-15) Kan nou vinn bann dimounn ki zenere ek ki pa egois, Zeova pou anvi vinn nou kamarad pou touletan.​—Ebre 13:16.

17. Ki kitsoz sakenn parmi nou bizin fer? (Matie 7:13, 14)

¹⁷ Eski nou pou parmi bann dimounn ki pou viv pou touletan? Zeova inn donn nou sa posibilite-la. Aster-la, se nou ki bizin fer nou best pou nou res lor sime lavi. (Lir Matie 7:13, 14, NW. c) Kouma lavi pou ete kan nou pou viv pou touletan? Nou pou reponn sa kestion-la dan prosin lartik.