1. Avan ki Zezi mor, ki li ti dir sa bandi ki ti akote li la? (Lik 23:39-43)

 ZEZI ek sa de bandi ki ti akote li lor poto la, ti pe bien soufer. (Lik 23:32, 33, NW) Toulede bandi ti maltret Zezi. Sa montre ki zot pa ti so bann disip. (Mat. 27:44; Mark 15:32, NW) Me ariv enn moman, enn parmi zot ti sanz so latitid. Li ti dir: “Zezi, pa bliye mwa kan to rant dan to Rwayom.” Lerla, Zezi ti reponn li: “Vremem mo dir twa zordi, to pou avek mwa dan Paradi.” (Lir Lik 23:39-43, NW. b) Nou pa kone si bandi-la ti aksepte mesaz konsernan “Rwayom Bondie” ki Zezi ti prese kan li ti lor later. Ek Zezi zame pa’nn dir ki sa zom-la ti pou rant dan Rwayom Bondie. (Mat. 4:17) Alor, nou konpran ki Zezi ti pe koz lor paradi ki pou ena lor later. Kifer nou dir sa?

2. Kifer nou panse ki sa bandi ki ti repanti la ti enn Zwif?

² Sa bandi ki ti repanti la, kitfwa ti enn Zwif. Li ti dir lot bandi-la: “Eski to pena okenn respe pou Bondie, alor ki to’si to pe gagn mem zizman?” (Lik 23:40, NW) Bann Zwif ti ador enn sel Bondie, me bann dimounn dan lezot nasion ti krwar dan plizir bondie. (Ex. 20:2, 3; 1 Kor. 8:5, 6) Si sa de bandi-la ti sorti dan bann lezot nasion, kitfwa kestion-la ti pou koumsa: “Eski to pena okenn respe pou bann bondie?” Anplis, Bondie ti avoy Zezi “zis pou bann brebi perdi pep Izrael,” pa pou bann lezot nasion. (Mat. 15:24) Bondie ti fer bann Izraelit konpran ki Li ti pou resisit bann mor. Kitfwa sa bandi-la ti konn sa, ek par  seki li ti dir Zezi, kitfwa li ti panse ki Zeova ti pou resisit Zezi pou ki li regne dan Rwayom Bondie. Sirman li ti panse ki Bondie ti pou resisit li osi.

3. Kan Zezi ti koz lor Paradi, ki kitsoz kitfwa bandi-la ti konpran? Explike. (Zenez 2:15)

³ Si bandi-la ti enn Zwif, sirman li ti bizin konn zistwar Adan ek Ev, ek Paradi kot Zeova ti met zot. Alor, kan Zezi ti koz lor Paradi, kitfwa bandi-la ti konpran ki Zezi ti pe koz lor enn zoli zardin ki ti pou lor later.​—Lir Zenez 2:15.

4. Bann parol ki Zezi ti dir sa bandi-la bizin motiv nou pou fer ki kitsoz?

⁴ Bann parol ki Zezi ti dir sa bandi-la bizin motiv nou pou reflesi lor kouma lavi pou ete dan Paradi. Ofet, nou kapav aprann boukou kitsoz lor Paradi kan nou examinn regn Lerwa Salomon. Me Labib dir ki Zezi pli gran ki Lerwa Salomon. Alor, nou kapav sir ki Zezi, ansam avek bann ki pou regn avek li, pou fer later vinn enn zoli paradi. (Mat. 12:42) Nou konpran kifer bann “lezot mouton” bizin fer zefor pou aprann seki zot bizin fer pou ki zot kapav viv pou touletan dan Paradi.​—Zan 10:16.

5. Kouma to panse lavi pou ete dan Paradi?

⁵ Kouma to panse lavi pou ete dan Paradi? Kitfwa to mazinn enn zoli zardin, parey kouma zardin Edenn. (Zen. 2:7-9) Sirman to rapel profesi Mishe ki dir ki pep Bondie “pou asiz anba so pie rezin ek anba so pie fig.” (Mish. 4:3, 4) Kitfwa to mazinn lezot verse Labib osi, ki dir ki pou ena enn kantite manze lor later. (Ps. 72:16; Iza. 65:21, 22) Alor, kitfwa to pe mazinn twa dan sa zoli zardin-la pe asize atab devan enn kantite bon manze. To pe respir enn ler fre, ek to pe santi parfin bann plant ek bann fler. To pe tann to fami ek to bann kamarad, parmi ena bann ki’nn resisite, pe riye ek zot pe pas bann bon moman ansam. Tousala pa enn rev! Nou sir ki sa pou arive lor later! Dan Paradi, nou pou kapav osi fer bann travay ki pou fer nou gagn lazwa.

6. Ki nou pou fer dan Paradi? (Get zimaz.)

⁶ Zeova inn kree nou avek kapasite pou gagn lazwa dan nou travay. (Ekle. 2:24) Nou pou ena boukou travay pou fer pandan Regn Mil An Zezi Kris. Bann ki pou travers Armagedon ek bann milyon dimounn ki pou resisite pou bizin linz, manze, ek enn plas pou reste. Pou organiz tousala, nou pou ena boukou travay pou fer. Me sa bann travay-la pou fer nou gagn boukou lazwa. Parey kouma Adan ek Ev ki ti bizin fer later vinn enn paradi, nou osi nou pou gagn privilez  pou fer later vinn enn paradi. Mazine ki kantite lazwa nou pou gagne pou ansegn bann milyon dimounn ki pou resisite! Nou pou ed zot pou aprann konn Zeova ek so proze. Nou pou osi ed bann serviter Zeova ki’nn viv avan lepok Zezi, pou aprann seki’nn arive apre zot lamor.

7. Ki kitsoz nou kapav sir, ek kifer?

⁷ Kan nou pou dan Paradi, nou kapav sir ki nou pou viv anpe, nou pou ena tou seki nou bizin, ek nou pou bien organize. Kifer? Parski Zeova inn deza donn nou enn ti lide kouma lavi pou ete kan so Garson pou regne. Nou kapav trouv sa kan nou examinn regn Lerwa Salomon.

8. Kouma bann parol ki ena dan Psom 37:10, 11, ek 29 inn realize apre ki Lerwa David inn ekrir zot? (Get “Kestion Bann Lekter” dan sa Latour Degard-la.)

⁸ Bondie ti fer Lerwa David ekrir kouma lavi ti pou ete dan lavenir kan enn lerwa ki fidel ek ki ena sazes ti pou regne. (Lir Psom 37:10, 11, 29.) Souvan, nou lir Psom 37:11 ar lezot dimounn kan nou koz lor Paradi. Nou ena bann bon rezon pou fer sa, parski Zezi ti servi sa verse-la dan so Sermon lor Montagn pou montre ki sa pou realize dan lavenir. (Mat. 5:5) Me seki David ti ekrir, ti montre osi kouma lavi ti pou ete kan Salomon ti pou regne. Kan Salomon ti regn lor Izrael, pep Bondie ti pe viv dan lape, ek zot pa ti mank nanye. Zot ti pe viv dan “enn pei kot dile ek dimiel koule.” Bondie ti dir: “Si zot kontign swiv mo bann lalwa . . . , mo pou met lape dan sa pei-la, ek zot pou dormi san ki personn fer zot per.” (Lev. 20:24; 26:3, 6) Sa bann promes-la ti realize kan Salomon ti vinn lerwa dan Izrael. (1 Kro. 22:9; 29:26-28) Zeova ti promet osi ki bann move dimounn ki ti ador bann lezot bondie ti “pou disparet.” (Ps. 37:10) Alor, seki nou lir dan Psom 37:10, 11, ek 29 inn realize dan lepase ek li pou osi realize dan lavenir.

9. Ki kitsoz larenn Saba ti dir konsernan regn Lerwa Salomon?

⁹ Pandan regn Salomon, Larenn Saba  ti tann dir ki pep Izrael ti pe viv dan lape ek ki zot pa ti mank nanye. Li ti vwayaz enn long distans pou vinn Zerizalem, pou ki li kapav trouv sa par limem. (1 Ler. 10:1) Apre ki li ti examinn rwayom Salomon, li ti dir: “Mem lamwatie ladan zot pa’nn dir mwa. . . . To bann zom ere, ek to bann serviter zot ere, zot ki pe debout touletan devan twa, ek ki ekout to sazes!” (1 Ler. 10:6-8) Me lavi ki lepep ti pe viv kan Salomon ti pe regne, se zis enn ti lide seki Zeova pou fer kan So Garson, Zezi, pou regne.

10. Dan ki fason Zezi boukou pli siperyer ki Salomon?

¹⁰ Zezi boukou pli siperyer ki Salomon dan ninport ki domenn. Salomon ti enn zom inparfe, ek li ti fer boukou erer bien grav ki ti fer pep Bondie soufer. Parkont, Zezi li enn Dirizan parfe ek li pa fer okenn erer. (Lik 1:32; Ebre 4:14, 15) Mem si Satan ti fer Zezi pas par bann leprev bien difisil, Zezi ti res fidel ar Zeova. Zezi inn montre ki zame li pou fer pese, ek ki zame li pou fer enn kitsoz ki pou fer lezot soufer. Limem meyer lerwa ki nou kapav ena!

11. Kisann-la pou regne ansam avek Zezi?

¹¹ Zezi ek bann 144,000 ki pou regne ansam avek li, pou pran swin bann dimounn lor later, ek zot pou realiz proze Zeova. (Rev. 14:1-3) Sa bann 144,000-la inn konn boukou leprev ek difikilte kan zot ti pe viv lor later. Alor, zot pou konpran bann ki pou viv lor later. Ki travay bann 144,000 pou fer?

12. Ki travay Zeova pou donn bann 144,000?

¹² Zezi ek bann 144,000 pou ena boukou plis travay pou fer ki Salomon. Lerwa Salomon ti pran swin bann dimounn ki ti pe res zis dan enn sel pei. Parkont, bann ki pou regne dan Rwayom Bondie pou ede pou pran swin bann milyar dimounn ki pou res partou lor later. Zeova inn vremem donn bann 144,000 enn gran loner!

13. Ki travay spesial bann ki pou regn ansam avek Zezi pou ena?

¹³ Parey kouma Zezi, bann 144,000 pou vinn bann lerwa ek bann pret. (Rev. 5:10) Kan bann Izraelit ti anba Lalwa Moiz, bann pret ti ed lepep pou ki zot ena enn bon lasante ek pou ki zot res pros ar Zeova. Lalwa ti “enn lonbraz bann vre kitsoz, ouswa bann bon kitsoz ki pou vini.” Alor, nou konpran ki bann ki pou regn ansam avek Zezi, zot pou ed pep Bondie pou ki zot ena enn bon lasante ek pou ki zot res pros ar Zeova. (Ebre 10:1) Nou pa kone dan ki fason bann 144,000 pou koz avek bann ki pou res lor later. Me nou sir ki, ninport ki dispozision ki Zeova pou pran dan Paradi, bann ki pou res lor later pou gagn bann instriksion ki zot bizin.​—Rev. 21:3, 4.

14. Ki lien ena ant bann “lezot mouton” ek “ti troupo”?

¹⁴ Zezi ti apel bann ki pou regn ansam avek li, “ti troupo.” (Lik 12:32) Li ti koz lor enn deziem group osi, ek li ti apel zot, “lezot mouton.” Sa de group-la, zot enn sel troupo. (Zan 10:16) Azordi, zot pe travay ansam, ek zot pou kontign travay ansam kan later pou vinn enn paradi. Sa lepok-la, bann ki form parti dan bann “ti troupo” pou dan lesiel, ek bann “lezot mouton” pou ena posibilite pou  viv pou touletan lor later. Me ena sertin kitsoz ki bann “lezot mouton” bizin fer depi aster-la mem pou zot kapav viv dan Paradi.

15. (a) Kouma eski bann “lezot mouton” pe travay ansam avek bann 144,000? (b) Kouma to kapav imit lexanp sa frer ki dan farmasi la? (Get zimaz.)

¹⁵ Bandi ki ti repanti la, ti mor avan ki li ti gagn lokazion pou montre so rekonesans pou seki Zezi ti fer pou li. Parkont, nou ki form parti bann “lezot mouton,” nou ena boukou lokazion pou montre Zezi seki nou resanti pou li. Par exanp, nou montre ki nou kontan Zezi dan fason ki nou tret bann 144,000. Zezi ti dir ki li pou ziz bann mouton dapre fason ki zot pou tret bann 144,000. (Mat. 25:31-40) Nou montre ki nou soutenir zot kan nou fer nou best pou prese ek ansegn bann dimounn. (Mat. 28:18-20) Akoz sa, nou anvi fer zefor pou servi bien bann zouti ki nou ena pou etidie Labib, kouma par exanp liv Viv Ere pou Touletan! Si to pankor koumans enn letid Labib avek enn kikenn, eski to kapav fixe lobzektif pou propoz enn letid Labib ar maximum dimounn ki to kapav?

16. Ki nou bizin fer depi aster-la mem pou prepar nou pou viv dan Paradi?

¹⁶ Nou pa bizin atann pou rant dan Paradi pou nou vinn sa kalite dimounn ki Zeova anvi nou vini la. Depi aster-la mem, nou bizin fer zefor pou ki nou vinn enn kikenn ki rezonab, ek nou bizin onet dan tou seki nou dir ek fer. Nou bizin osi res fidel ar Zeova, ar nou konzwin, ek ar nou bann frer ek ser. Si depi aster-la mem nou obeir Zeova dan sa move lemond-la, li pou pli fasil pou nou obeir Li dan Paradi. Nou kapav osi devlop bann kapasite ek bann kalite ki montre ki nou pe prepar nou pou viv dan Paradi. Get lartik “Eski To’nn Pare pou ‘Erit Later’?” ki ena dan sa Latour Degard-la.

17. Eski nou bizin santi nou koupab akoz bann pese ki nou’nn fer dan lepase? Explike.

¹⁷ Nou bizin osi fer zefor pou aret santi nou koupab akoz bann pese grav ki nou’nn fer dan lepase. Biensir, fode pa nou panse ki nou kapav “persiste dan  pese” ek demann pardon, zis parski Zezi inn fini donn so lavi pou nou. (Ebre 10:26-31) Si nou’nn fer enn pese grav, nou kapav sir ki si nou vremem repanti, nou rod led Zeova avek bann ansien, ek nou sanz nou kondwit, Zeova pou pardonn nou net. (Iza. 55:7; Zist. 3:19) Rapel seki Zezi ti dir bann Farizien: “Mo pa finn vini pou apel bann zis me bann peser.” (Mat. 9:13) Wi, nou kapav gagn pardon tou nou bann pese gras-a sakrifis Zezi!

18. Ki to ti pou kontan demann sa bandi ki ti mor akote Zezi la?

¹⁸ Sey mazinn twa dan Paradi pe koz ar sa bandi ki ti koz avek Zezi la. Nou sir ki zot toulede pou ena boukou rekonesans pou sakrifis Zezi. Kitfwa to pou anvi demann li seki’nn pase dan bann dernie lertan ki Zezi ti viv lor later, ek lor seki li’nn resanti kan Zezi inn reponn li. Ouswa, kitfwa li pou anvi demann twa kouma lavi ti ete pandan bann dernie zour. Sa pou enn gran loner pou etidie Labib avek bann dimounn kouma sa zom-la!​—Efe. 4:22-24.

19. Kifer nou pa pou plin dan Paradi? (Get zimaz lor kouvertir.)

¹⁹ Zame nou pou plin dan Paradi. Nou pou fer konesans bann dimounn ki ti viv dan diferan lepok, ek nou pou fer bann travay ki pou fer nou gagn lazwa. Me pli inportan, sak zour nou pou aprann konn nou Papa pli bien, ek nou pou profit bann bon kitsoz ki Li pou donn nou. Nou pou touletan ena boukou kitsoz pou aprann lor Li ek lor so kreasion. Plis letan pase, plis nou lamour pou Zeova pou ogmante. Nou vremem rekonesan ki Zeova ek Zezi inn promet nou ki nou pou kapav viv pou touletan dan Paradi!